Thursday, May 16, 2013

အိုင်အိုဝါ ရက်စွဲများ အပိုင်း (၃)


အိုင်အိုဝါ ရက်စွဲများ အပိုင်း (၃)

၈။ အိုဘားမား မိန့်ခွန်းဟောပြောပွဲ
စက်တင်ဘာ ၇ ရက်နေ့မှာ စာကြည့်တိုက်မှာ ကျင်းပတဲ့ ကျားမဖြစ်တည်မှု ဆွေးနွေးပွဲအပြီးမှာ အိုဘားမား မိန့်ခွန်းပြောမယ့် အိုင်အိုဝါ တက္ကသိုလ်ဝင်းထဲကို သွားဖို့ တန်းစီကြပါတယ်။ ဟောပြောပွဲအတွက် အခမဲ့ ဝင်ခွင့် လက်မှတ်တွေကိုတော့ ပြီးခဲ့တဲ့ ရက်ပိုင်းအတွင်းကတည်းက အိုင်အိုဝါတက္ကသိုလ်မှာ  ထုတ်ယူပြီးသားပါ။
(အိုဘားမား ဟောပြောပွဲ လက်မှတ်)


အိုင်အိုဝါပြည်နယ်ဟာ ဒီမိုကရက်နယ်မြေ ဒါမှမဟုတ် ရီပတ်ဘလီကန်နယ်မြေလို့ အတပ်မပြောနိုင်ဘဲ swing state လို့ခေါ်တဲ့ ဟိုဘက်ဒီဘက် မဲရလာဒ်တွေကို အချိန်မရွေးပြောင်းလဲ သွားစေနိုင်တဲ့ ပြည်နယ်တွေထဲက ပြည်နယ်ငယ်တစ်ခုပါ။ ၂၀၀၈ ခုနှစ်တုန်းကတော့ အိုဘားမားဟာ အိုင်အိုဝါပြည်နယ်မှာ ပြိုင်ဖက်ပါတီအပေါ်မှာ ၉% အသာနဲ့ အနိုင်ရတယ်လို့ ဆိုကြပါတယ်။ IWP အစီအစဉ်က ဆရာတွေ ကျောင်းသားတွေ အပါအဝင် တက္ကသိုလ် အသိုင်းအဝိုင်းကတော့ ဒီမိုကရက်ကို တက်တက်ကြွကြွ အားပေးကြသူတွေပါ။ 

တန်းစီနေတုန်းမှာ မိုးဖွဲဖွဲ စရွာပါတယ်။ ဟောပြောပွဲကို လာနားထောင်ကြသူတွေဟာ ကလေးသူငယ် လူကြီးလူငယ် ကျားမ မရွေး စုံလင်လှပါတယ်။ အများစုကတော့ လူငယ်လူရွယ် ကျောင်းသားတွေ ဖြစ်ကြပါတယ်။ ရုရှက အလီနာကတော့ သတင်းထောက်တစ်ဦးလည်း ဖြစ်သူပီပီ တန်းစီနေကြတဲ့ IWP စာရေးဆရာတွေကို ဗီဒီယိုရိုက်ရင်း “ဒီမိုကရက်ပါတီကို ထောက်ခံသလား။ အိုဘားမားကို ဘာဖြစ်လို့ အားပေးတာလဲ” စသည်ဖြင့် ပေါ့ပေါ့ပါးပါးမေးခွန်းတွေနဲ့ အင်တာဗျူးနေပါတယ်။ 

လမ်းမှာ ရေသန့်ဗူးတွေ အလကား ဝေပါတယ်။ ရင်ထိုးတွေ တီရှပ်တွေ ရောင်းကြပါတယ်။ ဟောပြောပွဲ ကျင်းပမယ့် Jessup Hall ရှေ့က မြက်ခင်းပြင်ကို ရောက်ခါနီးမှာတော့ လူတွေအားလုံးဟာ ထီးတွေ၊ ရေဗူးတွေ၊ မီးခြစ်တွေ၊ အန္တရာယ်ရှိနိုင်တဲ့ သတ္ထုပစ္စည်းတွေ၊ အချွန်အတက်တွေ ပါလာခဲ့ရင် လုံခြုံရေးစခန်းတွေမှာ စွန့်ပစ်ထားခဲ့ရပါတယ်။ မြက်ခင်းပြင်ထဲကို လှမ်းအဝင်မှာ ရေသန့်ဗူးတွေ ပြန်ဝေပေးပါတယ်။ ဒါပေမယ့် ဒီတစ်ခါ ဝေတဲ့အခါ ရေသန့်ဗူးတွေမှာ အဖုံးမပါပါဘူး။ 

နေ့လည် ၁ နာရီကစပြီး ဝင်ခွင့်ပြုထားတယ် ဆိုပေမယ့် လုံခြုံရေးကြောင့် အိုဘားမား ရောက်လာမယ့် အချိန်အတိအကျကို ပြောမထားပါဘူး။ မတ်တပ်ရပ်နေကြတဲ့ လူအုပ်က တဖြည်းဖြည်း ထူထပ်လာတဲ့အချိန်မှာ မိုးကလည်း ပိုပြီး သည်းလာပါတယ်။ တချို့လူတွေကတော့ ပလတ်စတစ်မိုးကာလေးတွေ ပါလာတော့ ခြုံထားကြပါတယ်။ ကျွန်မက လူ မိုးစိုမှာထက် လက်ထဲက ကင်မရာလေး စိုမှာကို ပိုပြီး စိုးရိမ်နေမိပါတယ်။ လူအုပ်ထဲက ပြန်တိုးထွက်ပြီး ခပ်လှမ်းလှမ်းက သစ်ပင်အောက်မှာ မိသားစုတစ်ခုနဲ့အတူ မိုးခိုနေလိုက်ပါတယ်။ ပတ်ဝန်းကျင်မှာတော့ အမေရိကန်အလံတွေနဲ့ အိုဘားမားပါတီရဲ့ ကြွေးကြော်သံဖြစ်တဲ့ FORWARD ဆိုတဲ့ အပြာရောင်စာတန်းတွေကို မြင်နေရပါတယ်။ မိန့်ခွန်းစင်မြင့် နောက်တည့်တည့် ကျွန်မတို့ မရောက်နိုင်တဲ့ တစ်နေရာမှာလည်း ပွဲကြည့်စင် လှေခါးထစ်တွေပေါ်မှာ ထိုင်ပြီး အနီးကပ် အားပေးနေသူတွေလည်း ရှိကြပါတယ်။ အဲဒီနေရာကို သီးသန့် ကာထားပါတယ်။   
(အိုဘားမားကို အားပေးနေသူများ)
(အိုဘားမား မိန့်ခွန်းနားထောင်နေသူ ပရိသတ်)
 ညနေ ၄ နာရီကျော်လောက်မှာ အိုဘားမား ရောက်လာပါတယ်။ ကံကောင်းစွာပဲ မိုးကလည်း တော်တော် စဲသွားပါတယ်။ ကျွန်မလည်း ကင်မရာလေးကို ကိုင်ပြီး လူအုပ်ထဲကို ပြန်တိုးရပါတယ်။ ရှေ့မှာ လူတွေအတော်များများ ခံသွားပြီမို့ မားမားမတ်မတ် အနောက်တိုင်းသားတွေကြားမှာ ကျွန်မအရပ်နဲ့ ခြေဖျားထောက်ပြီး မနည်းကြည့်ရပါတယ်။ ကျွန်မရဲ့ ကင်မရာမှာလည်း အနီးကပ်ဆွဲရိုက်တဲ့ zoom မပါတာမို့ ဝေးဝေးက ဓာတ်ပုံခပ်သေးသေးပဲ ရလိုက်ပါတယ်။ 
(အိုဘားမားကို ခပ်လှမ်းလှမ်းက မြင်ရပုံ)


အိုဘားမားက နာရီဝက်လောက် မိန့်ခွန်းပြောသွားပါတယ်။ သူဟာ လူလတ်တန်းစားတွေအတွက် အဓိကထားပြီး ပြောသွားခဲ့ပါတယ်။ ကျောင်းသားတွေ အများအပြားရှိတဲ့ ကျောင်းမြို့နဲ့ လိုက်လျောညီထွေစွာပဲ ပညာသင်စရိတ် ထောက်ပံ့ကြေးတွေပေးမယ့် မူဝါဒတွေကို အသေးစိတ်ရှင်းပြသွားခဲ့ပါတယ်။ “ပညာရေးဆိုတာ လူလတ်တန်းစားဘဝအတွက် လက်မှတ်ပဲ” (Education is the ticket to a middle-class life) လို့ ပြောသွားပါတယ်။ လူတွေက “နောက်ထပ်လေးနှစ် နောက်ထပ်လေးနှစ်” (Four more years! Four more years!) လို့ ကြွေးကြော်ကြပါတယ်။ ဆက်ပြီးတော့ ကျန်းမာရေး ဝန်ဆောင်မှုတွေနဲ့ ပတ်သက်လို့ ပံ့ပိုးမှုတွေ ပေးသွားမယ့်အကြောင်းအပါအဝင် အခြားသော ခေါင်းစဉ်တွေကို ပြောသွားခဲ့ပါတယ်။ ကျဆင်းနေတဲ့ စီးပွားရေးကို အလျှင်အမြန် နာလန်ထူလာအောင် လုပ်ဖို့ မလွယ်ကူဘူးဆိုတဲ့ အကြောင်းကို သမ္မတဟောင်း ဘီလ်ကလင်တန် Bill Clinton ပြောခဲ့တဲ့ စကားကို ကိုးကားသွားတာကိုလည်း သတိပြုမိပါတယ်။ 


ကျွန်မတို့နိုင်ငံက မဲဆွယ်ပွဲတွေနဲ့ အဓိက ကွာခြားတဲ့ အချက်ကတော့ သူတို့ဆီမှာ သူတို့ပါတီ အနိုင်ရရင် အကောင်အထည်ဖော်မယ့် မူဝါဒတွေအကြောင်းကို လိုအပ်ရင် ကိန်းဂဏန်းတွေနဲ့ တကွ အသေးစိတ်၊ ပညာရပ်ဆန်ဆန်၊ ပိုင်ပိုင်နိုင်နိုင် ရှင်းလင်း ပြောပြပြီး မဲဆွယ်ကြတာပဲ ဖြစ်ပါတယ်။ သူတို့ပြည်သူတွေကလည်း ဘယ်မူဝါဒကို ကျင့်သုံးရင် ဘယ်လို အကျိုးသက်ရောက်မှုတွေ ရှိနိုင်မယ်ဆိုတာကို ပြန်လည် ဝေဖန်ဆွေးနွေး တတ်ကြတဲ့ အနေအထားမှာ ရှိပြီး မိမိတို့ နှစ်သက်တဲ့ မူဝါဒတွေကို အကောင်အထည်ဖော်မယ့် ပါတီကို မဲပေးဖို့ အသင့်ဖြစ်နေကြတာကို တွေ့ရပါတယ်။ ကျွန်မတို့ဆီမှာတော့ အမတ်လောင်းတွေ မိန့်ခွန်း ပြောတဲ့အခါ ကျွန်မတို့နဲ့ စိမ်းနေသေးတဲ့ ဒီမိုကရေစီစနစ်၊ ပွင့်လင်းလူ့အဖွဲ့အစည်းနဲ့ သန့်ရှင်းကောင်းမွန်တဲ့အစိုးရရဲ့ အခြေခံသဘောသရားတွေကို ပြည်သူတွေ နားလည်အောင် ပြောပြနေကြရတဲ့ အချိန်ပဲ ရှိသေးတယ် လို့ ထင်မိပါတယ်။ လာမယ့် ၂၀၁၅ ရွေးကောက်ပွဲမှာတော့ ကျွန်မတို့နိုင်ငံက ပါတီတွေရဲ့ ကိုယ်ပိုင်ရပ်တည်ချက်နဲ့ သူတို့အားသန်တဲ့ မူဝါဒတွေကို ပိုပြီး နက်နက်ရှိုင်းရှိုင်း အသေးစိတ် ဆွေးနွေးလာကြလိမ့်မယ်လို့ မျှော်လင့်မိပါတယ်။


၉။ ကျန်းမာရေးနဲ့ စားရေးသောက်ရေး

အိုဘားမား ဟောပြောပွဲသွားခဲ့တဲ့ နေ့က မိုးမိလာပေမယ့် ကံကောင်းထောက်မစွာပဲ မဖျားမနာခဲ့ပါဘူး။ ကျွန်မဟာ အေးတဲ့ရာသီဥတုနဲ့ မတည့်သူပါ။ ရောက်ရောက်ချင်းမှာတော့ လေယာဉ်ပေါ်မှာ အအေးမိလာခဲ့တာနဲ့ ဆက်ပြီး အတော်ကြာကြာ ချောင်းဆိုးနေခဲ့ပါတယ်။ တခြားနိုင်ငံက ရောက်လာတဲ့ စာရေးဆရာ အချို့လည်း အဲဒီလိုဖြစ်ကြပါတယ်။ 

IWP ကျောင်းက ကျွန်မတို့ကို ကုန်တိုက်ကြီးတစ်ခုကို တစ်ပတ်တစ်ကြိမ် လိုက်ပို့ပေးပါတယ်။ အဲဒီက ဆေးဆိုင်မှာ ဆေးဝါးကျွမ်းကျင်သူကို မေးမြန်းပြီး ချောင်းဆိုးပျောက်ဆေး အရည်နဲ့ ငုံဆေးပြားတွေ ဝယ်ရပါတယ်။ အစီအစဉ်တွေ အတော်များများက စကားပြောရမှာတွေရှိပြီး၊ အားလပ်ချိန်တွေမှာလည်း တစ်ယောက်နဲ့ တစ်ယောက် မိတ်ဆက်မေးမြန်း ပြောဆိုရတာတွေ များတဲ့အတွက် ချောင်းဆိုးခြင်းဟာ အတော်ဒုက္ခပေးပါတယ်။ 

ချောင်းဆိုးမပျောက်ခင်မှာ ကြုံရတဲ့ နောက်တစ်ခုကတော့ ခြေထောက်နာတာပါ။ ခရီးဆောင်အိတ်ထဲမှာ မဆန့်တဲ့အတွက် ဖိနပ်တွေ များများစားစား ယူမလာခဲ့ပါဘူး။ လမ်းလျှောက်ရှူးဖိနပ် လိုလာရင် ဟိုရောက်မှပဲ ဝယ်တော့မယ်လို့ ကြံစည်ထားခဲ့ပါတယ်။ နေ့စဉ်စီးဖို့အတွက် ကျွန်မပါသွားတဲ့ ကြိုးသိုင်းဖိနပ်ထူလေးဟာ စင်ကာပူမှာရော ရန်ကုန်မှာပါ အတော့်ကို သက်တောင့်သက်သာ ရှိပေမယ့် တောင်ကုန်းလေးတွေ အဆင်းအတက်များတဲ့ အိုင်အိုဝါမြို့လေးနဲ့ မကိုက်ညီခဲ့ပါဘူး။ 
(အိုင်အိုဝါ မြို့တွင်းတစ်နေရာ)
 တစ်နေ့တော့ ဘဏ်စာရင်းဖွင့်ဖို့ မြို့ထဲကို လမ်းလျှောက်သွားကြပါတယ်။ ဒီမှာ မြို့ထဲသွားတာလောက်ကို အားလုံး လမ်းလျှောက်လေ့ ရှိကြပါတယ်။ တခြားမြို့တွေနဲ့ ခပ်လှမ်းလှမ်းက ရပ်ကွက်တွေကို သွားတာလောက်ပဲ ကားစီးကြတာပါ။ ဘဏ်ကိုရောက်တော့ နိုင်ငံကူးလက်မှတ် မေ့ကျန်ခဲ့တာနဲ့ တစ်ခေါက်ပြန်ယူရပါတယ်။ ကျွန်မလိုပဲ စာရွက်စာတန်း မေ့ကျန်ခဲ့တဲ့ ချီလီစာရေးဆရာ နဲ့ အတူတူလမ်းလျှောက်ပြန်လာတဲ့အခါ သူ့ခြေလှမ်းကျဲကြီးတွေကို အမီလိုက်မိရင်း အဲဒီနေ့ညနေရောက်တဲ့အခါ ကျွန်မရဲ့ ခြေဖဝါး ကြွက်သားတွေက ထောက်လို့ မရအောင် နာလာပါတယ်။နောက်တစ်နေ့မှာ တော့ ပိုဆိုးလာတာနဲ့ မြို့ထဲက စတိုးဆိုင်တစ်ဆိုင်မှာ လမ်းလျှောက်ဖိနပ်နဲ့ ခြေအိတ်ထူထူတစ်စုံ ဝယ်လိုက်ရပါတယ်။ အိမ်ကပါလာတဲ့ လိမ်းဆေးတွေလိမ်း ပတ်တီးစည်းပြီး တစ်ပတ်လောက်ကြာမှ ကောင်းကောင်း ပျောက်သွားပါတယ်။
(အိုင်အိုဝါ တက္ကသိုလ်ဝင်းထဲက မြင်ကွင်း)
 ခြေထောက်နာ ပျောက်သွားတဲ့အချိန်မှာ ရာသီဥတု အေးလာတာနဲ့ ကြုံရပါတယ်။ ကျွန်မရဲ့ အရေပြားက ပတ်ဝန်းကျင်အပူချိန် န်ိမ့်တာနဲ့ မတည့်လို့ ယားယံတတ်ပါတယ်။ ခြေထောက်တွေ လက်တွေမှာရော မျက်နှာမှာပါ အရေပြားတွေကြမ်းပြီး အဖုလေးတွေပေါက်လာပါတယ်။ အိမ်ကယူလာတဲ့ အလှဆီတွေ လိမ်းတာလည်း မသက်သာပါဘူး။ မျက်နှာကိုတော့ CVS pharmacy က ထုတ်တဲ့ day cream နဲ့ night cream ကို ဝယ်လိမ်းတဲ့အခါ တဖြည်းဖြည်း သက်သာသွားပါတယ်။ ခြေထောက်နဲ့ လက်က အနီဖုတွေကတော့ မနိုင်းနိုင်းစနေ ညွှန်းတဲ့ Cetaphil cream ကို လိမ်းမှ ပျောက်သွားပါတယ်။ ဒါကတော့ ကြုံရတဲ့ ကျန်းမာရေး ကိစ္စလေးတွေပါ။

စားရေးသောက်ရေးအတွက်ကိုတော့ မသွားခင်ကတည်းက ဆရာမင်းထက်မောင်က အဲဒီကိုရောက်ရင် Iowa House Hotel အောက်က စားသောက်ဆိုင်တန်းက ဆူရှီဆိုင်ပိုင်ရှင် ကိုရာဇာ ကိုသွားတွေ့ပါလို့ မှာလိုက်ပါတယ်။ ဆရာ IWP တက်တုန်းက ကိုရာဇာတို့အိမ်မှာ မြန်မာအစားအသောက်တွေ မကြာခဏ သွားစားဖြစ်တယ်လို့ ပြောပါတယ်။ နေဘုန်းလတ် ရောက်လာတဲ့အခါ ကျွန်မနဲ့ နေဘုန်းလတ်တို့ဟာ ကိုရာဇာ ကို ဆက်သွယ်ကြပါတယ်။ ကိုရာဇာနဲ့ သူ့ရဲ့ လုပ်ဖော်ကိုင်ဖက်တွေဖြစ်တဲ့ ရှမ်းတိုင်းရင်းသား၊ မွန်တိုင်းရင်းသားလေးတွေဟာ အလွန် သဘောကောင်း ဖော်ရွေကြပါတယ်။ သူတို့ဟာ အိုင်အိုဝါမြို့မှာ နေထိုင်ကြတဲ့ တစ်ခုတည်းသော မြန်မာမိသားစုလည်း ဖြစ်ကြပါတယ်။ အိုင်အိုဝါမြို့ကို နှစ်တိုင်းလာမယ့် မြန်မာစာရေးဆရာတွေကို သူတို့က မျှော်နေကြတာပါ။ သူတို့က ကျွန်မတို့ကို ထမင်းပေါင်းအိုးတစ်အိုးနဲ့ ဆန်တစ်အိတ် ပေးပါတယ်။  သူတို့အိမ်မှာ ထမင်းဟင်း လာစားဖို့၊ လာချက်ဖို့လည်း အမြဲဖိတ်ခေါ်ပါတယ်။ အပြင်မှာလည်း လိုက်ကျွေးပါသေးတယ်။
(ကိုရာဇာရဲ့ အိမ်မှာ သူ့ရဲ့မိသားစု၊ လုပ်ဖော်ကိုင်ဖက်များနဲ့ ညနေစာစားပြီး အမှတ်တရ)
 သူတို့ပေးထားတဲ့ ထမင်းပေါင်းအိုးနဲ့ ကျွန်မအခန်းမှာ ထမင်းချက်စားဖြစ်ပါတယ်။ မိုက်ကရိုဝေ့ဗ် မီးဖိုထဲမှာ တချို့ဟင်းလေးတွေ ကြံဖန်ချက်ပြီး နေဘုန်းလတ်နဲ့ ခွဲဝေစားဖြစ်ကြပါတယ်။ အိုင်အိုဝါ မြို့ထဲမှာလည်း တရုတ်စားသောက်ဆိုင်၊ အိန္ဒိယစားသောက်ဆိုင် အနည်းငယ်ရှိပါတယ်။ အာရှအစားအသောက် စားချင်တဲ့အခါ တချို့ရက်တွေမှာ အဲဒီဆိုင်တွေမှာ သွားဝယ်စားဖြစ်ပါတယ်။ အိုင်အိုဝါနယ်သားတွေကလည်း ဖော်ရွေကြပါတယ်။ ကျွန်မတို့ကို ဖိတ်ခေါ်ကျွေးမွေးတဲ့ မြို့ခံတွေအကြောင်းကို နောက်တော့ ဆက်ပြောပြပါဦးမယ်။ 

ကျွန်မက လျှပ်စစ်ရေနွေးအိုးတစ်လုံးကိုလည်း ဝယ်ထားပါတယ်။ ရေနွေးကြိုဖို့နဲ့ ကြက်ဥပြုတ်စားဖို့ပါ။ ဟိုတယ်ခန်းထဲမှာကတော့ ကော်ဖီဖျော်စက်ပဲ ပေးထားပါတယ်။ ဖိလစ်ပိုင်စာရေးဆရာမ ဂျန် ဟာ ကြက်ဥပြုတ်ချင်ရင် ကျွန်မအခန်းကို လာပြုတ်ပါတယ်။ အီရတ်က ဂူလာလာ ကတော့ ကျွန်မတို့ချက်လေ့ရှိတဲ့ သီးစုံကုလားဟင်းဆန်ဆန် အသီးအရွက်မျိုးစုံပါတဲ့ အီရတ်အစားအစာကို သူ့အခန်းမှာ မိုက်ကရိုဝေ့ဗ် မီးဖိုနဲ့ ချက်တဲ့အခါ ကျွန်မကို ခေါ်ကျွေးပါတယ်။ ဟင်းထဲမှာ ထမင်းကိုပါ ထည့်ချက်တာပါ။ အီရတ်ရဲ့ ပဲနီလေးဟင်းချို ချက်ပုံကတော့ ကျွန်မတို့ဆီမှာ ချက်တာနဲ့ အတော်တူပါတယ်။ 

ကျွန်မက မုန့်ဟင်းခါး ဟင်းရည်အခြောက် တစ်ထုပ် ပါသွားခဲ့တယ်။ ဗီယက်နမ်က လာတဲ့ ကြာဇံတစ်မျိုးက ပြုတ်လိုက်ရင် မုန့်ဟင်းခါးဖတ်နဲ့တူတယ်လို့ ကိုရာဇာတို့က ညွှန်းတာနဲ့ အဲဒီကြာဇံခြောက်ကို ဝယ်ပြုတ်ပြီး နေဘုန်းလတ်၊ ဂူလာလာတို့နဲ့အတူ မုန့်ဟင်းခါး ချက်စားဖြစ်ပါသေးတယ်။ တခါတရံမှာ ကြက်ဥကိုမွှေပြီး ခရမ်းချဉ်သီး၊ ကြက်သွန်နီ၊ ဆား၊ ငရုပ်သီးစိမ်းနည်းနည်း၊ ဆီနည်းနည်းထည့်ပြီး မိုက်ကရိုဝေ့ဗ် မီးဖိုထဲကို တစ်မိနစ်လောက် ထည့်၊ Omelet ကြက်ဥမွှေကြော် လုပ်ပြီး ကျွန်မနဲ့ နေဘုန်းလတ်တို့ ဟိုတယ်က မနက်စာခန်းထဲမှာ စားကြတဲ့အခါ ကိုရီးယားစာရေးဆရာ ဟေးအီစူးနဲ့ အာဖဂန်နစ္စတန် စာရေးဆရာ မိုဟစ်တို့က လာမြည်းကြည့်ကြပြီး အလွန်နှစ်သက်ကြလို့ သူတို့အတွက်လည်း ထပ်ချက်ကျွေးခဲ့ရပါသေးတယ်။

အချိန်ကြာလာတဲ့အခါ စာရေးဆရာတွေဟာ ကိုယ့်ဒေသက အစားအသောက်တွေကို လွမ်းလာကြပါတယ်။ ကျွန်မတို့ဟာ အားလပ်တဲ့အချိန်တွေမှာ သူ့နိုင်ငံ ကိုယ့်နိုင်ငံက အစားအသောက်တွေအကြောင်းကို ပြောဖြစ်ကြပါတယ်။ စင်ကာပူက စတက်ဖနီနဲ့ကတော့ ကျွန်မတို့နှစ်ယောက်လုံး ရင်းနှီးကျွမ်းဝင်ပြီးသားဖြစ်တဲ့ စင်ကာပူ အစားအသောက်တွေအကြောင်း ပြောဖြစ်ကြပါတယ်။ အိမ်နဲ့ဝေးရာမှာ အစားအသောက်ဟာလည်း မိတ်ဆွေတွေကြားက ခင်မင်ရင်းနှီးမှုကို တိုးပွားစေပါတယ်။

၁၀။ “ယနေ့ကမ္ဘာ့စာပေ” ဆွေးနွေးပွဲအစီအစဉ်

ယနေ့ကမ္ဘာ့စာပေ (International Literature Today) ဟာ IWP စာရေးဆရာတွေအားလုံး မဖြစ်မနေ ပါဝင်ဆွေးနွေးပေးရတဲ့ အစီအစဉ်တစ်ခုပါ။ ဒီအစီအစဉ်ကို အိုင်အိုဝါ တက္ကသိုလ်ရဲ့ ဘွဲ့ကြိုတန်း စာသင်ခန်း တစ်ခန်းမှာ တစ်ပတ်တစ်ကြိမ် ကျင်းပပြီး ဆွေးနွေးမှုတစ်ခုမှာ စာရေးဆရာ ၃ ယောက်ကနေ ၄ ယောက်အထိ ပါဝင်ကြပါတယ်။ ဆွေးနွေးဖို့ အလှည့်ကျသူတွေသာမက အခြား IWP စာရေးဆရာတွေပါ တက်ရောက်နားထောင်လေ့ရှိပါတယ်။ များသောအားဖြင့်တော့ စာရေးဆရာတွေဟာ သူတို့နိုင်ငံက စာပေမြင်ကွင်းကို မိနစ် ၂၀ လောက် အကျဉ်းချုံး ပြောပြတတ်ကြပါတယ်။ နိုင်ငံရဲ့ စာပေမြင်ကွင်းတွေထဲမှာ ဘာသာပြန်စာပေ၊ စာပေစိစစ်ရေး၊ အမျိုးသမီးကဏ္ဍ၊ တိုင်းရင်းသားစာပေ၊ စာပေတိုးတက်ပုံသမိုင်း အစရှိတဲ့ အကြောင်းအရာတွေ ပါဝင်လေ့ရှိကြပါတယ်။ အိုင်အိုဝါကျောင်းသားတွေဟာ စာရေးဆရာရဲ့ လက်ရာတွေကို ကြိုဖတ်ထားကြပြီး မိနစ် ၂၀ စာလောက် မေးခွန်းတွေ မေးမြန်းလေ့ရှိကြပါတယ်။ 

စက်တင်ဘာ ၁၀ ရက်နေ့မှာ ကျွန်မနဲ့အတူ ဆွေးနွေးမယ့် စာရေးဆရာတွေကတော့ ပါကစ္စတန်က ဘီလယ် တန်ဝီရာ (Bilal Tanweer) နဲ့ ဖိလစ်ပိုင်က ဂျန်နီဗီး အာစန်ဂျို (Genevieve Asenjo) တို့ဖြစ်ပါတယ်။ ကျွန်မက နောက်ဆုံး ဆွေးနွေးရသူပါ။ ဒီဆွေးနွေးပွဲမတိုင်မီက IWP ရဲ့ အကြံပေးတစ်ဦး ဖြစ်ပြီး အင်္ဂလိပ်စာဌာနက ပရော်ဖက်ဆာတစ်ယောက်ဖြစ်တဲ့ ပီတာ နဇာရက် (Peter Nazareth) နဲ့ စကားပြောဖြစ်ကြတဲ့အခါ သူက မြန်မာနိုင်ငံက ကဗျာတွေ ပြောင်းလဲလာပုံ အကြောင်းကို သိချင်တယ်လို့ ပြောပါတယ်။ ကျွန်မက ဒီကိုမလာခင်ကတည်းက မြန်မာကဗျာအကြောင်းကို ပြောမယ်လို့ ကြံရွယ်ပြီး ကဗျာနဲ့ပတ်သက်တဲ့ စာအုပ်စာတန်းတချို့ကို ဖတ်ရှုပြင်ဆင်လာခဲ့ပါတယ်။ လတ်တလော ကိုးကား စာအုပ်တွေထဲမှာ ဆရာသစ္စာနီပေးလိုက်တဲ့ “မော်ဒန်ရှင်းတန်း နှင့် မြန်မာကဗျာဖြစ်ပေါ်တိုးတက်မှု” စာအုပ်၊ ကိုမိုးဝေး ဆီက ကော်ပီဆွဲလာတဲ့ “ဆရာမျိုးသန့်ရဲ့ မဂ္ဂဇင်းဆောင်းပါး စုစည်းမှုတွေ”၊ ဆရာဇေယျာလင်းရဲ့ “ဖြစ်နိုင်ခြေရှိသော ခေတ်ပြိုင်မြန်မာကဗျာ အလားအလာများ”နဲ့ အခြား စာအုပ်တွေ ပါဝင်ပါတယ်။

မြန်မာ့ရိုးရာ ကဗျာတွေအကြောင်းကိုတော့ အကျဉ်းချုံးပဲ ပြောပြလိုက်ပြီး ခေတ်စမ်းစာပေနဲ့ နောက်ပိုင်းခေတ်တွေက မြန်မာကဗျာ ပြောင်းလဲလာပုံနဲ့ နိုင်ငံရေး လူမှုရေး သမိုင်းနောက်ခံတွေကို ပါဝါပွိုင့် စလိုက်ရှိုးနဲ့ မိနစ် ၂၀ ကျော်စာ ရှင်းလင်းပြောပြခဲ့ပါတယ်။ ဒါရိုက်တာ ခရစ္စတိုဖာ မာရေးလ်ကတော့ ခရီးသွားနေလို့  အဲဒီနေ့က မရှိပါဘူး။ နာတာရှာနဲ့ ကျောင်းသားတွေကပဲ ပြန်ဆွေးနွေးကြပါတယ်။ ဒီအတန်းမှာလည်း နာတာရှာက ကျွန်မရဲ့ နာမည်တွေနဲ့ ဒေါ်အောင်ဆန်းစုကြည်ရဲ့ နာမည်ကို မြန်မာစာလုံးနဲ့ ရေးပြခိုင်းပါတယ်။ ဒီအတန်းက ကျောင်းသားတွေကတော့ စီနီယာတွေဆိုတော့ ဒေါ်အောင်ဆန်းစုကြည်ကို အသေအချာ ကြားဖူးကြပါတယ်။ ပြီးတော့ နာတာရှာက ကျောင်းသား တချို့ရဲ့ မေးခွန်းတွေကို မေးပေးပါတယ်။ မြန်မာနိုင်ငံရဲ့ စာပေ လွတ်လပ်မှုအခြေအနေနဲ့ ပတ်သက်တဲ့ မေးခွန်းတချိုနဲ့ ကျွန်မရဲ့ ကလောင်နာမည်ကို ဘယ်လို ယူဖြစ်တယ် ဆိုတဲ့အကြောင်းကို ပြန်ဖြေဖြစ်ခဲ့ပါတယ်။
(ယနေ့ကမ္ဘာ့စာပေ ဆွေးနွေးပွဲမှာ ရှင်းလင်းပြောပြနေစဉ်)
 ဆွေးနွေးပွဲမှာ အချိန်မရလို့ မမေးလိုက်ရတဲ့ မေးခွန်းတွေကို နောက်တစ်နေ့မှာတော့ ကျွန်မဆီကို IWP ရုံးအဖွဲ့ဝင်တစ်ဦးဖြစ်တဲ့ မေရီ  (Mary Nazareth )က ယူလာပေးပါတယ်။ (မေရီဟာ အင်မတန် ကြင်နာတတ်ပြီး မိခင်ဆန်သူပါ။ သူက ပီတာရဲ့ ဇနီးပါ။ သူ့ရဲ့ တာဝန်ကတော့ ကျွန်မတို့တွေကို ဟိုတယ်မှာ နေရေးထိုင်ရေး စီမံပေးဖို့၊ စားစရိတ် ထုတ်ပေးဖို့နဲ့ အခြား လိုအပ်တာမှန်သမျှကို ကူညီပေးဖို့ပါ။) “မေးခွန်းတချို့က ငါတို့ကျောင်းသားတွေ ဘယ်လောက် မသိနားမလည်လဲဆိုတာကို ဖော်ပြနေလို့ ရှက်မိပါတယ်။ ဒါပေမယ့် မင်းသိစေဖို့ ယူလာပေးတာပါ” လို့ မေရီကပြောပါတယ်။

ဘယ်လိုပဲဖြစ်ဖြစ် ကျွန်မက မမေးဖြစ်ခဲ့တဲ့ မေးခွန်းအားလုံးကို သေသေချာချာ ဖတ်ကြည့်လိုက်ပါတယ်။ အားလုံးပေါင်း ၃၃ခု ရှိပါတယ်။ တချို့ကတော့ မြန်မာ့စာပေ မြန်မာ့ကဗျာနဲ့ ပတ်သက်လို့ ယေဘုယျမေးထားပါတယ်။ တချို့ကတော့ ကျွန်မရဲ့ ကဗျာတွေနဲ့ ပတ်သက်လို့ နည်းပညာပိုင်းဆိုင်ရာ အသေးစိတ် မေးထားပါတယ်။ မေရီက နှိမ့်နှိမ့်ချချလေး ပြောပေမယ့် စိတ်ဝင်စားစရာကောင်းတဲ့ မေးခွန်းကောင်းတွေကိုလည်း ကျွန်မက သတိထားမိပါတယ်။ အဲဒီထဲက တချို့ကို ဘာသာပြန်ပြီး ဖော်ပြလိုက်ပါတယ်။

  • ·         မြန်မာနိုင်ငံ စစ်အစိုးရလက်ထက်မှာ စာရေးဆရာတွေ အနုပညာရှင်တွေအတွက် ဘယ်လို အခက်အခဲတွေ ရင်ဆိုင်ရပါသလဲ။
  • ·         ပန်ဒိုရာရဲ့ “လူပြိန်းများမြို့ကိုသိမ်းပိုက်စဉ်” (ဘာသာပြန်) မှာ အဖြတ်အတောက် (punctuation) တွေ အသုံးပြုတာ မတွေ့ရပါဘူး။ နာမည်တွေလောက်ပဲ စာလုံးအကြီးနဲ့ ရေးထားတာမျိုး တွေ့ရပါတယ်။ ဘာဖြစ်လို့ ဒီလို ရေးဖို့ စဉ်းစားတာလဲ။ တကယ်လို့ သဒ္ဒါထုံးအတိုင်း အဖြတ်အတောက်တွေသုံးရင် ကဗျာဟာ ဘယ်လို ခြားနားသွားပါမလဲ။
  • ·         ပန်ဒိုရာရဲ့ ကဗျာတွေမှာ လုံးဝ မြို့ပြနောက်ခံ ဒါမှမဟုတ် တောရိုင်းနောက်ခံကို တွေ့ရတယ်။ အဲဒီလို လုံးလုံးလျားလျား ဆန့်ကျင်ကွာခြားနေတဲ့ နောက်ခံအခင်းအကျင်း (setting) က စာရေးသူအတွက် ဘယ်လို အရေးပါပါသလဲ။
  • ·         ပန်ဒိုရာရဲ့ ကဗျာတွေထဲမှာ အကြမ်းပတမ်း (violent) ဖြစ်တဲ့ သင်္ကေတတွေ တွေ့ရတယ်။ ဥပမာ လက်ဖြောင့်တပ်သား၊ ကျား စတဲ့ စကားလုံးတွေ။ ဘာဖြစ်လို့ အဲဒီစကားလုံးတွေကို ကဗျာတွေထဲမှာ မကြာခဏ ဆက်တွေ့နေရတာလဲ။
  • ·         ဒီနေ့အတန်းထဲမှာ လေ့လာရတဲ့ ပန်ဒိုရာရဲ့ စာတွေထဲမှာ၊ အထူးသဖြင့် “လူပြိန်းများ မြို့ကိုသိမ်းပိုက်စဉ်” ကဗျာမှာ ပို့စ်မော်ဒန် စာပေရဲ့ လွှမ်းမိုးမှုအတိုင်းအတာ ဘယ်လောက်အထိရှိပါသလဲ။ ဒါမှမဟုတ် ပို့စ်မော်ဒန်နဲ့ ဘယ်လို ပတ်သက်ပါသလဲ။ စာရေးသူရဲ့ ပို့စ်မော်ဒန်အပေါ် နားလည်မှု ဒါမှမဟုတ် ပို့စ်မော်ဒန် ရေးသားမှုစတိုင်အပေါ် စုံစမ်းလေ့လာထားမှုကို သိချင်ပါတယ်။ လူပြိန်းများ ကဗျာထဲက ပို့စ်မော်ဒန် အရာဝတ္ထုတွေဖြစ်တဲ့ မာရီလင်မွန်ရိုးနဲ့ မိုက်ကယ်ဂျက်ဆင်တို့လို အမေရိကန် ပေါ်ပြူလာကာလချာကို သတိထားမိပါတယ်။ စကားလုံးတစ်လုံးဖြစ်တဲ့ လူပြိန်းကို ထပ်ခါထပ်ခါ သုံးထားတာမျိုးတွေဟာ ပို့စ်မော်ဒန် အရေးအသားအများအပြားမှာ တွေ့ရတဲ့ ချဲ့ကားတွန်းတိုက် ရေးထားပုံမျိုး ဖြစ်နေပါတယ်။ အဲဒီလိုပါပဲ ဟစ်တလာ နဲ့ ချေဂွေဗားရား ကဗျာမှာဆိုရင်လည်း ပို့စ်မော်ဒန်ဝတ္ထုအများအပြားမှာ ရေးလေ့ရှိသလို သမိုင်းနောက်ခံကို ထင်ဟပ်ရေးတာမျိုးတွေ့ရပါတယ်။ ဥပမာ ဒွန် ဒီလီလို (Don DeLillo) ရဲ့ Libra ဝတ္ထုမှာလိုမျိုးပါ။ ပို့စ်မော်ဒန် ဝတ္ထုတွေ မြန်မာနိုင်ငံမှာ ကျယ်ကျယ်ပြန့်ပြန့် ဖတ်ကြသလား ဆိုတာကို ကျွန်တော်မသိပါဘူး။ တစ်နည်းအားဖြင့်လည်း တကယ်လို့ စာရေးသူဟာ ပို့စ်မော်ဒန် အနုပညာနည်းလမ်းတွေကို တမင်တကာ အသုံးချထားခဲ့ခြင်း မရှိခဲ့ဘူးဆိုရင် တခြား ဘယ်စာရေးဆရာတွေနဲ့ ဘယ်လိုရေးဟန်တွေက လွှမ်းမိုးမှုရှိပါသလဲ။ အဲဒီလို ကိုယ့်ကိုလွှမ်းမိုးသူတွေက မြန်မာနိုင်ငံကလူတွေ ဟုတ်ကြပါသလား။ ကျွန်တော်က မြန်မာနိုင်ငံက တီထွင်ဖန်တီးမှု စာပေရေးသားခြင်း အကြောင်းကို လုံးဝ မသိပါဘူး။ ဒါကြောင့် အဲဒီက စာပေအခြေအနေ ဘယ်လိုရှိတယ်ဆိုတာကို သိချင်ပါတယ်။
အဲဒီလို မေးခွန်းတွေဟာ စိတ်ဝင်စားစရာ ကောင်းပါတယ်။ ဒါပေမယ့် အဲဒီမေးခွန်းတွေကို ပြန်ဖြေဖို့အတွက် ကျွန်မမှာ အချိန်မရခဲ့ပါဘူး။ အပြင်မှာ တွေ့ကြတဲ့အခါ မေးချင်တာ မေးလို့ရပါတယ် လို့တော့ စာသင်ခန်းထဲမှာ ပြောခဲ့ပါတယ်။ 
(မေးခွန်းတချို့)
 (ဆွေးနွေးပွဲအပြီးမှာ နာတာရှာက ဆွေးနွေးသွားတဲ့  IWP စာရေးဆရာတွေကို ထပ်ပြီး မေးခွန်းမေးချင်တာ၊ အင်တာဗျုးချင်တာရှိရင် သူကနေတစ်ဆင့် ခွင့်တောင်းဆက်သွယ်ပြီး စာတမ်းတစ်ခု ပြန်ရေးတင်ဖို့ ကျောင်းသားတွေကို အိမ်စာပေးခဲ့ပါတယ်။ ကျောင်းသူလေးတစ်ယောက်က ကျွန်မကို ဆက်သွယ်လာပါတယ်။ သူနဲ့ တစ်ရက်ချိန်းပြီး အမေးအဖြေလုပ်ပြီးတဲ့နောက်မှာ ကျွန်မရဲ့စာရေးသားခြင်းနဲ့ ဘဝဖြတ်သန်းမှု အကြောင်းကို သူက စာတမ်းငယ်တစ်စောင် ရေးခဲ့ပါတယ်။) 


ပန်ဒိုရာ
(ဆက်လက်ဖော်ပြသွားပါမည်။)

၂၀၁၃ မေလ စတိုင်သစ်မဂ္ဂဇင်းတွင် ဖော်ပြပြီး။  



အပိုင်း (၁) သို့  
အပိုင်း(၂) သို့

Expand..

Thursday, May 9, 2013

အိုင်အိုဝါရက်စွဲများ (အပိုင်း ၂)




အိုင်အိုဝါ ရက်စွဲများ အပိုင်း (၂)

၎။ နေမှုထိုင်မှု အခက်အခဲတချို့

အိုင်အိုဝါမြို့ကို ရောက်လာကြတဲ့ နိုင်ငံတကာ စာရေးဆရာတွေအတွက် ပထမဆုံး အခက်အခဲကတော့ လျှပ်စစ်ပလပ်ပေါက်ပါပဲ။ ကျွန်မတို့ ပါလာကြတဲ့ ဖုန်းတွေ ကွန်ပြူတာတွေဟာ အမေရိကမှာ ကျင့်သုံးတဲ့ ပလပ်ပေါက်စနစ်နဲ့ မတူတာများပါတယ်။ စင်ကာပူမှာဆိုရင်တော့ ပလပ်ပေါက်က 3-pin လေးထောင့်ပေါက်  ၃ ပေါက်ဖြစ်ပြီး မြန်မာပြည်မှာကတော့ များသောအားဖြင့် 2-pin အဝိုင်းပေါက် ၂ ပေါက် ဖြစ်တတ်ပါတယ်။ အမေရိကမှာ တွေ့ရတဲ့ ပလပ်ပေါက်တွေက 2-pin အပြားနှစ်ပေါက် ဖြစ်နေတော့ ကျွန်မတို့ပါလာတဲ့ လျှပ်စစ်ပစ္စည်းတွေကို အသုံးပြုဖို့ အားသွင်းဖို့အတွက် အပေါက်မကိုက်ဘဲ အခက်ကြုံကြရပါတယ်။ ကျွန်မကတော့ ခရီးသွားတိုင်း ထည့်နေကျ universal adapter လေး ပါလာမိလို့ အဆင်ပြေနေပေမယ့် အတော်များများကတော့ adapter ကို မြို့လေးက ဆိုင်တွေမှာ တော်တော်နဲ့ ရှာလို့မရဖြစ်ကြပါတယ်။ 

နောက်တစ်ခုကတော့ ဆေးလိပ်သောက်သူတွေအတွက် အခက်အခဲပါ။ ကျွန်မတို့ကို နေရာချပေးထားတဲ့ Iowa House Hotel က အခန်းတွေထဲမှာ ဆေးလိပ်သောက်လို့မရပါဘူး။ ပြီးတော့ မြို့ထဲက နေရာအတော်များများမှာလည်း ဆေးလိပ်မသောက်ရ ဇုံတွေနဲ့ ပြည့်နှက်နေပါတယ်။ ဆေးလိပ်သောက်ရင်း ဈာန်ဝင်ပြီး စာရေးလေ့ရှိတဲ့ စာရေးဆရာတချို့အတွက် ကိုယ့်အခန်းထဲမှာ ဇိမ်နဲ့နားနားနေနေ မရေးနိုင်ဘဲ အခက်ကြုံရပါတယ်။ ဒီတော့ ဆေးလိပ်သောက်ခြင်းကို ခွင့်ပြုတဲ့ ကော်ဖီဆိုင်၊ စားသောက်ဆိုင်တွေကို နေ့လည်ဘက်မှာ သွားပြီး စာရေးကြပါတယ်။ 

စာရေးဆရာတွေကို orientation မိတ်ဆက် ပြောတဲ့နေ့က ဥပဒေ ပညာရှင်တစ်ယောက် လာပါတယ်။ ဥပဒေရေးရာနဲ့ ပတ်သက်လို့ ဒီမြို့လေးမှာ ဆောင်ရန် ရှောင်ရန်တွေကို ပြောပြသွားပါတယ်။ အဓိက ပြောသွားတာကတော့ ယာဉ်စည်းကမ်း၊ လမ်းစည်းကမ်းနဲ့ အရက်သေစာ သောက်သုံးမှုပါပဲ။ အမေရိကမှာက ပြည်နယ်အလိုက်  မိမိတို့နဲ့ သင့်လျော်တဲ့ ဥပဒေတွေကို ပြဌာန်းတဲ့ စနစ်ရှိပါတယ်။ အိုင်အိုဝါမြို့လေးအတွက်  အရက်သောက်သုံးမှုနဲ့ ပတ်သက်လို့ အဓိက အချက် ၂ချက်ကတော့ public drinking နဲ့ public intoxication ကို ရှောင်ကြဉ်ဖို့ပါ။  အများနဲ့ သက်ဆိုင်တဲ့ နေရာတွေမှာ အရက်သောက်လို့ မရပါဘူး။ နောက်တစ်ခုက အများနဲ့သက်ဆိုင်တဲ့နေရာတွေမှာ အရက်ကို သောက်မနေတောင်မှ ဆိုင်ကသောက်ပြီး ပြန်လာတဲ့အခါ၊ အိမ်ကနေထွက်လာတဲ့အခါ၊ အများနဲ့သက်ဆိုင်တဲ့ မြင်ကွင်းမှာ မူးယစ်နေလို့လည်း မရပါဘူး။ ကျွန်မကတော့ ကိုယ့်နိုင်ငံက သင်္ကြန်ချိန်ခါကို ဖျတ်ခနဲ မြင်ယောင်သွားပါတယ်။ မြန်မာနိုင်ငံမှာလည်း အဲဒီလို ဥပဒေ ပြဌာန်းရင် ကောင်းမယ်လို့လည်း တွေးမိပါသေးတယ်။

အရက်သေစာနဲ့ ပတ်သက်လို့ နောက်ထပ်အခြေခံ အချက်တစ်ချက်ကတော့ အသက် ၂၁ နှစ်ပြည့်မှ အရက်ဝယ်လို့ရတာပါ။ ဆိုင်တွေမှာ ဘီယာ၊ ဝိုင် စတဲ့ အရက်ဝယ်သူတွေကို အသက်ပြည့်မပြည့် မဝေခွဲနိုင်ရင် ရုပ်ပုံပါတဲ့ သက်သေခံ ကဒ်ပြား (photo ID) တမျိုးမျိုးကို ပြခိုင်းပါတယ်။ ကဒ်ပြားပါမလာရင် မရောင်းပါဘူး။ (စင်ကာပူမှာလည်း အဲဒီဥပဒေရှိပါတယ်။ ဒါပေမယ့် လူကိုမှန်းကြည့်ပြီး တော်ရုံဆို မပြခိုင်းပါဘူး။) ဖွံ့ဖြိုးဆဲ နိုင်ငံတွေကလာသူ အတော်များများအတွက်ကတော့ ဒီလို စည်းနဲ့ကမ်းနဲ့ အရက်ဝယ်ရတာ အတွေ့အကြုံသစ်ပါပဲ။  စာရေးဆရာတွေဟာ သူတို့ကို သက်သေခံကဒ်ပြား ပြခိုင်းတဲ့အခါ “ဒါ အသက် ၂၁ နှစ် မပြည့်သေးဘူးထင်လို့ ပြခိုင်းတာ၊  တော်တော်နုပျိုတာပဲ” လို့ အချင်းချင်း နောက်ပြောင်ရင်း ဂုဏ်ယူဝံ့ကြွားလေ့ ရှိကြပါတယ်။

၅။ မြင်း/နွားစီးပွဲ သို့မဟုတ် Rodeo

နိုင်ငံတကာက စာရေးဆရာတွေကို IWP ကို ဖိတ်ခေါ်ရတဲ့ ရည်ရွယ်ချက်တွေထဲမှာ အမေရိကရဲ့ ယဉ်ကျေးမှုနဲ့ လူနေမှုဘဝတွေကို သိရှိနားလည် လေ့လာစေချင်တာလည်း ပါဝင်ပါတယ်။  ဒါကြောင့်မို့ ယဉ်ကျေးမှု ဒါမှမဟုတ် ဒေသန္တရဗဟုသုတနဲ့ ပတ်သက်တဲ့ အစီအစဉ်တွေကိုလည်း ဖိတ်ခေါ်လေ့ရှိပါတယ်။

စက်တင်ဘာ ၆ ရက်နေ့မှာ ၆၅ ကြိမ်မြောက်ကျင်းပမယ့် ရိုဒီယို (rodeo) ဆိုတဲ့ပွဲရှိတယ်။ ကြည့်ချင်သူတွေကို ပွဲကျင်းပတဲ့ Fort Madison ကို လိုက်ပို့မယ် လို့ ကျောင်းက အကြောင်းကြားလာပါတယ်။ ရိုဒီယို ဆိုတာ ဘာလဲ ဆိုတာကို ရှင်းလင်းချက်ကိုလည်း ပို့ထားပါသေးတယ်။ စပိန်က နွားရိုင်းသတ်ပွဲလို မဟုတ်ဘဲ မြင်းတွေနွားတွေကို ထိန်းချုပ်နိုင်တာကို ယှဉ်ပြိုင်ကြတဲ့ပွဲပါ။ တိရိစ္ဆာန်အခွင့်အရေး လှုပ်ရှားသူတွေက ကန့်ကွက်ကြတဲ့ ပွဲမျိုးလို့လည်း သတိပေးထားပါတယ်။  စာရေးဆရာ အတော်များများဟာ ဒီလိုပွဲမျိုးကို ရုပ်ရှင် တီဗွီထဲမှာလောက်ပဲ မြင်ဖူးပြီး ကိုယ့်နိုင်ငံမှာ ကျင်းပလေ့မရှိတဲ့အတွက် မျက်ဝါးထင်ထင် ကြည့်ရှုဖို့ စိတ်အားထက်သန်နေကြပါတယ်။ 


(တစ်ပတ်တာရဲ့ အချိန်ဇယား၊ လိုအပ်နေတဲ့ ပလပ်ခေါင်း နဲ့ ရိုဒီရို လက်မှတ်)

အိုင်အိုဝါမြို့ရဲ့ မလှမ်းမကမ်းမှာ တည်ရှိတဲ့ Fort Madison ကို ရောက်တော့ လက်မှတ်တွေ ဝယ်ပြီး ပွဲကျင်းပတဲ့ ဝင်းထဲကို ရောက်ခဲ့ကြပါတယ်။ ပွဲကို လာကြသူတွေအများစု ကလေး လူကြီးတွေဟာ ဦးထုတ်ပြန့်တွေ ရှပ်အင်္ကျီ ဂျင်းဘောင်းဘီတွေနဲ့ ကောင်းဘွိုင်လို ဝတ်စားဆင်ယင်လာကြပါတယ်။ ဈေးဆိုင်တန်းတွေကလည်း နွားသားရေနဲ့ လုပ်ထားတဲ့ ခါးပတ်တို့၊ ပိုက်ဆံအိတ်တို့ ရောင်းကြပါတယ်။ ကောင်းဘွိုင်ဦးထုပ်တွေကိုလည်း ရောင်းကြပါတယ်။ ကျွန်မလည်း  အမှတ်တရ တစ်ခုခု ဝယ်ဖို့ ကြည့်ဖြစ်ပါတယ်။ ပထမဆုံး အမေရိကန် အမှတ်တရ ပစ္စည်း ဝယ်ဖို့ ကြည့်ဖြစ်တဲ့နေ့ပါ။ အဲဒီမှာ အရာရာတိုင်းလိုလိုဟာ made in China ဖြစ်နေတာနဲ့ စပြီးတွေ့တော့တာပါပဲ။ 
( စာရေးဆရာတွေ ဦးထုပ်ဝယ်နေကြစဉ်)



ပွဲကို အတော်လေး ခန်းခန်းနားနား ဖွင့်လှစ်ပါတယ်။ အမျိုးသမီး အမျိုးသားတွေဟာ မြင်းတွေကို အလှစီးပြီး လှည့်လည်ကြပါတယ်။  အမေရိကန်အလံနဲ့ လေထီးခုန်ချတာလည်း ကြည့်လို့ကောင်းပါတယ်။ ကျွန်မက ဒီလိုပွဲကို တီဗွီမှာ ယူကျုမှာ အနည်းငယ် မြင်ဖူးပေမယ့် အစအဆုံး တစ်ခါမှ မကြည့်ဖူးပါဘူး။ မှတ်ထားမိသလောက် ပွဲစဉ်တွေကို ပြန်ပြောပြရရင်တော့ -

စည်ပိုင်း ၃ခုကြား မြင်းလှည့်လည်စီးခြင်း
စည်ပိုင်း ၃ ခုကို တြိဂံပုံ (သူတို့အခေါ်တော့ ကလိုဗာ သစ်ရွက်ပုံပေါ့) ချထားတယ်။ အဲဒီ စည်ပိုင်းတွေကို သတ်မှတ်ထားတဲ့ လမ်းကြောင်းအတိုင်းပတ်ပြီး မြင်းစီးရတယ်။ အချိန်မြန်မြန် မှန်မှန်စီးနိုင်ခြင်းကို အမှတ်ပေးတာပါ။

မြင်းပေါ်ကို ကုန်းနှီးပါ/ကုန်းနှီးလွတ် စီးခြင်း
ကုန်းနှီးပါတဲ့မြင်း နဲ့ မပါတဲ့မြင်း နှစ်မျိုးရှိပါတယ်။ အဲဒီမြင်းတွေကို တက်စီးတော့ မြင်းကခါချပါတယ်။ အဲဒါကိုအချိန်ကြာကြာ ထိန်းနိုင်အောင် ကြိုးစားစီးရတဲ့ကစားနည်းပါ။

နွားသိုးစီးခြင်း
မြင်းကို စီးသလိုပါပဲ။ ခါချနေတဲ့ နွားသိုးတွေပေါ်မှာ တက်စီးကြတာပါ။

အဖွဲ့ဖြင့် နွားလေးကို ကြိုးချည်ခြင်း
မြင်းစီးလာတဲ့ လူနှစ်ယောက်မှာ တစ်ယောက်က နွားကလေးရဲ့ ချိုကို ဒါမှမဟုတ် လည်ပင်းကို ကြိုးကွင်းပစ်ပြီး စွပ်၊ နောက်တစ်ယောက်က နွားလေးရဲ့ နောက်ခြေထောက်ကို ကြိုးကွင်းစွပ်ပြီး ဖမ်းတဲ့နည်းပါ။

နွားလေးကို လေးဘက်လေးတန် တုပ်ခြင်း
မြင်းစီးလာတဲ့လူက နွားကလေးရဲ့ ခေါင်းကို ကြိုးကွင်းပစ်ပြီး စွပ်ပါတယ်။ မိတာနဲ့ မြင်းပေါ်က ပြေးဆင်းသွားပြီး နွားလေးကို တွန်းလှဲပြီး သူ့ခြေထောက်သုံးချောင်းကို မလှုပ်နိုင်အောင် ကြိုးနဲ့တုပ်ပါတယ်။

နွားကို နပန်းလုံး တွန်းလှဲခြင်း
မြင်းစီးလာသူက ပြေးနေတဲ့ နွားကို မီအောင်လိုက်ပြီး မီတဲ့အခါ ဆင်းပြီး နွားရဲ့ ဦးချိုကနေကိုင်ပြီး လှဲချတဲ့ ကစားနည်းပါ။

နွားလေးတွေကို ကြိုးချည်တာတို့ လှဲချတာတို့ လုပ်နေတဲ့အချိန်မှာ စိတ်ထဲ မကောင်းဖြစ်မိပါတယ်။ တစ်ကြိမ်မှာ နွားကလေးက လည်ပင်းကို ကြိုးပတ်တဲ့အချိန် ကြာသွားတော့ ပွဲအပြီး မှာ တော်တော်နဲ့ ပြန်မထနိုင်ပဲ ဆန့်ငင်ဆန့်ငင် ဖြစ်နေတာကို တွေ့ရတော့ စိတ်ပူမိတယ်။ ဒါကြောင့်လည်း တိရိစ္ဆာန်အခွင့်အရေး တောင်းဆိုသူတွေ ကန့်ကွက်စရာ ဖြစ်ရတာ လို့တွေးမိပါတယ်။ 

ကျွန်မဘေးမှာ ထိုင်နေတဲ့ ဂူလာလာကတော့ ဆက်မကြည့်တော့ပါဘူး။ သူ လာမိတာ မှားပြီလို့ ပြောနေပါတယ်။ ကျောပေါ်တက်စီးရင် ခါချတတ်တဲ့ မြင်းတွေနွားတွေကိုလည်း အဲဒီလို အတင်းခါချအောင် ခါးကို သံနဲ့ရိုက်ထားတယ်လို့ သူ ကြားဖူးတယ်တဲ့။ ဘေးက အိုင်အိုဝါသားတစ်ယောက်ကတော့ ဒီခေတ်မှာ အဲဒီလို မလုပ်တော့ပါဘူး လို့ရှင်းပြပါတယ်။ ဘယ်လိုပဲဖြစ်ဖြစ် ဒီကစားနည်းတွေက သူတို့ရဲ့ ကျေးလက်လုပ်ငန်းခွင်မှာ မြင်းတွေနွားတွေနဲ့ပတ်သက်လာရင် လက်တွေ့လိုအပ်တဲ့ ကျွမ်းကျင်မှုတွေ လို့ မှတ်သားခဲ့ရပါတယ်။ 

၃ နှစ် ၄ နှစ်အရွယ် ကလေးငယ်လေးတွေက သိုးလေးတွေကို စီးပြီးပြိုင်ကြတဲ့ ပွဲလည်းပါပါသေးတယ်။ သိုးလေးတွေ ဖြည်းဖြည်းခါချတာကို မခံနိုင်ပဲ ကလေးတွေ လဲပြိုကျတဲ့အခါ လူကြီးတွေက ရယ်ကြပါတယ်။ ဒီကလေးတွေ ကြီးလာတဲ့အခါ နွားစီးမယ့် ကောင်းဘွိုင်လေးတွေ ဖြစ်လာကြမှာပေါ့လေ။  ဓာတ်ပုံတွေတော့ သိပ်မရိုက်ဖြစ်ပဲ ဗွီဒီယိုနည်းနည်း ရိုက်လာခဲ့ပါတယ်။ မှောင်လာတဲ့အချိန်မှာ လျှင်မြန်လွန်းတဲ့ လှုပ်ရှားမှုတွေကို ကျွန်မကင်မရာနဲ့ အဝေးကလှမ်းရိုက်ရတာ မနိုင်တာကလည်း တစ်ကြောင်းပါ။ 

(ရိုဒီယို ဖွင့်လှစ်တဲ့ အခမ်းအနား)
(ရိုဒီယိုပွဲမှာ နေဘုန်းလတ်နဲ့ အမှတ်တရ)



၆။ အမေရိကန်ကျောင်းသားတွေရဲ့ စာသင်ခန်း

ကျွန်မမျှော်လင့်ထားတဲ့ စက်တင်ဘာ ၇ ရက်ကို ရောက်လာပါပြီ။ စောစောထ မနက်စာစားပြီးတော့ နာတာရှာနဲ့အတူ အိုင်အိုဝါတက္ကသိုလ်ထဲက စာသင်ခန်းတစ်ခန်းကို သွားကြပါတယ်။ အတန်းထဲက ကလေးတွေက အသက် ၁၆ - ၁၈ ပတ်ဝန်းကျင်လို့ နာတာရှာက ပြောပြပါတယ်။ သူတို့ဟာ ဖရက်ရှာ ကျောင်းသားလေးတွေပါ။

ကလေးတွေဟာ ဆရာမ နာတာရှာ ကြိုပြောထားတဲ့အတိုင်းပဲ တကယ့်ကို ငြိမ်သက်အေးဆေးပါတယ်။ ဒါပေမယ့် လွတ်လပ်ပေါ့ပါးပုံလည်း ပေါက်ပါတယ်။ နာတာရှာက ကျွန်မကို ကလေးတွေနဲ့ မိတ်ဆက်ပေးပါတယ်။ စာသင်ခန်းကျဉ်းကလေးမှာ ကျောင်းသူကျောင်းသား ၁၀ ယောက်ကျော် လောက်ပဲရှိတာပါ။ အဲဒီထဲက ထက်ဝက်လောက်ကိုတော့ ရုပ်ရှင်ခံစားမှု အစီအစဉ်မှာ တွေ့ခဲ့ရလို့ မှတ်မိနေပါတယ်။

နာတာရှာက ကျွန်မရဲ့ နာမည်ကို မြန်မာလိုရော အင်္ဂလိပ်လိုပါ ကျောက်သင်ပုန်းမှာ ရေးပြခိုင်းပါတယ်။ မြန်မာစာလုံး ဝိုင်းဝိုင်းလေးတွေကို သူတို့က စိတ်ဝင်စားနေကြပါတယ်။ ပြီးတော့ မြန်မာနိုင်ငံကို ကြားဖူးလား။ မြန်မာနိုင်ငံအကြောင်း ဘာသိလဲ လို့ ကလေးတွေကို မေးတော့ ကလေးတွေက သိပ်မပြောနိုင်ကြပါဘူး။ ဒါနဲ့ ဒေါ်အောင်ဆန်းစုကြည် နာမည်ကို ရေးပြပြီး သူ့ကို ကြားဖူးလားဆိုတော့ တစ်ယောက်နှစ်ယောက်က ကြားဖူးတယ် လို့ပြောကြပါတယ်။ 

နာတာရှာကတော့ ကလေးတွေရဲ့ အဖြေတွေကို အားမရဘဲ ကျွန်မကိုလည်း အားနာနေဟန်တူပါတယ်။ အတန်းပြီးသွားတဲ့အခါ ပြောပြပါသေးတယ်။ ကလေးတွေ သိပ်ပြီး စကားမပြောကြတာဟာ ရှက်လို့ကြောက်လို့ မဟုတ်ဘူး။ သူတို့ကိုယ် သူတို့ ယုံကြည်မှု လွန်ကဲနေကြတာ တဲ့။ ဒီခေတ် အမေရိကန်ကလေးတွေဟာ သူတို့ကိုယ်သူတို့ ပြီးပြည့်စုံတဲ့ နိုင်ငံမှာ နေထိုင်နေကြတယ် လို့ ထင်နေကြပြီး နိုင်ငံပြင်ပက ကိစ္စတွေကို စိတ်မဝင်စားကြတာလည်း တွေ့ရတယ်တဲ့။ ဒါကြောင့်မို့ အပြင်ဘက်ကိုလည်း ကြည့်ကြဖို့ တိုက်တွန်းနေရတယ်တဲ့။ ကျွန်မကတော့ ကျွန်မတို့ဆီမှာ ကိုယ့်ကိုယ်ကို ယုံကြည်မှု နည်းလို့ အတန်းထဲမှာ စကားပြန်မပြောရဲတဲ့ ကလေးတွေရဲ့ အဖြစ်နဲ့ ဆန့်ကျင်ဘက်ဖြစ်ရပုံကို စဉ်းစားနေမိပါတယ်။ 

အတန်းထဲမှာ ကျွန်မရဲ့ အကြောင်းကို သူတို့ကို နည်းနည်းပါးပါး မိတ်ဆက်ပြောပြပြီးတော့ ကျောင်းသားလေး တစ်ယောက်က ကျွန်မရဲ့ “လူပြိန်းများမြို့ကို သိမ်းပိုက်စဉ်” ကဗျာ ကို အသံထွက်ဖတ်ပါတယ်။ အဲဒီကဗျာကို အင်္ဂလိပ်လို ဘာသာပြန်ထားတာက “the scene of the city siege by the daft”  ပါ။ အဲဒီကဗျာမှာ the daft လို့ဘာသာပြန်ထားတဲ့ အင်္ဂလိပ် အသုံးအနှုန်းကို သူတို့တွေက ကျယ်ကျယ်ပြန့်ပြန့် ဆွေးနွေးကြပါတယ်။ the daft ဆိုတာက ဗြိတိသျှတွေ သုံးလေ့ သုံးထရှိတဲ့ စကားလုံးပါ။ အမေရိကန်တွေအနေနဲ့ သုံးလေ့မရှိပါဘူး။ ဒီကဗျာကို ဘာသာပြန်ထားသူ ကိုကိုသက်က ဥရောပနိုင်ငံတွေမှာ အခြေချနေထိုင်သူဖြစ်ပြီး အဲဒီကဗျာပါဝင်တဲ့ စုစည်းမှုစာအုပ်ကို တွဲဖက်တည်းဖြတ်သူ ဂျိမ်းစ်ဘန်းကလည်း ဗြိတိန်နိုင်ငံသား ဖြစ်ပါတယ်။ နာတာရှာနဲ့ ကျောင်းသားလေးတွေက ဒီနေရာမှာ အမေရိကန်တစ်ယောက်က ဘာသာပြန်မယ်ဆိုရင် the idiot ဒါမှမဟုတ် the fool လို့ ပြန်ကောင်းပြန်မယ် လို့ ဆွေးနွေးကြပါတယ်။ ဒါပေမယ့် the daft လို့ပြောလိုက်တာကတော့ ကဲ့ရဲ့ရှုံ့ချတာမျိုးမဟုတ်ဘဲ စိတ်ခံစားမှု ပိုကင်းတဲ့ neutral သဘောဆန်တယ် လို့ ဆွေးနွေးကြပါတယ်။ ပြီးတော့ ကျွန်မရဲ့ တခြားကဗျာတွေကို ဖတ်ကြပြီး မရှင်းတာကို မေးကြပါတယ်။ ဆက်ပြီးတော့ ကျွန်မပြခဲ့တဲ့ The tiger and the snow ရုပ်ရှင်အကြောင်းကို ဆွေးနွေးကြပါတယ်။

ဒီနေရာမှာ ကျွန်မတွေ့မြင်မိတာကတော့ အမေရိကန်ကျောင်းသားလေးတွေရဲ့ လေ့လာနိုင်ခွင့်နဲ့ ယနေ့ခေတ် နိုင်ငံတကာစာပေ အနုပညာတွေကို လက်လှမ်းမီနိုင်မှုကိုပါ။ IWP ကို ရောက်လာကြတဲ့ စာရေးဆရာတွေဟာ အသက်အရွယ်၊ အောင်မြင်ကျော်ကြားမှု၊ အသိအမှတ်ပြုခံရမှုတွေ အမျိုးမျိုး ကွဲပြားကြပေမယ့်လည်း အားလုံးကတော့ ခေတ်ပြိုင်ရေးသားနေဆဲ စာရေးဆရာတွေပါ။ ဒီလိုလူတွေ လက်ရှိရေးသားဆဲ ပူပူနွေးနွေး လက်ရာတွေကို အမေရိကန်ကျောင်းသားတွေဟာ စာရေးဆရာ ကိုယ်တိုင်နဲ့အတူ လေ့လာခွင့် ဆွေးနွေးခွင့် ရကြခြင်းဟာ တကယ်ကို တန်ဖိုးရှိတဲ့ အတွေ့အကြုံပါ။ ကျွန်မတို့ဆီမှာလည်း စာပေဆိုင်ရာ ဘာသာရပ်တွေ အထူးပြုလေ့လာကြတဲ့ ကျောင်းသားတွေကို ဂန္ထဝင်စာပေတွေသာမက အခုလို ခေတ်ပြိုင်လက်ရာတွေကို လေ့လာဆွေးနွေးနိုင်ဖို့ သင်ရိုးတွေကို မွမ်းမံပြင်ဆင်ကြရင် ကောင်းမယ်လို့တွေးမိပါတယ်။ (နောက်ပိုင်းမှတော့ သူတို့ဆီမှာ အခုလိုခေတ်နဲ့ တပြေးညီ လေ့လာခွင့်ရတာဟာ တက္ကသိုလ်အဆင့်သာမက အထက်တန်း အလယ်တန်း ကျောင်းတွေမှာပါ ရှိတယ်ဆိုတာကို creative writing အတန်းတွေမှာ ပါဝင်ကူညီခဲ့တဲ့အခါ ပိုနားလည်ခဲ့ရပါသေးတယ်။) 

အတန်းချိန် ကုန်ဆုံးသွားတဲ့အခါမှာတော့ ကျောင်းသားတွေဟာ ပြောလက်စ စကားတွေ အကုန်ဖြတ်၊ စာအုပ်တွေ ကောက်သိမ်းပြီး သူတို့ကျောပိုးအိတ်ကလေးတွေလွယ် ဘိုင့်ဘိုင်ဆိုပြီး အတန်းထဲက ချက်ချင်းထွက်သွားကြတာကတော့ ကျွန်မကို သူတို့ရဲ့ ယဉ်ကျေးမှုဆိုင်ရာ အသိတစ်ခု တိုးစေပါတယ်။ ကျောင်းသားတွေဟာ သူတို့ အတန်းချိန်စေ့သွားတဲ့အခါ လုံးဝအားမနာကြပါဘူး။ ဒါဟာ သူတို့ရဲ့ အခွင့်အရေးလို့ပဲ ယူဆတာလည်း ဖြစ်နိုင်ပါတယ်။ ဒါမှမဟုတ် အချိန်တိတိကျကျ လုပ်ကိုင်လေ့ရှိတဲ့ သူတို့လူမျိုးတွေအဖို့ နောက်ထပ် အတန်းတစ်တန်းကို အချိန်မီ သွားဖို့လိုအပ်လို့လည်း ဖြစ်နိုင်ပါတယ်။  ကျွန်မကိုယ်တိုင်လည်း ညနေပိုင်း အစီအစဉ်ဖြစ်တဲ့ panel discussion အတွက် စာကြည့်တိုက်ကို သုတ်ခြေတင်ရပါတယ်။    


၇။ ကျားမဖြစ်တည်မှု ဆွေးနွေးပွဲ

IWP မှာ စာရေးဆရာတိုင်း ပါဝင်ရတဲ့ အစီအစဉ်တစ်ခုကတော့ public library မှာ ကျင်းပလေ့ရှိတဲ့ panel discussion ဖြစ်ပါတယ်။ ပထမဆုံး ရက်သတ္တပတ်မှာ  “ကျားမဖြစ်တည်မှု” ခေါင်းစဉ်ကို ဆွေးနွေးဖို့ အလှည့်ကျပါတယ်။  အဲဒီခေါင်းစဉ်အောက်မှာ မြန်မာအမျိုးသမီးကဗျာဆရာတွေရဲ့ အခန်းကဏ္ဍအကြောင်း ပြောဖို့ ကျွန်မက စာတမ်းတစ်ခု ပြင်ဆင်ထားခဲ့ပါတယ်။ 

ဖြစ်ချင်တော့ အဲဒီ ဆွေးနွေးပွဲအပြီးမှာ သမ္မတ အိုဘားမားရဲ့ မိန့်ခွန်းပြောပွဲကို သွားဖို့ရှိနေပါတယ်။ တစ်နေ့လုံး အစီအစဉ်တွေ ပြည့်နေတဲ့ မှတ်မှတ်ရရ နေ့တစ်နေ့ပါ။ ကျွန်မက ကြုံရင်ကြုံသလို အခန်းအနားတွေမှာ ဝတ်ဖို့ မြန်မာဝတ်စုံ တချို့ထည့်လာခဲ့ပါတယ်။ အစကတော့ အဲဒီနေ့ ဆွေးနွေးပွဲမှာ မြန်မာလို ဝတ်မယ်လို့ စိတ်ကူးမိပေမယ့် အိုဘားမား ကြိုဆိုမယ့် လူအုပ်ထဲကို တိုးရမှာမို့ အိုင်အိုဝါ စာတန်းပါတဲ့ T-shirt လေးကိုပဲ ဝတ်လိုက်မိတာကလည်း မှတ်မှတ်ရရပါပဲ။ 

ဆွေးနွေးသူတွေကတော့ ဥဇဘက်ကစ္စတန် က အလီနာ၊ အီရတ်က ဂူလာလာ၊ အာဖဂန်နစ္စတန်က မိုဟစ်၊ စင်ကာပူက စတက်ဖနီ နဲ့ မြန်မာပြည်က ကျွန်မ ၊ အားလုံး ငါးယောက်ဖြစ်ပါတယ်။ ဆွေးနွေးပွဲကို နာတာရှာက နှုတ်ခွန်းဆက်စကား ပြောပေးပြီး၊ moderate လုပ်ပေးသူက ဖရော်ဖက်ဆာ ဆရာမကြီး အမ်မာရီတာ လင်ဒါ ကာဘာ (Emerita Linda Kerber) ဖြစ်ပါတယ်။ မိုဟစ်က “စစ်ပွဲအတွင်း စာရေးခြင်း” ဆိုတဲ့ ခေါင်းစဉ်အောက်မှာလည်း စာတမ်းဖတ်ဖို့ စာရင်းသွင်းထားပေမယ့် ကျားမဖြစ်တည်မှု ခေါင်းစဉ်မှာ အမျိုးသမီးတွေချည်း ပြောနေတာ ဖြစ်မှာစိုးလို့ အမျိုးသားတစ်ယောက် အနည်းဆုံး ထည့်ချင်တဲ့အတွက် ဒီခေါင်းစဉ်မှာလည်း ပါဝင်ဖို့ သူ့ကို ဖိတ်ခေါ်ခဲ့တာပါ။ ကျွန်မသတိထားမိပါတယ်။ သူတို့ဆီမှာ ပွဲစီစဉ်ရင် ပြောသူတွေဟာ ယောင်္ကျားတွေချည်းပဲ ဒါမှမဟုတ် မိန်းမတွေချည်းပဲ မဖြစ်အောင် သတိထားပြီး နေရာချ စီစဉ်တတ်ကြပါတယ်။ 

(ကျားမဖြစ်တည်မှု ဆွေးနွေးပွဲမှာ နာတာရှာက မိတ်ဆက်စကား ပြောနေစဉ်)



အီရတ် နဲ့ အာဖဂန်နစ္စတန် နိုင်ငံတွေမှာတော့ မျှော်လင့်ထားတဲ့အတိုင်းပဲ မိန်းမတွေအပေါ် ဖိနှိပ်မှုတွေ များလှပါတယ်။ အဲဒီလိုဖိနှိပ်မှုတွေကြောင့် အမျိုးသမီးတွေရဲ့ စာပေအနုပညာ ဖန်တီးမှုကို ထိခိုက်ရတဲ့အကြောင်းတွေကို ဂူလာလာနဲ့ မိုဟစ်တို့က ထောက်ပြသွားခဲ့ပါတယ်။  ဥဇဘက်ကစ္စတန်က အလီနာ ပြောသွားတာကတော့ ရှုထောင့်တစ်မျိုးပါ။ အမျိုးသမီးတွေကိုယ်တိုင်ကိုက အားနည်းတဲ့ လိင်အဖြစ် ဦးစားပေးခံရခြင်း၊ အိမ်ထောင်မှု ထိန်းသိမ်းခြင်း၊ ယောင်္ကျားကို မှီခိုခြင်းတွေကို အခွင့်အရေးအဖြစ် မှတ်ယူနေတာကို တွေ့ရှိရတဲ့အကြောင်းပါ။ စင်ကာပူကတော့ ကျားမဖြစ်တည်မှုခေါင်းစဉ်အောက်မှာ စင်ကာပူနိုင်ငံမှာ ယောင်္ကျားလေးတွေဟာ မဖြစ်မနေ စစ်မှုထမ်းရတဲ့အတွက် အလုပ်ခွင်နဲ့ တိုးတက်မှုမှာ ဆုံးရှုံးရတဲ့ ရှုထောင့်ကနေ ပြောပြသွားပါတယ်။ ကျွန်မကတော့ ၂၀၁၂ ကမ္ဘာ့ကဗျာနေ့မှာ ရန်ကုန်မှာ ဖတ်ခဲ့တဲ့ စာတမ်းကို အတိုချုပ်ပြီး ပြန်ပြောပြခဲ့ပါတယ်။  (စာတမ်း ဖတ်ရှုရန်)

( ဆွေးနွေးသူများ။ ဝဲမှယာ - စတက်ဖနီ ရဲ(စင်ကာပူ)၊ အလီနာ ဒါဒီဗာ (ဥဇဘက်ကစ္စတန်)၊ ဂူလာလာ နိုရိ (အီရတ်)၊ မိုဟစ် ဇဂမ်း (အာဖဂန်နစ္စတန်)၊ ပန်ဒိုရာ (မြန်မာ))


ပရိသတ်က မေးခွန်းတွေ မေးချင်သေးပေမယ့် အိုဘားမား မိန့်ခွန်းခြွေမယ့်နေရာကို အချိန်မီသွားကြရမှာမို့ ဆွေးနွေးပွဲကို နိဂုံးချုပ်လိုက်ပါတယ်။ အဲဒီနောက်မှာတော့ စာကြည့်တိုက်ထဲက ထွက်လာတဲ့ အားလုံးလိုလိုပါပဲ  သမ္မတအိုဘားမားရဲ့ မိန့်ခွန်းကို နားထောင်ကြဖို့ တန်းစီရမယ့် နေရာကို သွားကြပါတယ်။ လက်ထဲမှာလည်း လက်မှတ်ကိုယ်စီကိုင်ဆောင်လို့ပါ။ သမ္မတအိုဘားမားကို အပြင်မှာ ကိုယ်တိုင်ကိုယ်ကျ မြင်ဖူးတော့မှာမို့ ကျွန်မအပါအဝင် စာရေးဆရာတွေဟာ စိတ်လှုပ်ရှား ပျော်ရွှင်နေကြပါတယ်။ 

ပန်ဒိုရာ

(ဆက်လက်ဖော်ပြသွားပါမည်။)
၂၀၁၃ ဧပြီလ စတိုင်သစ် မဂ္ဂဇင်းတွင် ဖော်ပြပြီး။ 





Expand..

Monday, May 6, 2013

အိုင်အိုဝါ ရက်စွဲများ (အပိုင်း ၁)

၂၀၁၂ ခုနှစ်က International Writing Program တက်ရောက်ဖို့ အိုင်အိုဝါမြို့ကို ရောက်နေတုန်းမှာ အဲဒီခေါင်းစဉ်နဲ့ပဲ စာတစ်ပုဒ် တင်ဖူးပါတယ်။ နောက်တော့ ဆက်မရေးဖြစ်ပါဘူး။ ဒီပြန်ရောက်တဲ့အခါ စတိုင်သစ်မဂ္ဂဇင်းက ကိုလူဇော်သစ်ရဲ့ အားပေးမှုကြောင့် ခရီးသွားဆောင်းပါးဆန်ဆန် ဆက်ရေးဖြစ်ပါတယ်။ အိုင်အိုဝါရက်စွဲများ အပိုင်း (၁) က နေ (၃) အထိကို ၂၀၁၃ မတ်လထုတ် စတိုင်သစ်မဂ္ဂဇင်းမှာ စပြီး အခုအထိ လစဉ် ဆက်တိုက် ဖော်ပြလျက်ရှိပါတယ်။ နောက်ထပ်လည်း ဆက်ရေးနေဆဲပါ။ ကံကောင်းထောက်မပြီး သွားဖြစ်ခဲ့တဲ့ အဲဒီခရီးမှာ ကျွန်မအနေနဲ့ ဘာတွေ ကြိုးစားပန်းစား လုပ်ဆောင်ဖြစ်ခဲ့တယ်ဆိုတာတွေရယ် ခရီးသွား အတွေ့အကြုံတွေရယ် ကို မဂ္ဂဇင်း မဖတ်ဖြစ်တဲ့ ဝေးရပ်မြေက ကျွန်မရဲ့ မိတ်ဆွေသူငယ်ချင်းတွေ၊ ဘလော့ဂါ ရေးဖော်ရေးဖက်တွေနဲ့ အခြားသော စာရေးသူ စာဖတ်သူတွေကို ဝေမျှချင်တဲ့စိတ်နဲ့ ဘလော့ဂ်မှာလည်း ပြန်တင်လိုက်ပါတယ်။ အရင်ရေးခဲ့တဲ့ ဆောင်းပါးအစပိုင်းကို တော့ ပြန်ပြုပြင်ပြီး ရေးထားပါတယ်။

.....................................




အိုင်အိုဝါ ရက်စွဲများ (အပိုင်း ၁)



၁။ အိုင်အိုဝါသို့ ပျံသန်းခြင်း

မင်း ဒီအစီအစဉ်ကို တက်နိုင်မလား တဲ့။ မမျှော်လင့်ဘဲ သူတို့က မေးလာတော့ ကျွန်မအံ့သြမိပါတယ်။ ကျွန်မက မြန်မာပြည်မှာ အသိအမှတ်ပြုခံရတဲ့ စာရေးဆရာ၊ကဗျာဆရာတစ်ယောက် ပီပီပြင်ပြင် မဟုတ်သေးဘူးလို့ ကိုယ့်ကိုယ်ကို မှတ်ယူခဲ့သူပါ။ မိသားစုစီမံကိန်းအတွက် စင်ကာပူအလုပ်က ခွင့်ယူပြီး ကိုယ့်နိုင်ငံမှာ ပြန်အနားယူနေတာမို့ ကျွန်မ ခရီးသွားနိုင်မယ့် အခြေအနေ ဘာမှန်းမသိခင် အခုချက်ချင်းဆိုရင် အကြောင်းပြန်လို့မရဘူးလို့ ပြောလိုက်တယ်။ အဖြေပြောနိုင်တဲ့ နေ့တစ်နေ့မှာ ဖိတ်ခေါ်စာ ရောက်လာခဲ့တယ်။ ခရီးထွက်လို့ ဖြစ်နိုင်တဲ့ အနေအထားမို့ လာခဲ့မယ်လို့ အကြောင်းပြန်ခဲ့တယ်။ အဲဒီနောက်တော့ စာရွက်စာတမ်းတွေ လျှောက်လွှာတွေနဲ့ နပမ်းလုံးရတော့တာပါပဲ။

၂၀၁၂  သြဂတ်စ် ၂၄ ရက် ညနေ ၄ နာရီခွဲ မှာ ရန်ကုန်လေဆိပ်က ထွက်လာတဲ့ လေယာဉ်တစ်စီးထဲ လိုက်ပါလာခဲ့တယ်။ ခရီးတွေ အကြိမ်ကြိမ်သွားခဲ့ပေမယ့် ဒီတစ်ကြိမ် ပျံသန်းရတဲ့ ခရီးကတော့ မရောက်ဖူးတဲ့ ဒေသတစ်ခုက မကြုံဖူးသေးတဲ့ အတွေ့အကြုံတွေဆီကိုပါ။ ကိုယ်စိတ်ဝင်စားတာတာတွေကို အလေးအနက်လုပ်နိုင်ဖို့ အချိန်လပ်ကလေးတစ်ခု ဘဝမှာ ရှိခွင့်ရလာတာဟာ သိပ်ကို ကံကောင်းပါတယ်။ အလုပ်ကနေ ခွင့်ရက်ရှည်ယူပြီး အမိမြေမှာ မိသားစုနဲ့ ပြန်လည်နေထိုင်တဲ့အခိုက်  အမေရိကန်နိုင်ငံ အိုင်အိုဝါတက္ကသိုလ်က စီစဉ်တဲ့ ၄၆ ကြိမ်မြောက် International Writing Program(IWP) ရဲ့ ၂၀၁၂ ဆောင်းဦးပေါက်ရာသီ အစီအစဉ်ကို တက်ရောက်ဖို့ ကြုံလာခဲ့ရတယ်။

ကျွန်မအတွက် သူတို့ဝယ်ပေးထားတဲ့ လေယာဉ်လက်မှတ်က ရန်ကုန်-ဘန်ကောက်-နာရီတာ(တိုကျို)-ချီကာဂို-စီဒါရက်ပစ် ခရီးစဉ်ပါ။ စီဒါရက်ပစ် Ceder Rapids ဆိုတာက ခရီးအဆုံးဖြစ်တဲ့ အိုင်အိုဝါမြို့ကနေ တစ်နာရီခွဲ ၂ နာရီလောက် ကားမောင်းရတဲ့ မြို့လေးပါ။ တကယ်တော့ ၂၀၁၂ အတွက် မြန်မာနိုင်ငံက IWP တက်ဖို့ ဖိတ်ကြားခံရတာ ကျွန်မရယ် ဘလော့ဂါ နေဘုန်းလတ်ရယ် ၂ ယောက်ပါ။ နေဘုန်းလတ်က ပတ်စပို့နဲ့ ဗီဇာ အဆင်သင့်မဖြစ်သေးလို့ နောက်ကျပြီး နေရစ်ခဲ့ရပါတယ်။ ဒီတော့လည်း ခရီးရှည်ကြီးကို တစ်ယောက်တည်း ပျံသန်းလာခဲ့ရပါတယ်။

ရန်ကုန်ကနေ ဘန်ကောက် လေဆိပ်ထဲရောက်တဲ့အချိန်မှာ ညနေ ၆နာရီခွဲလောက် ဆိုတော့ တော်တော် စောနေသေးတယ်။ ဘန်ကောက်မှာ ညအိပ်နားပြီး မနက်အစောကြီးမှာ တိုကျိုကို ပျံသန်းရပါမယ်။  Louis Tavern ဟိုတယ် မှာ ၄ နာရီလောက် ညအိပ်နား ရေချိုးပြီး မနက် ၅ နာရီမှာ ဘန်ကောက်လေဆိပ်ကနေ တိုကျို နာရီတာ လေဆိပ် ကို ၆ နာရီကျော် ပျံသန်းခဲ့ပါတယ်။

နာရီတာ ကိုရောက်တော့ အချိန်ရသေးတာနဲ့ လေဆိပ်ကစားသောက်ဆိုင်မှာ ဘာစားရင်ကောင်းမလဲ ကြည့်တယ်။ ဂျပန် ပဲခေါက်ဆွဲ တစ်ပွဲဝယ် စားလိုက်တယ်။ ၉ ဒေါ်လာကျော်ပေးရတယ်။ လေဆိပ်ဆိုတော့လည်း ဈေးကြီးတာပေါ့လေ။ ကျွန်မက အချိန်ရတာနဲ့ လေဆိပ်ထဲကို လှည့်ပတ်ကြည့်လိုက်ပါသေးတယ်။ ချီကာဂို ကိုပျံမယ့် လေယာဉ်က ညနေ ၄ နာရီ ၃၅ ထွက်ရမှာကို တစ်နာရီ လေယာဉ်နောက်ကျပြီး  ညနေ ၅ နာရီ ၃၅ မှထွက်လာခဲ့ပါတယ်။ 


Narita လေဆိပ်


ချီကာဂို ကိုရောက်အောင် ၈ နာရီလောက် ပျံသန်းခဲ့ရပါတယ်။ ရောက်တဲ့အချိန်မှာ ဒေသစံတော်ချိန် ညနေ ၃နာရီခွဲလောက်ရှိပါပြီ။ နောက်ထပ် ပြောင်းစီးရမယ့် ပြည်တွင်းလေယာဉ် က ညနေ ၆ နာရီ ၅ မိနစ်ထွက်မှာဆိုတော့ အေးအေးဆေးဆေးပဲ လို့ထင်မိခဲ့ပေမယ့် transit သွားမယ့် လိုင်းက immigration မှာ တန်းစီရပါတယ်။ လူတန်းရှည်ကြီးထဲမှာ ၂ နာရီကျော်လောက် စောင့်ပြီးတော့မှ တံဆိပ်တုံးထုလို့ပြီးပါတယ်။ တန်းစီနေတဲ့အတောအတွင်းမှာ တန်းစီနေတဲ့ လူတွေကို ရဲခွေးတွေက အနံ့ခံရှာဖွေပါတယ်။ သစ်သီးတွေ အပင်နဲ့ပတ်သက်တဲ့ အရာတွေပါလာရင် ချက်ချင်း သိမ်းလိုက်ပါတယ်။

ပြည်ဝင်ခွင့်ကိစ္စ ပြီးသွားတော့ ကျွန်မရဲ့ luggage ကို လိုက်ရှာရပါတယ်။ ကျွန်မစီးလာခဲ့တဲ့ လေယာဉ်က ဆိုက်တာ ကြာနေပြီဆိုတော့ luggage တွေက တန်းစီပြီး လည်နေတဲ့အထဲမှာ မရှိတော့ဘူး။ ဒါနဲ့ လုံခြုံရေးတွေကို မေးပြီး ကိုယ့်အိတ်တွေရှိတဲ့နေရာကို လိုက်ရှာရတယ်။ အိတ်ရပြီးတော့ ပြည်တွင်းလေယာဉ် ရှိတဲ့ နေရာမှာ အိတ်ကို check in ပြန်လုပ်ရတယ်။ လက်ဆွဲအိတ် တွေကို ဆွဲပြီး လေယာဉ်ထွက်မယ့် ဂိတ်ကိုရှာပြီး လေယာဉ်ကွင်းထဲ ပတ်နေတဲ့ မိုးပျံရထားလေးကို စီးသွားရပြန်ပါတယ်။

 လေယာဉ် ထွက်မယ့် နေရာကို ရောက်တော့ စစ်ဆေးရေး ဖြတ်ရပြန်တယ်။ အဲဒီမှာလည်း လူတန်းရှည်ကို စောင့်ရပြန်တယ်။ (စစ်ဆေးရေးတွေက တစ်ခါဖြတ်တိုင်းမှာ ကွန်ပြူတာအပြင်ထုတ်၊ ဖိနပ်ချွတ်၊ ခါးပတ်ပါရင်ချွတ်ပြီး ဗန်းတွေထဲ ထည့်ရတယ်။) ဖြတ်ပြီးတော့ ကိုယ့်လေယာဉ်ထွက်မယ့် ဂိတ်ကို  အဲဒီအထဲကနေ ငါးမိနစ်လောက် လမ်းလျှောက်သွားရပြန်တယ်။ အချိန်က ညနေ ၆ နာရီထိုးခါနီးနေပြီဆိုတော့ အပြေးတပိုင်းသွားရတယ်။ လေယာဉ်ပေါ် ရောက်ပြီး နောက် ၅ မိနစ်ကြာတယ်ဆို ထွက်တာပါပဲ။ မီရုံလေးရှိတယ်။ (နောက်မှ ပြန်သိရတာ မမီခဲ့ရင် နောက်တစ်နေ့ထွက်တဲ့ လေယာဉ်နဲ့မှ လိုက်ရမတဲ့။) အဲဒီခရီးကတော့ အတော့်ကို သုတ်ချေတင်ခဲ့ရပါတယ်။

လေယာဉ်ပျံချိန် တစ်နာရီတောင် မကြာဘဲ စီဒါရက်ပစ် လေဆိပ်ကို ဆိုက်ရောက်လာပါတယ်။ ညနေ ၇ နာရီလောက်ရှိပါပြီ။ အဲဒီမှာ ပထမဆုံးကြုံကြိုက်ခဲ့ရတာကတော့ သူတို့ရဲ့ ဖော်ရွေမှုနဲ့ ဝန်ဆောင်မှုပါ။ luggage တွေကို ရွေးဖို့ တွန်းလှည်းယူတော့ ပိုက်ဆံ ၂ဒေါ်လာထင်ပါတယ်။ deposit ထည့်ရမယ် လို့ရေးထားပါတယ်။ ကျွန်မမှာ အကြွေမရှိလို့ အခက်အခဲတွေ့နေတုန်း လေဆိပ်က ဝန်ထမ်းတစ်ယောက်က ဝန်ထမ်းတွေ သုံးတဲ့ တွန်းလှည်းတစ်စီးကို ထုတ်လာပေးတယ်။ ဒါဆိုရင် မင်းပိုက်ဆံသုံးစရာမလိုတော့ဘူးပေါ့ တဲ့။  အဲဒီတွန်းလှည်းလေးကို သူကိုယ်တိုင် တွန်းပြီး ကိုယ့်အနားမှာ လာကူစောင့်ပေးတယ်။ လက်ထဲက ပစ္စည်းတွေကို  ကူသယ်ကူချပေးတယ်။ အပျင်းပြေအောင် သူက စကားတွေလာပြောပေးနေတယ်။ ယဉ်ယဉ်ကျေးကျေး ဖော်ဖော်ရွေရွေပဲ။  ဒါပေမဲ့လည်း ကျွန်မ စောင့်နေတဲ့ luggage က ပါမလာဘဲ ချီကာဂိုမှာ ကျန်ရစ်ခဲ့တယ်တဲ့။ လေယာဉ်အကူးအပြောင်းမှာ အချိန်မမီလို့ကျန်ခဲ့တယ်လို့ ယူဆရပါတယ်။

ဒီလို အဆင့်ဆင့်ပြောင်းပြီး လေယာဉ်စီးရတာမျိုး လွန်ခဲ့တဲ့ ဆယ်နှစ်လောက်က တစ်ကြိမ်ကြုံခဲ့ပါတယ်။ အရေးကြီးတာကတော့ အဲဒီလေယာဉ်တွေ ရပ်နားတိုင်းမှာ ကိုယ် check in လုပ်လိုက်တဲ့ အိတ်တွေ ပါလာမလာ စုံစမ်းကြည့်ဖို့နဲ့ လေယာဉ်ချိန်တွေ ပြောင်းမပြောင်း အမြဲ စစ်ကြည့်နေဖို့ပါ။ ဥပမာ - ဘန်ကောက်လေဆိပ်ကနေ နာရီတာကို ထွက်ခါနီးမှာတော့ လေကြောင်းလိုင်း ပြောင်းသွားတဲ့အတွက် ကျွန်မရဲ့ ပစ္စည်းတွေကို ပြန်ရွေးရမဲ့ code နံပါတ်ပါ ပြောင်းသွားခဲ့ပါတယ်။  အဲဒီလို စစ်ခဲ့တာတောင်မှ အခုတော့ luggage က ကျန်ရစ်ခဲ့ပါသေးတယ်။ (နောက်ထပ်သိရတာက စာရေးဆရာ ၁၀ ယောက်လောက် အဲဒီလိုပဲ သူတို့ luggage တွေ ကျန်ရစ်ခဲ့ရတယ်။ နောက်မှ ပြန်လာပို့တယ် တဲ့)။ ကျွန်မက လိုလိုမယ်မယ် ကျွန်မရဲ့ လက်ဆွဲအိတ်ထဲမှာ အဝတ်အစားအပိုတွေနဲ့ လတ်တလော လိုတဲ့ အသုံးအဆောင်တွေကို ထည့်ထားမိခဲ့လို့ တော်သေးတာပေါ့။

လေဆိပ်ကို အိုင်အိုဝါတက္ကသိုလ်က မိန်းကလေးတစ်ယောက် လာကြိုတယ်။ သူ့ကိုယ်သူ ဒရိုင်ဘာပါ လို့မိတ်ဆက်တယ်။ နောက်မှ သိရတာက အဲဒီမြို့လေးမှာ ကျောင်းက ပရိုဂရမ်တွေမှာ ဒရိုင်ဘာအနေနဲ့ အချိန်ပိုင်း အလုပ် လုပ်နေကြသူတွေဟာလည်း ကျောင်းပြီးခါစ ဒါမှမဟုတ် ဘွဲ့ကြို ဘွဲ့လွန်တက်နေတဲ့ ကျောင်းသားတွေ ဖြစ်နေကြတာကိုပါ။ သူတို့ဟာ စာရေးဆရာတွေလည်း တစ်စိတ်တစ်ပိုင်း ဖြစ်နေတတ်ကြပါတယ်။ အိုင်အိုဝါဟာ စာပေမြို့တော်လေး ဖြစ်လေတော့ တမြို့လုံးမှာ ကျောင်းသားတွေ ကျောင်းဆရာတွေနဲ့ စာရေးဆရာတွေ ပြည့်နှက်လို့နေပါတယ်။

အဲဒီနေ့က ညနေ လေယာဉ်တွေနဲ့အတူ ပါလာကြသူတွေကတော့ ပါကစ္စတန်၊ ဂရိ၊ အီရတ် နိုင်ငံတွေက စာရေးဆရာတွေပါ။ အီရတ်က စာရေးဆရာမ  “ဂူလာလာ နိုရိ” နဲ့ ကျွန်မဟာ မြင်မြင်ချင်းပဲ စကားတွေပြောဖြစ်ပြီး ခင်မင်သွားကြပါတယ်။ ဖြစ်ချင်တော့ စီဒါရက်ပစ် လေဆိပ်ကို ဂူလာလာရဲ့ အိတ်ရော ကျွန်မရဲ့ အိတ်တွေပါ ပါမလာခဲ့လို့ လေဆိပ်မှာပဲ သတင်းပို့ ထားလိုက်ခဲ့ရတယ်။ ပါကစ္စတန်က စာရေးဆရာက ပြောတယ်။ ဘာမှမပူပါနဲ့ ဒီနိုင်ငံဟာ ဘာမဆို အားလုံးအတွက် လွယ်ကူအောင် လုပ်ထားတာ။  အိတ်တွေ နောက်နေ့ ရောက်ကို ရောက်လာမှာပါ တဲ့။ သူကတော့ အမေရိကကို ရင်းနှီးပြီးသားပါ။

လေဆိပ်ကထွက်လာတဲ့ ကားလမ်းဘေး တစ်ဖက်တစ်ချက် မှာတော့ မြင်ကွင်းတွေက ကျယ်တယ်။ မြင်လေရာရာ တမျှော်တခေါ်ရှုခင်းတွေထဲမှာ လေထုကလည်း သန့်ရှင်းနေတယ်။ အိုင်အိုဝါမြို့ထဲဝင်လာတော့ အိမ်ကလေးတွေက သပ်သပ်ရပ်ရပ် လှလှပပနဲ့ လုံးချင်းအိမ်လေးတွေများတာကို တွေ့ရပါတယ်။ အဆောက်အဦ အမြင့်တွေ မမြင်ရဘူး။ မိုးလည်း ဖွဲဖွဲရွာနေတယ်။ နေရမယ့် Iowa House Hotel ကိုရောက်လာကြတယ်။ အဲဒီဟိုတယ်က အိုင်အိုဝါတက္ကသိုလ် ရဲ့ ကျောင်းဝင်းထဲမှာပါပဲ။ ဟိုတယ်ခန်းထဲမှာတော့ ခုတင်တစ်လုံး စားပွဲ ကုလားထိုင်တွေနဲ့ ရေခဲသေတ္တာတစ်လုံး မိုက်ခရိုဝေ့ဖ်မီးဖို တစ်လုံး ပေးထားပါတယ်။

ခဏနားပြီးတော့ ဂူလာလာက အပြင်မှာ လိုတာလေးတွေ ဝယ်မယ်ဆိုလို့ နှစ်ယောက်သား ထွက်လာခဲ့ကြတယ်။ ဟိုမေးဒီမေးနဲ့ စားသောက်ဆိုင်တန်းတွေ ရှိတဲ့နားတွေဖြတ်ပြီး ရှော့ပင်းမောလ်လေး တစ်ခု ရှိတဲ့နေရာကို ရောက်သွားတယ်။ (နောက်ပိုင်းတော့ အဲဒီ Old Capital Mall ဟာ မကြာခဏ သွားဖြစ်တဲ့နေရာတစ်ခု ဖြစ်လာခဲ့တယ်။)  ည ၉ နာရီကျော်ပြီဆိုတော့ ဆိုင်တွေက ပိတ်နေပြီ။ ဝယ်မရတော့ဘူး။ ကျွန်မအတွက် ညနေစာကို ခေါက်ဆွဲပြုတ် ပွဲအသေးလေး ပါဆယ်ဝယ်ခဲ့ပါတယ်။ ဂူလာလာကတော့ ညနေစာ မစားဘူးတဲ့။ အပြန်မှာ နှစ်ယောက်သား လမ်းမှားသွားကြသေးတယ်။ မိုးကလည်း ဖွဲဖွဲ ရွာနေဆဲပါ။ လမ်းမှာတွေ့တဲ့ ကျောင်းသားလေးတွေကို မေးမြန်းပြီး ဟိုတယ်ကို ပြန်ရောက်လာကြတယ်။ ည ၁၀ နာရီကျော် နေပေမယ့် ပတ်ဝန်းကျင်ကတော့ သွားလာနေကြတဲ့ ကျောင်းသားတွေနဲ့ လူသူမပြတ်ပါဘူး။

နောက်တစ်နေ့ မနက်စာ ကို ဟိုတယ်က ကျွေးပါတယ်။ အာရှတိုက်သားတစ်ယောက်ရဲ့ ပါးစပ်အတွက်ဆိုရင် ခြောက်ခြောက်ကပ်ကပ်မို့ သိပ်စားမဝင်ပါဘူး။ ပေါင်မုန့်၊ ဒိုးနပ်၊ သစ်သီး၊ ကော်ဖီ၊ လက်ဖက်ရည်၊ ဒိန်ချဉ်၊ စီရီယယ်လ်တွေနဲ့ နို့နဲ့ စသည်ဖြင့်ပါ။(အဲဒါကိုပဲ ဆင်တူ နေ့တိုင်းကျွေးလိမ့်မယ်လို့လည်း အဲဒီတုန်းက မထင်မိခဲ့သေးဘူး။) နေ့လည်ကျတော့ မိုးရွာနေတာမို့ ကျောင်းက ရုံးခန်းကို သွားကြမယ့် အစီအစဉ်ကို ဖျက်လိုက်ပါတယ်။ ဒါနဲ့ပဲ ရှော့ပင်းမောလ်တစ်ခုဆီကို ဂရိက စာရေးဆရာရယ် အီရတ်က စာရေးဆရာမရယ် နဲ့ တက္ကစီ ငှားပြီး သွားကြတယ်။ အဲဒီမောလ် နာမည်ကတော့ Coral Ridge Mall တဲ့။   ညနေပြန်ရောက်တော့ ခေါင်းပြန်ကိုက်ပြီး အအေးမိသလိုဖြစ်နေတာနဲ့ ဆေးသောက်လိုက်ရတယ်။ လည်ချောင်းကလည်း နာလာတယ်။ အဲဒီညနေရောက်တော့  ချီကာဂို လေဆိပ်မှာ ကျန်ခဲ့တဲ့ luggage ဟိုတယ်ကို ရောက်လာတယ်။

ကျွန်မ နေရတဲ့အခန်းမှာ ပြတင်းပေါက်က လှမ်းကြည့်လိုက်ရင် ငြိမ့်ငြိမ့်လေးစီးနေတဲ့ အိုင်အိုဝါမြစ်ကလေးနဲ့ တံတား အစိမ်းနုရောင်လေးကို ညအမှောင်ထဲမှာ မှုန်ပျပျ မြင်နေရတယ်။ အဲဒီနေ့က အိပ်ပျော်သွားပြီး မနက် အစောကြီး ၄ နာ၇ီလောက်မှာ နိုးလာပါတယ်။  တဖြည်းဖြည်း မိုးလင်းလာတော့ အိုင်အိုဝါမြစ်ရဲ့ လှပတဲ့နံနက်ခင်းလေးကို မြင်တွေ့ရပါတော့တယ်။ ဖြတ်သန်းသွားလာနေကြတဲ့ ကျောင်းသားတချို့ကိုလည်း
 မြင်နေရပါတယ်။

အိုင်အိုဝါ မြစ်ရဲ့ လှပတဲ့ နံနက်ခင်း

Iowa House Hotel ကို တံတားလေးကနေ လှမ်းမြင်ရ


နောက် ရက်အနည်းငယ်ကြာတော့ အဲဒီမြင်ကွင်းကို ကြည့်ရင်း မနက်ခင်းတစ်ခုမှာ ကဗျာလေးတစ်ပုဒ် ရေးဖြစ်ခဲ့တယ်။ ကဗျာခေါင်းစဉ်ကတော့ သန္တဟာ သန္တာန်ထဲ တဲ့။

“သန္တဟာ သန္တာန်ထဲ”
(အိုင်အိုဝါသို့)

နံနက်ခင်းက မနိုးသေး
နှိုးစက်သံမရှိ နှိပ်စက်ခြင်းလွတ်တဲ့
အိပ်မက်ထဲက ညင်သာ လူးလွန့်ရုံလေး ငါ့ခန္ဓာ ကြွထ
ပြတင်းပေါက်အပြင်မှာ မြစ်နဲ့ တံတားကလေး သက်ငြိမ်
သုံးဖက်ချွန်သစ်ရွက်ကလေးတွေ ဝေ့ဝဲ  လေထုထဲ အညစ်အကြေးမပါ
စာတမ်းလေးတစ်ခုနဲ့ လည်ချောင်းနာတာလေးတစ်ခုသာ ဖိစီးမှုရှိ
ကျန်အရာအားလုံးဟာ လေဟာနယ်ထဲ ဆွဲငင်အားမဲ့

ကျောပိုးအိတ် ကင်းဗတ်ဖိနပ် တီရှပ် အားကစားဘောင်းဘီတို
နှိမ့်ချတဲ့အဆောင်အယောင် မြင့်မားတဲ့ သင်ခန်းစာ
ဖြန့်ထားတဲ့ လက်ဖဝါး ဖွင့်ထားတဲ့ ဦးနှောက်
အမိုးချွန်ချွန်လေးတွေ အနီရောင်မှိုင်းမှိုင်း အဖြူရောင်သန့်သန့်
အပြောင်အလက်  အထိုးအထောင်တွေ ကင်းစင်
အနှေးမြင်ပြကွက်တွေဟာ တငြိမ့်ငြိမ့် တလိမ့်လိမ့်
သြော်… သူတို့ရဲ့ တက္ကသိုလ်

မလုပ်ချင်တာတွေကို မလုပ်လိုတဲ့အချိန်မှာ မေ့ထား
အိပ်ရာဘေး ညမီးဆိုင်းဝါဝါကလေးကို လှည့်ဖွင့်
မဖြီးသင်ရသေးတဲ့ဦးခေါင်း မသန့်စင်ရသေးတဲ့ ကိုယ်ငွေ့
ဒိန်ခဲအကြေအမွတွေ ပေါင်မုန့်အကျိုးအကြေတွေ
ခွဲစိတ်ထားပြီးသား သစ်သီးစုံ အစအနကလေးတွေ
ရေခဲအိတ်ထဲက ပျော်လက်စ ရေခဲတုံးကလေးတွေ
အနားမှာရှိသမျှတွေကို ဝမ်းဗိုက်ကြီးထဲကောက်ထည့်
ပြီး လှေ ခါး ထစ် တွေ တစ် ထစ် ပြီး တစ် ထစ် ချင်း
နင်း
ဆင်း
လာ။
ပန်ဒိုရာ
၃၀-၃၁.၈.၂၀၁၂




၂။ IWP ဆိုတာ…

အိုင်အိုဝါတက္ကသိုလ်က ကျင်းပတဲ့ International Writing Program (IWP) ရဲ့ ၂၀၁၂ ခုနှစ် အစီအစဉ်ကို တက်ဖို့ မြန်မာနိုင်ငံက ပန်ဒိုရာနဲ့ ဘလော့ဂါ နေဘုန်းလတ် တို့ ဖိတ်ကြားခံရပါတယ်။ အစီအစဉ်က၂၀၁၂ သြဂတ်စ် ၂၅ ကနေ နိုဝင်ဘာ ၁၃ ရက်နေ့အထိ ကြာမြင့်မယ်လို့ စီစဉ်သူတွေက အကြောင်းကြားထားခဲ့ပါတယ်။  ဒီအစီအစဉ်မှာ မြန်မာနိုင်ငံက စာရေးဆရာ အနည်းဆုံး တစ်ယောက်ကို နှစ်စဉ် ဖိတ်ခေါ်လေ့ရှိပါတယ်။ ၂၀၀၁ နဲ့ ၂၀၁၂ တွေမှာတော့ မြန်မာနိုင်ငံက  နှစ်ယောက်စီ ဖိတ်ခဲ့တယ်။

IWP တက်ရောက်ခဲ့တဲ့ မြန်မာ စာရေးဆရာတွေကို IWP ဝက်ဘ်ဆိုက်မှာ ရှာဖွေပြီး စာရင်းပြုစုကြည့်တော့ အခုလိုတွေ့ရပါတယ်။
၁၉၉၄
ဆရာဦးဝင်းဖေ
၁၉၉၅
-
၁၉၉၆
ဆရာတင်မောင်သန်း
၁၉၉၇
-
၁၉၉၈
ဆရာဖေမြင့်
၁၉၉၉
-
၂၀၀၀
ဆရာမနုနုရည်(အင်းဝ)
၂၀၀၁
ဆရာမမြနှောင်းညို
၂၀၀၁
ဆရာသုမောင်
၂၀၀၂
ဆရာချစ်ဦးညို
၂၀၀၃
ဆရာမောင်စွမ်းရည်
၂၀၀၄
ဆရာမောင်သာနိုး
၂၀၀၅
ဆရာမ မသီတာ(စမ်းချောင်း)
၂၀၀၆
ဆရာမိုးဟိန်း
၂၀၀၇
ဆရာမခက်မာ
၂၀၀၈
ဆရာကျော်ဝင်း
၂၀၀၉
ဆရာမင်းထက်မောင်
၂၀၁၀
ဆရာခင်မောင်ညို
၂၀၁၁
ဆရာချိုတူးဇော်
၂၀၁၂
ဆရာနေဘုန်းလတ်
၂၀၁၂
ပန်ဒိုရာ

အခုသွားရမယ့် ၂၀၁၂ ဆောင်းဦးရာသီမှာ နိုင်ငံပေါင်း ၂၈ နိုင်ငံက စာရေးဆရာ ၃၁ ယောက် တက်ရောက်ကြမယ်လို့လည်း သိလိုက်ရတယ်။ ကျွန်မအတွက်တော့ မရောက်ဖူးသေးတဲ့ အမေရိကန်နိုင်ငံကို သွားရမယ့်အတွက်ရော နိုင်ငံတကာ စာရေးဆရာတွေနဲ့ တွေ့ဆုံရမယ့်အတွက်ပါ စိတ်လှုပ်ရှားစရာပါ။ ကိုယ်လေးစားခဲ့ရတဲ့ စာရေးဆရာတွေ သွားခဲ့တဲ့ အစီအစဉ်တစ်ခုကို တက်ဖို့ အခုလို ဖိတ်ကြားခံရတာ ဝမ်းသာစရာလည်း ကောင်းသလို တာဝန်လည်း ကြီးလှတယ်လို့ တွေးမိပါတယ်။ မသွားခင်မှာ ဆရာမောင်သာနိုးနဲ့ ဆရာမင်းထက်မောင်တို့ကို တွေ့ဖြစ်တော့ သူတို့ပါဝင်ခဲ့တဲ့ အတွေ့အကြုံတွေအကြောင်း ကျွန်မကို ရှင်းပြကြပါတယ်။ ဆရာကျော်ဝင်းကိုတော့ ဖုန်းထဲက စကားနည်းနည်း ပြောဖြစ်ပေမယ့် အချိန် မတိုက်ဆိုင်တာမို့ မတွေ့ဖြစ်ခဲ့ဘူး။ ဒါပေမယ့် “မစ္စစ္စပီခရီးသည်” ဆိုတဲ့ ဆရာ့ရဲ့ IWP အတွေ့အကြုံကို ရေးထားတဲ့ စာအုပ်ကလေးကို ဖတ်လာခဲ့ပါတယ်။

IWP မှာ ပါဝင်ခွင့်ရတာနဲ့ ပတ်သက်လို့ အထူးကျေးဇူးတင်ရမယ့်လူတွေကတော့ ဗြိတိသျှ ကဗျာဆရာ ဂျိမ်းစ်ဘန်း(James Byrne) နဲ့ IWP ဒါရိုက်တာ ခရစ္စတိုဖာ မာရေးလ် (Christopher Merrill) တို့ပါ။    ခရစ္စတိုဖာ မာရေးလ်   ရဲ့တောင်းဆိုချက်အရ   ဂျိမ်းစ်ဘန်း က သူ တွဲဖက် တည်းဖြတ်ဘာသာပြန်ပြီး UK မှာ ထုတ်ဝေခဲ့တဲ့ Bones Will Crow: 15 Contemporary Burmese Poets စာအုပ်ထဲမှာ ပါဝင်တဲ့ ကဗျာဆရာတချို့ကို IWP တက်ရောက်ဖို့အတွက် အမည်စာရင်း ပေးလိုက်တယ် လို့ သိရပါတယ်။ အဲဒီမှာ တခြားဆရာများက အကြောင်းအမျိုးမျိုးကြောင့် မသွားနိုင်ကြတာက တစ်ကြောင်း၊ ခရစ္စတိုဖာ မာရေးလ်က ကျွန်မရဲ့ကဗျာတွေကို နှစ်သက်တာက တစ်ကြောင်းကြောင့် ကျွန်မဟာ IWP တက်ရောက်ဖို့ ဖိတ်ကြားခံ ခဲ့ရတာပါ။

IWP တက်ရောက်ဖို့ အတွက် နိုင်ငံတကာက ကဗျာဆရာ၊ ပြဇာတ်ရေးဆရာ၊ သုတ ရသ စာရေးဆရာ တွေကို အိုင်အိုဝါ တက္ကသိုလ်က နှစ်စဉ်ဖိတ်ကြားပါတယ်။ အဲဒီ စာရေးဆရာတွေကို ရက်သတ္တ ၁၀ပတ် ကြာမြင့်တဲ့ အစီအစဉ်အတွင်း အိုင်အိုဝါမြို့မှာ နေထိုင်ဖို့ ချထားပေးပါတယ်။ များသောအားဖြင့်တော့ အိုင်အိုဝါတက္ကသိုလ်ဝင်းထဲက အိုင်အိုဝါဟောက်စ် ဟိုတယ် (Iowa House Hotel) မှာ နေထိုင်စေပါတယ်။

IWP ကို ၁၉၆၇ ခုနှစ်မှာစတင်ခဲ့ပြီး ယခုအချိန်အထိ နိုင်ငံပေါင်း ၁၃၀ ကျော်က စာရေးဆရာပေါင်း ၁၃၀၀ ကျော် တက်ရောက်ခဲ့ကြပြီးဖြစ်ပါတယ်။  IWP ကို တည်ထောင်သူတွေကတော့ ကဗျာဆရာ ပေါလ်အန်ဂယ်လ် (Paul Engle) နဲ့ ဟွာလင်း နီး အန်ဂယ်လ် (Hualing Nieh Engle) တို့ဖြစ်ပါတယ်။ လက်ရှိ ပရိုဂရမ်ဒါရိုက်တာကတော့ ခရစ္စတိုဖာ မာရေးလ် (Christopher Merrill) ဖြစ်ပါတယ်။
IWP ရုံးခန်းထဲရှိ ပေါလ် အန်ဂယ်၏ ရုပ်တု


IWP ကို တက်ရောက်နိုင်ဖို့အတွက် စာရေးဆရာတွေဟာ အနည်းဆုံး စာအုပ်တစ်အုပ်ထုတ်ဝေပြီးသား ဖြစ်ရပါမယ်။ ဒါမှမဟုတ်လည်း ပြီးခဲ့တဲ့ နှစ်နှစ်အတွင်းမှာ ထုတ်ဝေခဲ့တဲ့ စုစည်းမှုစာအုပ် (anthology) တွေထဲမှာ ကိုယ့်စာတွေ ပါဝင်မှု ရှိခဲ့ရပါမယ်။ အမေရိကန်နိုင်ငံမှာ နေထိုင်ပြီး နိုင်ငံတကာ စာရေးဆရာတွေနဲ့ ဆက်ဆံရမှာ ဖြစ်တဲ့အတွက် သင့်တင့်တဲ့ အင်္ဂလိပ်ဘာသာနဲ့ ဆက်သွယ်နိုင်စွမ်းရှိရပါမယ်။

အစီအစဉ်မှာ ပါဝင်မယ့် စာရေးဆရာတွေဟာ ရသစာပေ၊ သုတစာပေ၊ ကဗျာ၊ ပြဇာတ် ဒါမှမဟုတ် ရုပ်ရှင်ဇာတ်ညွှန်း(fiction, literary nonfiction, poetry, drama, or screenplays) ရေးသားသူတွေဖြစ်ရပါမယ်။ ဘာသာပြန်ဆရာတွေနဲ့ ဂျာနယ်၊ ယဉ်ကျေးမှုစာပေ၊ အထုပ္ပတ္တိစာပေ ရေးသားနေသူတွေလည်း ပါဝင်နိုင်ပါတယ်။ ဒါပေမယ့် စောစောက ဖော်ပြခဲ့တဲ့ တီထွင်ရေးသားမှုတွေထဲမှာ တစ်ခုခုတော့ တစိုက်မတ်မတ် ရေးနေသူဖြစ်ရပါမယ် လို့  IWP က တာဝန်ရှိသူတွေက ပြောပြခဲ့ပါတယ်။

သြဂတ်စ် ၂၈ မနက်ပိုင်းမှာ Iowa House Hotel မှာ အားလုံးကို အထူးနံနက်စာနဲ့ တည်ခင်းဧည့်ခံပါတယ်။ နေ့လည်ပိုင်းမှာ IWP ရုံးခန်းတည်ရှိရာဖြစ်တဲ့ Shambaugh House ကို အားလုံးကို ဖိတ်ခေါ်ပြီး အစီအစဉ်အကြောင်းကို ရှင်းလင်းပြောပြပါတယ်။ ပြီးတော့ စာရေးဆရာတွေအားလုံးက ကိုယ့်ကိုယ်ကို မိတ်ဆက်ကြပါတယ်။
IWP ရုံးခန်းတည်ရှိရာ Shambaugh House




အဲဒီနေ့ ညနေမှာပဲ ၄၆ ကြိမ်မြောက် IWP အစီအစဉ်ရဲ့ စာရေးဆရာတွေကို ကြိုဆိုတဲ့ ညစာစားပွဲ ပါတီကို တက်ရောက်ကြရပါတယ်။ ပါတီပွဲကို ဒါရိုက်တာ ခရစ္စတိုဖာ မာရေးလ်ရဲ့ အိမ်က မြက်ခင်းပြင်မှာ ကျင်းပပါတယ်။ ကြိုဆိုနှုတ်ဆက်ကြတဲ့ မြို့မိမြို့ဖတွေဟာ သိပ်ကို လှိုက်လှိုက်လှဲလှဲရှိကြပါတယ်။ ကျွန်မက ရှမ်းရိုးရာဖျင်နဲ့ ချုပ်လုပ်ထားတဲ့ မြန်မာဝတ်စုံ အပြာရောင်ကို ဝတ်ထားတာကို သူတို့က သဘောကျနေကြပါတယ်။ မြို့သူမြို့သားတွေဟာ သူတို့ရဲ့ မြို့အတွက်ရော ကျောင်းအတွက်ပါ သိပ်ကို ဂုဏ်ယူကြပုံပေါ်ပါတယ်။ အဲဒီ ပါတီပွဲမှာ အိုင်အိုဝါတက္ကသိုလ်ရဲ့ President ဆယ်လီမေဆင် (Sally Mason) ပြောခဲ့တဲ့ စကားကို သဘောတကျ မှတ်သားမိပါတယ်။

“စင်တင်ပြဇာတ်မှာ ကပြချင်ရင် နယူးယောက်ကို သွားပါ။ ရုပ်မြင်သံကြား ဒါမှမဟုတ် ရုပ်ရှင်ရိုက်ချင်ရင် လော့စ်အိန်ဂျလိစ်ကိုသွားပါ။ ဒါပေမဲ့ စာရေးဆရာဖြစ်ချင်ရင်တော့ အိုင်အိုဝါမြို့ကို လာပါ။”
“If you want to be in the theater, you go to New York City. If you want to be in television or the movies, you go to Los Angeles. But if you want to be a writer, you come to Iowa City.”

နှုတ်ဆက်မိတ်ဖွဲ့နေကြတုန်းမှာ မှတ်မှတ်ရရတစ်ခုရှိပါတယ်။ ကင်မရာကြီးတစ်လုံးကို လွယ်ထားတဲ့ လူတစ်ယောက်က ကျွန်မကို ကြည့်ပြီး မြန်မာပြည်က ပန်ဒိုရာလား လို့ မေးပါတယ်။ ဟုတ်ပါတယ် လို့ပြောတော့ သူ့ရဲ့ လိပ်စာကဒ်လေးကို ထုတ်ပေးပြီး အဲဒီ ကဒ်ပေါ်မှာ ပုံနှိပ်ထားတဲ့ အဖြူအမည်း ဓာတ်ပုံထဲက အမျိုးသမီးတစ်ယောက်ကို သိသလားလို့ မေးပါတယ်။ ကျွန်မ သေသေချာချာ ကြည့်လိုက်တော့ ဆရာမ မသီတာ(စမ်းချောင်း) ရဲ့ပုံပါ။ ကျွန်မက သိပါတယ် ဒါ ဆရာမ မသီတာပါ လို့ ပြောပြလိုက်ပါတယ်။ ဒီတော့ သူက သူ့နာမည်က တောမတ်စ် လန်ဒွန် (Thomas Langdon) တဲ့ သူက မသီတာနဲ့လည်း ခင်မင်ကြောင်း၊ IWP စာရေးဆရာတွေကို နှစ်တိုင်းမှာ ဓာတ်ပုံ အလှပုံတွေ အခမဲ့ ရိုက်ပေးလေ့ရှိကြောင်း ပြောပြီး အားတဲ့အခါ သူ့ကို ဆက်သွယ်ပါလို့ ပြောပါတယ်။ ကျွန်မလည်း သူ့လိပ်စာကဒ်လေးကို သိမ်းထားလိုက်ပါတယ်။ (IWP ပြီးခါနီး တစ်လလောက်အလိုမှာတော့ သူက ဟိုတယ်ကိုလာပြီး ကျွန်မအပါအဝင် စာရေးဆရာတချို့ကို ဓာတ်ပုံရိုက်ပေးခဲ့ပါတယ်။)

အဲဒီတစ်နေ့တာ အပြီးမှာတော့ ကျွန်မလည်း မြို့ခံတချို့နဲ့ရော IWP စာရေးဆရာတချို့နဲ့ပါ  ရင်းနှီးမှု ရသွားခဲ့ပါတယ်။  
၄၆ကြိမ်မြောက် IWP ကြိုဆို နှုတ်ဆက်ပွဲမှ ဆယ်လီမေဆင်
 

IWP စာရေးဆရာများနဲ့ အတူ

၃။ ရုပ်ရှင်ခံစားမှုအစီအစဉ် (Cinematheque)

IWP မှာ ကျွန်မ ပထမဆုံး စပြီး ပါဝင်ဆင်နွှဲရတဲ့ အစီအစဉ်ကတော့ ရုပ်ရှင်ခံစားမှုအစီအစဉ်ပါ။ အစကတော့ အဲဒီအစီအစဉ်မှာ ရုပ်ရှင်ဒါရိုက်တာတွေ ဒါမှမဟုတ် ဇာတ်ညွှန်းရေးဆရာတွေက သူတို့ ရိုက်ကူးထားတဲ့ ရုပ်ရှင်တွေကို ပြသကြမယ်လို့ ထင်မိတာပါ။ ဒါပေမယ့် အဲဒီအစီအစဉ် တာဝန်ခံ ဆရာမ နာတာရှာ ဂျူရိုဗီကိုဗာ က ပြောလာပါတယ်။ ဒါဟာ ဘယ်သူမဆို ပါဝင်နိုင်တဲ့ အစီအစဉ်ပါ တဲ့။ ကိုယ့်နိုင်ငံကဖြစ်ဖြစ် တခြားကဖြစ်ဖြစ် ကိုယ်နှစ်သက်မိတဲ့ ရုပ်ရှင်ဇာတ်ကားတစ်ကားကို ပြသပြီး လာရောက်ကြည့်ရှုကြသူတွေနဲ့အတူ ခံစား ဆွေးနွေးကြဖို့ပါတဲ့။ ကျွန်မကို အဲဒီအစီအစဉ်မှာ ပါဝင်ဖို့ တိုက်တွန်းပါတယ်။

ဒီတော့ ကျွန်မလည်း ဘယ်ရုပ်ရှင်ကို ပြရင်ကောင်းမလဲ လို့ စဉ်းစားပါတယ်။ မြန်မာနိုင်ငံကရိုက်တဲ့ ရုပ်ရှင်တွေက သူတို့ စာကြည့်တိုက်မှာ မရှိပါဘူး။ မြန်မာ့ဓလေ့ကိုလည်းပြ ဇာတ်လမ်းလည်းလှတဲ့ သင်္ကြန်မိုးကို အွန်လိုင်းမှာရှာရင် အဆင်ပြေမလား စဉ်းစားပါတယ်။ အဲဒီအထဲက သီချင်းတချို့က အော်ရီဂျင်နယ် မဟုတ်တာကို သိနေတော့ သူတို့တွေရှေ့မှာ ပြဖို့ တွန့်ဆုတ်မိတာလည်း အမှန်ပါ။ မြန်မာနိုင်ငံအကြောင်းကို လတ်တလော ပြည်ပက ရိုက်ထားတဲ့ ရုပ်ရှင်တွေထဲမှာလည်း မကြာခင်က ထွက်သွားတဲ့ The Lady ကို စဉ်းစားပါသေးတယ်။ အဲဒီရုပ်ရှင်ထဲက အချက်အလက်မှားတွေကို ပြန်ရှင်းပြရရင်လည်း အတော် ပေရှည်မှာကိုလည်း စိုးမိပြန်တယ်။ လောလောလတ်လတ် ပြနေတဲ့ They call it Myanmar ဆိုတဲ့ documentary ဇာတ်ကားကျတော့လည်း ကျွန်မ မကြည့်ရသေးပါဘူး။

ဒါနဲ့ပဲ ကဗျာနဲ့ဆိုင်တာကို စဉ်းစားလိုက်တော့   အီတာလျံ ဒါရိုက်တာ ရောဘတ်တို ဘီနီဂနီ ပါဝင် ရိုက်ကူးတဲ့ ကျားနဲ့နှင်း the  tiger and the snow ဆိုတဲ့ အီတလီရုပ်ရှင်ကို သတိရလာပါတယ်။ နာတာရှာက ဝမ်းသာအားရဖြစ်သွားပါတယ်။ သူက ရောဘတ်တို ဘီနီဂနီကို သိပ်ကြိုက်သူပါ။ အစီအစဉ်ရဲ့ ပထမဆုံး ရက်သတ္တပတ်ဖြစ်တဲ့ စက်တင်ဘာ ၄ ရက်နေ့မှာပဲ အဲဒီရုပ်ရှင်ကို ပြပြီး ဆွေးနွေးပေးဖို့ ကျွန်မကို တိုက်တွန်းပါတယ်။ ဒီတော့ ရုပ်ရှင်ခံစားမှု အစီအစဉ်ကို ကျွန်မက ဈေးဦးဖောက်ရပါတော့တယ်။ ရုပ်ရှင်ပြတဲ့နေရာကတော့ ကျောင်းဝင်းထဲက ကျောင်းဆောင်တစ်ခုထဲမှာပါ။  

ကျွန်မပြခဲ့တဲ့ ရုပ်ရှင်ကတော့ အီရတ်စစ်ပွဲကို နောက်ခံထားတဲ့ အချစ်ဇာတ်လမ်းလို့ပဲ ဆိုကြပါစို့။ ဇာတ်လိုက်က နည်းနည်း အူကြောင်ကြောင်နိုင်တဲ့ ကဗျာဆရာတစ်ဦးပါ။ surreal ဆန်တဲ့ ဇာတ်ဝင်ခန်းတွေနဲ့ ရိုက်ကူးထားပြီး စဉ်းစားစရာတွေနဲ့ အကွက်စေ့တဲ့ ရုပ်ရှင်တစ်ပုဒ်မို့ ကျွန်မ နှစ်သက်မိပါတယ်။
the tiger and the snow ရုပ်ရှင်


ရုပ်ရှင်လာကြည့်ကြသူတွေဟာ IWP စာရေးဆရာတွေရော အိုင်အိုဝါ တက္ကသိုလ်က ကျောင်းသားတချို့ပါ ပါပါတယ်။ ကျောင်းသားတွေ အတွက်ကတော့ ဒါဟာ သူတို့ရဲ့ သင်ခန်းစာထဲက လေ့လာမှု တစိတ်တပိုင်းလည်း ဖြစ်ပါတယ်။ အဲဒီ ဇာတ်လမ်းကြည့်ပြီးတဲ့အခါ ပြန်ပြီး ဆွေးနွေးတဲ့လေ့ကျင့်ခန်းဟာ သူတို့ရဲ့ အမှတ်တွေကို အထောက်အကူ ပြုပါလိမ့်မယ်။ ရုပ်ရှင်အပြီးမှာ ချက်ချင်း ဆွေးနွေးကြတဲ့ သုံးသပ်ထင်မြင်ချက်တွေ အမျိုးမျိုးကြားရတာ  စိတ်ဝင်စားစရာပါ။ ကူဝိတ်က စာရေးဆရာ ပေးတဲ့မှတ်ချက်ကတော့ အချစ်ဆိုတာဟာ ဘယ်တော့မှ မဖြောင့်ဖြူးဘဲ အခက်အခဲတွေရှိတယ် ဆိုတာကို ခက်ခဲကြမ်းတမ်းတဲ့ စစ်ပွဲနောက်ခံနဲ့ နှိုင်းယှဉ် တင်စားထားတယ် လို့ဆိုပါတယ်။

အဲဒီနောက် ရောဘတ်တို ဘီနီဂနီကို နှစ်သက်ရင် သူ့ရဲ့ ရုပ်ရှင်တွေထဲက  Life is beautiful ကိုလည်း မဖြစ်မနေကြည့်ဖို့ တိုက်တွန်းကြပါတယ်။ အဲဒီတုန်းက Life is beautiful ကို ကျွန်မ မကြည့်ရသေးပါဘူး။ နောက်တော့ အိုင်အိုဝါမြို့ကနေ မထွက်ခွာခင် နောက်ဆုံးရက်တွေမှာ စာကြည့်တိုက်ကနေ ငှားကြည့်ခဲ့ပါတယ်။ နှစ်သက်ရတဲ့ ရုပ်ရှင်တစ်ကားပါပဲ။ အဲဒီ ရုပ်ရှင် နှစ်ကားစလုံးမှာ ရောဘတ်တို ဘီနီဂနီဟာ ရုပ်ဆိုးတဲ့ စစ်ပွဲတွေ သတ်ဖြတ်မှုတွေကို နောက်ခံထားပြီး ကြမ်းတမ်းမှုတွေကြားက ဖူးပွင့်နေတဲ့ လှပတဲ့ ချစ်ခြင်းမေတ္တာကို ဖွဲ့ဆိုပြခဲ့တယ် လို့ ကျွန်မ မြင်မိပါတယ်။

ရုပ်ရှင်ပြပြီး နောက်တစ်နေ့ ဟိုတယ်မှာ မနက်စာစားတဲ့အချိန်မှာ စာရေးဆရာတွေက အဲဒီရုပ်ရှင်အကြောင်းကို ဆက်ဆွေးနွေးနေတာ တွေ့ရတော့လည်း ဝမ်းသာမိပါတယ်။ နောက်တစ်နေ့မှာတော့ နာတာရှာဆီက အီးမေးလ် ဝင်လာပါတယ်။ ကျွန်မပြခဲ့တဲ့ ရုပ်ရှင်ကိုရော ကျွန်မရဲ့ ကဗျာတွေကိုပါ သူ့စာသင်ခန်းထဲမှာ ဆွေးနွေးချင်လို့ စက်တင်ဘာ ၇ ရက်နေ့ မနက်ပိုင်းမှာ လာခဲ့နိုင်မလား တဲ့။ အဲဒါဟာ မဖြစ်မနေအစီအစဉ်တော့မဟုတ်ပါဘူး။ သူက သီးသန့် တောင်းဆိုတာပါ။ သူ့စာသင်ခန်းက ကျောင်းသားလေးတွေက ဖရက်ရှာလေးတွေဖြစ်ပြီး သိပ်ကို နူးညံ့သိမ်မွေ့ပါတယ်။ အတိုက်အခံ မေးခွန်းတွေနဲ့ အခက်တွေ့အောင် စိန်ခေါ်တတ်တဲ့ ကလေးမျိုးတွေ မဟုတ်လို့ မပူပါနဲ့လို့လည်း (ကျွန်မ စိုးရိမ်မှာစိုးလို့ ထင်ပါရဲ့) ထည့်ရေးထားပါသေးတယ်။ သူပြောတဲ့ စက်တင်ဘာ ၇ ရက်ဟာ ကျွန်မအတွက် အလုပ်များပါတယ်။ အဲဒီနေ့ နေ့လည်မှာ စာကြည့်တိုက်မှာ IWP၂၀၁၂ အတွက် ပထမဆုံး ကျင်းပမယ့် စာတမ်းဖတ်ပွဲနဲ့ ဆွေးနွေးပွဲ  အစီအစဉ်မှာလည်း ကျွန်မနာမည်ကို သူတို့က ထည့်ထားခဲ့ကြပါတယ်။ ဒါပေမယ့်လည်း နာတာရှာရဲ့ စာသင်ခန်းကို လာခဲ့မယ်လို့ ကျွန်မက အကြောင်းပြန်လိုက်ပါတယ်။

အဲဒီနောက်တော့ အမေရိကန် တက္ကသိုလ် ကျောင်းသားတွေရဲ့ စာသင်ခန်းဟာ ဘယ်လိုများလဲဆိုတာကို ကျွန်မ သိချင်စိတ်တွေ ပြင်းပြနေခဲ့ပါတယ်။




ပန်ဒိုရာ

(ဆက်လက် ဖော်ပြသွားပါမည်။)
 

Expand..