Sunday, October 3, 2010

မှော်အိမ်မက်တွေထဲမှာ မသိစိတ်ကို လိုက်မျှားသူ

Kafka on the Shore အကြောင်းကိုတော့ ဒီနေရာမှာ ပြောပြခဲ့ပြီး ဖြစ်ပါတယ်။ ဟာရူကီ မူရာကာမိရဲ့ အရေးအသားတွေ အတွေးအခေါ်တွေက တကယ့်ကို ထူးခြားဆန်းသစ်ပြီး ဆွဲဆောင်အားကောင်းလှတယ်။ နှစ်သက်မိတဲ့ သူ့ရဲ့ တခြားဝတ္ထုတွေအကြောင်း ဆက်ပြောချင်ပါတယ်။ မပြောခင် မူရာကာမိဟာ စာရေးသားခြင်းကို ဘယ်လိုစီမံခန့်ခွဲသလဲ ဆိုတဲ့အကြောင်းကို အရင် ဝေမျှချင်ပါသေးတယ်။

ပုံ ဒီက


မူရာကာမိ က ၀တ္ထုရှည်(novel) နဲ့ ၀တ္ထုတို (short story)တွေကို တစ်လှည့်စီ ရေးလေ့ရှိတယ်လို့ ဆိုပါတယ်။ Blind Willow, Sleeping Woman ၀တ္ထုတိုပေါင်းချုပ်စာအုပ်ရဲ့ အမှာစာမှာ သူက ပြောထားခဲ့တယ်။ အရှင်းဆုံးပြောပြရရင် ၀တ္ထုရှည် တွေကိုရေးရတာ စိန်ခေါ်မှုတစ်ခုဖြစ်ပြီး ၀တ္ထုတို ရေးရတာကတော့ ပျော်ရွှင်မှုပါတဲ့။ ၀တ္ထုရှည်ရေးရတာက တောအုပ်ကို စိုက်ပျိုးရသလိုဆိုရင် ၀တ္ထုတိုကျတော့ ဥယျာဉ်ကို စိုက်ပျိုးရသလိုပါပဲလို့ သူက ဥပမာပေးထားပါတယ်။ အဲဒီဖြစ်စဉ်နှစ်ခုကလည်း တစ်ခုကိုတစ်ခု အပြန်အလှန် ဖြည့်စွက်ပေးနေပြီး နှစ်မျိုးလုံးကို သူ တန်ဖိုးထားပါတယ်တဲ့။ တောအုပ်စိမ်းထဲမှာ လူတွေကို အရိပ်ပေးတဲ့ အပင်တွေနဲ့ ပင်ခြေမှာ ရော်ရွက်ဝါခြောက်တွေနဲ့ သစ်ရွက်တွေကြား ဖြတ်တိုက်လာတဲ့ လေနုအေးနဲ့ တန်ဆာဆင်ထားသလို ပန်းဥယျာဉ်ထဲမှာကျတော့လည်း ပန်းပွင့်တွေ ပျားပိတုန်းတွေနဲ့ ရာသီအပြောင်းကို ဖော်ကျုးပြီး တစ်မျိုး တင့်တယ်နေပြန်တယ်။

မူရာကာမိရဲ့စတိုင်က ၀တ္ထုရှည် ခရီးရှည်ကြီးတစ်ခု ပြီးသွားတိုင်းမှာ ခဏနားတဲ့အနေနဲ့ ၀တ္ထုအတိုတချို့ ရေးပါတယ် တဲ့။ ၀တ္ထုရှည်ရေးနေချိန်မှာ ၀တ္ထုတိုတွေကို ဘယ်တော့မှ ကြားဖောက်မရေးဘူး။ အဲဒီလိုပဲ ၀တ္ထုတိုတွေ ရေးနေချိန်မှာလည်း အတိုတွေကိုပဲ ဆက်တိုက်ရေးသွားတယ် အရှည်ဘက်ကို ဦးမလှည့်ပါဘူး တဲ့။ ၀တ္ထုရှည်နဲ့ ၀တ္ထုတို ရေးတဲ့အခါ လှုပ်ရှားရတဲ့ ဦးနှောက်ရဲ့ လုပ်ဆောင်မှုတွေဟာ မတူပါဘူး တဲ့။ တခါတလေကျတော့ တစ်ဖက်ကနေ တစ်ဖက်ကို ချန်နယ် အကူးအပြောင်းအတွက် အချိန်နည်းနည်း ယူရပါတယ် တဲ့။

တခါတလေကျတော့ သူ့ရဲ့ ၀တ္ထုတိုတွေဟာ ၀တ္ထုရှည်တွေ ရေးဖို့အတွက် ပုံစံငယ် (prototype) လေးတွေ ဖြစ်နေပြန်သတဲ့။ တကယ်ပါပဲ။ သူ့ရဲ့ ၀တ္ထုတိုတချို့မှာ ၀တ္ထုရှည်ထဲက နိဒါန်းလေးဖြစ်ဖြစ် အိုင်ဒီယာလေးဖြစ်ဖြစ် ထင်ဟပ်နေတာတွေ သတိထားမိတယ်။ ဥပမာတစ်ခု ပြောရရင် Blind Willow, Sleeping Woman ထဲမှာပါတဲ့ Firefly ဆိုတဲ့ ၀တ္ထုတိုလေးဟာ သူ့ရဲ့ နာမည်ကျော် Norwegian Wood အငယ်စားလေးလို ဖြစ်နေတာကို ဖတ်မိပါတယ်။

ဝတ္ထုတိုလေးတွေကို ရေးတဲ့အခါမှာ ပျော်စရာကောင်းတဲ့ အချက်တစ်ချက်ကတော့ မြန်မြန်ပြီးတာရယ် အသေးစိတ်လေးတွေကို အနုစိတ် ခြယ်မှုန်းနိုင်တာရယ်ပါ လို့ သူက ဆိုပါသေးတယ်။ သူက တစ်ပတ်လောက် အချိန်ယူရေးရင် တော်ရုံအရည်အသွေးနဲ့ ၀တ္ထုတိုတစ်ပုဒ် အကြမ်းရပြီတဲ့။ နောက်မှတော့ ထပ်ခါထပ်ခါ ပြင်တာပေါ့လေ။ ၀တ္ထုရှည်ကတော့ စိတ်ရောကိုယ်ပါ ပုံအပ် နှစ်မြုပ်ပြီး တစ်နှစ်-နှစ်နှစ်လောက် ချီတက်ရေးသားရတဲ့ မာရသွန်ခရီးရှည်ပါပဲ တဲ့။ ဒါကြောင့် သူက ၀တ္ထုတိုတွေရေးခြင်းဟာ ၀တ္ထုရှည်တွေကြားမှာ ခဏခြားပေးထားတဲ့ လိုအပ်တဲ့ အပြောင်းအလဲလို့လည်း မြင်ပါတယ်တဲ့။

မူရာကာမိရဲ့ အရေးအသားတွေကို မြန်မာပြန် ပုံနှိပ်ထုတ်ဝေထားတာ ရှိမရှိ မသိပါဘူး။ Blind Willow, Sleeping Woman ထဲမှာပဲ ဖတ်ခဲ့ရတဲ့ Ice Man ဆိုတဲ့ ၀တ္ထုတိုလေးကိုတော့ The New Yorker မှာ ဖော်ပြခဲ့တဲ့ လင့်ခ်ကို အင်တာနက်ထဲမှာ ရှာတွေ့တာနဲ့ တေဇာ (လရောင်လမ်း) ကို ပေးပြီး ဘာသာပြန်ဖို့ တိုက်တွန်းခဲ့ပါသေးတယ်။ မြည်းစမ်းချင်ရင် ဒီနေရာမှာ ဖတ်ကြည့်လို့ရပါတယ်။


(စိတ်ဝင်စားကြရင် သူ့ဝတ္ထုတွေအကြောင်း မှတ်စုတွေကို မြန်မြန်ဆက်ရေးပါမယ်။ ဒါမှမဟုတ်ရင်တော့ ဖြည်းဖြည်းဆက်ပါမယ်။း))

ပန်ဒိုရာ

12 comments:

ယောနက်သန် said...

စိတ်ဝင်စားပါတယ်။ နောက်ရေးမယ့် မှတ်စုတွေကို မျှော်နေပါတယ်။

TNS said...

ပန်ဒိုရေ..
ဘာသာပြန်လေးကိုဖတ်ချင်မိပါတယ်..။

မိုးယံ said...

နောက်ရေးမယ့် စာတွေ လဲ လာဖတ်ပါဦးမည်။

Eccentric Ghost said...

ဘာသာပြန် ဖတ်ချင်ပါတယ်။ အားပေးလျက်ပါ။

မောင်လေး said...

စိတ်ဝင်စားပါတယ်ခင်ဗျ...။အချိန်မရရင်တော့ အေးဆေး
ပေါ့ခင်ဗျာ...။

Rita said...

ကျွန်မ စိတ်ဝင်စားဖို့ မီတဲ့ စာအမျိုးအစားလို့တော့ မထင်ဘူး။ ဒါပေမဲ့ မပန်ရေးတာတွေကိုတော့ စိတ်ဝင်တစားလာဖတ်မိတယ်။ အဲဒီစာပေမျိုးဆို သူများက တဆင့်ပြန်ပြောမှ နားလည်လို့။ စိတ်ဝင်စားနိုင်လို့။

မောင်မျိုး said...

သူ့အကြောင်းနဲ့ သူရဲ့ စာတွေက စိတ်ဝင်စားစရာကောင်းမှာ Kafka အကြောင်းတုန်းက စာထုတ်ပြီး ဖတ်ထားတာ ဒီစာရေးဆရာမှန်းမသိလို့ ညဏ်မကောင်းပုံများ ခု သွားပြန်ဖတ်ရတာ မြန်မြန်ရေးပါ ဖတ်ချင်သေးတယ် အထူးသဖြင့် ကြောင် အကြောင်းပေါ့း) ကိုယ်ဖတ်ဖူးသား စာအုပ်ကို ပြန်ပြီး ပရီဗြူး လုပ်ရတာလည်းမလွယ်ဘူးနော့် ။

သက်ဝေ said...

စာရေးဆရာ မူရာကာမိက စာရေးသားခြင်းကို ဘယ်လိုစီမံခန့်ခွဲသလဲ ဆိုတာတော့ သိရပြီ... ဝတ္ထုတိုမှာ ဝတ္ထုရှည်ထဲက တချို့ အိုင်ဒီယာလေးတွေ ထင်ဟပ်နေတယ်ဆိုတာလေး သဘောကျတယ်...

ဘာပဲဖြစ်ဖြစ် အချောင်ခိုတတ်တဲ့ ထုံးစံအတိုင်း ပန်ပန်ရေးတာပဲ စောင့်ပြီး ဖတ်ပါ့မယ်...။
ဝတ္ထုတပုဒ် စာတအုပ်ကို Review လုပ်ရတာ တကယ်မလွယ်တာ သိပေမယ့် မြန်မြန်လေးရေးပါလို့ တိုက်တွန်းချင်ပါတယ်...

လင်းဒီပ said...

စိတ်ဝင်စားပါတယ်။ လောလောဆယ်တော့ လရောင်လမ်းမှာ ရေခဲလူ သွားဖတ်တာ တောင်ဝင်ရိုးစွန်းရောက်သွားလို့ စိတ်ကော လူကော အေးခဲပြီး ပြန်လာခဲ့ပါတယ် ။ :)

ကိုချစ်ဖေ said...

စိတ်ဝင်စားပါတယ်ဒေါ်ပန်ရယ် ဘာသာပြန်မဲ့ဟာသာ ပြန်ပါဗျာ..မြန်မာရော အင်္ဂလိပ်ရောရသူမို့ အားကိုးပါရစေ..

သော်ဇင်စိုး said...

စိတ်ဝင်စားပါတယ်.. မျှဝေပေးပါအမ

nyeinsoe said...

သိတ် စိတ်ဝင်စားပါတယ် ။ ဘာသာပြန်လက်ရာကောင်းတဲ့ ပန်ပန် ဘာသာပြန်ရင်
ဖတ်လို့ ကောင်းမှာ ယုံပြီးသား ။ မြန်မြန်လေး ဘာသာပြန်ပေးဖို့ ... တိုက်တွန်းလိုက်ပါတယ် ...
ငြိမ်းစိုးဦး