ပန်ဒိုရာ ဘာကောင်လဲ

ဒီကြွေးရှင် က ပူနေတော့ ကြွေးပူကို အရင်ဆပ်လိုက်ပါတယ်။

ပုံပန်းသဏ္ဍာန်

• ဆံပင် ။ ။ သဘာဝအမည်းရောင်။ ဆေးဆိုးမထား။ ပခုံးခန့်ရှည်လျား။ ဆံပင်လုံးသေးမျှင် အဖျားတွန့်ကောက်။
  
• နဖူး။ ။ လေးထောင့်ကျ။ မကျယ်ပါ။ မပြောင်ပါ။
  
• မျက်လုံး မျက်ခုံး။ ။ အမည်းရောင်။ မျက်နှာတခုလုံးတွင် ကြည့်ပျော်ရှုပျော် အရှိဆုံးအရာဟု သူငယ်ချင်းများက နှစ်သိမ့်ပြောကြ။ သို့သော် တချိန်ချိန် မျက်မှန်တပ်ရလျှင် မမြဲသော တရားသဘောဖြင့် အဖုံးကွယ်ခံ သွားရလေမည်။
  
• နှာတံ။ ။ မချွန်လွန်း မပြားလွန်း မကြီးလွန်း မသေးလွန်း
  
• နှုတ်ခမ်း။ ။ မထူလွန်း မပါးလွန်း
  
• မုတ်ဆိပ်ကျင်စွယ်။ ။ Not Applicable
  
• နားရွက်။ ။ ကြည့်ကောင်းရုံ ပညာရှိပီသရုံ အချိုးတကျ ကားသည်။ (မောင်တက်စ်တို့လို အရုပ်ဆိုးစွာ ကားခြင်းမဟုတ်.. ခွိခွိ၊)။ နားပေါက်၂ ဘက် ရှိသည်။ ၂၀၀၆ ကမှ ဖောက်ခဲ့။
  
• မျက်နှာပေး။ ။ အလေးအနက် စဉ်းစားနေချိန်တွင် မှုန်ကုတ်ကုတ် ရှိတတ်။ သဘောကျနေလျှင် သွား ၃၂ချောင်း ပေါ်အောင်ရယ်တတ်။ စိတ်ကူးယဉ်နေလျှင် တယောက်တည်း ပြုံးစိစိ စပ်ဖြဲဖြဲ ဖြစ်နေတတ်။
  
• အသားအရောင်။ ။ မဖြူပါ။ သို့သော် မညိုလွန်းပါ။
• အရပ်အမောင်း။ ။ မနိမ့်ပါ။ မမြင့်ပါ။
  
• ကိုယ်လုံးကိုယ်ထည်။ ။တချိန်က အလွန်အမင်း ပိန်ခဲ့ဖူး။ ယခု BMI ထဲ ၀င်ဆန့်လာပြီ။ အသက်ကလေး ရလာသဖြင့် နောင်တွင် ပုံပျက်အောင် ၀ကောင်း ၀မည်။ အာမမခံ။
  

ခြုံပြောရလျှင် ထူးထူးခြားခြားမရှိပါ။ လှသည်မမည် ရုပ်ဆိုးသည်လည်းမဟုတ် သာမန်ရုပ်ရည်ဖြစ်။ လူကြားထဲ ထင်းနေသည့် ရုပ်ရည်ပိုင်ရှင်မျိုး မဟုတ်။ စပိုင် လုပ်ငန်းများ လုပ်ရန် အထူးသင့်တော်သည်။

စိတ်နေသဘောထား အကျင့်စရိုက်

• ပို့စ်များကို ကြည့်၍ အကဲခတ်နိုင်သည်။ (ပြောပြရမှာ စိတ်မရှည်ခြင်း)
  
• ပြန်ဖတ်ရမှာ ပျင်းသလား။ ကဲ.. ဒါဆိုလည်း အတိုချုပ်ပြောရမှာပေါ့။ (စိတ်ကောင်း အနည်းငယ် ရှိတတ်ခြင်း)
  
• တကယ်တော့ လူဟာလူစိတ်ပဲပေါ့..ကဲ။ (တခါတလေ ဘုကျကျပြောတတ်ြခင်း)
  
• ပရိုဖိုင်းမှာလည်း ရေးထားပြီးသားပဲ။ (အပျင်းခိုခြင်း)
  
• အရက်သေစာ လောင်းကစား . အာ..ဒါတွေနဲ့တော့ အားလုံး လုံးဝ ကင်းစင်တယ်။ စိတ်ချ။ (တခါတလေ လိမ်တတ်ခြင်း.. အဲလေ..)
  
• ဘာအရောင်ကြိုက်သလဲ ဘာညာတွေတော့ မပြောချင်ဘူး (လျှို့ဝှက်တတ်ခြင်း)
  
• မြန်မာထမင်းဟင်းကို ပိုနှစ်သက်တတ်တာတွေ ဘာတွေလည်း ပြောမနေတော့ဘူး။ (ရှေ့ကဖုံးလည်း နောက်ကပေါ်တတ်ခြင်း)
  
• တကယ်တော့ ဒါမျိုးတွေ မရေးချင်ဘူး ကြွေးရှင်ကလာပူနေလို့ရေးရတာ။ (အားနာတတ်. ကြောက်တတ်ခြင်း)
  
• တော်ကြာမရေးလို့ လာမလည်တော့ရင်ဒုက္ခ (အပေါင်းအသင်း မင်ခြင်း)
  
• အခုတော့ ကိုယ့်အကြောင်းတွေ သိကုန်ပြီ။ ဘလော့ လာဖတ်သူတွေ များလာဦးမှာပဲ အဟိ.. (စိတ်ကူးထဲ တိုက်အိမ်ဆောက်ခြင်း)
  
• ဒါပေမယ့်လည်း တကယ်ကတော့ ပန်ဒိုရာဆိုတာ နာမည်ကျော်ပြီးသားပါလေ ငှက်ငှက်.. (ကြွားတတ်ခြင်း၊ ကိုယ့်ကိုယ်ကို အထင်ကြီးခြင်း)
  

အကောင်းဆုံးအချက်။ ။ မိမိစိတ်ဝင်တစား ခင်မင်လိုသူ တစ်ဦးဦး တွေ့ပါက နှစ်ရှည်လများပင် ကြိုးစားရပါစေ၊ စိတ်ရှည် သည်းခံစွာ မရရအောင် လိုက်လံခင်မင်တတ်သည်။ ထိုသူများသည် ကံကောင်းသူများ ဖြစ်သွား တတ်သည်။

အဆိုးဆုံးအချက်။ ။ စကားကြီးစကားကျယ် ပြောကာ ဆရာကြီး လုပ်တတ်သည်။ မယုံက နိဂုံးစာပိုဒ်ကို ဖတ်ပါလေ။

ခြုံပြောရလျှင် ကိုယ့်စိတ် ကိုယ့်အကြောင်းကို ကိုယ်တိုင် အသေအချာ သိလို့ကတော့ အောင်မြင်သော အေးချမ်းသော လူသား တစ်ယောက် ဖြစ်နေမှာပေါ့။ သတိ ဆိုတာကလည်း ခက်သား။ စိတ်၏ အနားသတ်တွင် စင်္ကြန်လျှောက်ရင်း ကံကြမ္မာလေကို ဆန်ကာ ရှင်သန်ခြင်း မီးအိမ်ကို ထွန်းညှိဖို့ ကြိုးစားနေသူသည် ပန်ဒိုရာဖြစ်သည်။