အိုင်အိုဝါရက်စွဲများ အပိုင်း (၆)

အိုင်အိုဝါရက်စွဲများ အပိုင်း (၆)

၁၆။ စာပေမြို့တော် နဲ့ ရာသီပြောင်းချိန်

အိုင်အိုဝါမြို့ဟာ ၂၀၀၈ ခုနှစ်မှာ စာပေမြို့တော် (city of literature) အဖြစ် ယူနက်စကို ရဲ့ အသိအမှတ်ပြုခြင်းကို ခံရပါတယ်။ ကမ္ဘာပေါ်မှာ စာပေမြို့တော်အဖြစ် ယူနက်စကိုက အသိအမှတ်ပြုထားတဲ့ မြို့ပေါင်း ၆ မြို့ရှိပါတယ်။ ၂၀၀၄ မှာ စကော့တလန်က အက်ဒင်ဘရာ၊ ၂၀၀၈ မှာ သြစတေးလျက မဲလဘုန်း၊ အမေရိကက အိုင်အိုဝါမြို့၊ ၂၀၁၀ မှာ အိုင်ယာလန်က ဒဗ္ဗလင်၊ ၂၀၁၁မှာ အိုက်စလန်က ရေဂျာဗစ်နဲ့ ၂၀၁၂မှာ အင်္ဂလန်က နောဝစ် တို့ဖြစ်ကြပါတယ်။ 

စာပေမြို့တော်အဖြစ် အသိအမှတ်ပြုခံရဖို့အတွက် အောက်ပါအချက်တွေ ပြည့်စုံဖို့လိုအပ်တယ်လို့ သိရပါတယ်။

• ·         အဲဒီမြို့မှာ ကျယ်ပြန့်၊ စုံလင်၊ ကောင်းမွန်တဲ့ စာပေတွေကို အရေအတွက်များများ ပုံနှိပ်ထုတ်ဝေမှု ရှိရပါမယ်။
• ·         ပြည်တွင်းစာပေရော နိုင်ငံရပ်ခြားစာပေတွေကိုပါ အထူးပြုတဲ့ ပညာရေးအစီအစဉ်တွေကို အခြေခံပညာနဲ့ အဆင့်မြင့်ပညာ ကျောင်းတွေမှာ သင်ကြားမှုရှိရပါမယ်။
• ·         စာပေ၊ ပြဇာတ်၊ ကဗျာတို့ဟာ မြို့မှာ အရေးပါတဲ့ ကဏ္ဍအဖြစ် တည်ရှိနေရပါမယ်။
• ·         ပြည်တွင်းနဲ့ နိုင်ငံခြား စာပေတွေကို မြှင့်တင်ဖို့အတွက် စာပေပွဲတော်တွေကို အိမ်ရှင်အဖြစ် လက်ခံကျင်းပရပါမယ်။
• ·         စာကြည့်တိုက်၊ စာအုပ်ဆိုင်နဲ့ အများပိုင်၊ ပုဂ္ဂလိကပိုင် ယဉ်ကျေးမှု အဖွဲ့အစည်းတွေက ပြည်တွင်းနဲ့ နိုင်ငံခြား စာပေတွေကို ထိန်းသိမ်း၊ ဖြန့်ဝေ၊ တိုးမြှင့်ဖို့ လုပ်ဆောင်နေရပါမယ်။
• ·         အမျိုးမျိုးအဖုံဖုံသော ဘာသာစကားတွေနဲ့ နိုင်ငံခြားစာပေတွေကနေ ဘာသာပြန်ဆိုထားတဲ့ လက်ရာတွေအတွက်လည်း ထုတ်ဝေမှု ကဏ္ဍတစ်ရပ် ပါဝင်ရပါမယ်။
• ·         စာပေဖွံ့ဖြိုးတိုးတက်အောင် မြှင့်တင်ရေးနဲ့ စာပေဖန်တီးမှုတွေကို ဈေးကွက်ခိုင်မာစေရေး မှာ ထုံးတမ်းစဉ်လာမီဒီယာနဲ့ မီဒီယာအသစ်တွေရဲ့ တက်ကြွစွာ ပူးပေါင်းပါဝင်မှု ရှိရပါမယ်။

ကျွန်မတို့ကို IWP အစီအစဉ်ကနေ မြို့ရဲ့ အများပြည်သူသုံး စာကြည့်တိုက်နဲ့ တက္ကသိုလ်စာကြည့်တိုက်တွေကို လိုက်ပို့ပြီး ရှင်းလင်းပြခဲ့ပါတယ်။ ကျွန်မတို့ကို ထုတ်ပေးထားတဲ့ ယာယီစာကြည့်တိုက်ကဒ်နဲ့ အိုင်အိုဝါတက္ကသိုလ် စာကြည့်တိုက်တွေမှာ စာအုပ်တွေ ဗီဒီယိုခွေတွေ ငှားလို့ရပါတယ်။ IWP စာရေးဆရာတွေ စာအုပ်ငှားရတာ အဆင်ပြေအောင်လို့ စာကြည့်တိုက်အရာရှိတွေကို လူမျိုးတူရာအုပ်စုခွဲပြီး တာဝန်ချပေးပါတယ်။ မြန်မာ၊ ကိုရီးယား၊ စင်ကာပူ၊ ဖိလစ်ပိုင် တို့အတွက် အနီးစပ်ဆုံး အုပ်စုဖွဲ့ပြီး ဂျပန်လူမျိုး စာကြည့်တိုက်အရာရှိ အမျိုးသမီး တစ်ယောက်ကို တာဝန်ပေးထားပါတယ်။ သူက ကျွန်တို့ သိချင်သမျှကို ရှင်းလင်းပြပါတယ်။ 

အိုင်အိုဝါတက္ကသိုလ် စာကြည့်တိုက်တွေမှာ စုစုပေါင်း စာအုပ် ၅ သန်းလောက်ရှိတယ်လို့ ပြောပါတယ်။ စာကြည့်တိုက်တွေကို သွားလေ့လာတဲ့အခါ အနောက်တိုင်း ဘာသာစကား မဟုတ်တဲ့အထဲမှာ တရုတ်၊ အိန္ဒိယ စာပေတွေ တမျှော်တခေါ် တွေ့ရပြီး ထိုင်းစာပေတောင် အတော်အတန် တွေ့ရပါတယ်။ ဒါပေမယ့် မြန်မာ စာအုပ်စင် တစ်စင်တောင် မတွေ့ရပါဘူး။ ရှိနေတဲ့ မြန်မာစာအုပ်အရေအတွက် နည်းလွန်းတာရယ်၊ ဖတ်လိုအား နည်းတာရယ်၊ စနစ်တကျ မှတ်တမ်းပြုစုဖို့ အခက်အခဲတချို့ရယ်ကြောင့် စာကြည့်တိုက်မှာ မြန်မာစာအုပ်တွေ မရှိရတဲ့အကြောင်း ဂျပန်မလေးက ရှင်းပြပါတယ်။ တန်ဖိုးရှိတဲ့ မြန်မာစာကောင်းပေကောင်းတွေကို နိုင်ငံတကာက သိရှိကြစေဖို့ ကျွန်မတို့ အခုထက်ပိုပြီး အများကြီး ကြိုးစားကြရပါဦးမယ်။ အိုင်အိုဝါက ပြန်ခါနီးမှာတော့ ကျွန်မယူလာတဲ့ စာအုပ်တချို့ကို စာကြည့်တိုက်ကို လှူခဲ့ပါတယ်။  ကျွန်မလှူခဲ့တဲ့ စာအုပ်တွေထဲမှာ ဆရာသုခမိန်လှိုင်ရဲ့ ပိုမို နဲ့ ပုစွန်တွေဖတ်ဖို့ကဗျာ လည်း ပါပါတယ်။ 

စာအုပ်စာပေ မြတ်နိုးသူတွေနဲ့ ပြည့်နှက်နေတဲ့ ဒီမြို့လေးမှာ ကျွန်မသဘောကျနှစ်သက်တဲ့ အရာတွေ အတော်များပါတယ်။ အေးဆေးငြိမ်သက်တဲ့ စာအုပ်ဆိုင်လေးတွေထဲမှာ စာပေရွတ်ပွဲတွေ ကျင်းပလေ့ရှိကြတာ ကြည်နူးစရာပါ။ အများပြည်သူသုံး စာကြည့်တိုက်နားမှာ ချထားတဲ့ ခုံတန်းလျားလေးတွေမှာ ပန်းချီပုံတွေကို  အမျိုးမျိုး လွတ်လွတ်လပ်လပ် ခြယ်ထားတာကိုလည်း ကျွန်မမျက်စိထဲမှာ သိပ်ကိုလှပပါတယ်။ စန္ဒရားတွေကို လမ်းဘေးမှာ ဒီအတိုင်း ချထားတာကိုလည်း သဘောကျနေမိတယ်။ ညဘက်တွေမှာလည်း အေးအေးဆေးဆေး သွားလာနေကြတဲ့ ကျောင်းသားလေးတွေကို အမြဲမြင်နေရပါတယ်။ ဒီမြို့လေးဟာ ရာဇဝတ်မှု လုံးဝ ကင်းရှင်းတဲ့မြို့လို့လည်း ပြောကြပါတယ်။

အများပြည်သူသုံး စာကြည့်တိုက်နားက ဆေးရောင်ခြယ် ခုံတန်းလျားလေးတွေ

အိုင်အိုဝါမြို့ လမ်းမဘေးမှာ ချထားတဲ့ စန္ဒယားတစ်လုံး

စာရေးသားခြင်း ယဉ်ကျေးမှု အလွန်ထွန်းကားတဲ့ မြို့လေးပီပီ တမြို့လုံးမှာ စာရေးဆရာ ကဗျာဆရာတွေ၊ စာပေလေ့လာနေကြတဲ့ ကျောင်းသားတွေ ပညာရှင်တွေနဲ့ ပြည့်နှက်နေပါတယ်။ ဒီမြို့ကထွက်တဲ့ ကမ္ဘာကျော်စာရေးဆရာတွေထဲမှာ ကျွန်မနှစ်သက်တဲ့ ပို့စ်မော်ဒန် စာရေးဆရာ ကာ့တ်ဗွန်းနဂတ် (Kurt Vonnegut) လည်းပါပါတယ်။ မြို့ရဲ့လမ်းမတွေမှာ အမှတ်တရ ရုပ်တုတွေကို မကြာခဏတွေ့ရပြီး ပလက်ဖောင်းပေါ်မှာလည်း စာအုပ်စာပေ၊ စာရေးဆရာတို့ရဲ့ အမှတ်အသားတွေ စာတန်းတွေကို ထွင်းထု ခင်းကျင်းထားတာကို တွေ့ရတာ အလွန်စိတ်ဝင်စားဖို့ကောင်းပါတယ်။

ပလက်ဖောင်းပေါ်မှာ ခင်းကျင်းထားတဲ့ Kurt Vonnegut ရဲ့ စကား

သစ်ရွက်တွေ အရောင်ပြောင်းတဲ့ ဆောင်းဦးပေါက်ကို တဖြည်းဖြည်း ချဉ်းကပ်လာတဲ့အခါ ရာသီဥတုလေးမျိုးရှိတဲ့ နိုင်ငံမှာ တစ်ခါမှ မနေဖူးတဲ့ ကျွန်မအဖို့ ရာသီပြောင်းချိန်အလှကို မျက်ဝါးထင်ထင် တွေ့ရပါတော့တယ်။ အိုင်အိုဝါ တက္ကသိုလ်တဝိုက်မှာ တွေ့ရတဲ့ သစ်ပင်တွေကတော့ အဝါရောင်ကို ပြောင်းတဲ့ အပင်မျိုးတွေ ပိုများပါတယ်။ နောက်တော့ ဒီကပ်ဘ်(DeKalb) မြို့ကို သွားတဲ့အခါ အဲဒီက အနီရောင် ပိုသန်းတဲ့ ပတ်ဝန်းကျင်မှာလည်း ကြည့်လို့မဆုံး ဖြစ်ရပါတယ်။ ဝါရှင်တန်ဒီစီမှာတော့ အချိန်နည်းနည်းနောက်ကျပြီးမှ အရောင်ပြောင်းတတ်တာမို့ IWP အစီအစဉ်ပြီးခါနီး ရက်တွေမှာ ကျွန်မတို့ ဝါရှင်တန်ဒီစီကို ရောက်တဲ့အခါ  အဲဒီနားက သစ်တောတွေ အရောင်ပြောင်းနေတဲ့ဆီကို လိုက်ပို့မယ်လို့ ဝါရှင်တန်မှာ နေကြတဲ့ မိတ်ဆွေတွေကပြောပါတယ်။ ဒါပေမယ့် ဝါရှင်တန် မသွားခင် ရက်ပိုင်းအလိုမှာ မုန်တိုင်းဝင်သွားတာမို့ သစ်တောကို သွားကြည့်မယ့် အစီအစဉ် ပျက်သွားခဲ့ရပါတယ်။

အိုင်အိုဝါ တက္ကသိုလ်ဝင်းအတွင်းက အရောင်ပြောင်း သစ်ပင်တွေ

ဒီကပ်ဘ်မြို့က သစ်ရွက်နီနီတွေ

လှပတဲ့ သစ်ရွက်ဝါဝါ နီနီ တွေကို ဓာတ်ပုံတွေတော့ အများအပြား ရိုက်လာခဲ့ပါတယ်။ ရွက်ကြွေရာသီအကြောင်းကိုလည်း မှတ်မှတ်ရရ ကဗျာလေးတစ်ပုဒ် ရေးဖြစ်ခဲ့ပါတယ်။

ရွက်ကြွေရာသီ

နံနက်စောစောထတဲ့ ငှက်ကို ငါချီးကျူး

နံနက်စောစောထတဲ့ ပိုးတီကောင်ကို ငါမသနား

သူများမျက်ချေးကို လက်ညိုးထိုးပြီး ငါရယ်မော

ငါ့လက်ချောင်း လေးချောင်းက ငါ့မျက်ချေးကို တိတ်တိတ်ချောင်းကြည့်

ညံ့ဖျင်း တုံးအ  အဆင်ခြင်မဲ့ရန်ကော လို့ ခပ်လွယ်လွယ် စွပ်စွဲပစ်

ဖြစ်နိုင်လောက်တဲ့အဖြေကို မစဉ်းစားဘဲ ပြဿနာကို ငါသယ်ဆောင်သွား

ရာနှုန်းပြည့် သဘောကျ/တူနိုင်စရာ ဘယ်သူမှ မရှိတာကို ငါတွေ့

ရာနှုန်းပြည့် သဘောမကျ/မတူနိုင်စရာ ဘယ်သူမှ မရှိတာကို ငါမေ့

ငါ့ကျမ်းစာ ငါ့အဘိဓမ္မာ မနာယူနိုင်သူတွေကို ကရုဏာဝင် စုပ်သပ်

ကျောခိုင်းလှည့်ထွက်သွားသူတွေရဲ့ မျက်နှာပေါ်က အပြုံးကို ငါလျစ်လျူရှု

သစ်ရွက်တွေ ဝါ နီ  နိမိတ်ပြ သာမောဆန်းကြယ်အံ့လောက်ဖွယ်လို့ ငါမှတ်

ပင်ခြေမှာပုံထပ်ကြွေ အရိုးပြိုင်းပြိုင်းအကိုင်းတွေ ဒါကိုလည်း အလှတရားလို့ ငါထင်

ရာသီကူးပြီးရင် ပြန်ဝေဆာဦးမယ့် သစ်ပင်တွေကို သက်တောင့်သက်သာ ငါစောင့်ကြည့်နေ

ဘယ်တော့မှ အရောင်ပြန်မပြောင်းတော့မယ့် ငါ့ခေါင်းပေါ်က မြွေဟောက်ဖြူတွေကို သတိမထားမိ

ပန်ဒိုရာ

၁၆.၁၀.၂၀၁၂

၁၇။ မြောက်ပိုင်းအီလီနွိုက်တက္ကသိုလ်က မြန်မာနိုင်ငံအကြောင်း လေ့လာရေး နိုင်ငံတကာ ကွန်ဖရန့်

မြန်မာနိုင်ငံအကြောင်း လေ့လာရေး နိုင်ငံတကာ ကွန်ဖရန့် (International Burma Studies Conference) အကြောင်းကို ကြားဖူးနေတာကြာပါပြီ။ ကျွန်မ စင်ကာပူမှာ ရှိနေချိန် အဲဒီ ကွန်ဖရန့်ကို စင်ကာပူအမျိုးသားတက္ကသိုလ် (NUS) မှာ ကျင်းပခဲ့တယ်ဆိုတာ သိခဲ့ပါသေးတယ်။ နှစ်နှစ်ကို တစ်ကြိမ် ကျင်းပလေ့ရှိတဲ့ အဲဒီညီလာခံဟာ ကျွန်မ အမေရိကရောက်နေချိန်မှာ တိုက်ဆိုင်စွာပဲ အိုင်အိုဝါမြို့နဲ့ သိပ်မဝေးတဲ့ ဒီကပ်ဘ်မြို့ရဲ့ မြောက်ပိုင်းအီလီနွိုက်တက္ကသိုလ် (Northern Illinois University (NIU)) မှာ အောက်တိုဘာ ၅ ရက်ကနေ ၇ ရက်နေ့အထိ ကျင်းပဖို့ ကြုံလာပါတယ်။ 

ကျွန်မနဲ့ နေဘုန်းလတ်တို့ဟာ ဒီကွန်ဖရန့်ကို တက်ဖို့ ဆက်သွယ်ကြတဲ့ အချိန်မှာ သွားလာရေးနဲ့ နေထိုင်တည်းခိုဖို့ စပွန်ဆာပေးတဲ့ အစီအစဉ်တွေက ပြီးဆုံးသွားပြီလို့ဆိုပါတယ်။ ကျွန်မတို့က အမေရိကကို လာခါနီးမှာ ဗီဇာကိစ္စနဲ့ မသေမချာဖြစ်နေခဲ့တော့ ကွန်ဖရန့် တက်နိုင်ကြောင်းကို စောစောစီးစီး အကြောင်းမကြားနိုင်ခဲ့ဘူးလေ။ ဒါပေမယ့်လည်း NIU က ဒေါက်တာသရဖီသန်းနဲ့ ဆရာဦးစောထွန်းရဲ့ဇနီး ဒေါ်စန္ဒာတို့က ကျွန်မနဲ့ နေဘုန်းလတ်အတွက် ကြိုးစားပမ်းစား စီစဉ်ပေးကြပါတယ်။

ဒီကပ်ဘ်မြို့ကို အိုင်အိုဝါမြို့ကနေ သွားဖို့အတွက် စီဒါရက်ပစ်မှာ ကျောင်းတက်နေတဲ့ ကျောင်းသားလေးတွေရဲ့ ကားကြုံနဲ့ ချိတ်ဆက်ပေးပါတယ်။ တည်းခိုဖို့အတွက်တော့ ကျွန်မက ဆရာဦးစောထွန်းနဲ့ ဒေါ်စန္ဒာတို့အိမ်မှာ တည်းပြီး၊ နေဘုန်းလတ်ကတော့ ဒေါက်တာသရဖီသန်းတို့အိမ်မှာ အခြားကျောင်းသားအချို့နဲ့အတူ တည်းခိုပါတယ်။ 

ဒီကပ်ဘ်မြို့ကလေးဟာလည်း ကျောင်းကိုအခြေပြုထားတဲ့ ကျောင်းမြို့ဖြစ်ပါတယ်။ သစ်ရွက်နီနီရဲရဲတွေ နဲ့ ဆင်ယင်ကာ အလွန်လှပပြီး ရာသီဥတုကလည်း လေတဟူးဟူးကြားမှာ အိုင်အိုဝါမြို့ထက် ပိုအေးပါတယ်။ ဆရာဦးစောထွန်းအိမ်မှာ တည်းခိုတဲ့အတွက် နာမည်ကြားဖူးပြီး တစ်ခါမှမဆုံဖူးတဲ့ ပညာရှင်တွေ၊ မြန်မာစကား ကျွမ်းကျွမ်းကျင်ကျင် ပြောတတ်တဲ့ ဆရာ့တပည့် နိုင်ငံခြားသားတွေ အလည်လာတဲ့အခါ  ဆုံတွေ့ခွင့်ရခဲ့ပါတယ်။ ဒေါ်စန္ဒာ ချက်ပြုတ်ကျွေးမွေးတဲ့ မြန်မာအစားအသောက်တွေကိုလည်း စားခဲ့ရပါတယ်။ ဒေါက်တာသရဖီသန်းတို့ အိမ်ကို သွားလည်တဲ့အခါမှာလည်း ကျောင်းသားလူငယ်တွေနဲ့  စုစုဝေးဝေး စားသောက်ကြ ပျော်ပျော်ရွှင်ရွှင် စကားပြောခဲ့ရပါတယ်။ 

မိတ်ဆွေသစ် မိတ်ဆွေဟောင်း အတော်များများနဲ့ ဆုံဖြစ်ပါတယ်။ မြန်မာကျောင်းသား လူငယ်လေးတွေကိုလည်း တွေ့ခဲ့ရပါတယ်။ လွန်ခဲ့တဲ့ ၁၀ နှစ်လောက်ကဆိုရင် စင်ကာပူမှာ ဘွဲ့လွန်တက်သူတွေ၊ ပိုလီကျောင်းတက်ကြတဲ့ ဆယ်ကျော်သက် လူငယ်တွေ များပါတယ်။ ဒါပေမယ့် အဲဒီကာလက စင်ကာပူမှာတော့ ဆယ်တန်းအောင်ပြီးတဲ့အခါ တက္ကသိုလ် ကောလိပ် ဘွဲ့ကြို တိုက်ရိုက် လာတက်သူတွေ ရှားပါးပါတယ်။ အဲဒီအချိန်က အမေရိကမှာလည်း ဒီလိုပဲ လို့ထင်ပါတယ်။ အခုတွေ့ရတဲ့ ကျောင်းသားလေးတွေကတော့  မြန်မာနိုင်ငံမှာ အထက်တန်းဖြစ်စေ၊ ဂျီစီအီး၊ အက်စ်အေတီ ဖြစ်စေ အောင်ပြီး အမေရိက တက္ကသိုလ် ကောလိပ်တွေမှာ ဘွဲ့ကြိုတက်နေကြသူတွေ အတော်များများ ပါပါတယ်။ လူငယ်တွေရဲ့ တက်ကြွမှုနဲ့ ဖောက်ထွက်တဲ့ အမြင်တွေ၊ ငယ်ငယ်ရွယ်ရွယ်မှာ ပြင်ပအတွေ့အကြုံ (exposure) ရထားသူတို့ရဲ့ အင်္ဂလိပ်စာကျွမ်းကျင်မှု၊ ပြောရဲဆိုရဲရှိမှုကို မြင်ခဲ့ရတာ အားရစရာလည်း ကောင်းပါတယ်။ နောင်အနာဂတ် မြန်မာပြည်မှာ သူတို့တွေဟာလည်း တတပ်တအား ဖြစ်လာကြဖို့ မျှော်လင့်မိပါတယ်။

NIU တက္ကသိုလ်ဝင်းအတွင်း တနေရာ

NIU လိုဂို

ဒီကပ်ဘ်မြို့လည်က မြင်ကွင်းတစ်ခု

ကွန်ဖရန့်တက်ရောက်ကြသူများနဲ့အတူ ဒေါက်တာသရဖီသန်း အိမ်မှာ (အများစုက မြန်မာကျောင်းသားတွေပါ။)

ဒီကွန်ဖရန့်ကို တက်ရောက်ခဲ့တဲ့အတွက် အိုင်အိုဝါတက္ကသိုလ်က အစီအစဉ်တချို့ကို လွတ်သွားပါတယ်။ ဒါပေမယ့်လည်း အားလုံးမျှော်လင့်နေခဲ့ကြတဲ့ mid residency travel ဆိုတဲ့ ခရီးသွားအစီအစဉ်နဲ့ တိုက်ဆိုင်မနေဘဲ နယူးအော်လန်းဇ်ခရီးကို မလွတ်ခဲ့လို့ ကံကို ကျေးဇူးတင်နေရပါသေးတယ်။ ဆရာကျော်ဝင်းတို့နှစ်မှာတော့ ကွန်ဖရန့်တက်နေတဲ့ရက်တဲ့ တိုက်နေတဲ့အတွက် သူသွားချင်တဲ့ နယူးအော်လန်းဇ်ကို မသွားလိုက်ရဘူးလို့ ဆရာ့ခရီးသွားမှတ်တမ်းစာအုပ်မှာ ဖတ်လိုက်ရပါတယ်။

မြန်မာ့အကြောင်းလေ့လာရေး နိုင်ငံတကာကွန်ဖရန့် ဟာ မြန်မာ့ နိုင်ငံရေး စီးပွားရေး အကြောင်းတွေသာမက ယဉ်ကျေးမှုနဲ့ ဘာသာစကားဆိုင်ရာ အကြောင်းအရာတွေနဲ့ စုံလင်လှပါတယ်။ ညစာစားပွဲမှာ ဖျော်ဖြေတဲ့ ရိုးရာယဉ်ကျေးမှု အတီးအမှုတ် အကအခုန်တွေ၊ ခင်းကျင်းထားတဲ့ မြန်မာ့ရိုးရာ အနုပညာလက်ရာတွေဟာလည်း အမေရိကမှာဆိုပေမယ့် စုံလင်လှပါတယ်။

ညစာစားပွဲမှာ ဖျော်ဖြေတဲ့ မွန်ရိုးရာ အက

ဒီနှစ်ရဲ့ထူးခြားချက်ကတော့ မြန်မာအစိုးရဘက်က ပုဂ္ဂိုလ်အချို့ တက်ရောက်မှာပဲဖြစ်ပါတယ်။ သမ္မတအကြံပေး ဦးကိုကိုလှိုင်နဲ့ အခြားအဖွဲ့ဝင်တချို့ကို ပွဲမှာ တွေ့လိုက်ရပါတယ်။ ပြည်တွင်းပြည်ပ ပညာရှင်တွေရော၊ အတိုက်အခံတွေပါ စုံလင်လှတဲ့ ဒီပွဲမှာ သမ္မတ အကြံပေးတွေဖြစ်တဲ့ ဦးကိုကိုလှိုင် နဲ့ ဦးသန်းကျော်တို့ ကဘာတွေပြောမလဲဆိုတာ လူတွေက စိတ်ဝင်စားနေကြပါတယ်။ မေးခွန်းမေးချင်သူတွေကလည်း များပါတယ်။

၂ ရက်ခွဲတာ ကာလအတွင်းမှာ အစီအစဉ်အတော်များများကို လေ့လာနားထောင်ခဲ့ပါတယ်။ အဲဒီအထဲမှာ မှတ်မှတ်ရရ နှစ်ခုကတော့ “မြန်မာပြည် နိုင်ငံရေးပြုပြင်ပြောင်းလဲမှုနှင့် အထွေထွေရွေးကောက်ပွဲအပြီးကာလ တရုတ်မြန်မာ ဆက်ဆံရေး” ဆိုတဲ့ ခေါင်းစဉ်အောက်မှာ ပြောသွားတဲ့ ဆွေးနွေးပွဲတွေရယ်၊ နောက်ဆုံးနေ့က “မြန်မာနိုင်ငံ၏ လတ်တလောကိစ္စရပ်များ” ဆိုတဲ့ ဆွေးနွေးပွဲရယ်ပါ။ 

ဒုတိယနေ့မှာ တရုတ်ပြည်က လာကြတဲ့ ပညာရှင် တွေပြောသွားတဲ့အထဲမှာ တရုတ် နဲ့ မြန်မာနိုင်ငံကြားက စီးပွားရေး ဆက်စပ်မှု၊ မြန်မာနိုင်ငံက ခရိုနီတွေအကြောင်းနဲ့ နိုင်ငံခြားရင်းနှီးမြှုပ်နှံမှု ဥပဒေလိုအပ်ပုံ၊ သဘာဝပတ်ဝန်းကျင်နဲ့ လူမှုရေးဆိုင်ရာ အကျိုးသက်ရောက်တွေ၊ သဘာဝ ပတ်ဝန်းကျင်ထိခိုက်စေတဲ့ စီမံကိန်းတွေအပေါ်မှာ တရုတ်ပြည်ရဲ့ အနာဂတ်အစီအစဉ် စတာတွေ အတော်များများကို ခြုံငုံသွားကြပါတယ်။ 

ပြောသွားတဲ့အထဲမှာ သိသာထင်ရှားတဲ့ အချက်အလက်တွေ ကတော့ “မြန်မာနိုင်ငံ ပွင့်လင်းလာတဲ့အခါ အနောက်နိုင်ငံတွေနဲ့ စီးပွားရေး နိုင်ငံရေးဆိုင်ရာ ဆက်သွယ်မှုတွေ ရှိလာကြောင်း၊ အဲဒါဟာ တရုတ်-မြန်မာ ဆက်ဆံရေးမှာ တစ်နည်းနည်းနဲ့ သက်ရောက်မှုရှိကြောင်း၊ မြန်မာ့စီးပွားရေးမှာ တရုတ်ရဲ့ အခန်းကဏ္ဍကို အမေရိကန်က ဘယ်လိုမှ အစားထိုးမဝင်နိုင်ကြောင်း၊ မြန်မာပြည်နဲ့ နိုင်ငံတကာ ဆက်ဆံရေးမှာတော့ တရုတ်က အမြဲ အရေးပါနေသေးပေမယ့်လည်း တရုတ်ရဲ့ အခန်းကဏ္ဍ လျော့ကျသွားနိုင်ကြောင်း၊  ဒါပေမယ့်လည်း အဲဒီလို တခြားနိုင်ငံတွေနဲ့ ကူးလူးဆက်ဆံလာမှုကရော မြစ်ဆုံစီမံကိန်း ရပ်သွားတဲ့ကိစ္စမျိုးကရော တရုတ်နဲ့မြန်မာရဲ့ အနာဂတ် ဆက်ဆံရေးကို ထိခိုက်မယ့် အလှည့်အပြောင်းတစ်ခု (Turning point) တော့ မဟုတ်တဲ့အကြောင်း”၊ ဒါတွေကို အဓိက ပြောသွားပါတယ်။ ပြောဆိုတင်ပြပုံကတော့ သုတေသနမှတ်တမ်း၊ ပညာရပ်ဆိုင်ရာ စာတမ်းမဆန်ဘဲ တရုတ်ပြည်ရဲ့ ရည်တည်ချက်နဲ့ သဘောထားကို ကြေညာသွားသလိုဖြစ်တယ်လို့ ကျွန်မကတော့ ခံစားမိပါတယ်။

“တရုတ်ကုမ္မဏီတွေဟာ နိုင်ငံခြားရင်းနှီးမြုပ်နှံမှုတွေမှာ သဘာဝပတ်ဝန်းကျင် ထိခိုက်တဲ့ စီမံကိန်းတွေအတွက် ထည့်တွက်စဉ်းစားမှု အားနည်းခဲ့ကြောင်း၊ ဒါကြောင့်မို့ မြန်မာနိုင်ငံမှာသာမက အခြားနိုင်ငံခြား စီမံကိန်းတွေမှာပါ ပြဿနာတွေရှိခဲ့ကြောင်း၊ ဒါကြောင့်မို့ သတင်းကောင်းကတော့ တရုတ်ပြည်ရဲ့ သက်ဆိုင်ရာဌာနတွေဟာ ဒီကိစ္စတွေကို ဖြေရှင်းဖို့ ကြိုးစားနေကြပြီဖြစ်ကြောင်း၊  စီမံကိန်းတွေကို သဘာဝပတ်ဝန်းကျင်အရ၊ လူမှုတန်ဖိုးတွေအရ အကဲဖြတ်သုံးသပ်ဖို့ ညွှန်ကြားမှုတွေ ပေးနေပြီဖြစ်ကြောင်း” လည်း ပြောသွားပါတယ်။

တရုတ်ပညာရှင်တွေရဲ့ တင်ပြဆွေးနွေးမှု ပြီးသွားတဲ့အခါ ကျွန်မ သိချင်တဲ့ မေးခွန်းတစ်ခုကို မေးခဲ့ပါတယ်။

“နောင်လာမယ့် စီမံကိန်းတွေမှာ တရုတ်ကုမ္မဏီတွေက သဘာဝပတ်ဝန်းကျင်နဲ့ လူမှုတန်ဖိုးတွေကို ဒီ့ထက်ပိုပြီး ထည့်တွက်လာကြမယ်ဆိုလို့ ဝမ်းသာပါတယ်။ ဒါပေမယ့် လောလောဆယ် မြန်မာနိုင်ငံနဲ့ စာချုပ်ချုပ်ဆိုပြီးသား စီမံကိန်းတွေမှာ သဘာဝပတ်ဝန်းကျင်နဲ့ လူမှုဝန်းကျင်ကို ထိခိုက်စေမယ့် ကိစ္စတွေ ရှိနေတာကို ဘယ်လိုလုပ်မလဲ။ အဲဒီအကျိုးသက်ရောက်မှုတွေကို ကြားနေအဖွဲ့အစည်းတစ်ခုခု (ဥပမာ- ကုလသမဂ္ဂ အဖွဲ့အစည်း) ကို အကဲဖြတ်စေပြီး တကယ်ကို ဆိုးကျိုးတွေ တွေ့ရတယ်ဆိုရင် ချုပ်ခဲ့တဲ့ စာချုပ်တွေကို အခုအချိန်မှာ သင့်တော်မျှတအောင် ပြန်ပြင်လို့ ရနိုင်မလား။ ပြည်သူတွေအပေါ် ထိခိုက်နစ်နာမှုတွေ တကယ် ရှိနေတယ်ဆိုရင်တောင် ဘာမှမပြင်တော့ပဲ စီမံကိန်းတွေ ဆက်အကောင်အထည်ဖော်သွားတော့မလား”

ယူနန်တက္ကသိုလ်က ပါမောက္ခဟာ ကျွန်မမေးခွန်းကို ဒါက ဒီလို ဟိုလိုနဲ့ လှည့်ပတ်ဖြေနေပါတယ်။ နောက်ဆုံးတော့ “စာချုပ်တွေ ပြင်လို့ရမရ ကျွန်တော်လည်း မသိဘူး” လို့ ပြောလိုက်ပါတယ်။ အဲဒီအချိန်မှာပဲ မြန်မာလူမျိုး ပါမောက္ခတစ်ဦးက ပရိသတ်ထဲက ထရပ်လိုက်ပြီး

“ ကျွန်တော့်အမြင် ပြောရမယ်ဆိုရင် စာချုပ်ဆိုတာ စာချုပ်ပဲ (a deal is a deal)။ မြန်မာဘက်က ကိုယ်လုပ်ခဲ့ရမှာကို မလုပ်ခဲ့တာတော့ ဆိုးတာပေါ့ (too bad you didn’t do your homework). ဥပဒေအရ စာချုပ်ဟာ လက်မှတ်ထိုးချုပ်ပြီးသွားရင် တရားဝင်သွားပြီ”

လို့ဝင်ဖြေပါတယ်။ ဆွေးနွေးချိန်လွန်နေပြီမို့ မကြာခင်မှာ ဆွေးနွေးပွဲကို ရုတ်သိမ်းလိုက်ပါတယ်။ ကျွန်မစိတ်ထဲမှာတော့ ဘဝင်မကျနိုင်ခဲ့ပါ။ အဲဒီလို တရားဝင်ဖြစ်အောင် လက်မှတ်ထိုးခဲ့တဲ့ အစိုးရက ပြည်သူ့ဆန္ဒကို ကိုယ်စားပြုခဲ့လို့လားလေ။ (အားလုံးသိကြတဲ့အတိုင်း နောက်ပိုင်းမှာတော့ လက်ပံတောင်းတောင်ကိစ္စ၊ ဒေါ်အောင်ဆန်းစုကြည် ပါဝင်တဲ့ စုံစမ်းရေးကော်မရှင်ရဲ့ အစီရင်ခံစာနဲ့ အကြံပြုချက်တွေ၊ ပြင်ဆင်မှုတွေ ဆက်လက်ဖြစ်ပွားခဲ့ပါတယ်။ ပြဿနာတွေက လုံးလုံးလျားလျား ပြေလည်မသွားသေးပါဘူး။ မြစ်ဆုံစီမံကိန်းကလည်း ခဏတာ ရပ်ဆိုင်းထားရုံပဲ ရှိသေးတယ်မဟုတ်လား။)

ကွန်ဖရန့်နောက်ဆုံးနေ့ နောက်ဆုံးအစီအစဉ်ကတော့ လတ်တလော မြန်မာ့အရေးကိစ္စများကို ဆွေးနွေးမယ့် ခေါင်းစဉ်ဖြစ်ပါတယ်။ ပါမောက္ခ ဒေးဗစ်စတိန်းဘတ်၊ ဦးကိုကိုလှိုင်၊ ဦးသန်းကျော် နဲ့ ဒေါက်တာတင်မောင်မောင်သန်း တို့က ဆွေးနွေးပြီး ဂျွန်ဘရန်ဒွန် က မော်ဒရိတ်တာ လုပ်ပါတယ်။ အားလုံး စိတ်ဝင်စားနေကြတဲ့ ဦးကိုကိုလှိုင်က ဆင်းရဲနွမ်းပါးမှု အပါအဝင် မြန်မာနိုင်ငံရဲ့ လက်တလော အခက်အခဲတွေကို ပြောသွားခဲ့ပါတယ်။ နိဂုံးချုပ်မှာတော့ ဘုရားက ပစ္စုပ္ပာန် တည့်တည့်ရှု ဖို့ ဟောကြားခဲ့တာကို ကိုးကားပြီး “လက်ရှိအရေးတွေကိုသာ အာရုံထားပြီး အတိတ်ကို ပြန်အပြစ်မတင်ကြဖို့” အဓိကထား ပြောသွားခဲ့ပါတယ်။ 

အဲဒီ နိဂုံးချုပ်ပုံကတော့ ကျွန်မကို အတွေးတွေ ပွားစေပါတယ်။ မူဝါဒအသစ်တွေ၊ ဥပဒေအသစ်တွေ ချမှတ်တဲ့နေရာမှာဖြစ်စေ၊ အနာဂတ်အတွက် ပြုပြင်ပြောင်းလဲစရာတွေ လိုလာတဲ့အခါဖြစ်စေ ယခင်ပြုလုပ်ခဲ့တဲ့ အမှားအယွင်းတွေဟာ ဘယ်လို၊ ဘာကြောင့် ဆိုတာကို ပြန်မသုံးသပ်လို့မရဘူးလို့ ထင်ပါတယ်။ အဲဒီတုန်းက တာဝန်ယူ၊ တာဝန်ရှိခဲ့သူတွေ အကြောင်းကလည်း တစ်နွယ်ငယ် တစ်စင်ပါ ထည့်သွင်းစဉ်းစားလာရမှာပါပဲ။ ဝန်ခံစရာရှိတာကို ဝန်ခံရမှာပါပဲ။ အတိတ်ကို လုံးဝ ဖုံးကွယ်ထားပြီး ပြုပြင်ပြောင်းလဲရေးတွေ ဆက်လုပ်ဖို့ဆိုတာ လက်တွေ့အားဖြင့် ဖြစ်နိုင်ပါ့မလားလို့ စဉ်းစားမိပါတယ်။

မြန်မာကျောင်းသားလေးတစ်ယောက်က ဦးကိုကိုလှိုင်ကို “မြန်မာနိုင်ငံမှာ နိုင်ငံရေးအကျဉ်းသားရှိပါသလား။ အစိုးရအနေနဲ့မဟုတ်တောင် မိမိကိုယ်ပိုင်အမြင်နဲ့ ပြောပြပါ” လို့ မေးတဲ့မေးခွန်းကတော့ သူ့ကို အတော်အကျပ်ရိုက်စေပါတယ်။ (အခုအချိန်မှာတော့ တစ်နှစ်အတွင်းမှာကို အဲဒီကိစ္စတွေ၊ အသုံးအနှုန်းတွေ အတော်အတန် ညှိနှိုင်းပြေလည်လာကြပါပြီ။)

တရုတ်ပညာရှင်တွေရဲ့ တင်ပြချက် ဆလိုက်တစ်ခု - ၁

တရုတ်ပညာရှင်တွေရဲ့ တင်ပြချက် ဆလိုက်တစ်ခု - ၃

တရုတ်ပညာရှင်တွေရဲ့ တင်ပြချက် ဆလိုက်တစ်ခု - ၄

ပါမောက္ခ ဒေးဗစ်စတိန်းဘတ်၊ ဦးကိုကိုလှိုင်၊ ဦးသန်းကျော် နဲ့ ဒေါက်တာတင်မောင်မောင်သန်း တို့က ဆွေးနွေးပြီး ဂျွန်ဘရန်ဒွန် က မော်ဒရိတ်တာလုပ်တဲ့ မြန်မာအရေး ဆွေးနွေးပွဲ

ကျွန်မဟာ အဲဒီ ကွန်ဖရန့်ကို တက်နေတဲ့အချိန်မှာ ခေါင်းမှာ ဦးထုပ် ၂ လုံးဆောင်းထားရသလိုပါပဲ။ ကျွန်မ ဖိတ်ကြားခံရတာ မြန်မာစာရေးဆရာ၊ ကဗျာဆရာ တစ်ယောက်ဆိုတဲ့ အနေအထားနဲ့ပါ။ ဒါပေမယ့်လည်း ကျွန်မရဲ့ ပြည်သူ့ရေးရာ ဘာသာရပ်တွေအပေါ် သင်ယူလေ့လာခဲ့မှုတွေ၊ နိုင်ငံတစ်နိုင်ငံရဲ့ မူဝါဒ ချမှတ်ရေးနဲ့ စီမံကိန်းရေးဆွဲရေး အစိတ်အပိုင်းတစ်ခုမှာ (ခွင့်ရက်ရှည် ယူထားပေမယ့်) တာဝန်ထမ်းဆောင်နေဆဲ ဝန်ထမ်းတစ်ယောက်ရဲ့ အတွေ့အကြုံတွေက မေးချင် ပြောချင်စိတ်တွေကို လှုံ့ဆော်နေပါတယ်။ တစ်ဖက်ကလည်း ကျွန်မဟာ ဒီပွဲမှာ စင်ကာပူက ပြည်သူ့ဝန်ထမ်းတစ်ဦးအဖြစ် တရားဝင်ဖိတ်ကြားခံရပြီး တက်ရောက်နေတာ မဟုတ်တဲ့အတွက် သူများနိုင်ငံအစိုးရက ချမှတ်ထားတဲ့ ဝန်ထမ်းကျင့်ဝတ်တွေကိုလည်း စောင့်စည်းပြီး အပြောအဆို ထိန်းသိမ်းရပါတယ်။ နှောင်ကြိုးမဲ့သွားတဲ့ အနေအထားမှာ နောင်နှစ်တွေမှာ ကျင်းပမယ့် အခုလို ပွဲတွေကို တက်ရောက်ခွင့်ရပြီး လွတ်လွတ်လပ်လပ် ဆွေးနွေးနိုင်မယ်လို့သာ မျှော်လင့်မိပါတော့တယ်။

ပန်ဒိုရာ

(ဆက်လက်ဖော်ပြသွားပါမည်။)

၂၀၁၃ သြဂတ်စ်လ စတိုင်သစ်မဂ္ဂဇင်းတွင် ဖော်ပြပြီး။  


အပိုင်း (၁) သို့  
အပိုင်း(၂) သို့

 အပိုင်း (၃) သို့

 အပိုင်း (၄) သို့

အပိုင်း(၅) သို့

Expand..

Summary..

အိုင်အိုဝါ ရက်စွဲများ အပိုင်း (၅)

အိုင်အိုဝါ ရက်စွဲများ အပိုင်း (၅)

၁၃။ အိုင်အိုဝါရဲ့ ကျေးလက်မြင်ကွင်း

အိုင်အိုဝါမြို့ကို စရောက်ကတည်းက အနီးအနား သွားလိုက်တိုင်းမှာ ကျွန်မ အထူးမျက်စိကျမိတာကတော့ ပြောင်းခင်းတွေပါ။ ကျွန်မရဲ့ ကွန်ပျူတာထဲ ပါလာတဲ့ နောက်ခံဓာတ်ပုံတွေထဲက ကောက်ရိုးထုံးအကြီးကြီးတွေ ပုံကို သဘောကျနေတာ ကြာပြီမို့ အဲဒီလို ကောက်ရိုးထုံးတွေရယ် ပြောင်းခင်းတွေရယ် သူတို့ရဲ့ လူမှုဘဝတွေရယ်ကို ဓာတ်ပုံရိုက်ချင်ခဲ့ပါတယ်။ 

IWP ရဲ့အစီအစဉ်နဲ့ Eram Acreage ဆိုတဲ့နေရာ ကို အလည်သွားခဲ့ပါတယ်။ ကျွန်မ အိုင်အိုဝါမြို့ကို ရောက်ရောက်ချင်း ကြိုဆိုနှုတ်ဆက်တဲ့ညမှာ ပေါလ် လို့ခေါ်တဲ့ မြို့ခံ ဦးလေးကြီးတစ်ယောက်က လာနှုတ်ဆက်ပါတယ်။ ကျွန်မကို မြန်မာနိုင်ငံကမှန်းသိလို့ တကူးတက လာနှုတ်ဆက်တာပါ။ ပြီးတော့ သူက ပြောခဲ့ပါတယ်။ သူက IWP စာရေးဆရာတွေကို နှစ်တိုင်း သူ့အိမ်ကို အလည်ခေါ်ပါတယ် တဲ့ ဒီတော့ ကျွန်မလည်း သူ့အိမ်ကို အလည်ရောက်ချင်ရောက်ဦးမှာပါ တဲ့။ သူပြောခဲ့တဲ့ အတိုင်းပါပဲ Eram Acreage ကို အလည်သွားတဲ့ ခရီးဟာ ပေါလ်ရဲ့ အိမ်က ဖိတ်ကြားတာ ဖြစ်ပါတယ်။ 

အိုင်အိုဝါမြို့ရဲ့ အနီးအနားမှာရှိတဲ့ ကျေးလက်အိမ်ကလေးမှာ ပေါလ်နဲ့ သူ့ဇနီးတို့  နေထိုိင်ကြပါတယ်။ ကျွန်မတို့ရောက်လာတဲ့အခါ အိမ်ကလေးနဲ့ အိမ်နားက ကြက်ခြံ ဂိုထောင် စတာတွေကို တည်ဆောက်ထားပုံကို ရှင်းပြပါတယ်။ ပေါလ်ရဲ့ အိမ်ကို ပတ်ဝန်းကျင်ထိန်းသိမ်းရေးနဲ့ ကိုက်ညီအောင် သဘာဝစွမ်းအင်ကို အတတ်နိုင်ဆုံး အသုံးချထားတဲ့ ဒီဇိုင်းနဲ့ တည်ဆောက်ထားပါတယ်။  

ပေါလ်နဲ့အတူ သူ့ရဲ့အိမ်ရှေ့မှာ

ပေါလ်ရဲ့ အိမ်မှာ ခွေး နှစ်ကောင် မွေးထားပါတယ်။ ခြံကိုစောင့်တဲ့ ခွေးကြီးက အိမ်ထဲမှာ အလှမွေးထားတဲ့ ခွေးပုလေးကို ကြောက်ရတာကိုလည်း ပြုံးချင်စရာ တွေ့ခဲ့ရပါသေးတယ်။ သူတို့အိမ်ခြံဝင်းဟာ တခြားအိမ်တွေနဲ့ အတော်ကလေးလှမ်းပါတယ်။ ဒါကြောင့် တခါတလေတော့ ညဘက်တွေမှာ တောရိုင်းတိရိစ္ဆာန်အချို့က ကြက်တွေကို လာဆွဲတဲ့အခါ သေနတ်နဲ့ ခြောက်လှန့် ပစ်ခတ်ရပါသတဲ့။ မြွှေရော ရှိလား လို့ ကျွန်မကမေးလိုက်တော့ အိုင်အိုဝါမှာ မြွေမရှိဘူး လို့ ပေါလ်က ပြန်ပြောပါတယ်။ 

သူတို့ဇနီးမောင်နှံ ထိန်းသိမ်းစောင့်ရှောက်နေတဲ့ ပရေရီမြက်ခင်းတွေနဲ့ အနီးအနားက စိုက်ခင်းတွေရှိရာကို ကျွန်မတို့ကို လိုက်ပို့ပါတယ်။ ပရေရီမြက်ခင်းတွေကို ထိန်းသိမ်းဖို့ဟာ ဂေဟစနစ်အတွက် ဘယ်လိုအရေးကြီးကြောင်း ရှင်းပြပါတယ်။ ပရေရီမြက်ခင်းတွေအကြောင်းကို ငယ်ငယ်တုန်းကတော့ ၇တန်း ပထဝီမှာ သင်ခဲ့ရသေးတယ်လို့ ကျွန်မ ခပ်ရေးရေး ပြန်မှတ်မိပါတယ်။ အဲဒီမြက်တွေဟာ လူတစ်ရပ်လောက်အထိ ရှည်ပါတယ်။ အဲဒီမြက်ခင်းတွေကို ထိန်းသိမ်းခြင်းဖြင့် မြေဆီမြေနှစ်နဲ့ ရာသီဥတုကိုလည်း ထိန်းညှိပေးတယ်လို့ ပေါလ်က ရှင်းပြပါတယ်။   

မြက်ခင်းတွေကြားမှာ ဓာတ်ပုံရိုက်နေကြတဲ့ ရုရှက အလီဆာ နဲ့ ဖိလစ်ပိုင်က ဂျင်းန်

ပေါလ်တို့ ဇနီးမောင်နှံ တည်ခင်းတဲ့ နေ့လည်စာ

အဲဒီခရီးအပြီး စက်တင်ဘာလကုန်လောက်မှာ  အလည်ရောက်ခဲ့တဲ့ ကျေးလက်တစ်နေရာကတော့ အိုင်အိုဝါမြို့နဲ့ ဒမွိုင်းမြို့ကြားက ပြောင်းခင်းတွေ ရှိတဲ့ ရွာတစ်ရွာပါ။ ဂူလာလာရဲ့ မိတ်ဆွေတစ်ယောက်က အလည်ခေါ်လို့ ဂူလာလာနဲ့ ကျွန်မ လိုက်သွားဖြစ်ပါတယ်။

အဲဒီအိမ်ကလေးမှာတော့ အိမ်ရှင် ကန် နဲ့ သူ့ဇနီး၊ ကလေး ၃ ယောက်တို့ နေထိုင်ကြပါတယ်။ ကန် တို့မိသားစုကတော့ ပြောင်းမစိုက်ပါဘူး။ ကန်က ဆိုင်တစ်ဆိုင်မှာ အလုပ်လုပ်ပါတယ်။ သူတို့ အိမ်မှာ တနိုင်တပိုင် စိုက်ထားတဲ့ အသီးအနှံခင်းလေးတွေ ရှိပါတယ်။ ကလေးတွေအတွက်တော့ ပြေးလွှားဆော့ကစားစရာ နေရာ ကျယ်ကျယ်ဝန်းဝန်းနဲ့မို့ စိတ်ချမ်းသာစရာပါ။ ထင်းရှုးပင်မျိုးစုံ ဝန်းရံထားတဲ့ အိမ်လှလှလေးရယ် အိမ်နားပတ်ဝင်းကျင်က ပြောင်းခင်းတွေနဲ့ သိုလှောင်ရုံတွေကို ဓာတ်ပုံရိုက်လာခဲ့ပါတယ်။ သူတို့ကိုယ်တိုင်ချက်ပြုတ်ပြီး ဧည့်ခံတဲ့ လတ်ဆတ်တဲ့ ပြောင်းဖူးပြုတ်၊ အာလူးဖုတ်၊ ကြက်ကင်၊ ရွှေဖယုံသီးအစာသွပ်မုန့် တွေကို အားပါးတရ စားလာခဲ့ပါတယ်။ 

ပြောင်းခင်းတွေ

ကန် ရဲ့ အိမ်ကလေး

ကျေးလက်နဲ့ ပတ်သက်လို့ နောက်ထပ် အမှတ်တရတစ်ခုကတော့ Kalona Fall Festival ဖြစ်ပါတယ်။ ကလိုနာ ဒေသမှာ ကျင်းပတဲ့ ဆောင်းဦးရာသီ ပွဲတော်မှာ လယ်ယာသုံးပစ္စည်းတွေ၊ အသုံးအဆောင်ဟောင်းတွေ၊ ဒေသထွက်ကုန်ပစ္စည်းတွေ၊ အိမ်မှာလုပ်တဲ့ အစားအသောက်တွေ ရောင်းချနေတဲ့ ဆိုင်ခန်းတွေနဲ့ စည်ကားလှပါတယ်။ တီးမှုတ်ဖျော်ဖြေသူတွေ ရှိသလို ဗဟုသုတရစရာ ပြတိုက်တွေလည်း ရှိပါတယ်။ ဥဇဘက်ကစ္စတန်က အလီနာကတော့ အဲဒီပွဲတော်မှာ ကလေးတွေနဲ့အတူ က လာခဲ့ပါသေးတယ်။ သူတို့နိုင်ငံက ရိုးရာပွဲတော်တွေနဲ့ ဆင်တူတယ် လို့ပြောပြီး အဲဒီနေ့က အလွန်ပျော်ရွှင်နေခဲ့ပါတယ်။ 

ကလိုနာပွဲတော်မှာ ရောင်းချနေတဲ့ ဒေသထွက်ကုန်တွေ

ကျွန်မ မသွားနိုင်ခဲ့တဲ့ ရိုးရာပွဲတစ်ခုကတော့ အိုင်အိုဝါမြို့မှာ မြို့ခံတွေက ဖိတ်ခေါ်ခဲ့တဲ့ Barn Dance ပွဲပါ။ ကျီ (သိုလှောင်ရုံ) ကို ပတ်ပြီး ကကြတဲ့ အမေရိကန် ကျေးလက် စုပေါင်းအက တစ်မျိုးပါ။ အဲဒီနေ့က ကျွန်မက spirit lake ကို face to face workshop အတွက် ခရီးသွားနေခဲ့ပါတယ်။ အဲဒီနေ့က Barn Dance မှာ IWP စာရေးဆရာ အတော်များများဟာ ကျေးလက်အကကို မြို့ခံ အဘိုးကြီး အဘွားကြီးတွေနဲ့ ရင်းရင်းနှီးနှီး အတူတူကခဲ့ကြတယ်လို့ ပြန်ပြောကြပါတယ်။

၁၄။ Global Express စင်တင်ကဇာတ်

အိုင်အိုဝါကို မသွားခင် ရန်ကုန်မှာကတည်းက အစီအစဉ်တွေကို ကျွန်မတို့ကို ပေးပို့တဲ့အခါ Global Express ဆိုတဲ့ စင်တင်ကဇာတ်ပွဲမှာ စာရေးဆရာတွေရဲ့ ကဗျာ၊ ဝတ္ထု၊ ပြဇာတ် စတဲ့ လက်ရာတွေကို သရုပ်ဖော်ကပြဖို့ ပါဝင်ချင်တယ်ဆိုရင် စာမူတွေ ပေးထားဖုိ့ တောင်းဆိုခဲ့ပါတယ်။ ကျွန်မက ကျွန်မရဲ့ ကဗျာအချို့ကို ပေးပို့ထားခဲ့ပါတယ်။ 

အိုင်အိုဝါမြို့ကို ရောက်တဲ့အခါ IWP က စင်တင်ကဇာတ်မှာ ပါဝင်ဖို့ ရွေးချယ်ခံရတဲ့ စာမူတွေရဲ့ စာရင်းကို ထုတ်ပြန်ပါတယ်။ ကျွန်မရဲ့ “လူပြိန်းများ မြို့ကိုသိမ်းပိုက်စဉ်” ကဗျာ ရွေးချယ်ခံရတဲ့အတွက် ဒီကဗျာကို အိုင်အိုဝါ တက္ကသိုလ် ပြဇာတ်ပညာဌာနမှာ သင်ယူနေတဲ့ကျောင်းသားတွေနဲ့ ဆရာတွေက ဘယ်လို သရုပ်ဖော်ကြမလဲ ဆိုတာ စိတ်ဝင်စားနေမိပါတယ်။

ဇာတ်တိုက်ဖို့ ချိန်းဆိုထားတဲ့ ရက်တွေမှာတော့ ကျွန်မက spirit lake ကို ရောက်နေခဲ့ပါတယ်။ အစီအစဉ် ဒါရိုက်တာ ပြဇာတ်မင်းသမီး ဆဖရွန် ဟန်ကီ (Saffron Henke) က သူကိုယ်တိုင် ကျွန်မရဲ့ ကဗျာကို ရွတ်ဆိုမှာဖြစ်ကြောင်း၊ ဘယ်လိုရွတ်ဆိုဖို့ အကြံပေးလိုက ပေးနိုင်ကြောင်း အီးမေးလ်ပို့လာပါတယ်။ ကျွန်မကလည်း သူ သင့်တော်သလို သရုပ်ဆောင် ရွတ်ဆိုဖို့ပဲ ပြောလိုက်ပါတယ်။

Spirit lake က ပြန်ရောက်တဲ့ ညနေမှာ စင်တင်ကဇာတ်ပွဲကို သွားခဲ့ကြပါတယ်။ စာရေးဆရာ ၉ ယောက်ရဲ့ အစီအစဉ် ၉ ခုထဲမှာ မှတ်မှတ်ရရဖြစ်မိတဲ့ တင်ဆက်မှု တချို့ရှိပါတယ်။ ယူရူဂွေးက လူးဝစ် ဘရာဗို ရဲ့ The Hunt ဆိုတဲ့ ကဗျာကို ဒစ်ဂျစ်တယ် နည်းပညာတွေ ပေါင်းစပ်လို့ ဗွီဒီယိုရိုက်ကူးထားပြီး ရုပ်ရှင်ပိတ်ကားပေါ်မှာ ဆလိုက်ထိုးပြီး ပြသခဲ့ပါတယ်။ ဇင်ဘာဘွေက ခရစ္စတိုဖာမာလာဇီ ရဲ့ Election Day ဆိုတဲ့ ဝတ္ထုတိုနဲ့ ကိုရီးယားက ချွိုင် ရဲ့ Two Daughters ဆိုတဲ့ ပြဇာတ်ကို ဟန်မူပါပါ သရုပ်ဆောင် ကပြသွားကြပုံကို အထူးသဘောကျမိပါတယ်။ အမျိုးသမီးတွေ စုပေါင်းပြီးတော့ တီဂျေဒီမားရဲ့ Dead and Bread ကဗျာကို တစ်ယောက် တစ်ခွန်းရွတ်ဆိုပုံနဲ့ ရုတ်တရက် ပြိုင်တူ လုပ်လိုက်တဲ့ လှုပ်ရှားမှုတွေ ဟာလည်း သိပ်ကို တီထွင်မှု အားကောင်းပါတယ်။ ကျွန်မရဲ့ ကဗျာ လူပြိန်းများ (အင်္ဂလိပ်ဘာသာပြန်) ကိုတော့ ဆဖရွန်ဟန်ကီ တစ်ဦးတည်းက အနိမ့်အမြင့် အသံအား၊ မျက်နှာထား၊ လက်ဟန်ခြေဟန်တွေကို ထိထိရောက်ရောက် အသုံးပြုပြီး ရွတ်သွားခဲ့ပါတယ်။

Global Express ပိုစတာ

ပွဲပြီးတဲ့အခါ IWP က ဝန်ထမ်းတစ်ဦးက ကျွန်မကို ဘယ်လိုသဘောရလဲလို့ လာမေးတော့ ဆဖရွန် ရွတ်သွားပုံကို ကြည့်ပြီးတဲ့အခါ အဲဒီကဗျာကို သူ့လိုကောင်းအောင် မရွတ်နိုင်လို့ ကျွန်မကိုယ်တိုင် ရွတ်ရဲမှာတောင် မဟုတ်တော့ဘူးလို့ ရယ်ကာမောကာ ပြောလိုက်ပါတော့တယ်။ သူရွတ်သွားပုံကို သင်ယူလေ့လာရအောင် ကင်မရာထဲမှာ ဗွီဒီယိုရိုက်ယူလာခဲ့ပါတယ်။(အဲဒီဗွီဒီယိုကို ကြည့်ချင်ရင် poetpandora@gmail.com ကို မေးလ်ပို့လိုက်ပါ။ ဆဖရွန်ရဲ့ ကော်ပီရိုက်ကိစ္စကြောင့် တစ်ဦးချင်းကိုပဲ ဖြန့်ဝေပေးနိုင်ပါတယ်။)

၁၅။ New Orleans သို့ အလည်ခရီး

၂၀၁၂ ခုနှစ် IWP စာရေးဆရာတွေအတွက် mid-residency trip လို့ခေါ်တဲ့ လေ့လာရေးခရီးမှာ သွားစရာ နေရာ နှစ်ခုထဲက တစ်ခုကို ရွေးခိုင်းလာပါတယ်။ တစ်နေရာကတော့ ဆန်ဖရန်စစ္စကိုပါ။ နောက်တစ်နေရာကတော့  နယူးအော်လန်းဇ်  ဆိုတဲ့ လူဝီစီယားနား ပြည်နယ်ရဲ့ စိတ်ဝင်စားဖွယ်နေရာပါ။ ကျွန်မက ဘယ်နေရာကိုမှ မရောက်ဖူးသေးပေမယ့် ယဉ်ကျေးမှုအရ ပိုထူးခြားတယ်လို့ ထင်မိတဲ့  နယူးအော်လန်းဇ်  ကိုပဲ ရွေးလိုက်ပါတယ်။ 

နယူးအော်လန်းဇ် ကို သွားဖို့ စာရင်းပေးထားတဲ့ စာရေးဆရာတွေဟာ အိုင်အိုဝါမြို့နဲ့ အနီးဆုံးဖြစ်တဲ့ စီဒါရက်ပစ် လေဆိပ်ကနေ အုပ်စု ၂ စု ခွဲပြီး ရှီကာဂိုကို ထွက်ခွာခဲ့ကြပါတယ်။ ရှီကာဂိုကနေ နောက်ထပ် လေယာဉ်ပြောင်းစီးပြီးတော့  နယူးအော်လန်းဇ်  လေဆိပ်ကို သွားဖို့ပါ။ ကျွန်မပါတဲ့ အဖွဲ့ဟာ စောစောထွက်တဲ့အဖွဲ့ဖြစ်ပြီး မနက် ၇ နာရီကျော်မှာ စီဒါရက်ပစ်ကနေ ထွက်လာပြီး ညနေ ၄ နာရီခွဲမှာ နယူးအော်လန်းဇ်ကို ဆိုက်ရောက်ဖို့ အစီအစဉ်ချထားပါတယ်။ စောစောစီးစီး ရောက်သွားတဲ့အခါ ဘယ်လို လျှောက်လည်လိုက်မယ်လို့ အဖွဲ့သားတွေက စိတ်ကူးယဉ်နေကြပါတယ်။ သို့သော်လည်း ကံဆိုးချင်တော့ လေယာဉ်နှောင့်နှေးမှုနဲ့ ကြုံရပါတယ်။ ခေတ်မီတိုးတက်တဲ့ နိုင်ငံကြီးမှာလည်း ဒီလို အထစ်အငေါ့တွေ ရှိနေတတ်တာကို တွေ့ခဲ့ရပါတယ်။ (နောက်ပိုင်းမှာ အဝေးပြေးဘတ်စ် စီးဖြစ်တဲ့အခါ အဲဒီလို အတွေ့အကြုံတစ်ခု ထပ်ရပါသေးတယ်။)

 နယူးအော်လန်းဇ်  ရဲ့ လူးဝစ်အမ်းစထရောင်း လေဆိပ် ကိုရောက်တဲ့အချိန်မှာ နေဝင်ဖျိုးဖျ ဖြစ်နေပါပြီ။ လူးဝစ်အမ်းစထရောင်းက နာမည်ကျော် အမေရိကန် ဂျက်ဇ်ဂီတပညာရှင် အဆိုတော်ပါ။ အနုပညာရှင် တစ်ယောက်ကို ဂုဏ်ပြုပြီး ပေးထားတဲ့ လေဆိပ်နာမည်ဟာ အလွန်ကျက်သရေရှိတယ် လို့ ကျွန်မ ထင်မိပါတယ်။ ဂျက်ဇ်ဂီတ မြို့တော်ဖြစ်တဲ့  နယူးအော်လန်းဇ် နဲ့လည်း လိုက်ဖက်ညီလှပါတယ်။ မြို့ထဲကို ဖြတ်ကျော်ပြီး ကျွန်မတို့ တည်းခိုမယ့် ပြင်သစ်ရပ်ကွက် (French Quarter) ရှိရာကို ဘတ်စ်ကားက လိုက်ပို့ပါတယ်။ တည်းခိုတဲ့ ဟိုတယ်က Four Points By Sheraton ပါ။ လူစည်ကားရာ နာမည်ကျော် ဘာဘွန်းလမ်း (Barbon Street) မှာ တည်ရှိပါတယ်။

စက်တင်ဘာလကုန်ခါနီးမို့ အဲဒီအချိန်မှာ အိုင်အိုဝါမြို့နဲ့ အနီးတဝိုက်မှာ အတော်အေးလာပါပြီ။ အထူးသဖြင့် ညဖက်တွေဆိုရင် အနွေးထည်ထူထူ ဝတ်နေရပါတယ်။  နယူးအော်လန်းဇ် ကိုရောက်တဲ့အခါ နွေးထွေးတဲ့ ရာသီဥတုက ဆီးကြိုနေပါတယ်။ နေ့ဘက်တွေဆိုရင် နေကျဲကျဲပူနေတတ်ပြီး ညဘက်မှာလည်း အနွေးထည် လုံးဝဝတ်စရာမလိုပါ။ မြန်မာပြည်နဲ့ စင်ကာပူက ရာသီဥတုမျိုးမို့ ကျွန်မအတွက်ကတော့ သက်တောင့်သက်သာ ဖြစ်နေရပါတယ်။ ရာသီဥတုနဲ့ ပတ်သက်လို့ နယူးအော်လန်းဇ် ဒေသဟာ မုန်တိုင်းဒဏ်တော့ ရံဖန်ရံခါ ခံရတတ်ပါတယ်။၂၀၀၅ ခုနှစ်ကတော့ ကက်ထရီနာ ဟာရီကိန်း ဒဏ်ကို ဆိုးဆိုးဝါးဝါး ခံခဲ့ရပါတယ်။

ပြင်သစ်ရပ်ကွက်ဟာ မန္တလေးမြို့က လမ်းတွေလို လေးထောင့်ကွက်ကျ တည်ဆောက်ထားတာမို့ မြေပုံကိုကြည့်ပြီး သွားလာရတာ သိပ်လွယ်ကူပါတယ်။ ညမှောင်ရီတရောမှာ ရေမိုးချိုးအပြီး ဟိုတယ်က ထွက်လာတဲ့အခါ မီးရောင်စုံ လမ်းမဟာ သီတင်းကျွတ်ပွဲတော်အလား စည်ကားနေတာကို တွေ့ရပါတယ်။ ဘာဘွန်းလမ်းဘေးတလျှောက်က စားသောက်ဆိုင်တွေနဲ့ အကခန်းတွေရှေ့မှာ မလုံ့တလုံ အဝတ်အစားနဲ့ ဧည့်သည်တွေကို ကြိုဆိုနေတဲ့ မိန်းကလေးတွေဟာ ရုပ်ရှင်တွေထဲမှာသာ မြင်ဖူးတဲ့ မြင်ကွင်းတွေအတိုင်းပါပဲ။ သရဲပုံ၊ စက်ရုပ်ပုံ ဝတ်စားပြီး အခကြေးငွေယူပြီး ဓာတ်ပုံတွဲရိုက်ခံနေသူတွေကိုလည်း တွေ့ရပါတယ်။ တချို့ကလည်း အချင်းချင်း ပုတီးကုံးတွေနဲ့ ပစ်ပေါက် ဆော့ကစား နေကြပါတယ်။ တီးမှုတ် ကခုန်နေသူတွေကိုလည်း တွေ့ရပါတယ်။ ကျွန်မတို့ဟာ လမ်းလျှောက်ငေးမောရင်း Gumbo Shop ဆိုတဲ့ စားသောက်ဆိုင်ကို ရောက်လာကြပါတယ်။ 

နယူးအော်လန်းဇ် ဟာ ဒေသထွက် အစားအစာကောင်းတွေ အတွက်လည်း ထင်ရှားပါတယ်။ ခရီရိုး (Creole) လို့ခေါ်တဲ့ ပြင်သစ်၊ စပိန်၊ အာဖရိကန်၊ အင်ဒီယန် ရောနှောနေတဲ့ လူမျိုးတွေရဲ့ ဟင်းလျာတွေကို အလည်ရောက်နေတဲ့ ရက်အတွင်းမှာ တတ်နိုင်သလောက် မြည်းစမ်းကြည့်ဖို့ စဉ်းစားထားခဲ့ပါတယ်။ အဲဒီညကတော့ ပုစွန်လုံးအသားနဲ့ ချက်ထားတဲ့ crawfish Étouffée ကို စားခဲ့ပါတယ်။ ထမင်းကို အနှစ်ပါတဲ့ဟင်းနဲ့ စားရတာမျိုးမို့ ကျွန်မအတွက်တော့ မြန်မာထမင်းဟင်း စားရသလိုပဲ အရသာရှိပါတယ်။ အခြား စားဖြစ်ခဲ့တဲ့ အစားအစာတွေကတော့ Jambalaya ဆိုတဲ့ ထမင်းနဲ့ အသီးအရွက်၊ ဝက်အူချောင်း၊ အသားတွေ ရောနှောချက်ပြုတ်ထားတဲ့ အစားအစာ၊ ပဲနီ (red bean) နဲ့ ထမင်း၊ po-boy လို့ခေါ်တဲ့ အသားညှပ်ပေါင်မုန့် စတာတွေပါ။ ကမာ (oyster) အထူးပြုရောင်းတဲ့ ဆိုင်တွေမှာလည်း  သွားစားဖြစ်ကြပါတယ်။ နာမည်ကြီးတဲ့ဆိုင်ဆိုရင် တစ်နာရီလောက် တန်းစီရပါတယ်။ အဲဒီမြို့မှာ စားဖြစ်ခဲ့တဲ့ အစားအသောက်တွေမှန်သမျှ ကျွန်မကတော့ နှစ်သက်မိပါတယ်။ မနက်ခင်းစာ ဝယ်စားတဲ့ ကြက်ဥမွှေကြော်ကအစ အရသာရှိနေတာပါ။ 

ပြင်သစ်ရပ်ကွက်က အိမ်လှလှလေးတစ်လုံး

ပြင်သစ်ရပ်ကွက်ထဲမှာ လျှောက်ကြည့်တဲ့အခါ အိမ်ကလေးတွေကို ကျွန်မ အထူးသဘောကျမိပါတယ်။  တချို့အိမ်လေးတွေက ဗိသုကာ လက်ရာတွေဟာ မြန်မာပြည် တချို့ဒေသတွေမှာ တွေ့ရတဲ့ အိမ်လေးတွေနဲ့ တူသလိုလို ထင်မိပါသေးတယ်။ သစ်သားနဲ့ လုပ်ထားတဲ့ မျက်နှာစာတွေနဲ့ ဝရံတာတွေကို ပန်းရောင်၊ ခရမ်းရောင်၊ အစိမ်းရောင် စသည်ဖြင့် တောက်ပတဲ့ ဆေးရောင်စုံတွေ ခြယ်ထားတာ၊ သံပန်းတွေ အလှဆင်ထားတာ အင်မတန် နှစ်သက်စရာကောင်းပါတယ်။ နောက်ထပ် စိတ်ဝင်စားမိတာကတော့ ဆိုင်ခန်းတွေရဲ့ ဒီဇိုင်းလှလှ ဆိုင်းဘုတ်တွေနဲ့ လမ်းမပေါ်မှာ ဖန်တီးထားတဲ့ အနုပညာလက်ရာတွေပါ။ မြင်ရတဲ့အရာ အတော်များများဟာ အနုပညာမြောက်နေတယ်လို့ ခံစားရပါတယ်။

ပြင်သစ်ရပ်ကွက်က အိမ်လှလှလေးတစ်လုံး

ပြင်သစ်ရပ်ကွက်က ဆိုင်းဘုတ်တစ်ခု

ပြင်သစ်ရပ်ကွက်က ဆိုင်းဘုတ်တစ်ခု

လမ်းဘေးမှာ ချရောင်းတဲ့ ပန်းချီဆိုင်တွေရော ပန်းချီပြခန်းတွေကိုပါ ဝင်ကြည့်ဖြစ်ပါတယ်။ သူတို့ဆီက ပန်းချီပြခန်းတွေဟာ လက်ရာစုံ မူဟန်အစုံ ပြထားတာမဟုတ်ဘဲ တစ်ဆိုင်စီမှာ ကိုယ့်ဆိုင်ရဲ့ အထူးပြုလက်ရာ တစ်မျိုး နှစ်မျိုးကိုသာ ရွေးချယ်ရောင်းချကြတာ များပါတယ်။ ဥပမာ - တောက်ပတဲ့ ဆေးသားအထူသုံးပြီး ပန်းတွေကို ရေးထားတဲ့ ပန်းချီကားတွေကိုချည်း ရောင်းတဲ့ဆိုင်ရှိသလို၊ လူတွေရဲ့ လှုပ်ရှားမှု ကောက်ကြောင်း ပန်းချီလေးတွေကိုချည်း ရောင်းတဲ့ဆိုင်လည်းရှိပါတယ်။ ဆိုင်တိုင်းမှာ မူရင်းပန်းချီကားကိုရော၊ အဲဒီကားတွေရဲ့ ပုံနှိပ်မူပွား ပန်းချီတွေကိုရော အရွယ်အစားမျိုးစုံ ဈေးနှုန်းမျိုးစုံနဲ့ အမှတ်တရပစ္စည်း အနေနဲ့ ရောင်းကြပါတယ်။  ကျွန်မကတော့ သူတို့လက်ရာတွေထက် မညံ့တဲ့ ကိုယ့်ဆီက ပန်းချီဆရာတွေရဲ့ ပန်းချီကားတွေကိုလည်း မြန်မာပြည်ရောက်ရင် မဖြစ်မနေ ဝယ်သင့်တဲ့ အမှတ်တရ လက်ဆောင်အဖြစ် အဲဒီလို မူရင်းရော မူပွားကိုပါ တွင်တွင်ကျယ်ကျယ် ရောင်းရရင်ကောင်းမယ်လို့ တွေးမိပါတယ်။ 

body paint တွေအထူးပြသထားတဲ့ ပြင်သစ်ရပ်ကွက်က ပန်းချီပြခန်းတစ်ခန်း

အမှတ်တရပစ္စည်းရောင်းတဲ့ ဆိုင်တွေမှာ ရောင်းကြတာကတော့ အမှတ်တရ လွယ်အိတ်၊ တီရှပ်၊ ပို့စကဒ်တွေ အပြင် တစ္ဆေသရဲ ဝိညာဉ်တို့ ကျက်စားတယ်ဆိုတဲ့  နယူးအော်လန်းဇ် ရဲ့ အမှတ်အသားတွေဖြစ်တဲ့ ဗူးဒူးအရုပ်လေးတွေ၊ သွေးစုတ်ဖုတ်ကောင်တွေ၊ ငှက်မွှေးတွေ ဘော်ကြယ်တွေနဲ့ ရောင်စုံခြယ်သထားတဲ့ ဗင်းနစ် မျက်နှာဖုံးတွေ (Venetian masks)ကို တွေ့ရပါတယ်။ အမေရိကရဲ့ အမှတ်တရပစ္စည်းတွေဆိုပေမယ့် အားလုံးလိုလိုဟာ made in China ဖြစ်နေပြီး ရောင်းချတဲ့ ဈေးဆိုင်ပိုင်ရှင် အတော်များများကျပြန်တော့ အိန္ဒယလူမျိုးတွေ ဖြစ်နေတာကို သတိထားမိတော့ ပြုံးမိပါသေးတယ်။ မစ္စစ္စပီမြစ်နဲ့ အနီးအနားမှာရှိတဲ့ ပြင်သစ်ဈေး (French Market) မှာတော့ လက်မှုပစ္စည်းတွေ၊ အမှတ်တရ ပစ္စည်းတွေအပြင်၊ ဒေသထွက် အစားအစာတွေကိုလည်း တွေ့ရပါတယ်။

ပြင်သစ်ရပ်ကွက် အမှတ်တရပစ္စည်း အရောင်းဆိုင်တစ်ဆိုင်က ဗူးဒူးအရုပ်တွေ

အမေရိကမှာ သရဲအခြောက်ဆုံးမြို့လို့ နာမည်ကြီးတဲ့  နယူးအော်လန်းဇ် က ပြင်သစ်ရပ်ကွက်မှာ ghost tour ဒါမှမဟုတ် haunted tour လို့ခေါ်တဲ့ သရဲခြောက်ခရီးစဉ်ကိုလည်း  လိုက်ပါခဲ့ပါသေးတယ်။ အဲဒီ ခရီးကတော့ ဧည့်လမ်းညွှန်က တစ္ဆေသရဲပုံပြင်တွေနဲ့ မြို့ရဲ့ သမိုင်းကြောင်းကို ပြောပြပြီး တစ်နာရီခွဲလောက် အနီးအနားနေရာတွေကို လှည့်လည် လိုက်ပြတဲ့ အစီအစဉ်ပါ။ ဒေါ်လာ ၂၀ ပေးရပါတယ်။ ဧည့်သည်တွေကို ဟာရီကိန်းဖျော်ရည် တစ်ခွက်ဝယ်ရင် တစ်ခွက်အလကား ပေးပါတယ်။ ဟာရီကိန်းဆိုတာက အဲဒီဒေသရဲ့ နာမည်ကြီး ကော့တေးလ် တမျိုးရဲ့ နာမည်ပါ။ အယ်လ်ကိုဟော အနည်းငယ် ပါတဲ့ ချိုရှရှဖျော်ရည်ဟာ အနီရဲရဲအရောင်မို့ သွေးစုတ်ဖုတ်ကောင်စုတ်ထားတဲ့ သွေးတွေနဲ့ တူတယ်ဆိုပြီး အခုလို သရဲခြောက်ခရီးစဉ်နဲ့ လိုက်ဖက်အောင် ရောင်းချပေးတာဖြစ်ပါတယ်။ ကျွန်မ အစက မျှော်လင့်မိတာကတော့ သရဲခြောက်တယ် ဆိုတဲ့ အဆောက်အဦတွေကို ဝင်ကြည့်ပြီး ညနေမှုန်ပျပျမှာ သရဲရထားစီးသလို ကြောက်စရာ ဖြစ်မလားလို့ပါ။ ဒါပေမယ့်လည်း အဲဒီအဆောက်အဦတွေရဲ့ အနီးအနားမှာ ရပ်နားရင်းနဲ့ပဲ သက်ဆိုင်တဲ့ ပုံပြင်တွေကို ဧည့်လမ်းညွှန်က ပြောပြတဲ့ ခရီးစဉ် ဖြစ်နေပါတယ်။

နယူးအော်လန်းဇ်က စိန့်လူးဝစ် ဘုရားကျောင်း

 နယူးအော်လန်းဇ် ဟာ တချိန်က စပိန်နဲ့ ပြင်သစ်တို့ရဲ့ ကိုလိုနီနယ်မြေ ဖြစ်ခဲ့ပါတယ်။ လူမည်းတွေကို အကြီးအကျယ် ကျွန်ကုန်ကူးရာ ဆိပ်ကမ်းလည်း ဖြစ်ခဲ့ပါတယ်။ ကျွန်တွေကို အစုလိုက်အပြုံလိုက် သတ်ဖြတ်ခဲ့တဲ့အဖြစ်တွေ၊ မြို့လုံးကျွတ်နီးပါး မီးလောင်ခဲ့တဲ့ အဖြစ်တွေလည်း ကြုံခဲ့ရပါတယ်။ နေ့ရက်တစ်ခု ရောက်တိုင်းမှာ ဘုရားကျောင်းက အလိုလို ခေါင်းလောင်းသံ မြည်လာတတ်တဲ့ အကြောင်း၊ သွေးစုတ်ဖုတ်ကောင် ဇာတ်လမ်း၊ ရက်ရက်စက်စက် သတ်ဖြတ်မှုတွေ၊ ဒီဒေသမှာ လူတွေ ပျောက်သွားတတ်တဲ့အကြောင်း စတဲ့ ခေတ်အဆက်ဆက်က အသည်းထိတ်စရာ ဇာတ်လမ်းတွေကို ဧည့်လမ်းညွှန်က တစ်ခုပြီးတစ်ခု ပြောပြခဲ့ပါတယ်။ အဲဒီပုံပြင်တွေဟာ သမိုင်းအရ တိတိကျကျ မှန်ချင်မှလည်း မှန်မှာပါ။ ဒါပေမယ့် စိတ်ဝင်စားတတ်တဲ့ ဧည့်သည်တွေကို ဖျော်ဖြေမှုပေးပြီး ဝင်ငွေအများအပြားရတဲ့ tour တွေလို့ ပြောကြပါတယ်။ ကျွန်မကတော့ ပုဂံလို နေရာမျိုးမှာ ပါးစပ်ရာဇဝင် ဇာတ်လမ်းတွေပေါ် အခြေခံပြီး အဲဒီလို haunted tour တွေ တီထွင်ပြီး ရောင်းရင်တော့ သာသနာရေးအရ၊ သမိုင်းအရ လက်ခံနိုင်ဖွယ် ဖြစ်ပါ့မလားလို့ တွေးနေမိပါတယ်။ 

ပြင်သစ်ရပ်ကွက်က စိန့်လူးဝစ် သချိုင်္င်း အမှတ် (၁)

 

စိန့်လူးဝစ် သင်္ချိုင်း အမှတ် ၁ ကိုလည်း ဧည့်လမ်းညွှန်တစ်ဦးရဲ့ ဦးဆောင်မှုနဲ့ သွားခဲ့ကြပါတယ်။ ၁၇၈၉ ခုနှစ် ကတည်းက ဖွင့်လှစ်ခဲ့တာမို့ ရှေးအကျဆုံးနဲ့ အကျော်ကြားဆုံး ဂူသင်္ချီုင်းလို့ ဆိုပါတယ်။ ကြီးကြီးမားမား ခမ်းခမ်းနားနား တည်ဆောက်ထားတဲ့ အုတ်ဂူတွေကို တွေ့ရပါတယ်။ မိသားစုလိုက် နေရာချထားတဲ့ ဂူတွေ၊ ဘာသာရေး အထိမ်းအမှတ် အရုပ်တွေ ထုလုပ်ထားတဲ့ ဂူတွေဟာ စိတ်ဝင်စားစရာပါ။ Faulkner House လို့ခေါ်တဲ့ အမေရိကမှာ charming အဖြစ်ဆုံးလို့ ဆိုတဲ့ စာအုပ်ဆိုင်ကလေးကိုလည်း ရောက်ခဲ့ပါတယ်။ ရှားပါးစာအုပ်တွေကိုပါ စုဆောင်းထားတဲ့ဆိုင်ပါ။ ပန်းချီတွေ ရေးဆွဲထားတဲ့ ကွန်ကရစ်တိုင်လုံးတွေရှိရာ Claiborne Expressway အောက်မှာလည်း ဓာတ်ပုံရိုက်ခဲ့ပါတယ်။

Claiborne Expressway အောက်က ပန်းချီခြယ်ထားတဲ့ တိုင်လုံးတွေ

နယူးအော်လန်းဇ်ရဲ့ ညတွေမှာ မဖြစ်မနေ ခံစားသင့်တဲ့ အရာတစ်ခုကတော့ တော့ ဂျက်ဇ် ဂီတ ဖျော်ဖြေပွဲတွေပါ။ ညနေစောင်းမှာ လမ်းမတွေရဲ့ ဘေးမှာ လွတ်လွတ်လပ်လပ် တီးမှုတ်နေတဲ့ တီးဝိုင်းတွေ ရှိသလို၊ ကော်ဖီဆိုင် ဘားဆိုင်တွေထဲမှာ ဖျော်ဖြေတဲ့ တီးဝိုင်းတွေလည်း ရှိပါတယ်။ တချို့နေရာတွေကတော့ အခကြေးငွေပေးပြီးမှ ဝင်လို့ရပါတယ်။ မနက်စောစောနဲ့ ညနေစောင်းတွေမှာ ခံစားသင့်တာကတော့ မစ္စစ္စပီမြစ်ကမ်းမှာ လေညင်းခံရင်း လမ်းလျှောက်ဖို့ပါ။ မစ္စစ္စပီမြစ်ကို မြင်တိုင်းတော့ စာရေးဆရာတွေရဲ့ စိတ်ထဲမှာ အမေရိကန် စာရေးဆရာကြီး Mark Twainရဲ့ Tom Sawyer တို့ Huckleberry Finn တို့ကို သတိတရ ဖြစ်နေကြမှာပါ။ 

စားသောက်ဆိုင်တစ်ဆိုင်ထဲက ဂျက်ဇ် ဂီတဖျော်ဖြေပွဲ

မစ္စ္စစ္စပီမြစ်ရဲ့ မနက်ခင်းအလှ

မစ္စစ္စပီမြစ်ရဲ့ ညချမ်းအလှ

ချောင်းထဲမှာ စက်လှေစီးပြီး alligator မိချောင်းခေါင်းတိုတွေကို သွားကြည့်ကြတဲ့ Bayou Tour လို့ခေါ်တဲ့ ခရီးတစ်ခုလည်း မှတ်မှတ်ရရပါ။ နယူးအော်လန်းဇ် ဟာ မိချောင်းတွေ ရှိတဲ့ ဒေသအဖြစ်လည်း ထင်ရှားပါတယ်။ ဒါကြောင့် သူတို့ရဲ့ အမှတ်တရ ပစ္စည်းတွေမှာ မိချောင်းခေါင်းတွေကိုလည်း တွေ့ရပါတယ်။ Swamp ဆိုတဲ့ နွံဖုံးနေတဲ့ ရေတိမ်ချောင်းတွေမှာ မိကျောင်းတွေ မွေးထားကြပါတယ်။ ကျွန်မတို့ စီးနင်းလိုက်ပါလာတဲ့ စက်လှေကို မောင်းသူဟာ မိချောင်းတွေအကြောင်း ရှင်းလင်းပြောပြတဲ့ ဧည့်လမ်းညွှန်တစ်ယောက်လည်း ဖြစ်ပါတယ်။ လှေထဲမှာ မိကျောင်းခေါင်းပြတ် အစစ် အခြောက်တစ်လုံးကို ဧည့်သည်တွေက တစ်ယောက်ပြီးတစ်ယောက် ကိုင်ကြည့်ကြပါတယ်။ နောက်တော့ ချောင်းစပ်က မိချောင်းတွေ ထွက်လာတာကို မြင်ရပါတယ်။ တစ်နေရာမှာတော့ စက်လှေကို ခဏစက်သတ်ပြီး မိချောင်းတွေကို ဧည့်လမ်းညွှန်က အနီးကပ် အစာကျွေးပြပါတယ်။ အပြန်ခရီးမှာတော့ လှေထဲမှာ ပါလာတဲ့ လာရီ လို့နာမည်ပေးထားတဲ့ မိချောင်းပေါက်စလေးကို ဧည့်သည်တွေက ကိုင်ကြည့်ကြပြန်ပါတယ်။ 

မိချောင်းလေးကို အစာကျွေးနေစဉ်

နယူးအော်လန်းဇ်မှာ ကျွန်မအပါအဝင် တချို့သော စာရေးဆရာတွေဟာ အလည်အပတ်ခရီးအပြင် IWP အစီအစဉ်တွေမှာ ပါဝင်ဆင်နွှဲရပါတယ်။ မောရိသျှက ဘာလင်၊ ဖိလစ်ပိုင်က ဂျန်နဲ့ ကျွန်မကတော့ နယူးအော်လန်းဇ်က အထက်တန်းကျောင်းတစ်ကျောင်းရဲ့ တီထွင်ဖန်တီးစာရေးသားခြင်း အတန်းတစ်တန်းမှာ ဆွေးနွေးဖို့ အစီအစဉ်ထဲမှာ ပါပါတယ်။ အဲဒီအတန်းဟာ တခြားကျောင်းပေါင်းစုံက ကျောင်းသားတွေ စုပေါင်းလာတက်ကြတဲ့ အတန်းဖြစ်ပါတယ်။ နယူးအော်လန်းဇ် က ကျောင်းသားတွေဟာ အိုင်အိုဝါက ကျောင်းသားတွေနဲ့ ကွဲပြားတဲ့အချက်လေးတွေ ရှိပါတယ်။ ဒီက ကလေးတွေက လူမည်းလေးတွေ များပါတယ်။ စာသင်ခန်းထဲမှာ ပိုပြီး လွတ်လွတ်လပ်လပ် နေကြပြီး မေးခွန်းတွေကိုလည်း ပိုမေးကြပါတယ်။ ကျွန်မတို့ရဲ့ စာ၊ကဗျာ နမူနာတွေကို သူတို့တွေကို ဖတ်ပြပြီး သူတို့တွေက အဲဒီစာတွေနဲ့ ပတ်သက်တဲ့မေးခွန်းတွေ မေးပါတယ်။ ပြီးတော့ ကလေးတွေဖတ်ဖို့ ကျွန်မတို့ ညွှန်းချင်တဲ့ နိုင်ငံတကာ စာရေးဆရာတွေအကြောင်းကို သူတို့ကို မိတ်ဆက်ပြောပြကြပါတယ်။ အဲဒီနောက်ပိုင်းမှာတော့ ကျွန်မတို့ ရွတ်ပြသွားတဲ့ လက်ရာတွေက ကောက်နုတ်ပြီးတော့ သူတို့ဆရာမက သူတို့ကို အောက်က လေ့ကျင့်ခန်းတွေ လုပ်ခိုင်းပါတယ်။

• -       ကိုယ် တစ်ခါမှ မရောက်ဖူးတဲ့ မြို့တစ်မြို့အကြောင်း ရေးပါ။
• -       ကမ္ဘာ့သမိုင်းကို အတိုဆုံးအကျဉ်းချုံး ရေးပါ။
• -       နိုင်ငံရပ်ခြား ရေစိမ်းမြေစိမ်းမှာ ဆက်သွယ်မှု ခက်ခဲတဲ့အကြောင်း ရေးပါ။ 

နယူးအော်လန်းဇ်က creative writing စာသင်ခန်းတစ်ခန်းမှာ ဆွေးနွေးနေစဉ်

အီဂျစ်က ခါလက်၊ ဂျာမနီက လူစီနဲ့ ဘော့စဝါနာက တီဂျေ တို့ကတော့ Melvin’s Cocktail and Music ဆိုတဲ့ ဆိုင်မှာ ကျင်းပတဲ့ စာပေရွတ်ပွဲတစ်ပွဲမှာ ဒေသခံစာရေးဆရာ တစ်ယောက်နဲ့အတူ သူတို့ရဲ့ လက်ရာတွေကို ရွတ်ပြခဲ့ပါတယ်။ ကျွန်မတို့လည်း သွားနားထောင်ခဲ့ကြပါတယ်။ တကယ်တော့ ၄ ည ၅ ရက် ကြာမြင့်ခဲ့တဲ့ နယူးအော်လန်းဇ် ခရီးစဉ်အကြောင်းကို ဒီ့ထက်အသေးစိတ် ပြောစရာတွေ အများကြီးကျန်ပါသေးတယ် ပြောပြရရင်လည်း စာမျက်နှာပေါင်းများစွာ ဖြစ်သွားပါလိမ့်မယ်။  အမြဲတစေ ပွဲတော်အလား စည်ကားနေပြီး တက်ကြွပျော်ရွှင်နေသူတို့ရဲ့ ညတွေကို ကျွန်မအနေနဲ့တော့ အခုလို ခဏတဖြုတ် အလည်သွားပြီး ခံစားလေ့လာတာ လုံလောက်ပါပြီ။ ဒီလိုနေရာမျိုးမှာ နှစ်ရှည်လများ နေရရင် ကျွန်မအတွက်တော့ ပျော်ရွှင်စရာ လွန်ကဲပြီး အာရုံနောက်ကျိစေမှာပါ။

ပန်ဒိုရာ

(ဆက်လက်ဖော်ပြသွားပါမည်။)

၂၀၁၃ ဂျူလိုင်လ စတိုင်သစ်မဂ္ဂဇင်းတွင် ဖော်ပြပြီး။  


အပိုင်း (၁) သို့  
အပိုင်း(၂) သို့

 အပိုင်း (၃) သို့

 အပိုင်း (၄) သို့

Expand..

Summary..