Wednesday, March 31, 2010

Finding Art in the City

အခုတလောတော့ Singapore Art Museum ဘက်ကို ခြေဦးလှည့်ဖြစ်တယ်။ FX Harsono လို့ အမည်ရတဲ့ အင်ဒိုနီးရှား ပန်းချီဆရာတစ်ယောက်ရဲ့ Testimonies ဆိုတဲ့ အနုပညာပြကွက်တွေကို ငေးမိပါတယ်။ ၂၀၀၆ ခုနှစ်တုန်းကလည်း စင်္ကာပူမှာ သူ့လက်ရာတွေ ပြသခဲ့သေးတယ်တဲ့။ အနုပညာတွေဟာ ခေတ်ရဲ့ လူမှုရေး စီးပွားရေး နိုင်ငံရေး အခြေအနေတွေကို ထင်ဟပ်နေတယ် မဟုတ်ပါလား။ အနုပညာအကြောင်း အများကြီးနားမလည်လည်း ဟာဆိုနို တင်ပြထားတဲ့ အနုပညာလက်ရာတွေကတဆင့် သူဘာကို ပြောပြချင်တယ် ဆိုတာကို ဘယ်သူမဆို အနည်းနဲ့အများ ခံစားနိုင်လိမ့်မယ်လို့ ထင်မိတယ်။


Paling Top’ 75
၁၉၇၀ ကျော်ကာလတွေမှာ ဟာဆိုနို အပါအ၀င် အင်ဒိုနီးရှားပန်းချီဆရာတစုက အနုပညာသစ် လှုပ်ရှားမှုတစ်ခု အနေနဲ့ သမားရိုးကျ ပန်းချီ ပန်းပုရဲ့ ဟိုမှာဘက်ကို ကျော်လွန်ပြီး နေ့စဉ်သုံးစွဲတဲ့ အရာဝတ္တုတွေကို ပေါင်းစပ်သုံးစွဲလာတဲ့ အနုပညာတွေ ဖန်တီးခဲ့ပါသတဲ့။ Paling Top’ 75 ဆိုတဲ့ ပြကွက်မှာ သစ်သားဘောင်ထဲမှာ ၀ိုင်ယာကြိုးတွေ ကာရံထားတဲ့ သေနတ်တစ်လက် (ပလတ်စတစ် သေနတ်တု) ကို ပြထားပါတယ်။ ဒါဟာ ၁၉၇၅ ကာလတွေက အင်ဒိုနီးရှားစစ်တပ်ရဲ့ အင်အား လွှမ်းမိုးမှု နဲ့ ပြည်သူလူထုရဲ့ အနေအထားကို ဖော်ကျုးထားတယ် လို့ဆိုပါတယ်။


Power and the Oppressed

အခန်းထဲမှာ ပလ္လင်ဆန်ဆန် ကုလားထိုင် တစ်လုံးတည်း ချထားပါတယ်။ ကုလားထိုင်ရဲ့အနားမှာ သံဆူးကြိုးတွေ ရစ်ခွေဝိုင်းပတ်ထားပါတယ်။ ကုလားထိုင်ရဲ့နောက်မှာ မီးတောက်တွေ လွန့်တက်နေဟန် ရုပ်ပုံကားချပ်တွေကို နံရံမှာ ကပ်ထားတယ်။ အဲဒါတွေက ဂျာဗားလူမျိုးတွေရဲ့ ယဉ်ကျေးမှုလက်ရာကို ဖော်ကျူးတယ်။ ဆူဟာတိုလက်ထက်က တခြားလူမျိုးတွေရဲ့ ယဉ်ကျေးမှုတွေကို နှိပ်ကွပ်ခဲ့တာကို ဆိုလိုတယ်။ ကုလားထိုင်ရှေ့မှာ စနစ်တကျ တန်းစီ ချထားတာကတော့ မြေမှုန်အနက်ပုံတွေ အများအပြားပါ။ အဲဒီမြေကြီးမှုန်တွေပေါ်မှာ အနီရောင်စွန်းပေနေတဲ့ အ၀တ်ဖြူကို တင်ထားပြီး အဲဒီပေါ်မှာ သစ်ကိုင်းခြောက်လို တုတ်နှစ်ချောင်းကို တုတ်ဖျားချင်း ကြက်ခြေခတ်ပြီး ချထားတယ်။ ၁၉၆၆ ခုနှစ်က ကွန်မြူနစ်ဆန့်ကျင်ရေး လှုပ်ရှားမှုမှာ လူသောင်းနဲ့ချီပြီး သွေးမြေကျခဲ့ရတာကို ဖော်ကျူးသတဲ့။

Voice Without Voice/Sign

ပြခန်းထဲက နံရံမှာ ကားချပ် ၉ ခု တန်းစီ ထောင်ထားပါတယ်။ ကားချပ်တစ်ခုစီမှာ လက်သင်္ကေတ တစ်ခုစီရဲ့ ပုံတွေကို ပြထားတယ်။ ဒါက အပြည်ပြည်ဆိုင်ရာသုံး လက်ဟန်ခြေဟန် သင်္ကေတ တွေပါ။ အင်္ဂလိပ်အက္ခရာ တစ်လုံးစီကို ဖော်ညွှန်းတယ်။ D-E-M-O-K-R-A-S-I တဲ့။ လက်ဟန်ခြေဟန်ကို ပြတဲ့အတွက် အသံမထွက်ခြင်းကို ဆိုလိုတယ်။ လူတွေရဲ့အသံကို မထွက်နိုင်အောင် လုပ်ထားတယ်လို့လည်း ဆိုလိုသတဲ့။ နောက်ဆုံးစာလုံး I မှာတော့ သင်္ကေတ ပြနေတဲ့လက်ကို ကြိုးနဲ့တုပ်နှောင်ထားတဲ့ ပုံကို ပြထားတယ်။ ပြပွဲရဲ့ အညွှန်းစာအုပ်ကလေးမှာ ဒီပြကွက်ကို ရှင်းလင်းထားတဲ့ စာပိုဒ်ကတော့ စိတ်ဝင်စားစရာပဲ။ နည်းနည်း တွေးသွားရတယ်။ မူရင်းစာပုဒ်တွေထဲက နောက်ဆုံး စာကြောင်းတချို့ကို ထုတ်နုတ် လိုက်ပါတယ်။ ကိုယ့်ဘာသာပဲ ဘာသာပြန်ကြည့်ကြပါလေ။
… While the work spells out uncompromisingly the demand for democracy, it is also a sign of the impossibility or futility of political action. Demokrasi (democracy) exists only as a series of empty gestures; it is represented purely as a sign, an abstraction, rather than concrete reality.

The Voices Controlled by the Powers

သစ်သားနဲ့ လုပ်ထားတဲ့ မျက်နှာဖုံးစွပ်တွေ အများကြီး ချထားပါတယ်။ မျက်လုံးနဲ့ နှာခေါင်းပါတဲ့ အပိုင်းတွေကို ဖြတ်ပြီး လေးဘက်လေးတန်က ၀ိုင်းပြီး စီထားတယ်။ အောက်က ပါးစပ်ပါတဲ့ အပိုင်းတွေက အလယ်မှာ ခင်းကျင်းထားတယ်။ ဒါဟာလည်း ဖိနှိပ်မှုတစ်ခုအောက်မှာ ပြောရေးဆိုခွင့်မရှိခဲ့ရပုံကို ပြသထားတာပါ။ ရှင်းလင်းချက်ထုတ်ထားတဲ့ စာအုပ်လေးထဲမှာတော့ လူနည်းစု လူမျိုးတွေရဲ့ ဘာသာဓလေ့ထုံးတမ်းတွေကိုပါ ဖိနှိပ်ခံခဲ့ရပုံကို ပြချင်တာလို့ ဆိုတယ်။

နောက်ထပ် စိတ်ဝင်စားစရာ ပြကွက်တွေရှိသေးတယ်။ Burned Victims ဆိုတဲ့ ပြကွက်မှာ မီးကျွမ်းလောင်နေတဲ့ လူ့ကိုယ်ခန္ဓာ တွေ ဖိနပ်တွေကို performance သရုပ်ဖော် ဗွီဒီယိုနဲ့တကွ ပြထားတာယ်။ (အထက်က ပြထားတဲ့ Voice Without Voice/Sign ရဲ့ ရှေ့မှာပါ။) Thousands Times Pain ဆိုတဲ့ ခေါင်းစဉ်အောက်မှာ ပင်အပ်တစ်ခုစီနဲ့ ထိုးစိုက်ပြီး နံရံမှာ တန်းစီကပ်ထားတဲ့ ပျားအကောင်တစ်ထောင်ရဲ့ ပုံ။ Open Your Mouth ဆိုတဲ့ခေါင်းစဉ်နဲ့ လူတစ်ယောက် (ပန်းချီဆရာကိုယ်တိုင်ရဲ့ပုံ ထင်ပါတယ်) ပါးစပ်ကို အတင်း ဆွဲဖွင့်နေတဲ့ ပုံမျိုးစုံ တန်းစီ ပြထားတာတွေ စတဲ့ ပြကွက်တွေ အများကြီး ကျန်ပါသေးတယ်။ ပြကွက်တွေအားလုံးမှာလည်း သက်ဆိုင်တဲ့ အင်ဒိုနီးရှားနိုင်ငံရဲ့ ဖြတ်သန်းမှုသမိုင်းကြောင်း ကိုယ်စီနဲ့။ အသေးစိတ် နမူနာသိချင်ရင်တော့ ဒီ link မှာ brochure လေး download ယူလို့ရပါတယ်။ http://www.singaporeartmuseum.sg/exhibitions/

ဓာတ်ပုံမရိုက်ရဘူးလို့ ရေးထားတာတော့ မတွေ့မိဘူး။ ဟန်းဖုန်းနဲ့ ရိုက်တော့ အစောင့်တွေက ဘာမှမပြောကြဘူး။ ခွင့်ပြုမပြု သိပ်မသေချာတာနဲ့ အများကြီး မရိုက်ဖြစ်ခဲ့ဘူး။ ပုံတွေက ၀ါးတားတားလည်း ဖြစ်သွားခဲ့တယ်။

ဟာဆိုနိုရဲ့ပြကွက်တွေက မေလ ၉ ရက်နေ့အထိ ပြထားမှာပါ။ သောကြာနေ့တိုင်းမှာ ညနေ၆ နာရီကနေ ၉ နာရီကြားမှာတော့ ပြတိုက်ထဲကို ၀င်ကြေးမဲ့ (free of charge) ၀င်လို့ရပါတယ်။ ကျန်တဲ့အချိန်တွေကတော့ ၀င်ကြေး အနည်းငယ် ပေးရလိမ့်မယ်။ စင်္ကာပူမှာ နေထိုင်သူတွေ စိတ်ဝင်စားရင် သွားကြည့်ကြပေါ့နော်။ လိပ်စာသိချင်ရင် စောစောက လင့်ခ်မှာပဲ ရှာလို့ရပါတယ်။

ပန်ဒိုရာ

Expand..

Saturday, March 27, 2010

ဘလော့ဂ် ၃ နှစ်ပြည့်

၂၀၁၀ မတ်လ ၂၇ ရက်နေ့ဆိုတာ ပန်ဒိုရာအတွက်ကတော့ ဘလော့ဂ်ရေးတာ ၃ နှစ်ပြည့်တဲ့နေ့ပါ။

အင်တာနက်ထဲက အသက်ဆိုတာ ခွေးတွေရဲ့ သက်တမ်းလိုပဲလို့ စလုံးဝန်ကြီးချုပ်ပြောတာ ကြားဖူးပါတယ်။ သူပြောတာ မမှားပါဘူး။ ဖြတ်သန်းခဲ့တာ ၃ နှစ်ဆိုပေမယ့် အတော်ကြာပြီလို့ ခံစားရပါတယ်။ တဖက်ကလည်း အင်တာနက်ထဲမှာ စာရေးသူတွေရဲ့ ဘ၀က ပျောက်သောသူကြာရင်မေ့ ဖြစ်တတ်ပါတယ်။ မရေးဖြစ်ပဲ နည်းနည်း ကင်းကွာလိုက်တာနဲ့ စာဖတ်သူတွေ ရေးဖော်တွေနဲ့ အဆက်ပြတ်သွားတတ်တာက အပြင်လောကထက် မြန်ဆန်တတ်ပါတယ်။ ဒီလိုပဲ နှုတ်ဆက်လို့ဖြစ်စေ နှုတ်မဆက်ဘဲဖြစ်စေ ထွက်ခွာသွားကြသူတွေလည်း များလှပါပြီ။ တချို့လည်း ဘယ်သူဘယ်ဝါမှန်း မသိတော့ ဘာဖြစ်သွားသလဲ မသိဘူးပေါ့နော်။

Blog honeymoon အချိန်လေး ကုန်သွားတာအပြင် တကယ့်ကမ္ဘာမှာလည်း အခြေအနေတွေက လွန်ခဲ့တဲ့ ၃ နှစ်နဲ့တော့ မတူတော့တာအမှန်ပဲ။ အလုပ်ထဲမှာ အချိန်ကြာလာတာနဲ့အမျှ အလုပ်တာဝန်တွေ၊ အသက်ကြီးလာတာနဲ့အမျှ မိသားစုတာဝန်တွေက များလာပါတယ်။ ဒါဟာလည်း စာရေးကျဲလာတာတို့၊ ပို့စ်တွေ သိပ်ပျော်စရာ မကောင်းတော့တာတို့နဲ့ ဆက်စပ်ပါတယ်။

ဟိုတလောကတော့ ဘလော့ဂ်ရေးပြီး ကျော်ကြားဝင်ငွေကောင်းနေတဲ့ တရုတ်လူငယ် ဘလော့ဂါ တစ်ယောက်အကြောင်း တူဒေး သတင်းစာမှာ ဖတ်ရပါသေးတယ်။ သူရေးတဲ့ စာအုပ်က သိပ်ရောင်းကောင်းနေတယ်ဆိုပဲ။ ပါရဂူဘွဲ့ပိုင်ရှင် တက္ကဆီမောင်းနေတဲ့ စင်္ကာပူက ဘလော့ဂါတစ်ယောက်ကလည်း Diary of a Taxi Driver ဆိုပြီး စာအုပ်ထွက်ထားပါတယ်။ မြင်မိသလောက်တော့ လူတွေပိုစိတ်ဝင်စားကြတာ သတင်းနဲ့ နေ့စဉ်လူမှုဘ၀ရေးတဲ့ ဘလော့ဂ်တွေဖြစ်ပါတယ်။

အင်တာနက်ထဲက စာတွေ ပုံနှိပ်စာမျက်နှာပေါ် ရောက်လာတာ ၀မ်းသာစရာပါ။ ဒီလိုပဲ ပုံနှိပ်စာတွေ အင်တာနက်ထဲကို ရောက်လာတာလည်း ၀မ်းသာစရာပါပဲ။ လူတစုကဖြစ်စေ လူအများကဖြစ်စေ အသိအမှတ်ပြုတာတို့ တန်းဝင်တာတို့ ဘေးချိတ်ထားရရင် စီးပွားရေးအရလည်း နစ်နာစရာမရှိဘူးဆိုရင် စာရေးသူအများစုဟာ ကိုယ့်စာကို လူများများ ဖတ်ဖြစ်သွားမယ့်ကိစ္စကို ၀မ်းသာကြမှာ သဘာဝပါ။

၃ နှစ်အတွင်းမှာရေးခဲ့တာ ပို့စ်ပေါင်း ၃၀၀ ကျော် ၄၀၀ နီးပါး ရှိပါတယ်။ ကဗျာတွေက အများစုပါ။ ဖတ်ဖြစ်ကြသူတွေ ဘယ်လို သဘောထားသလဲ၊ ဘာအကြံပေးချင်သလဲ။ သိရရင် ကောင်းတာပေါ့နော်။ မေးစရာရှိရင်လည်း မေးသွားပါ။ ဖြေနိုင်တာဆိုရင် ပြန်ဖြေပါမယ်။

ဘလော့ဂ်မှာ စာဆက်ရေးမှာလား လို့ မေးရင်တော့ အချိန်ရသလောက် ရေးဖြစ်ဦးမယ် ထင်ပါတယ် လို့ပဲ ပြောရမှာပါ။

အားလုံးကျန်းမာကြပါစေ။

ပန်ဒိုရာ

Expand..