ပန်ဒိုရာ

Wednesday, December 9, 2020

စာပေဆု ၂၀၂၀

ပြည်သူ့အစိုးရလက်ထက်မှာ လွတ်လွတ်လပ်လပ် ဖွဲ့စည်းထားတဲ့ အမျိုးသားစာပေဆု ရွေးချယ်ရေး ကော်မတီရဲ့ ဆုံးဖြတ်ချက်နဲ့ အခုလို ဆုတွေ ပေးနိုင်တာ အင်မတန်မှ ဝမ်းသာစရာ ကောင်းလှပါတယ်။ ကျွန်မ ဆုရတဲ့အတွက်တော့ ဝမ်းသာတာထက် အံ့သြတာက ပိုနေပါတယ်။ ဆုကို မမျှော်လင့်ခဲ့ပါဘူး။ ကျွန်မရယ်မှ မဟုတ်ပါဘူး။ ကဗျာနယ်ပယ်ထဲမှာ ကဗျာဆရာတွေဆိုတာ ကိုယ်ရေးချင်တာကိုသာ တစိုက်မတ်မတ် ရေးနေကြတာပါ။ စိတ်ထဲမှာ ဆုလိုမျိုးကို မမျှော်မှန်းမိကြသူတွေပါပဲ။

စာအုပ်ထဲမှာပါတဲ့ ကဗျာတွေက ယနေ့ခေတ်မှာ ကဗျာဆရာ အများအပြား ရေးနေကြတဲ့ ကဗျာအမျိုးအစားတွေထဲကပါ။ ၂၀၀၇ ကနေ ၂၀၁၈ ဆယ်နှစ်လောက်ကာလအတွင်းမှာ ရေးထားတဲ့ ကဗျာပုဒ်ရေ ရာဂဏန်းထဲက ဒီစာအုပ်အတွက် ရွေးချယ်ထားတဲ့ လက်ရွေးစဉ် ကဗျာ ၃၅ ပုဒ် ဖြစ်ပါတယ်။ ပုံသဏ္ဍာန်ရော အကြောင်းအရာပါ စုံလင်ပါတယ်။ စကားပြေဆန်တဲ့ ကဗျာအချို့လည်းပါပါတယ်။ ရှေးခေတ်ထုံးတမ်းစဉ်လာထဲမှာ မတွေ့ခဲ့ရတဲ့ ပုံစံတွေပါပါတယ်။ အရင်တုန်းက မသုံးနှုန်းခဲ့တဲ့ ကဗျာစကားတွေ ပါပါတယ်။ အဲဒီလို ပြောင်းလဲမှုဆိုတာကလည်း ပြောင်းလဲနေတဲ့ခေတ်ရဲ့ အာရုံခံစားမှုတွေကြောင့် လိုအပ်ချက်အရ သဘာဝကျကျ လိုက်လျောညီထွေ ပေါ်ပေါက်လာတာလို့ ယုံကြည်ပါတယ်။

ဒီစာအုပ်ဖြစ်ပေါ်လာဖို့ အရေးကြီးသူတစ်ဦးကတော့ နှစ်ကာလများစာပေက ဆရာမိုးဝေးပါ။ ဆရာမိုးဝေး တိုက်တွန်းပြီး ထုတ်ပေးလို့သာ ဒီစာအုပ် ထွက်လာရတာပါ။ ပြီးတော့ ဆရာဇေယျာလင်းရဲ့ အမှာစာပါ။ ဆရာ့အမှာစာမှာ ဒီစာအုပ်ထဲမှာ ပါတဲ့ ကဗျာတွေကို သုံးသပ်ချက်အနေနဲ့ တော်တော့်ကို အသေးစိတ်ရေးထားပါတယ်။ ဒါဟာ စာအုပ်ထဲက ကဗျာတွေကို ဖတ်ရှုတဲ့အခါ အများကြီး အထောက်အကူပြုစေတယ်လို့ ထင်ပါတယ်။

အဓိက ကျေးဇူးတင်ရမှာကတော့ ယနေ့အထိ မြန်မာကဗျာဖြစ်ပေါ်ပြောင်းလဲလာမှု အဆင့်ဆင့်မှာ ရှေ့ကနေ ဦးဆောင်လမ်းပြခဲ့ လမ်းဖောက်ခဲ့ကြတဲ့ ဆရာတွေအားလုံးပါပဲ။ တချိန် တင်းကျပ်တဲ့ ခေတ်စနစ်အောက်မှာ အားကောင်းမောင်းသန် ရုန်းကန်ရေးသားနေကြချိန်မှာ အဲဒီ ဆရာဆရာမတွေရဲ့ ကဗျာတွေဟာ နိုင်ငံအဆင့် ဆုရထိုက်တဲ့ စာအုပ်တွေ အများအပြားပါခဲ့ကြမှာပါပဲ။ ခေတ်နဲ့အပြိုင် ဖန်တီးမှုတွေကို ကဗျာတွေထဲမှာ တွေ့ခဲ့ကြရပါတယ်။ ကျွန်မတို့က အဲဒီ ဆရာတွေ မျိုးစေ့ချ စိုက်ပျိုးထားလို့ ဖူးပွင့်နေတဲ့ အသီးအပွင့်တွေကို ဆွတ်ယူစားသုံး အကျိုးကျေးဇူး ခံစားရတာပါ။ ကျွန်မတို့ကဗျာတွေဟာ ရှေ့ကဆရာတွေ လမ်းသစ်ဖောက်ခဲ့တဲ့အတိုင်း ဆက်ရေးခဲ့တဲ့ ကဗျာတွေပါ။ ဒီလိုကဗျာမျိုးတွေကို ဆုအဖြစ် အသိအမှတ်ပြုပေးတာဟာ ရှေးရှေးက ဆရာတွေရဲ့ အားထုတ်မှုတွေ ရောင်ပြန်ဟပ်တာပါပဲ။

ပြီးတော့ ဒီခေတ်သစ်ကဗျာမျိုးတွေဟာ ပညာရေးသင်ရိုးမှာ မပါခဲ့တဲ့အတွက် ကဗျာလောကမှာက ကဗျာဆရာအချင်းချင်းပဲ သင်ယူရတာပါ။ ဒီတော့ကျေးဇူးတင်ရသူတွေထဲမှာ ထင်ရှားတဲ့ လမ်းဖောက်သူ ကဗျာဆရာတွေအပြင် သင်ဆရာ မြင်ဆရာ ကြားဆရာ၊ လက်ရှိရေးသားနေကြတဲ့ ကြီးသူ၊ငယ်သူ ကဗျာဆရာအားလုံး ပါဝင်ပါတယ်။ ဒီကဗျာစာအုပ်ကို ဆုပေးလိုက်တယ် ဆိုတာက အဲဒီလိုကဗျာမျိုးတွေ ရေးသားနေကြတဲ့ အခုခေတ်ရဲ့ လက်တွေ့အနေအထားကို အနည်းနဲ့အများ ကိုယ်စားပြုနေတယ် လို့ ထင်ပါတယ်။

နောက်ထပ် အရေးကြီးသူကတော့ ကျွန်မရဲ့ ဖေဖေပါ။ ကဗျာဆရာဖြစ်လာဖို့အတွက် ဖေဖေ့ရဲ့ ကျေးဇူး ကြီးလှပါတယ်။ ဖေဖေက တက္ကသိုလ်မှာ အစပြုခဲ့တဲ့ ကဗျာအညွန့်အဖူးကို အခြေအနေတွေအများကြီးကြောင့် အပြည့်အဝ ပွင့်ခွင့်ဝေခွင့် မရနိုင်လိုက်တဲ့ ကဗျာဆရာတစ်ဦးပါ။ ကျွန်မ လူမှန်းမသိတတ်တဲ့ အရွယ် ပုခက်တွင်းကတည်းက ကဗျာရဲ့ အသံကို ကြားနိုင်အောင် မျိုးစေ့ချပေးခဲ့သူမို့ ကျွန်မ ကဗျာရေးဖြစ်လာခဲ့တာပါ။ ဖေဖေ့ဆီက ကဗျာသွေး ပါလာတယ် လို့ ပြောနိုင်ပါတယ်။။ မေမေကလည်း တချိန်လုံး ပါရမီဖြည့် အားပေးသူပါ။ ဒီတော့ ဆုရရှိမှုအပေါ် ကျွန်မဝမ်းသာတာထက် မိဘတွေက ပိုလို့ ဝမ်းသာပါလိမ့်မယ်။

ကျွန်မကတော့ တက္ကသိုလ်တက်ချိန်မှာ ကျောင်းတွင်းထုတ်ဝေတဲ့ မဂ္ဂဇင်းစာစောင်လောက်ပဲ ကဗျာ၊ ဝတ္ထု၊ ဆောင်းပါးတွေ ရေးခဲ့ဖြစ်တာပါ။ အင်္ဂလိပ်စာမေဂျာ မဟာတန်းမှာ တက်နေတုန်း သူငယ်ချင်းတွေ စုပေါင်းပြီး အိပ်မက်ထဲက သဲလွန်စ ဆိုတဲ့ ကဗျာစာအုပ်ကလေး စုထုတ်ခဲ့ပါတယ်။ နောက်တော့ စင်ကာပူကို ရောက်သွားပြီး ကျောင်းတက် အလုပ်လုပ်နေတုန်း ၂၀၀၇ ကျမှ ဘလော့ဂ် အင်တာနက်စာမျက်နှာ မှာ ပန်ဒိုရာ နာမည်နဲ့ စာစရေးပါတယ်။ အဲဒီနောက် စာရေးဆရာဆရာမတွေ၊ ကဗျာဆရာဆရာမတွေရဲ့ အားပေးမှုနဲ့ မဂ္ဂဇင်းစာမျက်နှာတွေမှာ ဖော်ပြခံလာရပါတယ်။

ကဗျာကို ဖတ်ရတာရော ရေးရတာပါ အလွန်နှစ်သက်ပါတယ်။ ဒါပေမယ့် ပိုပြီး လွှမ်းခြုံတဲ့ အမြင်နဲ့ ပြောရရင် ကျွန်မ အဓိက ခံစားနှစ်သက်မှုက လူသားရဲ့ တီထွင်ဖန်တီးမှုပါ။ ဉာဏပစ္စည်းဆိုင်ရာ မူပိုင်ခွင့်နဲ့ဆိုင်တဲ့ လုပ်ငန်းခွင်ထဲမှာ လေ့လာဖတ်ရှုခဲ့ရတော့ လူ့စွမ်းရည် တီထွင်ဖန်တီးမှုတွေနဲ့ ပိုမိုထိတွေ့ ပိုလို့ နားလည်လာခဲ့ရပါတယ်။ ဒါကြောင့် အနုပညာဆိုင်ရာ ဖန်တီးမှုတွေအားလုံးကို နှစ်ခြိုက်ခုံမင်ပါတယ်။ သူများဖန်တီးတာတွေ ခံစားတဲ့အခါ ကိုယ်တိုင်လည်း ဖန်တီးလိုစိတ်ကိုလည်း လှုံ့ဆော်မှုပေးပါတယ်။

ကျွန်မကတော့ ကဗျာလောကထဲက ကဗျာသမားတွေသာမက၊ တခြား စာဖတ်သူတွေကိုပါ ဒီကဗျာတွေကို မသိခဲ့ မဖတ်ခဲ့ဖူးဆိုရင် စမ်းသပ်ဖတ်ကြည့်ဖြစ်စေချင်ပါတယ်။ ယနေ့ခေတ် ကဗျာမြင်ကွင်းနဲ့ စိမ်းနေသူတွေဟာ ဆုရကဗျာစာအုပ်မို့ စူးစမ်းလိုစိတ်နဲ့ ဖတ်မိပြီး စာအုပ်ထဲကကဗျာတွေအပေါ် နမူနာအနေနဲ့ အာရုံဆက်သွယ်မှုရသွားတယ်ဆိုရင်လည်း ကျွန်မရဲ့ကဗျာတွေထက် အများကြီး အားကောင်းခိုင်မာတဲ့၊ သစ်လွင်တဲ့၊ ဖတ်သင့်ဖတ်ထိုက်တဲ့ မြန်မာကဗျာတွေနဲ့၊ ကဗျာထဲကို စိတ်ရောကိုယ်ပါ ဘဝကို နှစ်မြုပ်ကာ ကျွန်မတို့ လေးစားရတဲ့ လူကြီးလူငယ် ကဗျာဆရာဆရာမတွေ ထင်ထင်ရှားရှား ရှိနေသေးတယ် ဆိုတာကိုတော့ သတင်းစကားပါးချင်ပါတယ်။

Expand..

Wednesday, March 27, 2019

Blog anniversary

၂၀၀၇ မတ်လ ၂၇ ရက်က ပန်ဒိုရာ အမည်နဲ့ ဘလော့ဂ် စရေးခဲ့တယ်။ ဘဝမှာ အချိုးအကွေ့လို့ မဆိုနိုင်ပေမဲ့ အရောင်တချို့ ထပ်ဖြည့်ထည့်လိုက်တဲ့ ပန်းချီကားတစ်ချပ်လိုတော့ ဖြစ်သွားတယ်။ တော်လှန်ရေးနေ့နဲ့ တိုက်ဆိုင်ပေမဲ့ တ်ာလှန်တာလည်း မဟုတ်ပါဘူး။

နည်းပညာကျေးဇူးကြောင့် ရေးချင်တာတွေကို လူအများဖတ်နိုင်အောင် ဘလော့ဂ်ထဲမှာ အလွယ်တကူ ရေးတင်လို့ရသွားတယ်။ ဒီနေရာမှာ ဖတ်သူဟာ အရေးကြီးပါတယ်။ ဖတ်စေချင်လို့ လူတိုင်းကြည့်လို့ရတဲ့နေရာမှာ ကြော်ငြာဘုတ်လို တင်တာကိုး။ ရေးတာ သက်သက်ကတော့ ကိုယ့်ဘာသာ ဗလာစာအုပ်ထဲဖြစ်ဖြစ် ၊ ကွန်ပျူတာထဲဖြစ်ဖြစ် အချိန်မရွေး ရေးနေပြီး သိမ်းထားလို့ရတာပဲလေ။

ပြသချင်တဲ့ရောဂါလို့တော့လည်း မယူဆပြန်ဘူး။ သာမန်လူ့သဘာဝနဲ့ ဝါသနာ စိတ်ဝင်စားမှုတို့ ပေါင်းစပ်မိသွားတဲ့ ဖြစ်စဉ်မျှသာ။ မထူးဆန်းပါ သူသူငါငါ။

အခုလို နှစ်ပေါင်း တစ်ဒါဇင် ပြည့်ချိန်မှာတော့ ပန်ဒိုရာ ကဗျာစုစည်းမှု တစ်အုပ် ဖြစ်လာတယ်။ ရှေ့မှာတော့ ပုံပြင်စာအုပ်လေးတစ်အုပ် ဖြစ်ခဲ့သေးတယ်။ အဲဒီနှစ်အုပ်လုံးကို စီစဉ်ထုတ်ဝေပေးတဲ့ နှစ်ကာလများ ကိုမိုးဝေးမိသားစုကို ကျေးဇူးတင်တယ်။ လူကြိုက်မများနိုင်တဲ့ အရေးအသားမျိုးတွေမို့ ထုတ်ဝေသူကို အားလည်းနာမိတယ်။ ဖြစ်နိုင်ရင်တော့ ရောင်းရစေချင်ပါတယ်။

ဘလော့ဂ်ကတော့ ဖတ်သူတွေမရှိသလောက်ဖြစ်နေပြီ။ ဒါလည်း သူ့ခေတ်သူ့အခါမို့ အပြောင်းအလဲကို လက်ခံရမှာပါ။

ရေးချင်တာတွေရှိနေရင် တော့ ရေးချင်သလို ရေးနေဦးမှာ။ သိမ်းထားဖို့လည်း မဟုတ်ပါဘူး။ ဘယ်ပလက်ဖောင်းမှာရေးရေး ဖတ်သူနည်းနည်းပါးပါး ဖတ်ဖြစ်ကြရင် ပျော်တာပါပဲ။ ရေးတာနဲ့စပ်လျဉ်းတဲ့ လေ့လာမှု၊ ဆွေးနွေးပြောဆိုမှု အချို့လည်း အခါအားလျော်စွာ ဝါသနာအလျောက် တပါတည်း လုပ်ဖြစ်ပေမဲ့ ရေးဖြစ်ဖို့/ရေးခြင်းအပေါ် ဖိစီးမှု တော့ မထားဘူး ။ မထားချင်ဘူး။ အဲဒါကြောင့် ပရော်ဖက်ရှင်နယ် တကယ် ဖြစ်လာဖို့မသေချာ။ ဒါအတွက်လည်း ဘယ်သူတွေကို အားနာမိမှန်းမသိ အားတော့နာ။ ရေးရတာပျော်လို့ရေးနေတာဆိုတာ့ ပျော်သရွေ့ပေါ့။ ပျော်ဦးမှာပါ။ 🙂🙂🙂

ပန်ဒိုရာ

၂၇ မတ် ၂၀၁၉

Expand..

Friday, August 31, 2018

စိတ်ရှုပ်တဲ့အခါ

စိတ်ဟာ အရောင်မျိုးစုံရှိတယ်။ စိတ်ကိုလိုက်ဖမ်းရတာ မလွယ်။ မပျော်ရွှင်တဲ့ စိတ်အခြေအနေ တစ်ရပ်ထဲမှာ စိတ်ညစ်တာလည်းပါမယ်။ စိတ်ဓာတ်ကျတာ၊ စိတ်ဆိုးတာ၊ စိတ်ဖိစီးတာ၊ စိတ်ညှိုးငယ်တာ၊ စိတ်ပူပင်တာ၊ ဝေခွဲမရတာ၊ လွမ်းဆွေးတာ၊ နှမြောတသတာ စတဲ့ အနုတ်သဘောဆောင်တဲ့ စိတ်မရှင်းမှုပုံစံ မျိုးစုံ ရှိမယ်။ ဒီနေရာမှာတော့ စိတ်ရှုပ်တယ်လို့ပဲ ခြုံပြောလိုက်တာပါ။ အဓိပ္ပာယ်အတိအကျတော့ မဟုတ်ဘူးပေါ့။

ဆိုပါတော့.. စိတ်ရှုပ်တဲ့အခါ…… ဘာတွေလုပ်ကြမလဲ။ ကိုယ်ကတော့ တချို့အလုပ်တွေနဲ့ စိတ်ချည်မျှင်ထွေးကို ဖြည် လျှော့ လေ့ရှိတယ်။ အဲဒီအထဲမှာ ဟင်းတွေကို တစ်မျိုးပြီးတစ်မျိုး ချက်လိုက်တာပါတယ်။ နံပါတ်တစ် ဖြေရှင်းနည်းလို့လည်း ပြောလို့ရမယ်။ ဟင်းတစ်ခွက် ချက်တဲ့အခါ ပြင်ဆင်ရတဲ့ လုပ်ငန်းစဉ်အဆင့်ဆင့်ကနေ အစပ်အဟပ်တည့်အောင် စိတ်ပါလက်ပါ ချက်ပြုတ်နေတဲ့အခါ စိတ်ရှုပ်မှုကို အတော်မေ့ပျောက်နိုင်တယ်။ စိတ်ပါဝင်စားစွာ ချက်ပြုတ်ပြီးစီးသွားတဲ့အခါ အနံ့အရသာကို မြည်းကြည့်ပြီး နိဂုံးချုပ်နိုင်သွားတဲ့အခါ စိတ်တွေဟာ အတော်အတန် လျော့ကျ ပေါ့ပါးသွားတတ်တယ်။

စိတ်ရှုပ်တဲ့အခါ…. စာအုပ်တစ်အုပ်ကို အာရုံစူးစိုက်ဖတ်ဖို့ကြိုးစားတယ်။ ဒါပေမယ့် အသက်ကြီးလာတဲ့အခါ အဲဒီနည်းဟာ တခါတလေ မအောင်မြင်တော့ဘူး။ ငယ်ငယ်တုန်းကတော့ ထမင်းမေ့ ဟင်းမေ့၊ မိုးကြိုးပစ်သံတောင်မကြား အာရုံဝင်စားခဲ့တဲ့ ကာလတွေပေါ့။ ဖတ်ရှုခြင်းဖြစ်စဉ်ဟာ လူကိုတွေးတောစေတယ်။ ဒီတော့ အခုအချိန်မှာ တစ်ကြောင်းဖတ်လိုက် စာအုပ်ပိတ်ပြီးစဉ်းစားလိုက်၊ အတွေးတွေက ပြန့်သွားလိုက်။ တစ်မျက်နှာဖတ်ပြီးမှ စိတ်တွေဝေဝါးပြီး အစက ပြန်ဖတ်လိုက်နဲ့ စိတ်ကို စာကြောင်းတွေက အောင်အောင်မြင်မြင် မကုစားနိုင်တော့တာ များလှပြီ။

စိတ်ရှုပ်တဲ့အခါ…… ရုပ်ရှင်၊ ဂီတ တစ်ခုခုကို ကြည့်ရှုနားထောင်မယ်။ အလွန်စိတ်ဝင်စားဖွယ်ကောင်းတဲ့ အနုပညာမြောက် ဖန်တီးမှုတွေဟာ စိတ်ကို နစ်မြုပ်ထွက်ပြေးသွားဖို့အတွက် ဆွဲဆောင်မှုရှိစေတာ အသေအချာပေါ့။ ဒါပေမယ့် အဲဒီဖန်တီးမှုရဲ့ အကြောင်းအရာကိုတော့ ရွေးချယ်ဖို့လိုပြန်တယ်။ စိတ်ဟာ နောက်ကျိရှု့ပ်ထွေးနေစဉ် မြင်မိသမျှ ကြားမိသမျှ အရာရာဟာ ကိုယ့်ကို ရည်ရွယ်နေတော့သလားလို့ ဆတ်ဆတ်ထိမခံ ထင်မြင်နေမိတတ်တယ်မဟုတ်လား။ ရုပ်ရှင်ထဲက ဖြစ်ရပ်တစ်ခု၊ သီချင်းထဲက စာကြောင်းတစ်ကြောင်းက တိုက်ဆိုင်လာရင် တခါတလေမှာ ကိုယ့်စိတ်ရှုပ်မှု အခြေအနေကို ဒီဂရီမြင့်မားအောင် တွန်းအားပေးနေတတ်တော့ သတိထားရတယ်။

စိတ်ရှုပ်တဲ့အခါ…. window shopping ထွက်တယ်။ အထူးသဖြင့် ကိုယ့်ဘာသာ တစ်ကိုယ်တော် နေထိုင်ခဲ့တဲ့ အချိန်တွေတုန်းက ပေါ့။ ဘယ်တော့မှ ဝယ်မယ်မစဉ်းစားတဲ့ ထူးထူးဆန်းဆန်း ဖက်ရှင်လန်းလန်းတွေကို တစ်ထည်ပြီးတစ်ထည် အစမ်းဝတ်ကြည့်လိုက်၊ ဖိနပ်အမြင့်ကြီးတွေ စီးကြည့်လိုက်၊ နှုတ်ခမ်းနီ လက်သည်းနီတွေ စမ်းကြည့်လိုက်၊ ပန်းချီပစ္စည်းတွေ စာအုပ်တွေ စာရေးကိရိယာတွေ လှန်လှောကြည့်ရှုလိုက်၊ ဘာမှန်းမသိတဲ့ ကြုံရာကျရာ ပိစိကွစိ ပစ္စည်းလေးတွေကို စပ်စုလိုက်နဲ့ ဖြတ်သန်းသွားလာနေကြတဲ့ လူရေစီးကြောင်းကြီးထဲ အလိုက်သင့်မျှောပါရင်း စိတ်ကို အရောင်ပြောင်းကြည့်တဲ့နည်းဟာ အတော်အတန် ဟန်ကျတယ်။

စိတ်ရှုပ်တဲ့အခါ…. ပန်းချီပုံ တစ်ခုခု ဆွဲကြည့်တယ်။ အဆင်ပြေတဲ့အခါပြေတယ်။ skills မကောင်းသူမို့ စိတ်ကူးနောက်ကို လက်က မလိုက်နိုင်ရင် လောဘဒေါသ မပေါ်ပေါက်အောင်တော့ ထိန်းရတယ်။ ပန်းချီရေးဆွဲခြင်း ဖြစ်စဉ်တစ်ခုလုံးဟာ စိတ်ကို မီးကိုရေလောင်းလိုက်သလို ရှဲခနဲ မဟုတ်ပေမယ့် တဖြည်းဖြည်း တငွေ့ငွေ့ ငြိမ်းသတ်အေးချမ်းစေတယ်။ အရောင်တွေ မျဉ်းကြောင်းတွေနဲ့ စိတ်ကူးပုံဖော်နေချိန်မှာ ဘာသာစကားတွေကို မေ့လျော့ထားနိုင်တဲ့ ဖြစ်စဉ်ဟာ စကားလုံးတွေရဲ့ အကျနောက် အနက်ကောက် လိုက်ရတဲ့ ရှုပ်ထွေးမှုက ကင်းဝေးစေတယ်။

စိတ်ရှုပ်တဲ့အခါ…. ဖုန်းထဲက contact list တွေကို အထက်အောက်ပြောင်းပြန် လှန်လှောကြည့်တယ်။ ငါ ဘယ်သူ့ကို ဖုန်းဆက်ရင်ကောင်းမလဲ။ အသံချင်းသာ ဆုံတွေ့ကြမယ်။ စိတ်ရှုပ်နေတဲ့ မျက်နှာကြီးနဲ့ မျက်နှာချင်းတော့ မဆိုင်ချင်ဘူး။ ဒါတောင် စိတ်ရှုပ်တွေ အသံကတဆင့် ကူးသွားမှာလည်း စိုးလို့ တခါတလေ ဝေခွဲမရ ဖုန်းကို အသာဘေးပြန်ချထားလိုက်တဲ့ အချိန်တွေလည်း ရှိခဲ့တယ်။ နံပါတ်နှိပ်လိုက်ပြီးမှ ဟဲလို လည်း ထူးရော ပြောချင်တာတွေ မျိုသိပ်၊ ရောက်တတ်ရာရာ ဆက်ပြောဖြစ်တာတွေလည်းရှိတယ်။ လူတစ်ယောက်မှာ နှစ်သိမ့်ဆွေးနွေး အဖြေရှာတဲ့အထိ ရင်ဖွင့်နိုင်တဲ့ သူငယ်ချင်းမျိုးဟာ အနည်းဆုံး တစ်ယောက်လောက် ရှိသင့်တာပေါ့လေ။ ဖုန်းထဲက အသံလှိုင်းတွေနဲ့မှ မဟုတ်ပါဘူး။ တိုးတက်လာတဲ့ နည်းပညာ နဲ့အညီ မက်ဆင်ဂျာ တစ်ခုခုကနေ စာတိုစာရှည်ရိုက်ပြောနိုင်တာလည်း အကျုံးဝင်ပါတယ်။

စိတ်ရှုပ်တဲ့အခါ …… ကဗျာဖြစ်ဖြစ် စကားပြေတစ်ပုဒ်ဖြစ်ဖြစ် ရေးကြည့်ချင်တယ်။ ခက်တာက စာရေးသားခြင်း ဖြစ်စဉ်ဟာလည်း ခံစားချက်သက်သက်နဲ့ မောင်းနှင်ရတာ မဟုတ်ပြန်ဘူး။ ခံစားချက်လွှမ်းမိုးသွားတဲ့ စာတစ်ပုဒ်ကို နောက်တစ်ခေါက် ပြန်ဖတ်တဲ့အခါ စိတ်တိုင်းမကျတဲ့ အာရုံတွေ ခဏခဏ ကြုံခဲ့ရတယ်။ စာထဲမှာ စကားလုံးတွေ အထားအသိုတွေ အသုံးအနှုန်းတွေကို ခွဲခြမ်းစိတ်ဖြာ နေရာချတဲ့အခါ စိတ်ရှုပ်နေတဲ့ အတွေးထဲက တီးတိုးစကားတွေဟာ ကိုယ့်အတွက်တော့ အနှောက်အယှက် ပေးနေပြန်တယ်။

စိတ်ရှုပ်တဲ့အခါ …… တစ်ခွက်တစ်ဖလားလောက်မော့မလား။ ဟင့်အင်း။ အယ်လကိုဟောကို အလွဲသုံးစားပြုဖို့တော့ ဝါသနာမပါပြန်ဘူး။ စိတ်ရှုပ်ကို မေ့လျော့ဖို့ ရည်ရွယ်ချက်အတွက်တော့ အဲဒါဟာ ဘယ်တော့မှ မရွေးချယ်တဲ့ နည်းလမ်းပဲ။ စိတ်ကိုမူးရီစေတဲ့ အရည်တွေဟာ ပိုမိုသက်တောင့်သက်တာ ပြောဖြစ်ဆိုဖြစ် ရယ်မောပစ်နိုင်ကြဖို့ လူမှုရေးကဏ္ဍတွေအတွက် လည်ပတ်နိုင်ရုံ အသင့်အတင့်ချောဆီ အဖြစ်လောက်သာ ကိုယ်သဘောထားတယ်။

စိတ်ရှုပ်တဲ့အခါ…. အခိုးအငွေ့တွေကို ရှိုက်ဖွာသောက်သုံးတတ်ပြီး ကောင်းကင်ပေါ် ဝဲပျံသွားတဲ့ မီးခိုးတန်းတွေနဲ့အတူ လွင့်မျောလိုက်ပါသွားတတ်သူတွေကိုတော့ ငေးမောရုံသာ တတ်နိုင်တယ်။ အနံ့အသက်တွေကို မွန်းကြပ်တတ်သူမို့ ဒါဟာလည်း ကိုယ့်အတွက် ရွေးချယ်စရာတစ်ခု မဟုတ်ပြန်ဘူး။

စိတ်ရှုပ်တဲ့အခါ….. အစားအသောက်တွေကို ဖိစားပစ်လိုက်သူတွေရှိတယ်။ အဲဒါကတော့ စိတ်ဘယ်လိုရှုပ်သဲ ဆိုတာနဲ့မူတည်မယ်။ စိတ်ဓာတ်ကျတာ၊ စိတ်အားငယ်တာ၊ စိတ်ဖိစီးတာအတွက်တော့ စားဝင်စရာမရှိ။ စိတ်ဆိုးတာမျိုးဆိုရင်တော့ အလွန်အကျွံစားပစ်လိုက်တာ ဖြစ်ကောင်းဖြစ်နိုင်မယ်။ တခါတလေ ဖြစ်နိုင်တယ်။ တခါတလေ မဖြစ်နိုင်ဘူး။

စိတ်ရှုပ်တဲ့အခါ……. စိတ်ညစ်ရင် အိပ်ပစ်လိုက်မယ်။ အဲဒါက ကိုယ်လုပ်လေ့ရှိတဲ့ ကိစ္စတစ်ခု။ ပူပင်သောက ရောက်တဲ့ စိတ်အခြေအနေကလွဲလို့ ကျန်တဲ့ စိတ်ရှုပ်မှုတွေ အားလုံးမှာ လုပ်နိုင်ခဲ့တယ်။ ဒါပေမယ့် ခေါင်းကိုက်ရင်သောက်တတ်တဲ့ အကိုက်အခဲပျောက်ဆေးကလွဲလို့ အိပ်ပျော်စေဖို့ ဆေးဝါးတွေရဲ့ အကူအညီတော့ မယူချင်ဘူး။ နှစ်နှစ်ခြိုက်ခြိုက် တဒင်္ဂသေဆုံးခြင်းဟာ အမြဲတမ်းထွက်ပြေးနိုင်တဲ့ ထွက်ပေါက်တစ်ခု မဟုတ်ပေမယ့် မေ့လျော့နေတဲ့ အချိန်တိုလေးထဲမှာတော့ စိတ်ညောင်းညာမှုကို ပြေလျော့စေတယ်။

စိတ်ရှုပ်တဲ့အခါ…… သာသာယာယာ လမ်းကလေးတစ်ခုများ အနီးအနားမှာ အဆင်ပြေခဲ့ရင်ပေါ့။ လမ်းလျှောက်ဖြစ်ခဲ့ဖူးတယ်။ လျှောက်.. လျှောက်.. ဆက်လျှောက်.. မနားတမ်းလျှောက်။ အနီးအနားမှာ ရေကန်ကလေးနဲ့ ပြေးလမ်းကလေးနဲ့ သစ်ပင် ပန်းပင်ကလေးတွေနဲ့ ခွေးကလေးတွေ ထွက်ကျောင်းနေသူ စက်ဘီးစီးနေသူ အဘိုးအဘွားအရွယ်တွေ အားကစားသမားတွေ နဲ့…။ ကိုယ်ခန္ဓာကို ပြင်းပြင်းထန်ထန် မောင်းနှင်လိုက်ပြီး ကျလာတဲ့ ချွေးစက်တွေဟာ စိတ်ထဲအထိ လောင်ကျွမ်းအငွေ့ပျံသွားပြီး ကျယ်ပြန့်တဲ့ ကောင်းကင်ကို မော့ကြည့်လိုက်တဲ့အခါ ပေါ့ပါးလန်းဆန်းသွားစေတဲ့ အကျိုးရှိတဲ့ နည်းလမ်းတစ်ခုပေါ့။

စိတ်ရှုပ်တဲ့အခါ….. သင်တို့ရော စိတ်ရှုပ်တတ်ပါသလား။ စိတ်ရှုပ်တဲ့အခါ ဘာလုပ်တတ်ပါသလဲ။

ပန်ဒိုရာ

၃၁၊ ၈၊ ၂၀၁၈

Expand..

Blog Day

နှစ်တစ်နှစ်ရဲ့ August 31st ဟာ Blog Day လို့ အရင်က သတ်မှတ်ခဲ့တာရှိတယ်။ အခုရော ရှိသေးလားတော့မသိဘူး။ ဘာပဲဖြစ်ဖြစ် အမှတ်တရ ဆောင်းပါး ဒီနှစ် ဆက် မရေးဖြစ်ပြန်ဘူး။ ဘလော့ဂ်လေးကိုတော့ လာဖုန်သုတ်လိုက်တယ်။

Expand..

Monday, August 20, 2018

လက်ခလယ်တောင်ကုန်း

အဲဒီတောင်ကုန်းဟာ လွင်ပြင်တွေရဲ့ အလယ်မှာ ထူးထူးခြားခြား ထီးထီးတည်ရှိတယ်။ ကမ္ဘာ့မြေပုံရဲ့ ဘယ်အရပ်မှာလဲလို့ မေးရင်တော့ ပြောရခက်သား။ ကမ္ဘာပေါ်မှာ သာမန်အားဖြင့် အရှေ့အနောက် တောင်မြောက် သတ်မှတ်ချက်တွေ ရှိကြတယ်မဟုတ်လား။ ကမ္ဘာပေါ်ကနေ ကြည့်ရင် နေထွက်တာ နေဝင်တာကို မူတည်ပြီးတော့ပေါ့။ ဒါပေမယ့် အဲဒီတောင်ကုန်း တည်နေရာကတော့ ထူးခြားတယ်။ တောင်ဘက်က လူတွေကလည်း အရှေ့အရပ်လို့ ပြောလိုက်ရင် အဲဒီတောင်ကုန်းဘက်ကိုပဲ လက်ညိုးညွန်ကြတယ်။ မြောက်ဘက်က လူတွေကလည်း တောင်ကုန်းရှိရာကို အရှေ့အရပ်လို့ သတ်မှတ်ကြတယ်။ အရှေ့ဘက်နဲ့ အနောက်ဘက်က လူတွေလည်း ထို့အတူပဲ။ အဲဒီအခါ အဲဒီအရပ်မျက်နှာတွေရဲ့ အရှေ့အနောက်တောင်မြောက်တွေဟာ ကျွန်မတို့ အရင်တုန်းက နားလည်ထားတဲ့ အရှေ့အနောက်တောင်မြောက်တွေနဲ့ မတူတော့ဘူး။ ကျွန်မပြောပြတာ ရှုပ်ထွေးသွားမလားတော့ မသိဘူး။ ဥပမာ ဒီလိုမျိုးပေါ့။

ဘယ်လိုပဲဖြစ်ဖြစ် ကမ္ဘာကြီးက လုံးနေတယ်ဆိုတော့ အဲဒီတောင်ကုန်း ဘယ်နေရာမှာပဲရှိရှိ သိပ်တော့ ပြဿနာရှိလှမယ် မထင်ဘူး။ ခရီးကို ဘယ်နေရာက စတင်တယ်ဆိုတာလည်း သိပ်တော့ အရေးမကြီးလှဘူး။ တကယ်တော့ လက်ခလယ်တောင်ကုန်းဆိုတာကလည်း ကျွန်မပေးထားတဲ့ နာမည်ပါ။ ကျွန်မတစ်ဦးတည်း ခေါ်ဆိုတဲ့နာမည်လည်း ဖြစ်နိုင်ပါတယ်။ ကျွန်မရဲ့အလုပ်ကတော့ တောင်ကုန်းထိပ်ရှိရာကို ရောက်အောင် သွားဖို့သာဖြစ်တယ်။ အဲဒီနေ့က ကျွန်မရဲ့ ခရီးကို စတင်ခဲ့တဲ့အချိန်မှာ နေလုံးရဲ့လင်းနိုင်စွမ်း မဖြန့်ကျက်နိုင်သေးချိန် မှောင်မဲနေတဲ့ ကောင်းကင်မှာ ကြယ်ရောင်သာ ပျပျထွန်းလင်းနေခဲ့တယ်။

ဒီနေရာမှာ ပြောစရာတစ်ခုရှိပါတယ်။ နေလုံးဟာ ကျွန်မရှုထောင့် ကြည့်ရင် ကျွန်မနဲ့အတူ တောင်ကုန်းကို လိုက်ပါပြီး အချိန်နဲ့အမျှ တဖြည်းဖြည်း ထွန်းလင်းလာသလိုပါ။ တခြားသော တောင်ကုန်းတက်သူတွေဘက် ကကြည့်ရင်လည်း သူတို့နဲ့ မကွဲမကွာ အတူ လိုက်ပါနေတဲ့ နေလုံးကို တစ်မိုးအောက်မှာ ကိုယ်စီကိုယ်ငှ မြင်ကြရမှာပါ။

မြို့ကြီးပြကြီးတွေနဲ့ ကင်းဝေးနေတဲ့ ကမ္ဘာမြေဟာ အထိုက်အလျောက် ပြုပြင်မွမ်းမံခြင်း ခံထားရတဲ့ ရေမြေတောတောင် သဘာဝနဲ့ လှပနေတော့တယ်။ လယ်ကွင်းတွေကို တာဘောင်ရိုးကလေးတွေနဲ့ ရေမြောင်းကလေးတွေက အနားကွပ်ထားတယ်။ ခပ်ဝေးဝေးမှာ စိမ်းညို့နေတဲ့ တောင်တန်းပြာကြီးတွေက အုပ်မိုးနေတယ်။ အနီးအနားမှာ တွေ့ရတဲ့ တချို့တောင်တွေကတော့ နီကျင်ကျင်ဖြစ်နေတယ်။ သစ်ပင်မရှိတဲ့ နီကျင်ကျင်တောင်တန်းတွေဆီက အုန်းခနဲ အသံတွေ တစ်ချက်တစ်ချက်ကြားရတယ်။ မီးခိုးငွေ့တွေ အူထွက်လာတာလည်း မကြာခဏတွေ့ရတယ်။ ဓာတ်သတ္ထုရှာဖွေသူတွေဟာ တောင်တွေကို ဖြည်းဖြည်းချင်း ဖဲ့ဖြိုခွင့်ရထားတယ်။

ခပ်ပျပျ မြင်နေရတဲ့ လက်ခလယ်တောင်ကုန်းဆီကို လူတိုင်းဟာ ဦးတည်နေကြတယ်။ အရွယ်စုံ လူမျိုးစုံပါပဲ။ ဟိုးဝေးဝေးမှာ လှမ်းမြင်နေရတဲ့ အဘွားအိုတစ်ယောက်ဟာ အသက်ကြီးသူတွေကို မလွဲမသွေ ကိုယ်စားပြုသလို သူစွဲကိုင်ထားတဲ့ တောင်ဝှေးတစ်ချောင်းဟာလည်း အိုမင်းမစွမ်းမှုကို ကိုယ်စားပြုနေပါတယ်။ သူဝတ်ဆင်ထားတဲ့ မွဲခြောက်နေတဲ့ အဝတ်အစားတွေကတော့ နွမ်းပါးမှုရဲ့ သင်္ကေတဆိုတာ အထူးပြောစရာလိုမယ် မထင်ဘူး။

ဆူဖြိုးဖြူဝင်းနေတဲ့ ကိုယ်ခန္ဓာမှာ ဝတ်ဆင်ထားတဲ့ လက်ဝတ်တန်ဆာတွေနဲ့ ဝတ်ကောင်းစားလှတွေကို မထိမခိုက် မပေမကျံအောင် ထိန်းသိမ်းရင်း ဒေါက်ချွန်ဖိနပ် တလိမ့်လိမ့်နဲ့ လျှောက်လာသူ အမျိုးသမီး တစ်ယောက်ကတော့ ပူပြင်းလာမယ့်နေကို အံတုဖို့ မျက်မှန်မည်းတစ်လက် တပ်ဆင်ထားတယ်။ အားကောင်းမောင်းသန် ကျစ်လျစ်ဖွံ့ထွားတဲ့ ကြွက်သားပိုင်ရှင် အမျိုးသားတစ်ယောက်ဟာ သူတကာထက် လျှင်မြန်ကြီးမားတဲ့ ခြေလှမ်းကျဲကြီးတွေနဲ့ လျှောက်လှမ်းရင်း လူအတော်များများကို တရှိန်ထိုး ကျော်ဖြတ်သွားလေရဲ့။

အဲဒီလိုပါပဲ မခိုင်မခန့် ခြေလှမ်းသေးသေးလေးတွေနဲ့ လမ်းလျှောက်တတ်ခါစ ကလေးလေးတွေ၊ လမ်းမလျှောက်တတ်သေးတဲ့ ကလေးငယ်တွေကို ကျောပိုးလို့ တစ်ဖုံ၊ ရင်ခွင်ပိုက်လို့ တစ်မျိုး သယ်ပိုးလာကြတဲ့ မိခင်တွေ၊ လူမျိုးစုံ အသံမျိုးစုံနဲ့ အစုလိုက် အပုံလိုက် အတန်းလိုက် လူတွေဟာ လက်ခလယ်တောင်ကုန်းရှိရာကို တရွေ့ရွေ့ လျှောက်လှမ်းနေကြပါတယ်။

အားလုံးမှာ တူညီတဲ့အချက်တစ်ချက်ကို ပြောရမယ်ဆိုရင်တော့ စက်ကိရိယာတစ်ခုခုကို ဘယ်သူမှ မသုံးစွဲနိုင်ကြတာပါပဲ။ လက်ခလယ်တောင်ကုန်းကို အရောက်သွားမယ်ဆိုရင် စက်ဘီးအပါအဝင် တွန်းလှည်း၊ မော်တော်ယာဉ် ဘာတစ်ခုကိုမှ ဘယ်သူမှ သုံးလို့မရဘူး။ ဘာကြောင့်မသုံးနိုင်သလဲဆိုတာတော့ ကျွန်မမရှင်းပြနိုင်ဘူး။ သုံးစွဲဖို့ ကြိုးစားသူတွေ ရှိကောင်းရှိခဲ့မလား ဆိုတာကိုတော့ ကျွန်မလည်း မသိနိုင်ဘူး။ ယခု လက်ရှိ တမျှော်တခေါ်မှာတော့ အားလုံးဟာ မိမိခြေထောက် နှစ်ချောင်းပေါ်မှာ လမ်းလျှောက်၊ ပြေးလွှား၊ တွားသွား စသဖြင့် သွားလာနေကြသူတွေချည်း။ ပြီးတော့ အားလုံးဟာ လူသားစင်စစ်တွေချည်း။

တူညီတဲ့ ခရီးဆုံးတစ်ခုကို ရည်မှန်းပြီး လျှောက်လှမ်းကြသူတွေဟာ အသက်၊ အရွယ်၊ ကျန်းမာရေးအခြေအနေ၊ ကျားမဖြစ်တည်မှု၊ ပညာတတ်မြောက်မှု၊ ဆင်းရဲချမ်းသာ၊ ရုပ်ရည်သွင်ပြင် စသဖြင့် နောက်ခံ အခြေအနေတွေ မျိုးစုံကွဲပြားနေသလို အဲဒီ လက်ခလယ်တောင်ကုန်းအပေါ် ရှုမြင်မှုမှာလည်း ကွဲပြားနေတယ်။ အဲဒါဟာ ရှင်တို့အတွက်တော့ ဒီဇာတ်လမ်းရဲ့ စိတ်ဝင်စားစရာ အကောင်းဆုံးအပိုင်း ဖြစ်နိုင်သလို ကျွန်မအတွက်တော့ ရယ်စရာအကောင်းဆုံး အပိုင်းပါပဲ။

တကယ်တော့ ပြောခဲ့ပြီးသလိုပါပဲ။ လက်ခလယ်တောင်ကုန်း ဆိုတာ ကျွန်မရဲ့ အာဘော်သာဖြစ်တယ်။ ကျွန်မအတွက်တော့ လက်ခလယ်တောင်ကုန်းဟာ လက်ခလယ်တောင်ကုန်းသာ ဖြစ်ပေမယ့် တခြားလူတွေအတွက်တော့ တခြားအရာဖြစ်နေမယ်။ ဥပမာပြောရရင် ဟို ခပ်လှမ်းလှမ်းက တရွေ့ရွေ့လျှောက်လာတဲ့ အဘွားအိုအတွက်တော့ မျှော်လင့်ချက်တစ်ခု ဖြစ်ကောင်းဖြစ်မယ်။ အဲဒီလိုပဲ စိတ်အားထက်သန်စွာ လျှောက်လှမ်းလာတဲ့ ဝတ်ကောင်းစားလှနဲ့ အမျိုးသားငယ်တစ်ဦးအတွက်တော့ အဓိပ္ပာယ်ရှိတဲ့ ပန်းတိုင်တစ်မျိုးဖြစ်နိုင်တယ်။ အုပ်စုဖွဲ့ပြီး ရယ်လိုက်မောလိုက် ပေါ့ပေါ့ပါးပါး အပြေးတပိုင်းနဲ့ လှမ်းလာကြတဲ့ လူငယ်တစ်စုအတွက်လည်း နားလည်မှုဟာ ကွဲပြားနေမှာ သေချာသလို မလွှဲသာမရှောင်သာတဲ့သဘော စိတ်မပါလက်မပါ တစ်လှမ်းချင်းလှမ်းနေတဲ့ အထီးကျန်သူ တစ်ဦးမှာလည်း သူ့ခရီးဟာ ဘာ ဆိုတာ သူဘယ်လို ရှုမြင်ထားသလဲဆိုတာ ဘယ်သူမှ မသိနိုင်ဘူး။

သေချာတာတစ်ခုကတော့ လက်ခလယ်တောင်ကုန်း ရှိရာကို အားလုံးဟာ သွားနေကြတယ်။ သွားနေရတယ်။ ကောင်းကင်ဟာ တဖြည်းဖြည်းနဲ့ လင်းထိန်လာပါပြီ။ ခပ်ဝေးဝေးမှာ စိမ်းညို့နေတဲ့ တောင်တန်းပြာကြီးတွေနဲ့ အနီးအနားမှာ နီကျင်ကျင် တောင်တချို့နဲ့။ တစ်မိုးအောက်မှာ အခြားသော ဒေသတစ်နေရာမှာတော့ မိုးကွက်ကျား ရွာသွန်းနေတာကိုလည်း လှမ်းမြင်နေရတယ်။ မိုးရွာနေတဲ့ ကောင်းကင်အစိတ်အပိုင်းအောက်က လူတွေဟာ မိုးတွေထဲမှာ ကြိုးစားရုန်းကန် လျှောက်လှမ်းနေကြတယ်။ ကမူတွေ ခဲလုံးတွေနဲ့ ပြည့်နှက်နေတဲ့ အစိတ်အပိုင်းက လူတွေကလည်း ကိုယ့်အခက်အခဲကို ကိုယ်ရင်ဆိုင်ကြရတယ်။ ချောမွေ့သာယာတဲ့ တချို့သော လမ်းကြောင်းတွေမှာတော့ နားနားနေနေ အပန်းဖြေရင်း တောင်ကုန်းထိပ်ကို တက်လာကြသူတချို့လည်း ရှိနေတာပါပဲ။ ဘယ်လိုဖြစ်ဖြစ် တောင်ထိပ်ကိုရောက်လာလေလေ ကုန်းဟာ မတ်စောက်လာလေလေမို့ ပိုပြီး အားထည့်နေကြရတယ်။

ကျွန်မနဲ့ ခပ်လှမ်းလှမ်းမှာ အဘွားအိုတစ်ဦး အမှတ်မထင် ချော်လဲသွားတော့ ကျောမှာကလေးလွယ်ပိုးထားတဲ့ မိန်းမတစ်ဦးက သူ့လက်မောင်းကို ဖေးမလိုက်တယ်။ သန်မာတက်ကြွတဲ့ ယောက်ျားပျိုဟာ အားပါးတရ လွှဲလိုက်တဲ့ သူ့လက်မောင်းတွေနဲ့ အခြားခပ်ပိန်ပိန် ယောက်ျားတစ်ဦးကို ဝင်တိုက်သွားတာကို မမြင်လိုက်ဘူး။ အဲဒီခပ်ပိန်ပိန်ယောက်ျား လဲကျသွားတဲ့အခါ ကလေးငယ်တစ်ဦးအပေါ် ဖိမိသွားလို့ ကလေးငယ်က အော်ငိုလိုက်တော့ အနားကလူတွေက သူ့ကို ဝိုင်းပြီးအပြစ်တင်လိုက်ကြတယ်။

အုပ်စုလိုက် လျှောက်နေကြတဲ့ မိန်းကလေးတွေဟာ မောပန်းနွမ်းနယ်နေတဲ့ သူတို့အထဲက တစ်ဦးကြောင့် အားလုံး ဆက်မသွားတော့ပဲ ငုတ်တုတ်ထိုင်စောင့်နေကြတယ်။ ဖြစ်ရပ်ပေါင်းများစွာဟာ အခိုက်အတန့် တစ်ခုမှာတော့ တပြိုင်နက် ဖြစ်ပျက်နေတယ်။ ဖြစ်ရပ်တစ်ခုဟာ နောက်တစ်ခုကို ဖြစ်ပွားစေတာ ရှိတယ်။ တချို့ဖြစ်ရပ်တွေက ဘာကိုမှ မဆက်စပ်ဘဲ တည်ရှိနေတယ်။ တချို့ဖြစ်ရပ်ဟာ ဆင်တူပဲ။ တချို့ဟာ ကိုယ်စားပြုတွေ၊ တချို့က သီးသန့်ကိစ္စတွေဖြစ်တယ်။

တောင်ကုန်းထိပ်မှာ ဘာတွေရှိမလဲ။ လက်အုပ်ချီရင်း ကြည်လင်လေးမြတ်တဲ့ မျက်နှာထားနဲ့ မျှော်လင့်ချက်တွေ ထားနေကြသူတွေရှိတယ်။ တချို့က တောင်ကုန်းကို မြင်နေရတဲ့ လမ်းတဝက်မှာတင် ရှိခိုးဦးချ ထိုင်ကန်တော့ကုန်ကြပြီ။ တောင်ကုန်းထိပ်မှာ ဘာတွေရှိမလဲ။ တောင်ကုန်းစတက်ကတည်းက မျက်နှာပျက်နေတဲ့ လူတချို့ရှိတယ်။ ထိပ်နားရောက်လာလေလေ ခြေလှမ်းတွေလေးကန်နေလေလေ။ နောက်ကြောင်း ပြန်လှည့်ဖို့ စဉ်းစားတယ်။ မမြင်နိုင်တဲ့ စွမ်းအားတစ်ခုက သူတို့ကို ရှေ့ဆက်သွားဖို့ တွန်းပို့ပြန်တယ်။ တချို့တွေ ချုံးပွဲချ ငိုကုန်ကြတယ်။

တောင်ကုန်းထိပ်မှာ ဘာတွေရှိမလဲ။ အများယောင်လို့ လိုက်ယောင် အမောင် တောင်မှန်း မြောက်မှန်း မသိသူတွေ ရှိတယ်။ ဘယ်ရယ်မသိ တန်းစီနေတဲ့အထဲ တစ်ခုခု မရလိုက်မှာ စိုးလို့ အတင်းပေကပ် ထပ်ကြပ်မကွာ လိုက်ပါနေသူတွေရှိတယ်။ ရှေ့က ဖြတ်တက်သူတွေ နေရာလုသူတွေကို မကျေမနပ် အော်ဆဲကြတယ်။ တောင်ကုန်းထိပ်မှာ ဘာတွေရှိမလဲ။ ကိုယ့်ခြေထောက်နဲ့ ကိုယ်တက်တာ ဘက်သူ့တက်နင်းနင်းဆိုတဲ့ လူစားတွေပါတယ်။ ဘာပဲဖြစ်ဖြစ် ရှေ့ဆုံးပထမ ပဲ ဖြစ်ချင်သူတွေပါတယ်။ နောက်မှာကျန်ခဲ့သူတွေကို အထင်သေးစွာ လှည့်ကြည့်ရင်း ကျော်ဖြတ်တက်သွားကြတယ်။

ခက်တာက တောင်ကုန်းခရီးဟာ အပြန်မရှိတဲ့ အသွားသက်သက်သာဖြစ်တယ်။ အခုတွေ့နေရသမျှ လူအားလုံးအား တောင်ကုန်းကို သွားနေကြတဲ့လူတွေချည်းပဲ။ အောင်မြင်စွာ တောင်ကုန်းထိပ်ကို ပြီးမြောက်ရောက်ရှိ သွားသူတွေကို ဘယ်သူမှ မမြင်နိုင်ကြဘူး။ အားလုံးဟာ အသွားသမားတွေ။ အပြန်သမား တစ်ယောက်မှ မမြင်ရဘူး။

ကျွန်မဟာ ပြုဖွယ်ကိစ္စ တစ်ခု ပြီးမြောက်အောင် လုပ်ဖို့ လိုအပ်တဲ့ ခံစားချက်မျိုးနဲ့ ဒီတောင်ကုန်းကို တက်လာခဲ့ပါတယ်။ တောင်ကုန်းအနီး ပတ်ဝန်းကျင်သဘာဝရဲ့ သာယာလှပမှုကို ခံစားသင့်သလောက် ခံစားပြီး ရာသီဥတုဒဏ် လမ်းပန်းကြမ်းတမ်းမှုဒဏ်ကိုလည်း ကိုယ့်လမ်းကြောင်းထဲမှာ ကျရောက်နေသလောက် ရင်ဆိုင်ခဲ့ရပါတယ်။ ရည်ရွယ်သွားရသလို မဖြစ်မနေလည်း ဖြစ်ပါတယ်။ အားသာချက်လို့ ပြောရရင်တော့ ဒါဟာ လက်ခလယ်တောင်ကုန်းပဲ ဆိုတာကို ပြတ်ပြတ်သားသား မြင်ကွင်းထဲမှာ ထင်သာမြင်သာ ဖြစ်နေတာလေး တစ်ခုပါပဲ။ ဟုတ်တယ်လေ။ ဒီဘက်က လက်မနဲ့လက်ညိုး၊ တခြားဘက်က လက်သူကြွယ် လက်သန်းပုံ တောင်ကုန်းကလေးတွေ ဝန်းရံလို့ အလယ်မှာ မားမတ်ထိုးထွက်နေတဲ့ ဒီတောင်ကုန်းရဲ့ ပုံသဏ္ဍန်ဟာ ကျွန်မနေရာမှာသာ လာပြီး ကြည့်ရှုကြရင် လက်ခလယ်တစ်ချောင်းသာ ဖြစ်တယ် ဆိုတာ ဘယ်သူမဆို မြင်နိုင်မှာပါ။ ဦးချကန်တော့နေသူတွေ ၊ ယုံကြည်ဆုတောင်းနေသူတွေကို ကျော်ဖြတ်ခဲ့တယ်။ ကြောက်ရွုံ့တုန်လှုပ်နေသူတွေ နောက်ကြောင်းပြန်ချင်နေသူတွေကို ထားရစ်ခဲ့တယ်။ အလွန်တရာ ရောက်လိုအားကြီးနေသူတွေ သူ့ထက်ငါ အရင်ဦးဖို့ ယှဉ်ပြိုင်နေသူတွေကို ပြုံးပြခဲ့တယ်။ ခက်ခက်ခဲခဲ ရုန်းကန် လျှောက်လှမ်းနေသူတွေကိုလည်း ချန်ခဲ့ရတယ်။

တောင်ထိပ်ဟာ နီးကပ်လာပြီ။ အဲဒီမှာဘာရှိမလဲဆိုတာ ကျွန်မသိရှိပြီးတဲ့အခါ ပြန်ပြောပြချင်ပေမယ့် ဒါဟာ အသွားလမ်း သီးသန့်ဆိုတော့ လမ်းခုလတ်က လူတွေကို ပြန်ဆုံဖို့ မဖြစ်နိုင်တော့ပါဘူး။ သေချာတာကတော့ အဲဒီ တောင်ထိပ်ကို ဘယ်သူမှ လွဲချော်သွားမှာ မဟုတ်ပါဘူး။ လင်းထိန်တဲ့ ကောင်းကင်ဖြစ်လာဖို့ ဖြန့်ကျက်ထွန်းလင်းနေတဲ့ နေလုံးဟာ တဖြည်းဖြည်း ရင့်မှည့်နေပါပြီ။ တောင်ထိပ်တည့်တည့်ဟာ မွန်းတည့်နေနဲ့ အနီးဆုံး ဖြစ်နေပါလိမ့်မယ်။ ရင့်မှည့်နေတဲ့ နေလုံးဟာလည်း ကျွန်မ တောင်ထိပ်တည့်တည့် ရောက်တဲ့အခါ ဘုတ်ခနဲ ကြွေကျလို့ တောင်ကုန်းရဲ့ အခြားတစ်ဖက်ကို တလိမ့်လိမ့် ဆင်းသွားကောင်း ဆင်းသွားပါလိမ့်မယ်။ ကျွန်မနဲ့အတူတူလည်း ဖြစ်ချင်ဖြစ်မှာပေါ့။

ပန်ဒိုရာ

၉.၇.၂၀၁၇-၁၁.၇.၂၀၁၈

(၂၀၁၈ စက်တင်ဘာလထုတ် Idea မဂ္ဂဇင်းတွင် ဖော်ပြပါရှိပြီး။)

Expand..