Thursday, September 18, 2014

ကိုးလဆယ်လ




 
ပန်းချီ- မမသီရိ
 ကိုးလဆယ်လ

ရီမုကွန်ထရိုး၊ လက်ကိုင်ဖုန်း၊ ယပ်တောင်၊ ပလတ်စတစ်ဗူးခွံ၊ စက္ကူဗူးခွံ၊ အမာထည်တွေသာ အကြိုက်ဆုံး ကစားစရာ။ မွှေးပွရုပ်တွေ၊ လှုပ်ရှားမှု၊ သက်ရောက်မှု မပါတဲ့ အရုပ်တွေကို စိတ်မဝင်စား။ မှောက်တတ်ပြီ။ ချိုမိုင်မိုင် ကတတ်ပြီ။ ရွှေဝါးလက်ခုပ် တီးတတ်ပြီ။ ခိုးခိုးခစ်ခစ် ရယ်မောတတ်ပြီ။ တအိပ်ရာလုံး လူးလှိမ့်အိပ်တတ်ပြီ။ ငုတ်တုတ် ထထိုင်တတ်ပြီ။ ခြေနှစ်ဘက်ပေါ် မတ်မတ်ရပ်တတ်ပြီ။ ဗူးဗူး မှုတ်တတ်ပြီ။ ခြေထောက်ကလေးလှုပ်ပြ လက်ကလေးပုတ်ပြတတ်ပြီ။ နာမည်ခေါ်ရင် ရင်ဘတ်ကို ပုတ်ပြတတ်ပြီ။ ခြင်္သေ့ကြီးလို ဂါးဂါးနဲ့ သူများတွေကို လိုက်ခြောက်တတ်ပြီ။ ကြောင်ကလေးကို မီမီမီမီ ခေါ်တတ်ပြီ။ ကျီးကန်းကြီးလို အအအအ ပြောတတ်ပြီ။ လက်ညိုးလေးထောင်ပြီး ဒက်ဒက်ဒက်ဒက် လုပ်တတ်ပြီ။ တစ်ခုခု မကြိုက်ရင် နှုတ်ခမ်း စူပြတတ်ပြီ။ မေမေ၊ ဖေဖေ၊ ပါပါ၊ ဘွားဘွား၊ ဘဘ၊ မမ၊ နာနာ၊ ငယ်ငယ်၊ မျက်မှန် စတာတွေ ခေါ်တတ်ပြီ။  ခေါင်း ဘယ်မှာလဲ၊ ခြေထောက် ဘယ်မှာလဲ ပြတတ်ပြီ။ လမ်းလျှောက်ထိုင်ခုံတစ်လုံးနဲ့ တစ်အိမ်လုံး လျှောက်ပြေးတတ်ပြီ။ မွှေးမွှေးပေးတတ်ပြီ။ ဟိုင်းဖိုက် ဖလိုင်းကစ်စ် လုပ်တတ်ပြီ။ ခေါင်းပေါ်မှာ လက်ကိုင်ပုဝါလေးတင်ပြီး မုန့်ရောင်းတတ်ပြီ။ တူတူရေဝါး ကစားတတ်ပြီ။ ပုံပြင် နားထောင်တတ်ပြီ။ မုန့်လက်ညိုး ကိုင်စားတတ်ပြီ။ နို့ဗူးကုန်သွားရင် ခေါင်းခါ လက်ခါပြတတ်ပြီ။ လူတွေကို အားနာပါးနာ ဟန်ဆောင်ပန်ဆောင် အပြုံးလေးနဲ့ ပါးစပ်ဖြဲပြတတ်ပြီ။ အဲဒီလို တတ်ပြီးနောက် ဘာမှခိုင်းမရ၊ ဘာအမိန့်မှ မနာခံ၊ ဘာမှလုပ်မပြ၊ သူ့သဘော၊ သူ့ဆန္ဒ၊ သူလုပ်ချင်တာတွေ၊ သူ့စိတ်ထဲရှိသလို၊ သူနေချင်သလို၊ လွတ်လပ်စွာ၊ သဘာဝကျကျ၊ အာခံတတ်ပြီ။ အပြင်ခဏခဏ ထွက်ချင်ပြီ။ ပိတ်ထားတဲ့ တံခါးကို တဒေါက်ဒေါက် ခေါက်ရမှ။ လူကြီးလက်ပေါ်မှာ ဝမ်းလျားမှောက် ဆန့်တန်းပြီး လေယာဉ်ပျံကြီး ခဏခဏ စီးရမှ။ ဘာတွေ့တွေ့ ဘာရရ နောက်ဆုံးမှာ ပါးစပ်ထဲကို ထည့်ကြည့်ရမှ။ ညအိပ်ချိန် ခဏခဏ နိုးတိုင်း၊ မျက်စိမဖွင့်ဘဲ ဘေးပတ်ဝန်းကျင်ကို ပါးစပ်လေးဟ လိုက်စမ်းလိုက်တိုင်း ငုံစရာ သောက်စရာ အဆင်သင့် ရောက်လာမှ။ အရာဝတ္ထု သေးသေးလေးတွေကို သူပဲမြင်၊ သူပဲလိုက်ကောက်။ အပေါက်မြင်ရင် လက်ချောင်းတွေနဲ့ လိုက်ထိုးကြည့်။ သူ့လက်ညိုးလေးနှစ်ချောင်း အချင်းချင်း တို့ထိပြီး တွေတွေငေးကြည့်။ သူ့လက်ဖဝါးသူ ဆုပ်ကြည့်၊ ဖြန့်ကြည့်၊ နှိုင်းယှဉ်ကြည့်။ ဆံပင်ရှည်မြင်ရင် ခေါင်းခါယမ်းခိုင်းပြီး လိုက်ဆွဲ။ သဏ္ဍာန်တူတွေကို ရုပ်ပုံကားချပ်ထဲမှာ လက်ညိုးလိုက်ထိုး။ ပါးစပ်တပြင်ပြင် စားမယ် သောက်မယ် ဆိုတာချည်း၊ လူကြီးတွေမှာ သူစားလို့ မရတာတွေကို တိတ်တိတ်ဝှက်စားရ။ ဆတ်ဆတ်ထိမခံ။ လူစိမ်းကြောက်။ လန့်သွားရင်၊ နာသွားရင် မျက်ရည်ပေါက်ကြီးတွေ ကျအောင် ဖွဲ့ဖွဲ့နွဲ့နွဲ့ ထငို။ ဒိုက်ပါမှာ၊ ဖိနပ်မှာ၊ ပိုက်ဆံအိတ်မှာ ဗျစ်ဗျစ်မြည်တဲ့ ကပ်ခွာတွေကို  ဆွဲခွာလိုက် ပြန်ကပ်လိုက်။ ဗူးခွံတွေကို အဖုံးဖွင့်ကြည့်။ ပစ္စည်းတွေကို ကြမ်းပြင်ပေါ် ခဏခဏ ပစ်ချပြီး ကမ္ဘာမြေဆွဲအားကို စမ်းသပ်။ သွက်လက်မြူးကြွ တီဗွီကြော်ငြာ လာရင် ငေး။ မဂ္ဂဇင်းစာမျက်နှာတွေကို တဖျတ်ဖျတ်လှန်ပြီး လူရုပ်ပုံတွေကို သဘောကျ။ ကစားစရာ ပတ္တလားလေးနဲ့ ဖုန်းထဲက ပီယာနိုလေးကို လက်ဖဝါးနှစ်ဘက်နဲ့ အပြည့် ဒိန်းဒိန်းဒေါင်းဒေါင်း ခပ်ကြမ်းကြမ်းတီး။ ဂီတသံကြားလိုက်တိုင်း ခေါင်းကလေး တဆတ်ဆတ် လက်ကလေးတလှုပ်လှုပ် စည်းချက်နဲ့ က ။ 

ချစ်စရာ ၊ ချစ်တယ် ဆိုတဲ့ ဝေါဟာရကိုပဲ ပြောတတ်တာမို့ ဒီလိုဖော်ပြချက်ဟာ ပေါပေါပဲပဲ ဖြစ်နေမလား  စိုးရိမ်စိတ်နဲ့ပါ။ သူ့ဋီကာ သူ့ဗေဒ ချဲ့ကားမဆုံးနိုင်။ အိပ်ရေးဝခြင်းနဲ့ နှုတ်ဆက်ခွဲခွာရတာ အားအင်မကုန်ခန်းနိုင်။ ငါတို့အိုမင်းမစွမ်းချိန်နဲ့ သူ့အတောင်ပံတွေ လောက်လောက်လားလား သန်မာချိန်နဲ့ တိုက်ဆိုင်ပြီး အဝေးကို ပျံထွက်၊ ကျန်ခဲ့ရမှာကို သိသိနဲ့။ ပြန်မလိုချင်ပါဘူး၊ မလိုအပ်ဘူး။  တကယ်လို့ တစ်ခုခု လိုချင်မိတယ် ဆိုရင်တောင် ငါ့ကို၊ ငါတို့ကို သူကရော ချစ်ခင်ပါရဲ့လား ဆိုတာ။ လူးလွန့်ဝင်ဆန့်ရုံ ဝမ်းကြာတိုက်မှသည် အပြောကြီး အပြောကျယ် လောကအလယ်ကို ထွက်ကြည့်နိုင်ဖို့၊ ကိုယ့်အာဟာရ  တစ်ကိုယ်စာ လုံလောက် ဘောင်ခတ်ထားတဲ့ ရိက္ခာစက်ဝန်းထဲမှသည် သမုဒ္ဒရာ ဝမ်းတစ်ထွာ တစ်သက်စာ ဆာလောင်စေဖို့၊ ဖူးလ်စတော့ပ် အရွယ်မှသည် ဖဝါးလက်နှစ်လုံး အထိ၊ ရှင်သန်မှုတန်ဖိုးအတွက် ကိုယ်ချင်းစာနာစိတ်ကို၊ မိဘဘဝကို၊ ချစ်ခြင်းမေတ္တာကို၊ ထူးထူးခြားခြား လက်တွေ့ခံစား သင်ကြားပေးခဲ့တာ တစ်ခုတည်းနဲ့တင် ကျေးဇူးတင်ပြီ၊ ကျေနပ်ပြီ၊ လူအဖြစ်မှာ အနေတန်ပြီ။ ငါတို့သဘော၊ ငါတို့ဆန္ဒ၊ ငါတို့လိုအင်၊ ငါတို့ဆုံးဖြတ်ချက်၊ ငါတို့ထိုက်ငါတို့ကံ၊ ငါတို့လုပ်ငါတို့ခံ၊ ငါတို့လောဘ၊ ငါတို့အတ္တမှာ သူ့တိုက်ဆိုင်မှုကို အားဖြည့်ပေးပြီး ရောက်ရှိလာရသူတစ်ဦး။ အားပြင်းလှတဲ့ စုန်ရေ။ အခုအချိန်မှာ မေမေဆိုတာ သူ့အစားအစာ၊ သူ့ကစားစရာ၊ သူ့ဆော့ဖော်ဆော့ဖက်၊ သူ့မှီအုံး၊ သူ့အနွေးထည်၊ သူ့အအေးခန်း၊ သူ့ခိုလှုံရာ၊ သူ့အပျင်းဖြေ၊ သူ့စိတ်ဖောက်ခွဲရာ၊ သူ့အုပ်ချုပ်သူ၊ သူ့သူနာပြု၊  သူ့သမိုင်းရေးသမား။ မနက်မနက်ဆို ဖေဖေ့အတွက် သက်ရှိ နာရီနှိုးစက်ကလေး။ ထိခိုက်ပဲ့ရွဲ့မှာစိုးလို့ နှစ်နှစ်ခြိုက်ခြိုက် အိပ်မပျော်နိုင်ဘဲ နေ့နေ့ညည တဖွဖွ တသသ စောင့်ကြည့်နေရတဲ့ ဖန်ရုပ်ပါးပါးကြည်ကြည်လေး။ တစ်ချက်မှ အငြိမ်မနေဘဲ လှုပ်ရှားရိုက်ခတ်နေတတ်တဲ့ မာမာတင်းတင်း တစ်တစ်ရစ်ရစ် ခြေသလုံးကလေး။ ခေါင်းလေးငုံ့နေတိုင်း တွဲပြီး ထွက်ကျနေတဲ့ ဖောင်းဝဝ ပါးကလေး။ တစ်ခုခု မလုပ်ဖို့ ဟန့်တားလိုက်ကာမှ တမင်တကာ လုပ်ရင်း ပြန်လှည့်ရယ်ပြတတ်တဲ့ ပြုံးစစ စပ်ဖြဲဖြဲ သွားမပေါက်သေးတဲ့ ပါးစပ်ကလေး။ သူအမက်မောဆုံး ချိုချိုကို ပါးစောင်မှာ ဆေးတံခဲသလို ခဲထားရင်း မော့ကြည့်နေတတ်တဲ့ မျက်လုံးဝိုင်းကလေးတွေ။ အကာအကွယ်မဲ့ အနှောင့်အယှက်ကင်း ပကတိ သန့်စင်စွာ အိပ်မောကျနေတတ်တဲ့ မျက်တောင်ကော့ကော့လေးတွေ။

ပန်ဒိုရာ
၃၁.၇-၁၈.၉.၂၀၁၄


(အခုတလော ဘလော့ဂ်တွေကို ပြန်အသက်ဝင်စေဖို့ဆိုပြီး challenge လုပ်ကြတယ်။ ၂ ပတ်အတွင်း ဘလော့ဂ်မှာ တစ်ခုခုတင်ဖို့ပါ။ တခြား တင်စရာတွေ လက်စမသတ်သေးတာတွေ ရှိတော့ရှိသေးတယ်။ ဒီစာကတော့ မသက်ဝေ နဲ့ မစုချစ်သူတို့ ရည်ညွှန်းထားတာအတွက်ပါ။ နောက်ထပ်တော့ ကိုနတ္ထိ၊ မမေဓာဝီ၊ မအိန္ဒြာ၊ မ မနော်ဟရီ၊ မခင်ဦးမေ၊ Imaginary clouds No.2 ၊ မမေငြိမ်း၊ မခင်မင်းဇော် တို့ကို (မရေးရသေးရင်) တစ်ခုခုရေးဖို့ စာရင်းပေးချင်ပါတယ်။)

Expand..

Sunday, August 31, 2014

မြန်မာဘလော့ဂ်များ ဘယ်ဆီဘယ်ဝယ်ဘယ်ပုံဘယ်နှယ် - ၂



မြန်မာဘလော့ဂ်များ ဘယ်ဆီဘယ်ဝယ်ဘယ်ပုံဘယ်နှယ် - ၂
 
၂၀၀၇ ခုနှစ် MBS ရဲ့ ဖ်ိတ်စာ အမှတ်တရ
( BLOG ဆိုတဲ့ အင်္ဂလိပ်စာလုံးနဲ့ တူတဲ့ (3108)  သြဂတ်စ်လ ၃၁ ရက်နေ့ကို Blog Day လို့ blogday.org က ၂၀၀၅ ခုနှစ်က စပြီး သတ်မှတ်ခဲ့ဖူးတယ်။ အခုတော့ အဲဒီ website တောင် မရှိတော့ပါဘူး။ မြန်မာဘလော့ဂါတွေကတော့ ဆက်လက်ကျင်းပနေကြပါတယ်။ ၂၀၀၇ ကနေ စတင် သတ်မှတ်ခဲ့ကြတဲ့ Blog Action Day ဆိုတာကတော့ ရှိနေပါသေးတယ်။ အဲဒါကတော့ အောက်တိုဘာ ၁၅ သို့မဟုတ် ၁၆ ရက်မှာ အကြောင်းအရာတစ်ခုနဲ့ ပတ်သက်တာကို ကမ္ဘာအရပ်ရပ်က ဘလော့ဂါတွေက ဝိုင်းရေးကြဖို့ပါ။ ၂၀၀၇ မှာ environment ၊ ၂၀၀၈ မှာ poverty ၊ ၂၀၀၀၉ မှာ climate change ၊ ၂၀၁၀မှာ water ၊ ၂၀၁၁ မှာ food ၊ ၂၀၁၂ မှာ the power of we  လို့ သိရပါတယ်။ အခုလာမယ့် ၂၀၁၄ အောက်တိုဘာ ၁၅ ၁၆ အတွက် ခေါင်းစဉ်ကတော့ inequality ဖြစ်ပါတယ်။ http://blogactionday.org/ ။ ဘယ်လိုပဲဖြစ်ဖြစ် မနှစ်ကရေးခဲ့တဲ့ ပို့စ်ကို ရှေ့ဆက်ပါဦးမယ်။)


ရွှေဝါရောင်တော်လှန်ရေးကာလ ဖြစ်တဲ့ စက်တင်ဘာ ၂၀၀၇ မှာ မြန်မာဘလော့ဂ်တွေရဲ့ အခန်းကဏ္ဍဟာ ပိုထင်ရှားခဲ့တယ်။ နိုင်ငံရေးဆန်တဲ့ လှုပ်ရှားမှုတွေကိုတော့ ဂျူလိုင် ၂၀၀၇ လောက်ကတည်းက တွေ့မြင်ခဲ့ရတာပါ။ ၂၀၀၇ ဂျူလိုင် ၇ ရက်နေ့မှာ ဆဲဗင်းဂျူလိုင် လှုပ်ရှားမှု အမှတ်တရအနေနဲ့ ပိုစတာတွေကို ဘလော့ဂ်ပို့စ် အနေနဲ့ဖြစ်ဖြစ် sidebar မှာ ဖြစ်ဖြစ် ဘလော့ဂ်အတော်များများမှာ တင်ခဲ့ကြတာကို တွေ့ခဲ့ရပါတယ်။ အဲဒီတုန်းကတော့  မသင်္ကာကြည့်နဲ့ စောင့်ကြည့်ခံရတဲ့ အချိန်ဖြစ်တာမို့ ဘလော့ဂါတွေဟာ အလှမ်းမီဖို့ ခက်တဲ့ အင်တာနက်ထဲမှာ ဒီလိုလှုပ်ရှားမှုမှာ ပါဝင်တာကိုက အရဲကိုးခဲ့ကြတယ်လို့ ဆိုနိုင်ပါမယ်။ အဲဒီနောက် ၁၉ ဂျူလိုင် အာဇာနည်နေ့မှာလည်း ဗိုလ်ချုပ်အမှတ်တရ ပို့စ်တွေ ရုပ်ပုံတွေနဲ့ ဖြတ်သန်းခဲ့တယ်။ သြဂတ်စ် ၁၅ ရက်နေ့မှာတော့ ကုန်ဈေးနှုန်းကျဆင်းရေးအတွက် လမ်းလျှောက်လှုပ်ရှားမှုတွေ ဖြစ်လာခဲ့တယ်။ အဖြူရောင် လှုပ်ရှားမှုမှာ ကိုမင်းကိုနိုင်နဲ့ ၈၈ မျိုးဆက်တွေ အဖမ်းခံခဲ့ရပါတယ်။

ရွှေဝါရောင်တော်လှန်ရေး စတင်လို့ သံဃာတော်တွေ စီတန်းလမ်းလျှောက်ကြတဲ့အခါ အစပိုင်းရက်တွေမှာ အင်အားသုံး နှိမ်နင်းမှုတွေ မရှိသေးပါဘူး။ အဲဒီအစောပိုင်းကာလတွေကတည်းက သံဃာတော်တွေရဲ့ လှုပ်ရှားမှု ဓာတ်ပုံတွေကို ကမ္ဘာအရပ်ရပ်က မြင်တွေ့ကြရပါတယ်။ အဲဒီဓာတ်ပုံတွေထဲမှာ ဘလော့ဂါတွေ ရိုက်ကူးထားတဲ့ ဓာတ်ပုံတွေလည်း ပါပါတယ်။ ၁၉၈၈ ကာလက နည်းပညာတိုးတက်မှုတွေ မပေါ်ပေါက်သေးလို့ ဖြစ်ကြောင်းကုန်စင်ကို  အလျှင်အမြန် လူအများသိအောင် ချပြဖို့ မဖြစ်နိုင်ခဲ့ပေမဲ့ ၂၀၀၇ ရွှေဝါရောင်တော်လှန်ရေးရဲ့ အင်တာနက်ခေတ်မှာတော့ မြန်မာပြည်မှာ ဖြစ်ဖြစ်သမျှတွေကို မိနစ်ပိုင်းအတွင်းမှာပဲ ကမ္ဘာအရပ်ရပ်က သိမြင်နိုင်ခဲ့ကြပါတယ်။

အလွန်တင်းကျပ်တဲ့ကာလမှာ သတင်းဓာတ်ပုံနဲ့ သတင်းအချက်အလက်တွေ တင်တဲ့ ဘလော့ဂါတွေဟာ အမည်ရင်းနဲ့ ပုံရိပ်မှန်ကို ဖျောက်ထားကြရတယ် ဆိုတာ ပြောပြစရာတောင် မလိုပါဘူး။ အထူးသဖြင့် အလွန်တရာ နှေးကွေးတဲ့ ကော်နက်ရှင်နဲ့ မြန်မာပြည် အင်တာနက်ကဖေးတွေကနေ တင်ရသူတွေဟာ အချိန်လုပြီး စွန့်စားခဲ့ကြရမှာ သေချာပါတယ်။ တချို့က မူရင်းစတင် ဝေမျှသူတွေပါ။ တချို့က အခြားမှာ တင်ထားတဲ့ သတင်းတွေ ဓာတ်ပုံတွေကို ပြန်လည်ဝေမျှသူတွေပါ။ တချို့ကတော့ နှစ်မျိုးစလုံးပါ။ ဆန္ဒပြသူတွေကို ပစ်ခတ်မှုတွေ ဖြစ်လာပြီလို့ ကြားရတဲ့အခါ မိုးဇက်လို့ အမည်ရတဲ့ ဘလော့ဂ်တစ်ခုမှာ ဓာတ်ပုံတွေ တစ်ပုံပြီးတစ်ပုံ တက်လာခဲ့တယ်။ ခဏကြာတော့ အဲဒီဘလော့ဂ် ပျောက်သွားတယ်။ ဘယ်လို ဖြစ်သွားသလဲဆိုတာ ဘယ်သူမှ မသိနိုင်ပါဘူး။ အဲဒီကာလမှာ လူသိများတဲ့ သတင်းဘလော့ဂ်တွေထဲမှာ နစ်နေမန်း၊ ကိုထိုက်၊ ဒေါက်တာလွမ်းဆွေ၊ ဆုံဆည်းရာ ဘလော့ဂ်တွေ ပါဝင်ပါတယ်။

အဲဒီတုန်းက ပြည်တွင်းပြည်ပ တစ်ဦးနဲ့တစ်ဦး ဆက်သွယ်ကြတဲ့အခါ အခုလို viber တို့ facebook တို့ ခေတ်မစားသေးပါဘူး။ Gmail၊ Gtalk နဲ့ ဆီပုံး ဒါမှမဟုတ် Cbox လို့ခေါ်တဲ့ Chat box တွေ ဖိုရမ်တွေ ဘလော့ဂ်တွေက တဆင့် သတင်းအချက်အလက် ဖြန့်ဖြူးလေ့ရှိပါတယ်။ ဘလော့ဂ်တွေရဲ့ sidebar မှာ Cbox တွေ တပ်ထားလေ့ရှိပါတယ်။ အချက်အလက်တစ်ခုခု ဖြန့်ဖြူးချင်သူတွေဟာ လူသိများတဲ့ ဘလော့ဂ်တွေရဲ့ Cbox တွေမှာ တစ်ခုပြီး တစ်ခု လိုက်ရေးလေ့ရှိကြပါတယ်။ များသောအားဖြင့်တော့ အလကားရတဲ့ Cbox မှာ ထိန်းချုပ်နိုင်တဲ့ အဆင့်မြင့် function တွေ လိုချင်ရင်တော့ ပိုက်ဆံပေးဝယ်တပ်ကြပါတယ်။ ဥပမာ နစ်နေမန်း ဘလော့ဂ်မှာ သတင်းတွေကို Cbox ကနေ အမြန်ဆုံးတင်ပေးတာကို သွားသွားဖတ်ရပါတယ်။ လူဖတ်များတဲ့ Cbox link တွေချည်း သက်သက် စုစည်းထားတဲ့ link တွေလည်းရှိခဲ့ပါတယ်။

အဲဒီကာလက ပြည်တွင်းမှာ ပုဂ္ဂလိကထုတ် ဂျာနယ်တွေ သတင်းစာတွေ မပေါ်ပေါက်သေးဘဲ အစိုးရထုတ် သတင်းတွေကိုပဲ ဖတ်ရှုနိုင်တဲ့အတွက် သတင်းစာထဲမှာ မဖော်ပြတဲ့ တချို့ဖြစ်ရပ်မှန်တွေအတွက် အင်တာနက်ထဲက သတင်းတွေရယ် ပြည်ပအသံလွှင့်ဌာနတွေရယ်ကိုပဲ အားကိုးခဲ့ကြရပါတယ်။ ပရော်ဖက်ရှင်နယ် မီဒီယာသမားတွေ မဟုတ်တဲ့ ဘလော့ဂ်တွေထဲက သတင်းတွေဟာ ပြည်ပအသံလွှင့်ဌာနက သတင်းတွေလိုပဲ အားကိုးစရာ အသွင်ဆောင်လာပြီး နောက်ပိုင်းမှာတော့ ထူးခြားမှုတွေ ပေါ်ပေါက်လာပါတယ်။

ပထမဦးဆုံး သတိထားမိတာကတော့ ဘလော့ဂ်ထဲက သတင်းတွေရဲ့ ယုံကြည်အားထားမှုကို လျော့ကျလာစေတာပါ။ သတင်းတစ်ခု မှန်မမှန်ကို ပရော်ဖက်ရှင်နယ်ကျကျ စိစစ်စဉ်းစားတတ်တဲ့ ကျွမ်းကျင်မှုမျိုး မရှိဘဲ အချိန်ကိုလုပြီး အမြန်ဆုံး သတင်းပို့ဖို့ကို စိတ်ဆန္ဒအားကြီးနေကြတဲ့ ဘလော့ဂ်တွေကို သတင်းမှား ပေးသူတွေ ပေါ်လာပါတယ်။ နောက်ထပ်သိသာတာတစ်ခုက တော်လှန်လှုပ်ရှားသူတွေ နိုင်ငံရေးဆန်တယ်လို့ ထင်မြင်ခံရသူတွေ၊ လူသိများတဲ့ဘလော့ဂါတွေဟာ အုပ်ချုပ်ရေးကို ဝေဖန်တဲ့ အရေးအသားမျိုး ရေးတဲ့အခါ မကြားဝံ့မနာသာ ဆဲလာသူတွေ ပေါ်လာပါတယ်။ အမျိုးသမီးတွေကိုဆိုရင် ပိုပြီးတော့ ဆိုးပါတယ်။ မျက်နှာမဖော်ဝံ့အောင် ရှက်သွားကြောက်သွားပြီး ဆက်မရေးဝံ့အောင် ဆဲဆိုမှုတွေကို တွေ့ခဲ့ရပါတယ်။ တစ်ချိန်တည်းမှာပဲ အစိုးရအာဘော်ဆန်တဲ့ ဘလော့ဂ်တွေကိုလည်း လူသိများအောင် မြှင့်တင်လာကြပါတယ်။

အဲဒီနောက်မှာတော့ ဘလော့ဂ်အချို့ကို မြန်မာပြည်တွင်းက ကြည့်မရအောင် ပိတ်ပင်မှုတွေရှိလာပါတယ်။ နောက်ဆုံးတော့ blogspot.com တစ်ခုလုံး အပိတ်ခံလိုက်ရပါတယ်။ ပြည်တွင်းက အင်တာနက် သုံးစွဲသူတွေဟာ proxy တွေသုံးပြီး ကျော်ကြလွှားကြရပါတယ်။ တချို့က wordpress.com ကိုပြောင်းကြတယ်။ တချို့က blogspot.com မပေါ်အောင် domain name တစ်ခု နောက်ဆက်တွဲလုပ်ထားပြီး မြန်မာဘလော့ဂါတွေကို မျှဝေသုံးစေတယ်။ တချို့က ကိုယ်ပိုင် domain name  .net .com ဝယ်ကြတယ်။ တချို့ကတော့ ning.com မှာ sign up လုပ်ပြီး သွားရေးကြတယ်။ ning ကို ဘလော့ဂါအတော်များများ ရောက်လာကြပြီး စည်စည်ကားကား ဖြစ်စပြုလာတဲ့အချိန်မှာ ning site တွေက အလကားမပေးတော့ပဲ ပိုက်ဆံယူမယ်လို့ ဖြစ်လာတယ်။ အဲဒီမှာ တစ်ခေတ် ပျက်သွားပြန်တယ်။

၂၀၀၇ ရွှေဝါရောင်တော်လှန်ရေး မတိုင်မီနဲ့ အတောအတွင်းက ဘလော့ဂါအများစုဟာ ဘာအကြောင်းရေးရေး နိုင်ငံရေးလို့  ဆွဲယူချင်ရင် ရနိုင်ပြီး မမြင်ရတဲ့ နောက်ဆက်တွဲ အရေးယူနိုင်ခြေတွေကလည်း ရှိနေတယ်ဆိုတာ သဘောပေါက်ကြတာမို့ တစ်ဦးနဲ့တစ်ဦး မည်သူမည်ဝါဆိုတာ သိသည်ဖြစ်စေ မသိရသည်ဖြစ်စေ အရေးမကြီးခဲ့ကြပါဘူး။ ၂၀၀၆ ကနေ ၂၀၀၈ ဝန်းကျင် အချိန်လောက်က သတင်းဘလော့ဂ်မဟုတ်တဲ့ အထဲမှာ ညီလင်းဆက်၊ မေဓာဝီ၊ နိုင်းနိုင်းစနေ၊ နေဘုန်းလတ်၊ ခင်ဦးမေ၊ မင်းဒင် အစရှိတဲ့ ထင်ရှား ထူးခြားတဲ့ ဘလော့ဂါတွေ သူ့ကိုယ်ပိုင်ဟန်နဲ့သူ ရှိခဲ့ကြပါတယ်။ ဘလော့ဂါ ညီလင်းဆက်ရဲ့ ဘလော့ဂါစစ်တမ်းဟာ စိတ်ဝင်စားစရာကောင်းတဲ့ အချက်အလက်တချို့ကို ဖော်ထုတ်နိုင်ခဲ့တယ်။

(ခဏနားဦးမယ်။ ဖြည်းဖြည်း ဆက်မယ်။ )

ပန်ဒိုရာ
၃၁၊၈၊၂၀၁၄



 

Expand..

Monday, July 14, 2014

တစ်ခါအပြာဆိုရင် အမြဲအပြာပဲ

တစ်ခါအပြာဆိုရင် အမြဲအပြာပဲ

ဘောလုံးကစားနည်းကို တီထွင်ခဲ့သူကို ဘုရားအဖြစ် ကိုးကွယ်ဖို့ကောင်းတယ်။
ကျုပ်တို့အားလုံး ဂိုးသမားတွေချည်းဖြစ်နေလို့ကတော
ဘောလုံးသင်းဆိုတာ ရှိလာမှာမဟုတ်ဘူး။
ကျုပ်က ဘောလုံးကစားတာမဟုတ်ဘူး ဂိုးသွင်းတာ။
တစ်ဂိုးဂိုးမရှိနဲ့ ဆယ်ခါနိုင်ရတာက ဆယ်ဂိုးဂိုးမရှိနဲ့
တစ်ခါနိုင်ရတာထက် ပိုကောင်းတယ်။
ဒီ(သူ့မျက်နှာကို ဖိနပ်မှန်သွားတဲ့) ကိစ္စမျိုးကို
ကျုပ် အကြိမ် ၁၀၀၊ အကြိမ်သန်းပေါင်းများစွာ၊ ကြိုးစားလည်း
ပြန်မဖြစ်နိုင်ဘူး၊ ဖြစ်နိုင်ရင်လည်း ကျုပ် ဘောလုံးပဲ ဆက်ကန်တော့မှာပေါ့။
ဘောလုံးပွဲအုံကြွမှုတွေမှာ လူအလွန်ဆုံးသေရင် ဆယ်ဂဏန်းပေါ့၊
အတွေးအခေါ်အုံကြွမှုတွေက လူသန်းပေါင်းများစွာကို ဆုံးရှုံးစေတယ်။
ဘောလုံးစည်းမျဉ်းဆိုတာ ရှင်းရှင်းလေးပါ၊ အခြေခံအားဖြင့် ဒီလို -
၁) ဘောလုံးလိမ့်နေရင် ကန်။
၂) မလိမ့်ရင် မလိမ့်မချင်းကန်။
ခံစစ်နဲ့ပ်ိတ်ကစားနေတဲ့ အသင်းနဲ့ ကန်ရတာ
သစ်ပင်တစ်ပင်နဲ့ ဖက်အိပ်ရသလိုပဲ။
ဘောလုံးပွဲဆိုတာ မျှမျှတတ ကစားတာမျိုး မဟုတ်ဘူး၊
အမုန်းတွေ၊ မနာလိုမှုတွေ၊ အကြွားတွေ၊ စည်းကမ်းဖောက်ဖျက်မှုတွေ၊
အကြမ်းဖက်မှုကို အရသာခံကြည့်ကြတာတွေနဲ့ ပြည့်နှက်နေတယ်။
တစ်နည်းအားဖြင့်ပြောရရင်တော့ ဘောလုံးပွဲဆိုတာ
သေနတ်ပစ်ခတ်တာ မပါတဲ့ စစ်ပွဲပဲ။
နိုင်ငံတကာဘောလုံးပွဲတွေဆိုတာ စစ်ကို တခြားနည်းလမ်းနဲ့ ဆက်တိုက်တာ။
တချို့လူတွေက ဘောလုံးပွဲဆိုတာ သေရေးရှင်ရေးကိစ္စလို့ ပြောကြတယ်၊
စိတ်ပျက်စရာပဲ၊ ကျုပ်ကတော့ ဒီ့ထက်အများကြီး ပိုအရေးကြီးတယ်လို့ ထင်တယ်။
လူတစ်ယောက်ဟာ ဇနီးမယား၊ နိုင်ငံရေးပါတီ၊
ဘာသာရေးတွေကိုသာ ပြောင်းကောင်းပြောင်းမယ်၊
အကြိုက်ဆုံး ဘောလုံးသင်းကိုတော့ ပြောင်းလို့မရဘူး။
ရပ်ဂ်ဘီ ဆိုတာ လူရိုင်းတွေရဲ့ပွဲ၊ ဒါပေမဲ့ လူကြီးလူကောင်းတွေ ကစားနေတာ၊
ဘောလုံးကန်တယ်ဆိုတာ လူကြီးလူကောင်းတွေရဲ့ပွဲ၊ ဒါပေမဲ့ လူရိုင်းတွေ ကစားနေတာ။
ဒိုင်တွေရဲ့ပြဿနာကတော့ သူတို့က စည်းမျဉ်းစည်းကမ်းပဲသိတာ
ပွဲအနှစ်သာရကိုမသိဘူး။
ဘောလုံးပွဲဆိုတာ ရိုးရိုးလေးပါ၊ လူ၂၂ ယောက်က ဘောလုံးတစ်လုံးကို လုမယ်၊
သောက်တလွဲတွေ လုပ်မဲ့ ဒိုင်လူကြီးတစ်ယောက် ပါမယ်၊
နောက်ဆုံးတော့ ဂျာမနီပဲ အမြဲနိုင်မယ်။
ကျုပ်က ဒိုင်တွေနဲ့ ပတ်သက်ရင် ဘာဆိုဘာမှ မှတ်ချက်မချပါဘူး၊
အဲဒီခွေးမသားတွေအကြောင်းကို ဘာတစ်ခွန်းမှ မပြောတဲ့အကျင့်ကိုလည်း
မသေမချင်း ထိန်းသိမ်းသွားမှာပါ။
ကြည့်စမ်းပါ၊ ကျုပ်က ဘောလုံးနည်းပြပါ၊ ဟယ်ရီပေါ်တာမဟုတ်ဘူး၊
သူကမှော်ဆရာ၊ ဒါပေမဲ့ တကယ့်တကယ်မှာ မှော်ဆိုတာမရှိပါဘူး၊
မှော်ဆိုတာက ဝတ္ထုဇာတ်လမ်း၊ ဘောလုံးပွဲဆိုတာက အမှန်တကယ်။
ကျုပ်ကို မောက်မာတယ်လို့ မပြောကြပါနဲ့၊ ကျုပ်က ဥရောပ ချန်ပီယံ၊
ပြီးတော့ ကျုပ်က စပယ်ရှယ်ဝမ်း။
ဘောလုံးပွဲမှာ အဆုံးဝါးဆုံး အမြင်ကန်းမှုကတော့ ဘောလုံးကိုပဲ မြင်တာ။
မာရာဒိုနာရဲ့ ခေါင်းနဲ့က နည်းနည်း၊ ဘုရားသခင်ရဲ့ လက်နဲ့က နည်းနည်း
သုံးလိုက်တော့ ဂိုးဝင်သွားတာပါ။
ပင်နယ်တီကန်တယ်ဆိုတာ သူရဲဘောကြောင်တဲ့နည်းနဲ့ ဂိုးရအောင်လုပ်တာ။
ဖိလစ်ပို အင်ဇာဂီ ဆိုတဲ့ ငနဲဟာ လူကျွံဘောနဲ့ မွေးလာတာဖြစ်ရမယ်။
ကျုပ်တို့မှာ တင်မ်ရှားဝုဒ် ရှိနေမှတော့ ဘာဖြစ်လို့ ဇီဒိန်း လိုအပ်မှာလဲ။
ကျွန်မရည်းစားကပြောတယ်၊ ဘောလုံးပွဲလား၊ သူလား၊ ကြိုက်ရာရွေးတဲ့၊
ကျွန်မသူ့ကို အမြဲ လွမ်းနေတော့မှာ။
…အခုတော့ နီသွားတဲ့ ရွန်နီ၊ တို့ရင်ထဲမှာ သေသွားပြီ။ ။

ပန်ဒိုရာ
၁၀-၁၄.၇.၂၀၁၄
(ဘောလုံးနှင့်ပတ်သက်သော စကားအချို့ကို ပြန်ဆို စုစည်းထားခြင်း ဖြစ်သည်။)

Expand..

Wednesday, July 9, 2014

ငယ်ငယ်တုန်းက စာအုပ်ဆိုင်ကလေး

ငယ်ငယ်တုန်းက စာအုပ်ဆိုင်ကလေး



(မဂ္ဂဇင်းစာမျက်နှာဓာတ်ပုံ seesein shin)


၁၉၇၉ သြဂတ်စ်လမှာ ဖေဖေနဲ့မေမေဟာ သူတို့ရဲ့ စိတ်ကူးယဉ်အိပ်မက်တစ်ခုကို အကောင်အထည် ဖော်နိုင်ခဲ့တယ်။ ကျွန်မကတော့ သူငယ်တန်းကို စတက်နေချိန်ပေါ့။ ကျွန်မနာမည်ကို ဆိုင်နာမည်မှည့်ပေးထားတဲ့ စာအုပ်ဆိုင်ကလေးတစ်ဆိုင်ဟာ စာအုပ်အနည်းငယ်နဲ့ အစပြုခဲ့တယ်။ မြစ်ဝကျွန်းပေါ်က ရွာကလေးတစ်ရွာမှာ အဲဒီဆိုင်ကလေးကို ဖွင့်ခဲ့ကြတာပါ။ ရွာကလေးလို့ ချစ်စဖွယ်ကောင်းအောင် ပြောရပေမယ့်လည်း တကယ်တော့ ရွာကြီးလို့ပြောရမယ်။ လူမှုရေး စီးပွားရေး ဖွံ့ဖြိုးပြီး တိုက်နယ်ဆေးရုံရှိ၊ အထက်တန်းကျောင်းရှိတဲ့ ရွာကြီးတစ်ရွာပါ။ ဒါပေမဲ့ အဲဒီရွာမှာ စာအုပ်အငှားဆိုင်ကောင်းကောင်း မရှိခဲ့ဘူး။ တချိန်ကရှိခဲ့တဲ့ စာအုပ်အငှားဆိုင် တစ်ဆိုင်ကလည်း ကျွန်မတို့ပြောင်းရွှေ့လာတဲ့အချိန်မှာ ဖျက်သိမ်းစပြုနေပါပြီ။

စာအုပ်အငှားဆိုင်လေးကို ကာတွန်း၊ရုပ်ပြစာအုပ် ၁၂ အုပ်နဲ့ စတင်ခဲ့ပါတယ်။ ဆိုင်ဖွင့်ရက်က လလယ်ဖြစ်နေတဲ့အတွက် လကုန်မှ မဂ္ဂဇင်းအသစ်တွေဝယ်ပြီး စာအုပ်စင်ကို ထပ်ဖြည့်ခဲ့တယ်လို့  မေမေကပြောပြပါတယ်။ ကိုယ်ရေး အချက်အလက်တွေ ဖြည့်စွက်ရတဲ့ အခါ အိမ်ရှင်မ ဒါမှမဟုတ် မှီခို လို့ ထုံးတမ်းစဉ်လာအတိုင်း တစ်သက်လုံး ဖော်ပြခဲ့ရပေမယ့်လည်း သိမ်းထုတ်သေချာရုံသာမက တိုးပွားခိုင်မာအောင်ပါ ရောက်လေရာမှာ တနိုင်တပိုင်လုပ်ကိုင်ခဲ့သူ မေမေ့အတွက်တော့ အဲဒီစာအုပ်ဆိုင်ကလေးဟာ ကိုယ်ပိုင်စီးပွားရေးလေးတစ်ခုရဲ့ အောင်မြင်မှုမှတ်တိုင် တစ်တိုင်ပါ။

ဆိုင်ဖွင့်တဲ့နေ့မှာ ဈေးဦးပေါက် ငှားခဲ့ရတဲ့ စာအုပ်ကတော့ “ဓားငကောင်း” ဆိုတဲ့ ရုပ်ပြစာအုပ်တစ်အုပ် လို့ မှတ်မိနေခဲ့ကြပါတယ်။ အဲဒီတုန်းက ရုပ်ပြစာအုပ်တွေရဲ့ အရွယ်အစားဟာ မဂ္ဂဇင်းတွေလို အကြီးဆိုက်ဇ်တွေ မရှိသေးပါဘူး။ ဆိုင်ဖွင့်ခါစ ရက်တွေမှာ မဂ္ဂဇင်းနဲ့ ဝတ္ထုစာအုပ်တွေကို လူတွေက မငှားကြသေးဘဲ ရုပ်ပြတွေ ကာတွန်းတွေသာ ငှားရပါတယ်။ နောက်ပိုင်းမှာတော့ ကျွန်မတို့ရဲ့ စာအုပ်ဆိုင်ကလေးဟာ ရွာမှာနေထိုင်ကြသူတွေကို သုတရသစာမျိုးစုံ ဖတ်ဖြစ်အောင် တွန်းအားပေးတဲ့ အဓိကနေရာလေးတစ်ခု ဖြစ်ခဲ့ပါတယ်။

မဂ္ဂဇင်းတွေထဲမှာတော့ စစချင်းမှာ မြဝတီ၊ ငွေတာရီ နဲ့ စန္ဒာကို တင်ပါတယ်။ အဲဒီတုန်းက မြဝတီနဲ့ ငွေတာရီဟာ ယနေ့ခေတ် မြဝတီ ငွေတာရီနဲ့ ကွဲပြားခဲ့ပါတယ်။ အဲဒီအချိန်က ရုပ်ရှင်မင်းသား ဝင်းဦးစီစဉ်တဲ့ စန္ဒာ မဂ္ဂဇင်းဟာ အရမ်း ပေါက်နေချိန် ဖြစ်ပါတယ်။ စန္ဒာထဲက ဦးဦးပုံပြောမယ် တို့ ဆရာနန္ဒသူရဲ့ ပုဂံဇာတ်လမ်းတွေကို အခုအချိန်အထိ အမှတ်ရပါသေးတယ်။   စာအုပ်ဆိုင် စဖွင့်ဖွင့်ချင်းမှာ မဂ္ဂဇင်းစာအုပ်တွေကို သိပ်မဖတ်ကြလို့ တင်ရတာ အရှုံးပေါ်တယ်လို့ မေမေက ပြန်ပြောပြတယ်။ စာအုပ်ငှားခကတော့ အများအားဖြင့် တန်ဖိုးရဲ့ ၁၀ရာခိုင်နှုန်း သတ်မှတ်လေ့ ရှိတယ်။ မဂ္ဂဇင်းတစ်အုပ်ကို အဲဒီတုန်းက ဝယ်ဈေး၅ကျပ် ဒါမှမဟုတ် ၇ ကျပ်လောက်ရှိတာဆိုတော့ တစ်ရက်ငှားရင် ပြားငါးဆယ် ပြားခုနစ်ဆယ် ဖြစ်ပါတယ်။။ ဆယ်ခါငှားရရင် အရင်းကျေပါတယ်။ ရွာက စာဖတ်သူတွေကို မဂ္ဂဇင်းဖတ်ဖို့ တိုက်တွန်းရပါတယ်။  စစ်ပြန် ပေါ်လာတော့  သမိုင်းကြောင်းတွေ အခန့်အထည်တွေ ဖတ်ချင်သူတွေ စိတ်ဝင်စားကြပါတယ်။ ဒီလိုနဲ့ သွေးသောက်၊ ရှုမဝ၊ မိုးဝေ စသည်ဖြင့် မဂ္ဂဇင်းတွေ စာအုပ်စင်ပေါ်မှာ ပိုများလာပါတယ်။

မဂ္ဂဇင်းဖတ်ရှုသူတွေ များလာတဲ့ အချိန်မှာ တစ်ဘက်ကလည်း မဂ္ဂဇင်းတွေ ပိုထွက်လာကြပါတယ်။ ပေဖူးလွှာဟာ တကျော့ပြန်ခေတ်စားလာပါတယ်။ ကျွန်မက ပေဖူးလွှာထဲမှာ ပါတဲ့ ဘာသာပြန်ပုံပြင်လေးတွေကို မလွတ်တမ်းဖတ်ခဲ့တာ မှတ်မိပါသေးတယ်။ အဲဒီတုန်းက သောင်းပြောင်းထွေလာရယ်စရာဆိုတဲ့ မဂ္ဂဇင်းမှာ သောင်းပြောင်းထွေလာ ဆိုတဲ့ စာလုံးက အကြီးကြီးပါ။ နောက်ခေတ်မှာတော့ ရယ်စရာဆိုတဲ့စာလုံးက ပိုကြီးလာပြီး အခုတော့ သောင်းပြောင်းထွေလာဆိုတာ မရှိတော့ပါဘူး။ စာပေလုပ်သားမဂ္ဂဇင်းကိုတော့ ကျွန်မငယ်ငယ်က နည်းနည်း ပျင်းစရာကောင်းတယ်လို့ ထင်ခဲ့တယ်။ တဖြည်းဖြည်းနဲ့ မဂ္ဂဇင်းတွေဟာ အမျိုးအစားလည်း စုံလင်လာကြပါတယ်။   စံပယ်ဖြူမဂ္ဂဇင်းနဲ့ လုံမလေးမဂ္ဂဇင်းတို့ဟာ အမျိုးသမီးမဂ္ဂဇင်းတွေပါ။ အဲဒီမှာပါတဲ့ စက္ကူခေါက်နည်း၊ တံမြက်စည်းလုပ်နည်း၊ ပန်းထိုးနည်း၊ ဟင်းချက်နည်း  စတာတွေကို ကျွန်မတို့ လိုက်လုပ်ကြည့်ကြပါတယ်။ ရုပ်ရှင်မဂ္ဂဇင်း၊ ရုပ်ရှင်မျက်မှန်နဲ့ ရုပ်ရှင်အမြုတေ ဆိုပြီး ရုပ်ရှင်အထူးပြု မဂ္ဂဇင်းတွေလည်း များလာပါတယ်။ စောစောကတည်းက ထုတ်ဝေနေခဲ့တဲ့ သပြေကတော့ ဂီတအထူးပြုလို့ဆိုရမယ်။ သပြေမဂ္ဂဇင်းထဲမှာ ခေတ်ဟောင်းသီချင်း၊ ဓမ္မသီချင်း၊ စတီရီယိုသီချင်းနဲ့ လူငယ်သပြေအားမာန်ဝေဆိုတဲ့ လူငယ်သီချင်း အဲဒီလို သီချင်းတွေကို ကဏ္ဍခွဲပြီး လစဉ် တစ်ပုဒ်စီ ဖော်ပြခဲ့တာကို အမှတ်ရမိတယ်။

ပန် ရုပ်စုံ မဂ္ဂဇင်းဆိုပြီး ပန်းချီအနုပညာအကြောင်းတွေ အသားပေးဖော်ပြတဲ့ မဂ္ဂဇင်းတစ်စောင်ကိုလည်း အမှတ်ရနေပါတယ်။ ကျွန်မကတော့ အဲဒီထဲက ဆရာဦးဘကြည်ရဲ့ အခြေခံပုံဆွဲနည်းတွေကို လိုက်ဆွဲကြည့်ခဲ့ပါတယ်။ ဆရာ သိပ္ပံမှူးတင် စီစဉ်တဲ့ သိပ္ပံမဂ္ဂဇင်းထဲက Star War ကြယ်တာရာစစ်ပွဲ ရုပ်ရှင်ကို ပြန်ရေးထားတဲ့ အခန်းဆက်ရုပ်ပြကို ကျွန်မ စောင့်ဖတ်ဖြစ်ခဲ့ပါတယ်။  အံ့ဖွယ်သုတ၊ သုတအံ့ဖွယ် ဆိုတဲ့ မဂ္ဂဇင်းတွေလည်းရှိခဲ့တယ်။ မှုခင်းနဲ့ ပတ်သက်လို့လည်း ဆရာနီလေးမောင်စီစဉ်တဲ့ မှုခင်းစာစောင်အပါအဝင် လစဉ်ထုတ်မဂ္ဂဇင်းတွေရှိခဲ့ပါတယ်။

အဲဒီ ၁၉၈၀ ဝန်းကျင်ကာလတွေမှာ မြန်မာ့ဇာတ်သဘင်ကလည်း နိုင်ငံတဝှမ်းမှာ ရေပမ်းစားအောင်မြင်နေတဲ့ အချိန်ပါ။ သဘင်မဂ္ဂဇင်း ဆိုပြီးပေါ်ထွက်လာပါတယ်။ အဲဒီမဂ္ဂဇင်းမှာ ဇာတ်မင်းသားတစ်လက်ရဲ့ ရောင်စုံဓာတ်ပုံကို art paper နဲ့ မဂ္ဂဇင်းပြည့် ခေါက်ချိုးထားတဲ့ စာမျက်နှာတစ်ရွက် အမြဲပါပါတယ်။  ပထမပိုင်းတော့ စာဖတ်သူတွေ ခံစားနိုင်စေဖို့ ဒီလိုပဲထားလိုက်တာပါပဲ။ နောက်တော့ ဖြုတ်ယူထားသူတွေ ရှိလာတာနဲ့ စာအုပ်မငှားခင် အဲဒီစာရွက်ကို အရင် ဖြတ်ထားပြီး ဆိုင်မှာပဲ ကပ်ထားရတယ်။ အခုခေတ်တော့ အဲဒီလို စက္ကူအကောင်းနဲ့ မင်းသား၊မင်းသမီး၊မော်ဒယ် ပုံတွေဟာ မဂ္ဂဇင်းတွေထဲမှာ ပြည့်လျှံနေပါပြီ။ ဇာတ်သဘင်နဲ့ပတ်သက်လို့ နောက်ထပ် လူကြိုက်များတဲ့ စာစောင်တစ်ခုကတော့ ကြည်သာ(ပွဲကြိုက်ခင်) စီစဉ်တဲ့ ပွဲကြိုက်သူ ဆိုတဲ့ စာအုပ်ပါ။ သူက မဂ္ဂဇင်းအရွယ်လည်း မဟုတ်၊ ဝတ္ထုအရွယ်လည်း မဟုတ်တဲ့ အလယ်အလတ်ပါ။ အခုတော့လည်း တချိန်က အလွန်ထွန်းကားခဲ့တဲ့ ဇာတ်သဘင်တွေဟာ အထူးပြုစာစောင်တစ်စောင်အဖြစ် ထုတ်ဝေရလောက်တဲ့ အနေအထား မရှိတော့ပါဘူး။

၁၉၈၄ ခုနှစ်မှာ ဆရာမြတ်ထန်စီစဉ်တဲ့ ချယ်ရီမဂ္ဂဇင်းဟာ စာဖတ်သူတွေ အထူးစိတ်ဝင်စားကြတဲ့ ကဏ္ဍတွေနဲ့ ဆန်းသစ်စွာ ပေါ်ထွက်လာပါတယ်။ အဲဒီတုန်းက မှတ်မှတ်ရရ အမှတ် ၁ မျက်နှာဖုံးက ချယ်ရီပန်းလေးတွေပုံနဲ့ပါ။ ချယ်ရီအမှတ်၂ ထွက်လာတဲ့အခါ မို့မို့မြင့်အောင်က မိတ်ကပ်ရဲရဲ လည်ဟိုက် ဂါဝန်အနီလေးနဲ့ ဒေါက်ဖိနပ်ကို ငုံ့ကိုင်နေတဲ့ မျက်နှာဖုံးနဲ့ပါ။ အဲဒီမျက်နှာဖုံးဟာ အတော်လေး ဟော့သွားပါတယ်။ အဲဒီတုန်းက ပြောကြတာကတော့ အဲဒီမျက်နှာဖုံးကို ဦးနေဝင်းက မြင်တဲ့အခါ ဒါ မြန်မာမှ ဟုတ်ရဲ့လားဆိုပြီး အမျက်တော်ရှခဲ့သတဲ့။ အဲဒီကာလ အတောအတွင်းတွေမှာ မဂ္ဂဇင်းစာစောင်တွေမှာ လည်ဟိုက်တာ ပေါင်ပေါ်တာတွေကို ငွေမင်နဲ့ ဖုံးအုပ်ထားတာတွေကို တွေ့ခဲ့ကြရပါတော့တယ်။ မဆလခေတ်က ဆင်ဆာပေါ်လစီတစ်ခုပါ။ ချယ်ရီမဂ္ဂဇင်းထဲက ပင်တိုင်ကဏ္ဍတွေထဲမှာ ဆရာမောင်သစ်ရဲ့ဆောင်းပါးတွေ၊ အားကျစေချင်လွန်းလို့ ဆိုတဲ့ ထူးချွန်သူတွေနဲ့အင်တာဗျူးကဏ္ဍ၊ ဆရာကြီးဦးသုခရဲ့စာတွေ၊ ပြီးတော့ ကာတွန်းဆရာသော်ကရဲ့ ချစ်လွန်းသူ ဆိုတဲ့ ခွေးဇာတ်လမ်း အခန်းဆက် ရုပ်ပြကာတွန်း အစရှိတဲ့ ကဏ္ဍတွေကို အခုထက်ထိ ကျွန်မအမြဲ အမှတ်ရနေခဲ့ပါတယ်။ နောက်တော့ ဆရာခင်မောင်မြင့်ရဲ့ မဟေသီ မဂ္ဂဇင်းထွက်လာပါတယ်။ မဟေသီဟာ စာအုပ်ဆိုင်ပိတ်ချိန်မှာ အငှားရဆုံး မဂ္ဂဇင်းအဖြစ် ထိပ်ဆုံးက ရပ်တည်ကျန်ခဲ့ပါတယ်။

အခုခေတ်ကွာလတီ မဂ္ဂဇင်းတွေလို စာရွက်သား မကောင်း၊ ဆေးရောင်မစုံလင်ပေမယ့် အဲဒီတုန်းက မဂ္ဂဇင်းတွေမှာ ဖတ်ချင်စရာတွေ ပြည့်နှက်နေပြီး ကြော်ငြာကလည်း အနည်းငယ်သာပါဝင်ခဲ့ပါတယ်။ ဝတ္ထုတိုရွှေခေတ်လို့ ပြောရလောက်အောင်လည်း ထွန်းကားခဲ့ပါတယ်။ စံပယ်ဦး မဂ္ဂဇင်းဆိုရင် တခြားဘာအကြောင်းအရာမှ မပါဘဲ ဝတ္ထုတိုတွေချည်းသက်သက် စုစည်းထားတဲ့ ဝတ္ထုတိုမဂ္ဂဇင်းပါ။    ဆရာမဂျူးကိုလည်း ကျွန်မက ရှုမဝမဂ္ဂဇင်းထဲက ဝတ္ထုတိုမှာ စပြီး သတိထားမိခဲ့တာပါ။ ဆရာမရဲ့ တင်ပြပုံနဲ့ ဇာတ်ကွက်တွေဟာ ကျွန်မအဖို့ ဆန်းသစ်ထူးခြားနေလို့ အလွန်စိတ်ဝင်စားမိပါတယ်။ ကျွန်မတို့စာအုပ်ဆိုင် ပိတ်ပြီး တခြားမြို့တွေကို ပြောင်းရွှေ့သွားတဲ့အခါ “သူမ၏မိုး” “အနီးဆုံးခရီးသို့အဝေးဆုံးအချိန်” စတဲ့ ဝတ္ထုတိုတချို့ ပါတဲ့ မဂ္ဂဇင်းတွေကို အချိန်အတော်ကြာကြာအထိ ကျွန်မက ဆက်သိမ်းထားခဲ့ပါသေးတယ်။ “အမှတ်တရ” ဝတ္ထုထွက်ပြီး နာမည်ထင်ရှားလာခဲ့တဲ့အခါ ဝတ္ထုတိုတွေကတည်းက နှစ်သက်ရတဲ့ စာရေးဆရာမတစ်ယောက်မို့ ပိုဝမ်းသာခဲ့ရပါတယ်။

စာအုပ်ဆိုင်ဖွင့်ခါစက ဖေဖေ ကိုယ်ပိုင်ဖတ်ရှုဖို့ စုဆောင်းထားတဲ့ စာအုပ်တွေကို တင်ကြည့်သေးတယ်။ တက္ကသိုလ်ဘုန်းနိုင်တို့ မင်းကျော်တို့ စသည်ဖြင့်ပေါ့။ ဒါပေမယ့် စာဖတ်သူတွေက လတ်တလော အသစ်ထွက်လာတဲ့ စာရေးဆရာတွေကိုပဲ ပိုတောင်းဆိုကြတယ်လို့ ပြောပါတယ်။ ကျွန်မတို့ စာအုပ်ဆိုင်ဖွင့်ခါစ ကာလမှာ လုံးချင်းဝတ္ထုတွေထဲ လတ်တလော ရေပမ်းစားနေသူတွေကတော့ ခင်စိန်လှိုင်၊ ကလျာ(ဝိဇ္ဇာသိပ္ပံ)၊ ခိုင်ယဉ်မွန် စတဲ့ ဆရာ၊ဆရာမတွေပါ။ ဟာသစာရေးဆရာကတော့ ကြူမွှေးပါ။(ထပ်ခါထပ်ခါ ဖော်ပြရတာ ထောက်ပြီး ရှည်တဲ့အတွက် တချို့နေရာတွေမှာ ဆရာ၊ဆရာမ ဆိုတာကို ဖြုတ်ပြီး ကလောင်နာမည်ကိုသာ ရေးသားပါမယ်။ ဆရာ၊ဆရာမတို့အပေါ် အ,ဂါရဝ ဖြစ်သွားခဲ့ရင် ခွင့်လွှတ်ပါ။) ဆွေဆွေအောင်၊ ဝေဝေအောင်၊ နေနွယ်ဇင်မြင့်၊ မမိုးမြေ၊ စုလှဖြူ တို့ ခေတ်စားလာပါတယ်။ မဟူရာ(လွိုင်ကော်)၊ ကောလ်ထန်မောရီယယ် စတဲ့ စာရေးဆရာတွေလည်း ပေါ်လာပါတယ်။ (အချိန်ကာလအားဖြင့် တကယ့်အစီအစဉ်တိတိကျကျတော့ ဟုတ်ချင်မှ ဟုတ်မှာပါ။ စာအုပ်တွေအကြောင်း ကျွန်မတို့မိသားစုတွေကြား ဒီလိုပဲပြန်ပြီး ပြောကြတဲ့အခါ အဲဒီတုန်းက ဆိုင်မှာအငှားသွက်ခဲ့တဲ့ စာရေးဆရာတွေရဲ့ နာမည်တွေ အစီအရီပေါ်လာပါတယ်။)

အငှားရဆုံး ဝတ္ထုတွေထဲမှာ မြင့်မောင်မောင်၊ မောင်သာပြည့် တို့ဟာလည်း တစ်ခေတ်တစ်ခါက ထိပ်ဆုံးမှာ ရှိနေပါတယ်။ နေနွယ်ဇင်မြင့်ရဲ့သမီး လမင်းမိုမို ပေါ်လာတဲ့အခါ ပထမဆုံးစာအုပ်ကစပြီး ပရိသတ်ရဲ့ စိတ်ဝင်စားမှုကို ခံရပါတယ်။  မောင်စိန်ဝင်း (ပုတီးကုန်း)ဟာ အားလုံးတန်းစီ စောင့်ဖတ်ကြတဲ့ ဘက်ဆဲလားအဖြစ် ဆိုင်မှာ နေရာယူလာပါတယ်။ လူငယ်လူရွယ် ကျောင်းသားအရွယ်တွေရဲ့ အသည်းစွဲဖြစ်ပါတယ်။ အဲဒီမတိုင်ခင်ကတော့ ငြိမ်းကျော်နဲ့ နွမ်ဂျာသိုင်းတို့ရဲ့ ဝတ္ထုတွေဟာ ထိပ်တန်း အငှားရဆုံး အချစ်ဝတ္ထုတွေပါ။  ကျွန်မတို့ဆိုင်ဖွင့်တဲ့ ကာလအတွင်းမှာ မောင်စိန်ဝင်းဟာ အငှားရဆုံးစာရင်းမှာ အချိန်အကြာဆုံး ရပ်တည်ခဲ့တယ်လို့ မေမေက ပြောပြပါတယ်။ မိုးမိုး(အင်းလျား)၊ မောင်သာရ၊ နုနုရည်(အင်းဝ)၊ မစန္ဒာ တို့လို ဘဝသရုပ်ဖော်ဘက် လွှမ်းတဲ့ ဝတ္ထုမျိုးတွေနဲ့ နိုင်ငံခြားဘာသာပြန် ဝတ္ထုတွေကတော့ အငှားရဆုံး ဆိုတာမျိုးထက်  စာပေလိုက်စား ခံစားတတ်သူတွေကသာ အထူးရှာဖွေ ဖတ်ကြတာမျိုးပါ။ အပျော်ဖတ်လို့ လူတွေပြောကြတဲ့ ဝတ္ထုမျိုးတွေ၊ အချစ်ဝတ္ထုမျိုးတွေ၊ စွန့်စားခန်း လျှို့ဝှက်သည်းဖိုဝတ္ထုမျိုးတွေကတော့ ဘယ်ခေတ်ဘယ်အခါမှာမဆို ဖတ်သူဦးရေ ပိုများခဲ့ပါတယ်။

ရွှေဥဒေါင်း ဒဂုန်ရွှေမျှား ခေတ်တို့ ဆွေလှိုင်ဦးခေတ်တို့ကို ကျော်လွန်ခဲ့ပြီးဖြစ်တဲ့ အဲဒီ၁၉၈၀ ဝန်းကျင်မှာတော့ မင်းသိင်္ခရဲ့ စုံထောက်ဝတ္ထုတွေနဲ့ ဂမ္ဘီရဆန်တဲ့ဇာတ်လမ်းတွေဟာ သီးသန့်လိုင်းတစ်မျိုးနဲ့ အထူးသဖြင့် ယောက်ျားလေး စာဖတ်ပရိသတ်ရဲ့ စိတ်ဝင်စားမှုကို ခံရပါတယ်။ ယောက်ျားလေး ပရိသတ်တွေ နောက်ထပ် အထူးစိတ်ဝင်စားတာကတော့ သိုင်းဝတ္ထုတွေပါ။ တရုတ်သိုင်းဘာသာပြန် ဝတ္ထုတွေကို စာဖတ်သူတွေက မေးလာကြတော့ စာအုပ်ဆိုင်ဖွင့်စ အစောပိုင်းကာလက စပြီး ဆိုင်မှာ တင်ခဲ့ပါတယ်။ တက္ကသိုလ် ဝင်းကြွယ်၊ ဘုန်းကြွယ်၊ မိုးကျော်သူ၊ တက္ကသိုလ် နေလင်းအောင် စတဲ့ ဆရာတွေ ဘာသာပြန်တဲ့ သိုင်းဝတ္ထု အတွဲလိုက်တွေဟာ အငှားရဆုံးတွေပါ။ နောက်ပိုင်းမှာတော့ သိုင်းဝတ္ထုထဲမှာ တက္ကသိုလ်နေလင်းအောင်က စာဖတ်သူတွေ အကြိုက်ဆုံး ထိပ်ဆုံးမှာ ရောက်ခဲ့ပါတယ်။ ကျွန်မ ပထမဆုံး အစအဆုံး ဖတ်ခဲ့တဲ့ ဝတ္ထုစာအုပ်ဟာ သိုင်းဝတ္ထုတစ်အုပ်ပါ။ စာအုပ်ဆိုင် ပိတ်ပြီး ပြောင်းရွှေ့သွားတဲ့အခါ မရောင်းဘဲ သိမ်းပြီးယူသွားခဲ့တဲ့ စာအုပ်တွေထဲမှာ ကျွန်မနှစ်သက်တဲ့ သိုင်းဝတ္ထု အတွဲတွေလည်း ပါပါတယ်။

ဆရာချစ်ဦးညိုနဲ့ ပတ်သက်လို့ကတော့ ထူးထူးခြားခြားပြောစရာတွေ ရှိပါတယ်။ လင်္ကာဒီပချစ်သူမှာ ဗီလိန်ကို ဇာတ်လိုက်အဖြစ် ပြောင်းလဲချဉ်းကပ်လိုက်တဲ့အခါ ဝေဖန်သံတွေ ဆူညံထွက်လာခဲ့တယ်။ မြန်မာစာသင်တဲ့ ကျောင်းဆရာတစ်ဦးဖြစ်တဲ့ ဖေဖေဟာ ရသစာပေရေးသားခြင်းရဲ့ သဘောတရားတွေအတွက် အဲဒီအချိန်မှာ ထွက်နေတဲ့ “လင်္ကာဒီပချစ်သူ”နဲ့ “နှင်းကေသရာချစ်တဲ့သူရဲကောင်း” ကို ဖတ်ဖို့ ဆယ်တန်းကျောင်းသား တပည့်တွေကို ညွှန်းခဲ့တယ်။ ခက်တာက အဲဒီကာလတုန်းက မိဘအများအပြားဟာ သားသမီးတွေကို အပြင်စာတွေဖတ်ဖို့ အားမပေးဘူး။ အထူးသဖြင့် အချစ်ဝတ္ထုတွေဖတ်ရင် ငယ်ငယ်ရွယ်ရွယ်နဲ့ ရည်းစားထားတတ်မယ်လို့ ထင်ကြတယ်။ အဲဒီ့အပြင် စာအုပ်ဆိုင်ဖွင့်ထားတဲ့ ကျောင်းဆရာက ညွှန်းတယ်ဆိုတော့ အကျိုးစီးပွားပဋိပက္ခ လိုလို ဖြစ်နေပါတယ်။ ကျွန်မတို့မောင်နှမတွေကတော့ ကျောင်းစာမပျက်ကွက်ရင် ပြီးတော့ ကိုယ်ဖတ်နေတဲ့/ကိုယ်ဖတ်ချင်တဲ့ စာအုပ်ကို လာငှားသူ မရှိဘူးဆိုရင် အိမ်မှာရှိသမျှ စာအုပ်တွေကို ကြိုက်သလောက် ဖတ်ခွင့်ရပါတယ်။

ဆရာချစ်ဦးညိုရဲ့ စာအုပ်တွေဟာ လက်မလည်အောင် အငှားသွက်ခဲ့ပါတယ်။ ဒါပေမဲ့ တစ်လတစ်အုပ် နှစ်လတစ်အုပ် ထွက်နေကြတဲ့ လုံးချင်းဝတ္ထုတွေနဲ့ ယှဉ်ရင်တော့ အထွက်ကျဲတယ်လို့ ဆိုနိုင်ပါမယ်။ လင်္ကာဒီပချစ်သူကို ပန်းချီဝသုန်ရေးဆွဲတဲ့ ရုပ်ပြအနေနဲ့ ပြန်ထွက်လာတဲ့အခါ တစ်အုပ်ကို ၃၅ ကျပ်ကျမယ်လို့ သိလိုက်ရပါတယ်။ ကာတွန်းရုပ်ပြစာအုပ် ပုံမှန်တစ်အုပ်ကို ၁၀ကျပ်ကျော်ကျော်ဝယ်ရပြီး ပြန်ငှားရင် ၁ ကျပ်ကျော်နဲ့ ငှားနေတဲ့ အချိန်မှာ ၃၅ ကျပ်ဆိုတဲ့ ဈေးနှုန်းဟာ အလွန်ကို များလှပါတယ်။ ၃၅ ကျပ်ဆိုတော့ ၁၀ ရာခိုင်နှုန်း ငှားဈေးသတ်မှတ်ရင် တစ်ရက်ကို ၃ ကျပ်ခွဲ ဈေးနှုန်း သတ်မှတ်ရမယ်ဆိုရင် ငှားသူရှိပါ့မလားလို့ စဉ်းစားစရာ ဖြစ်လာပါတယ်။ ဒါပေမဲ့လည်း မေမေဟာ ဒီစာအုပ်ကို စွန့်စားပြီးဝယ်ဖို့ ဆုံးဖြတ်လိုက်ပါတယ်။ စာအုပ်မရောက်ခင်မှာ ပိုစတာ ကပ်ထားပြီး ဒီစာအုပ်ရောက်မယ့်အကြောင်းကို ကြော်ငြာထားပါတယ်။ စာအုပ်ရောက်လာတဲ့အခါမှာ အဲဒီဈေးနှုန်းနဲ့လည်း လက်မလည်အောင် ငှားရပါတော့တယ်။ အကြိမ် ၁၀၀ ကျော် ငှားရပြီး အမြတ်ငွေ အများကြီးတင်ကျန်စေအောင် ငွေရှာပေးခဲ့တဲ့ စာအုပ်မို့ ဆရာချစ်ဦးညိုကို အမြဲကျေးဇူးတင်မိတယ်လို့ မေမေက ပြောပြတတ်ပါတယ်။

အဲဒီခေတ်က ရုပ်ပြစာအုပ်တွေလည်း အလွန်ခေတ်စားခဲ့ပါတယ်။  တချို့ရုပ်ပြတွေက ပန်းချီဆန်ပြီး တချို့ကကာတွန်းဆန်ပါတယ်။ ရာမ၊ နန်းဦး၊ မင်းသိုက်၊ မြိတ်ဝင်းထိန် တို့ဟာ လူကြိုက်များတဲ့ ရုပ်ပြရေးဆရာတွေပါ။  တချို့ရုပ်ပြတွေကျတော့ ပြန်စဉ်းစားတဲ့အခါ  ဇာတ်လိုက်တွေကိုသာ မှတ်မိတော့တာရှိပါတယ်။ ထွန်းမင်းလတ်၊ စံရွှေမြင့်၊ နေကျောက်ခဲ၊ ဒီလုံး၊ ကြံ့ဗဟုံး စသည်ဖြင့် ပင်တိုင်ဇာတ်ကောင်တွေဟာ ကျော်ကြားပါတယ်။ မိုက်မိုက်(ပြည်) တို့လို ဘဝသရုပ်ဖော်ဆန်တဲ့ ရုပ်ပြတွေလည်း ရှိပါတယ်။ တစ်ဦးအောင်မြင်လာရင် ဆင်တူယိုးမှား လိုက်ရေးလာကြတာလည်း ရှိပါတယ်။ ရာမ ခေတ်စားလာတော့ လက္ခဏတို့ ဒဿတို့ လိုက်ထွက်လာပါတယ်။ ပန်းချီကိုကိုဝင်းရဲ့ နေကျောက်ခဲ ခေတ်စားလာတော့ နေကျောက်လုံးတို့ နေကျောက်စိမ်းတို့ ထွက်လာတာကို တွေ့ရပါတယ်။ ကာတွန်းရုပ်ပြတွေထဲမှာ မောင်မောင်လေးရဲ့ ငပြည့်၊ မောင်ဝဏ္ဏရဲ့ သမိန်ပေါသွပ်၊ သော်က ရဲ့ အရိုင်း၊ ပိုးဇာရဲ့ လေးမွန်ထွေးမွန်တို့ဟာ ထင်ရှားပါတယ်။ တချို့ ကာတွန်းရုပ်ပြတွေကတော့ နိုင်ငံခြားဇာတ်ကောင်တွေကနေ မှီငြမ်းထားတာလို့ ထင်ပါတယ်။ ကာတွန်းဆွေမင်း(ဓနုဖြူ)ရဲ့ မြိုင်ရာဇာတွတ်ပီကတော့ ကျွန်မတို့စာအုပ်ဆိုင် ပိတ်သွားတဲ့ အချိန်လောက်မှ တစ်ခေတ်ဆန်းလာခဲ့တာပါ။

ကျွန်မငယ်ငယ်က မဂ္ဂဇင်းတွေ ဖတ်တဲ့အခါ ပထမဆုံး ရှာဖွေခဲ့တဲ့ စာမျက်နှာက ကာတွန်းပါ။ ပြီးတော့မှ ဝတ္ထုတိုတွေ ရှာဖတ်ပါတယ်။ နောက်မှ ဆောင်းပါးတွေဖတ်ပါတယ်။ ကျွန်မအရမ်းငယ်သေးတဲ့အချိန်မှာ ကျောင်းမှာသင်ရတဲ့ ကာရန်ညီ ရိုးရာကဗျာတွေရဲ့ စပ်ထုံးတွေကို အလွန်စိတ်ဝင်စားပေမယ့် မဂ္ဂဇင်း ရှေ့ဘက် စာမျက်နှာတွေမှာ ပါတတ်တဲ့ ခေတ်ပေါ်ကဗျာတွေကိုတော့ မခံစားတတ်ပဲ ကျော်ဖတ်မိခဲ့ပါတယ်။ လွတ်လပ်ကာရန်ကဗျာ ဒါမှမဟုတ် ကာရန်မဲ့ကဗျာ ဒါမှမဟုတ် ခေတ်ပေါ်ကဗျာ လို့ဆိုကြတဲ့ ကဗျာတွေကို စပြီး စိတ်ဝင်စားမိတာကတော့ ဆရာမောင်သစ်တည် (ဆရာကြီးမြသန်းတင့်) ဘာသာပြန်တဲ့ “လင်ပစ်မညည်းချင်း” ဆိုတဲ့ ဘာသာပြန်ကဗျာ အခန်းဆက် မိုးဝေမဂ္ဂဇင်းမှာ ဖတ်လိုက်ရတဲ့အချိန်က အစပြုပါတယ်။ အာဖရိက ကဗျာဆရာ Okot p’ Batek ရဲ့ Song of Lawino ကဗျာပါ။  အဲဒီအချိန်က ကျွန်မ ငါးတန်းလောက်ပဲရှိမှာပါ။ ချီလီကဗျာဆရာနီရူဒါရဲ့ သစ်ခုတ်သမားနိုးကြားလေ့ာ ဘာသာပြန်ကဗျာကို ဆက်ဖတ်ပါတယ်။ အဲဒီ ကဗျာတွေကို အရမ်းစိတ်ဝင်တစား စောင့်ဖတ်ပြီး နောက်ပိုင်းမှာ မြန်မာခေတ်ပေါ်ကဗျာတွေ ရေးပုံသားပုံကို ဆက်ပြီး ဖတ်ဖြစ်သွားခဲ့ပါတယ်။

ဖေဖေနဲ့မေမေတို့ဟာ စာအုပ်ဆိုင်အတွက် အမြတ်အစွန်းမသေချာတဲ့ စာအုပ်တွေကို တင်ရတဲ့အခါ “အိမ်က ကလေးတွေဖတ်ရတာ အမြတ်ပဲ” လို့ သဘောထားပြီး ဝယ်လေ့ရှိကြပါတယ်။ စာအုပ်အငှားဆိုင်အဖြစ်သာမက တချို့စာစောင်တွေနဲ့ စာရေးကိရိယာတွေကိုပါ အရောင်းဆိုင်အနေနဲ့ တိုးချဲ့လာပါတယ်။ အဲဒီခေတ်က ကလေးတွေအတွက် မရှိမဖြစ် ဖတ်ကြတဲ့ ရွှေသွေး၊ တေဇ၊ တို့ကျောင်းသား၊ မိုးသောက်ပန်း၊ ဂါဒီးယန်းတွေ ကိုယ်စားလှယ်ယူပြီး ရောင်းပါတယ်။ အဲဒီခေတ်ကအခုလို ပုဂ္ဂလိကထုတ် ဂျာနယ်တွေ ပလူပျံအောင် ထုတ်ခွင့်မရတော့ နိုင်ငံရေးစိတ်ဝင်စားသူတွေအတွက် ပုံမှန်ထုတ်တဲ့ ပါတီရေးရာ၊ နိုင်ငံတကာရေးရာ စာစောင်တွေကိုပဲ တင်ရပါတယ်။ ကျောင်းသားတွေအတွက် ဂါးဒီးယန်းကထုတ်တဲ့ Sunday Supplement ဆိုတဲ့ အင်္ဂလိပ်စာ လေ့ကျင့်ခန်းစာစောင်ကို ကိုယ်စားလှယ်ယူ ပြီး အလယ်တန်း အထက်တန်းကျောင်းတွေကို ဖြန့်ပေးပါတယ်။ အဲဒီစာစောင်ဟာ တစ်စောင်မှ ငါးပြားပဲ မြတ်တယ်လို့ မေမေကပြောပါတယ်။ ဘာပဲဖြစ်ဖြစ် ဒီလို စာအုပ်စာစောင်တွေကို ရွာမှာ အလွယ်တကူ ဝယ်ရနိုင်တဲ့အတွက် ကျောင်းသားတွေအတွက် အတိုင်းအတာတစ်ခုအထိတော့ အထောက်အကူဖြစ်ခဲ့ပါတယ်။

မေမေက စာအုပ်ဆိုင်ကို အဓိကဦးဆောင်သူပါ။ ဖေဖေကတော့ ကျောင်းဆင်းချိန်တွေမှာ ကူညီပါတယ်။ ငွေကြေးကို တွက်တတ်ချက်တတ်လာတဲ့အခါ ကျွန်မတို့မောင်နှမတွေကလည်း စာအုပ်ဆိုင်မှာ ကူထိုင်ပေးကြပါတယ်။ မနက်မိုးလင်းလာတဲ့အခါ အိမ်ထဲမှာသိမ်းထားတဲ့ စာအုပ်တွေကို အပြင်ထုတ်ပြီး စာအုပ်စင်ပေါ်စီ၊ ညနေဆိုင်ပိတ်ရင် အိမ်ထဲကို ပြန်သွင်းတာတွေကို နေ့စဉ်ကူညီကြပါတယ်။ စာအုပ်တွေကိုတော့ ပုသိမ်မြို့က ဦးလေးတွေက ဒိုင်ခံဝယ်ပေးပြီး မော်တော်နဲ့ ထည့်ပေးကြပါတယ်။ စာအုပ်တွေရောက်လာတဲ့အခါ ကြာရှည်ခံအောင်လို့ ဖလင်ပြားတွေ ကဒ်ထူပြားတွေနဲ့ စာအုပ်တွေကို ပြန်ချုပ်ကြရပါတယ်။ အစပိုင်းမှာတော့ စာအုပ်တွေကို ဖလင်ပြားခံပြီး ပင်နဲ့ရိုက်ကြပါတယ်။ နောက်ပိုင်းတော့ စာအုပ်တွေကို ကြိုးနဲ့ချုပ်ကြပါတယ်။ ကျွန်မ ငါးတန်းနှစ်ရောက်တဲ့အခါ စာရေးဆရာတွေကို အားကျစိတ်နဲ့ ဗလာစာရွက်အလွတ်မှာ ဝတ္ထုလေးတွေ ကိုယ့်ဘာသာရေး၊ စာအုပ်သေးသေးလေးတွေလုပ်၊ စင်ပေါ်မှာ ရောတင်ထားပြီး ခပ်တည်တည် ဆော့ကစားခဲ့တာကိုလည်း သတိရမိပါသေးတယ်။ ဝါသနာပိုး အစထိုးခဲ့တယ်လို့ ဆိုနိုင်ပါမယ်။

ရွာလေးတစ်ရွာက စာအုပ်ဆိုင်လေးတစ်ဆိုင်မှာ တင်ခဲ့တဲ့ စာအုပ်တွေအကြောင်းကို ပြန်ပြောဖြစ်ကြတဲ့အခါ မြန်မာစာပေလောကကြီးတစ်ခုလုံးကို တိတိကျကျ မထင်ဟပ်နိုင်ပေမယ့်လည်း အဲဒီခေတ်က စာဖတ်သူတွေရဲ့ ဓလေ့ကို တစေ့တစောင်းတော့ ပြန်ပြောင်းသတိရစေခဲ့ပါတယ်။  ကျွန်မတို့စာအုပ်ဆိုင်က စာအုပ်တွေကို တရွာလုံး နေရာအနှံ့အပြားက လာငှားကြတဲ့အပြင် ရွာမှာငှားဖတ်သူတွေ နည်းပါးသွားတဲ့ စာအုပ်ဟောင်းတွေကို အနီးအနားက ရွာကလေးတွေကိုလည်း ရောင်းလို့၊ငှားလို့ရပါတယ်။ အငှားအလွန်လိုက်တဲ့ တချို့ဝတ္ထုတွေ တချို့မဂ္ဂဇင်းတွေကိုတော့ တန်းစီသူတွေအတွက် အဆင်ပြေအောင် နှစ်အုပ် သုံးအုပ် ဝယ်တင်ရတာမျိုးလည်း ရှိပါတယ်။ ငှားသူမရှိတော့တဲ့ စာအုပ်တွေဟာ ဟောင်းသွားပေမယ့်လည်း မပစ်လိုက်ရဘဲ ဝင်ငွေအနည်းငယ် ထပ်ရပါသေးတယ်။ ကျွန်မတို့စာအုပ်ဆိုင်သတင်းကို ကြားပြီး ကိုယ်မသိတဲ့ ရွာတွေက စာအုပ်ဆိုင်ကလေးတွေက ကျွန်မတို့စာအုပ်ဟောင်းတွေကို မေးစမ်းပြီး လာဝယ်ကြတာကိုလည်း ကြုံရပါသေးတယ်။ ကိုယ်ကြိုက်တဲ့ စာအုပ်တချို့ကိုတော့ နှမြောလို့ ကျွန်မတို့က ပြန်မရောင်းဘဲ သိမ်းထားတတ်ကြပါတယ်။ စာအုပ်ဆိုင်ကလေးဟာ ဝန်ထမ်းမိသားစုလေးရဲ့ စီးပွားရေးကိုလည်း အများကြီး ထောက်ပံ့ပေးခဲ့ပါတယ်။ စာအုပ်ဆိုင်ဝင်ငွေဟာ အိမ်စားရိတ်ကို ထိန်းတဲ့အပြင် ရွှေ လေးကျပ်ခွဲသားလောက် စုနိုင်ခဲ့တယ်လို့ မေမေကပြောပါတယ်။

စာဖတ်သူတွေဟာ ကျောင်းသူကျောင်းသားတွေ၊ အလုပ်သမားတွေ၊ ရပ်ကွက်ထဲက အိမ်ရှင်မတွေ၊ ဈေးသည်တွေ စတဲ့ လူတန်းစားမျိုးစုံပါ။ တချို့ဈေးသည်တွေဆိုရင် ကျွန်မတို့ဆီက တစ်ကျပ်ကျော်နဲ့ ငှားထားတဲ့ စာအုပ်ကို ဖတ်ပြီးသွားရင် နောက်တစ်နေ့ပြန်မအပ်ခင် ဈေးထဲမှာ တစ်ခါဖတ် တစ်မတ်နဲ့ လက်ဆင့်ကမ်းငှားကြပါသေးတယ်။ တချို့လည်း အမြတ်တောင် ထွက်ကြပါသေးတယ်။ အဲဒီအချိန်အခါက အပန်းဖြေဖို့အတွက်ကို လူအတော်များများဟာ စာဖတ်ခြင်းနဲ့ အချိန်သုံးကြလေ့ရှိပါတယ်။ တစ်နေ့တာ ပင်ပန်းသမျှ ရသစာအုပ်တစ်အုပ်ကို စွဲစွဲမက်မက် စိတ်နှစ်ပြီး ဖတ်လိုက်ရင် အပန်းပြေသွားကြတယ်လို့ ဆိုကြပါတယ်။ ရွာမှာ ပုံမှန်ပြတဲ့ ရုပ်ရှင်ရုံဆိုတာလည်း မရှိတော့ ပွဲလမ်းတစ်ခုခုမှာ ပိတ်ကားကြီးထောင်ပြီး ပြမှ ရုပ်ရှင်ကြည့်ဖြစ်ကြတာပါ။ ရုပ်မြင်သံကြား စပေါ်လာတော့လည်း လူတိုင်းမဝယ်နိုင်ကြသေးပါဘူး။ ကြည့်ချင်ရင် သူများအိမ်မှာ သွားကြည့်ကြရပါတယ်။ နောက်ပိုင်းတော့ အဖိုးအခနဲ့ ပြစားတဲ့ ဗွီဒီယိုရုံတွေ ပေါ်လာပါတယ်။ အဲဒီအချိန်က မြန်မာဗွီဒီယိုဇာတ်လမ်းတွေ မပေါ်သေးတော့ တရုတ်သိုင်းကား၊ ကုလားကားတွေ အကြည့်များကြပါတယ်။ အခုခေတ်လိုမျိုး အခြားအခြားသော အပန်းဖြေစရာ ဆော့ကစားစရာတွေ အလျှံပယ် ပေါများမလာသေးတဲ့အခါ လူတွေဟာ စာပိုဖတ်ဖြစ်ကြပါတယ်။ စာဖတ်ခြင်းဓလေ့ကလည်း ကူးစက်ပါတယ်။ ရွာမှာ စာအုပ်ဆိုင်ကောင်းကောင်း မရှိသေးခင်က မဖတ်ဖြစ်ကြတဲ့ ပရိသတ်ဟာ စာအုပ်စုံလင်တဲ့ ဆိုင်တစ်ဆိုင် ပေါ်လာတဲ့အခါ တစ်ဦးနဲ့တစ်ဦး ပြောဆိုဖလှယ်ကြရင်း စာအုပ်တွေ ဖတ်ကြတဲ့ အလေ့အထ ပိုပြန့်နှံ့လာခဲ့ကြပါတယ်။

ကျွန်မတို့မောင်နှမတွေ စူးစမ်းလိုစိတ် အားကောင်းနေတဲ့ ငယ်ရွယ်ချိန်ခါမှာ ဖေဖေမေမေတို့က ဒီလိုစာအုပ်အငှားဆိုင်လေး ဖွင့်ဖြစ်ခဲ့တာဟာ ကျွန်မတို့ဘဝအတွက် အရေးပါတဲ့ အခြေခံအုတ်မြစ်အနေနဲ့ အသိပညာတွေကို ခိုင်မာစေခဲ့ပါတယ်။ စာအုပ်မျိုးစုံကပေးတဲ့ သုတရသမျိုးစုံကို ကိုယ့်အိမ်မှာနေရင်းနဲ့ပဲ ဥာဏ်မီသလောက် စုပ်ယူနိုင်ခဲ့ကြပါတယ်။ ၁၉၈၆ ခုနှစ်မှာ တခြားမြို့တစ်မြို့ကို ပြောင်းတဲ့အခါ ကျွန်မတို့ရဲ့ စာအုပ်ဆိုင်ကလေးကို ပြန်ရောင်းခဲ့ကြပါတယ်။ အဲဒီအချိန်မှာ အဲဒီရွာကလေးမှာလည်း ကျွန်မတို့လို စုံလင်တဲ့ စာအုပ်ဆိုင်လေး နောက်ထပ်တစ်ဆိုင် ပေါ်ထွက်နေပါပြီ။ အသစ်ရောက်လာတဲ့ နောက်မြို့လေးတစ်မြို့မှာတော့ ကျွန်မတို့တွေ စာအုပ်ဆိုင်ထပ်မဖွင့်ဖြစ်တော့ပါဘူး။ အဲဒီမှာလည်း သူ့ဈေးကွက်နဲ့သူ ရှိနေကြပါပြီ။ ဒီတော့ ကျွန်မတို့တွေဟာ စာအုပ်သစ် ဖတ်ချင်ရင် သူများဆိုင်က သွားငှားဖတ်ရပါတော့တယ်။ အဲဒီအခါမှာတော့ ကိုယ့်ဆိုင်မှာလို ပေါ်သမျှ အကုန်ဖတ်ဖို့ မဖြစ်နိုင်တော့ပါဘူး။ ကုန်ကျစားရိတ်ကြောင့် ရွေးချယ်ဖတ်ရှုလာရပါတော့တယ်။

မြန်မာစာပေကတော့ ဆက်လက်နေဆဲပါ။ စာဖတ်ဓလေ့တွေလည်း ပြောင်းလဲလာပါတယ်။ လူတွေ သိပ်မဖတ်ကြတော့တဲ့ စာမျိုးတွေရှိသလို ပိုဖတ်လာကြတဲ့ စာအမျိုးအစားတွေလည်း ရှိပါတယ်။ တချိန်ကစာပေတွေ ပြန်ပြီးပုံနှိပ်ထုတ်ဝေလာကြတာတွေလည်း ရှိပါတယ်။ မသိမသာ တိမ်မြုပ်သွားကြတဲ့ စာတွေလည်းရှိပါတယ်။ စာအုပ်ဆိုင်ကလေး ဖွင့်ဖြစ်ခဲ့တဲ့ကာလဟာ ကျွန်မအတွက် အသက်အရွယ်နဲ့ နှိုင်းယှဉ်ရင် စာအဖတ်ဖြစ်ဆုံးကာလ ဖြစ်ခဲ့သလို ပျော်ရွှင်စိတ်လှုပ်ရှားစရာ အကောင်းဆုံးလည်း ဖြစ်ခဲ့ရပါတယ်။ မိဘတွေကျေးဇူးကြောင့် ဒီစာအုပ်ဆိုင်လေးကို ဖြတ်သန်းဖြစ်ခဲ့ရတဲ့ အချိန်တွေဟာ ဘဝမှာ အမြဲတမ်းအရေးပါနေတော့မှာပါ။

ပန်ဒိုရာ
၁၆-၁၇.၆.၂၀၁၄
 (နှင်းဆီဖြူမဂ္ဂဇင်းအမှတ်၂ တွင် ဖော်ပြပြီး)

(နောက်ဆက်တွဲမှတ်စုတို။ ။  ဒီအကြောင်းအရာကလေးကို ရေးဖို့ ခေါင်းထဲမှာ သိမ်းထားခဲ့တာ ကြာပါပြီ။ နှင်းဆီဖြုအတွက် ဖောင်ပိတ်ခါနီးမှ အမြန်ရေးဖြစ်သွားတယ်။ အမြန်ရေးတာကတစ်ကြောင်း၊ ဒါလေးရေးဖို့ အကြိမ် ၃၀ လောက် ပြတ်တောင်းပြတ်တောင်းနဲ့ ကွန်ပျူတာရှေ့ထိုင်ရတာက တစ်ကြောင်းကြောင့် အသုံးအနှုန်းတွေ ထပ်နေတာတို့ ထပ်ဖြည့်နိုင်သေးတဲ့ အကြောင်းအရာတချို့ကို သတိမရတာတို့ ဖြစ်သွားပါတယ်။ မိတ်ဆွေတစ်ယောက်ထောက်ပြလို့ ဒီဆောင်းပါးမှာ ထပ်နေတဲ့ စကားဆက်အနည်းငယ်ကို စာဖတ်ရချောအောင် ဖြုတ်လိုက်ပါတယ်။  )

Expand..

Saturday, June 28, 2014

သီချင်းကြိုက်တဲ့ကြောင်ကလေးနဲ့ နတ်သမီး ပုံပြင်



၁၀၀% မဂ္ဂဇင်း အတွဲ ၂ မှာ ပါတဲ့ ပုံပြင်လေးပါ။ မွေးကင်းစမှ ၁၀ နှစ်အထိ ဆိုတဲ့ ကဏ္ဍအောက်မှာ ဖော်ပြထားပါတယ်။

 

သီချင်းကြိုက်တဲ့ကြောင်ကလေးနဲ့ နတ်သမီး ပုံပြင်

သာယာတဲ့ နွေဦး နံနက်ခင်းတစ်ခုမှာပေါ့။ ကြောင်ကလေးတစ်ကောင်ဟာ မှုန်ကုတ်ကုတ်နဲ့ လမ်းလျှောက်လာတယ်။ လမ်းမှာတွေ့သမျှ သစ်ရွက်ကလေးတွေကို ခြေထောက်နဲ့ တွန်းတိုက်လိုက် လိုက်ဖမ်းလိုက်နဲ့ ဘာတွေ အလိုမကျ ဖြစ်နေလဲ မသိပါဘူး။

တကယ်တော့ အဲဒီကြောင်ကလေးက ဂီတကို သိပ်ဝါသနာပါတဲ့ ကြောင်ကလေးပေါ့ကွယ်။ ဒီမနက်တော့ သူ့ကြောင်မေမေက သူ့ကို ဆူပူလိုက်သတဲ့။ ဆူလည်းဆူစရာပေါ့။ ကြောင်ကလေးကလည်း ဆိုးပါတယ်။ ဟစ်ပ်ဟော့ပ် သီချင်းတွေရေးတယ် ပြီးရင် သူ့အသံကြောင်လေးနဲ့ ဆိုတယ်။ ကြောင်ကလေးဆိုတော့ အသံလေးက ကြောင်နေတော့ ဘယ်သူမှ နားမခံနိုင်ဘူးလေ။ သူ့ကို ၀ိုင်းပြောကြရော။ ဒါနဲ့ သူများတွေ အိပ်တဲ့အချိန်ကျမှ တညောင်ညောင်နဲ့ ခြံထဲထွက်ပြီး သီချင်းဆိုရသတဲ့။ ကြောင်မေမေက ဟဲ့ ညဥ့်နက်ပြီ ဆိုရင် အိပ်ဘူး လို့ ဂျစ်ကန်ကန် ပြန်ပြောသတဲ့။

အဲသည်လိုနဲ့ ညတွေဆို တော်တော်နဲ့မအိပ်ပဲ သီချင်းရေး သီချင်းဆို အလုပ်ကောင်းလိုက်တာ နောက်နေ့တွေ မိုးလင်းရင် ထမင်းစားဝိုင်းမှာ အိပ်ငိုက်လိုက် ကြောင်အတတ်ပညာ ကြွက်ဖမ်းတို့ ကြောင်ကျကျအောင် ခုန်နည်းတို့ သင်တဲ့အခါတွေကျရင် အိပ်ငိုက်လိုက် ဖြစ်လာတော့ ကြောင်မေမေက ဆူပါလေရော။ သည်တော့ ခေတ်ကြောင်ငယ်တို့ ထုံးစံအတိုင်းပေါ့။ အဘွားကြီးတွေ ခေတ်ကိုနားမလည်ဘူး  ဘာဘူး ညာဘူးနဲ့ မကျေမနပ်ပြောပြီး နံနက်ခင်းလေးမှာ ဆောင့်ဆောင့်အောင့်အောင့် လမ်းလျှောက်ထွက်လာတာပေါ့။

နွေဦးရဲ့ သစ်ရွက်ကလေးတွေက လှတယ်။ လှတဲ့သစ်ရွက်ကလေးတစ်ရွက် လေထဲမှာ ဝေ့၀ဲကျလာတယ်။ ကြောင်ကလေးက လှမ်းဖမ်းဖို့ ကြိုးစားတယ်။ လေပွေမှာ သစ်ရွက်ကလေးက ဝေ့ကာဝဲကာ လွတ်ထွက်သွားပြန်တယ်။ မကျေမနပ်ဖြစ်နေတဲ့ ကြောင်ကလေးက မရရအောင် လိုက်ဖမ်းတယ်။ လိုက်ရင်းလိုက်ရင်းနဲ့ သတိထားမိတဲ့ အချိန်ရောက်တော့ သူ့အိမ်နဲ့ တော်တော်ဝေးနေပြီ။ အဲဒါမှ ခက်တော့တာ။ ကြောင်ကလေး အိမ်မပြန်တတ်တော့ဘူး။

ကြောင်ကလေးက ဟိုဟိုဒီဒီ လှည့်ပတ်ကြည့်လိုက်တယ်။ သစ်ပင်တွေ ဆိုင်းနေတဲ့ တောအုပ်အုပ်ကလေးရယ်  မလှမ်းမကမ်းမှာ ဖြတ်စီးနေတဲ့ စမ်းချောင်းကလေးပေါ်က သစ်သားတံတားလေးရယ်။ သူရင်းနှီးကျွမ်းဝင်မှု မရှိတဲ့နေရာတစ်ခုပဲ။ ကြောင်ကလေးဟာ ထိုင်ချလိုက်ပြီး တိတ်တိတ်ကလေး ညည်းတွားနေပါတော့တယ်။

အဲဒီအချိန်မှာ တီတီ ဆိုတဲ့ အသံလေးကို ကြားလိုက်ရသတဲ့။  ဘေးနားမှာ လှည့်ပတ်ကြည့်လိုက်တော့ သူနဲ့အရွယ်တူလောက်ပဲ ရှိတဲ့ လူကောင်မလေး သေးသေးလေးကို တွေ့လိုက်ရသတဲ့။ အဲဒီ ကောင်မလေးက ၀တ်စားဆင်ယင်ထားတာ ပြောင်ပြောင်လက်လက်နဲ့ လက်ထဲမှာလည်း လက်ကိုင်ဖုန်းလေး တစ်လုံးကို ကိုင်လို့ ဖုန်းဆက်ဖို့ကြိုးစားနေတယ်တဲ့။ ကြောင်ကလေးက အံ့သြသွားတယ်။ ဘာကြောင့် ဒီလူမလေး သေးသေးလေးက ဒီနားကို ရောက်နေရတာလဲလို့ပေါ့နော်။

ကောင်မလေးကလည်း ကြောင်ကလေးကိုတွေ့သွားတယ်။ သူကပြောတယ်။ ငါက နတ်ပြည်က နတ်သမီးလေးပါ မင်းဘယ်သူလဲတဲ့။

ကြောင်ကလေးကပြောလိုက်တာပေါ့။ ငါက ကြောင်ကလေးပါ အိမ်ပြန်ဖို့ လမ်းပျောက်နေလို့တဲ့။

နတ်သမီးလေးက ဒါဆို ငါနဲ့လည်း အတူတူပဲတဲ့။ နတ်မေမေနဲ့ လူ့ပြည်ကို ခဏဆင်းလာတာ ကွဲသွားလို့ အခုဖုန်းဆက်နေတာလည်း ဆက်သွယ်ရေး ဧရိယာပြင်ပကို ရောက်နေလို့ မရဘူး ပေါ့နော်။

ကြောင်ကလေးကပြောတယ် နတ်သမီးဆိုရင် အတောင်ပံနဲ့ ပျံသွားပါလား ပေါ့။ ဒီတော့ နတ်သမီးလေးက ငါ့အတောင်ပံတွေက လုံလုံလောက်လောက် မသန်မာသေးဘူး။ မေမေက ကျောပိုးခေါ်လာရတာ လို့ပြန်ပြောသတဲ့။

အဲဒါနဲ့ အိမ်ပြန်မရောက်နိုင်တဲ့ ကြောင်ဆိုးကလေးနဲ့ နတ်သမီးလေးတို့ဟာ ဘာလုပ်ရမှန်းမသိ မှိုင်နေကြပါတော့တယ်။ အဲဒီလို ငိုင်နေတုန်း ကြောင်ကလေးက မနေနိုင်ပဲ သီချင်းတစ်ပုဒ် ကောက်စပ်ပြီး ဆိုလိုက်သတဲ့။

တိမ်တွေက ပျံတက်
အိမ်တွေက ကျန်ခဲ့
လမ်းပျောက်နေတဲ့ ဘ၀များ
ဆက်လျှောက်ဖို့လည်း ခဏနား
ကြောင်ကလေးလည်း တငူငူနဲ့
နတ်သမီးလည်း အတူတူပဲ

အဲဒီလို ဟစ်ပ်ဟော့ပ်ဆန်ဆန် သီချင်းကလေးပဲ ဆိုပါတော့။ ဒီတော့ နတ်သမီးကလေးက ၀မ်းသာအားရ ထအော်သတဲ့။ ဟေ့.. ကြောင်ကလေး မင်းက သီချင်းရေးတတ်သလားပေါ့။

ကြောင်ကလေးက ဟုတ်တယ် အဲဒီသီချင်းကြောင့်ပဲ ပြဿနာက တက်တာပေါ့ ဆိုပြီး သူအိမ်က ထွက်လာတဲ့အကြောင်းကို ပြောပြလိုက်သတဲ့။

ဒီတော့ နတ်သမီးလေးက တို့နတ်ပြည်မှာ ဒဏ္ဍာရီတစ်ခုရှိတယ်။ အိမ်ပြန်ရောက်ချင်လို့ရင် တကယ်တမ်းတပြီး ခံစားချက်အပြည့်နဲ့ သီချင်းအသစ်တစ်ပုဒ် ဆိုလိုက်လို့ရင် နတ်ပြည်က လှေခါးတစ်ခု ကျလာတယ်တဲ့။ ဒါဆို ငါအိမ်ပြန်လို့ရပြီ။ ခက်တာက ငါက သီချင်းအသစ်ရအောင် မစပ်တတ်ဘူး။ ကူညီပါလားလို့ပြောသတဲ့။

ဒီတော့ ကြောင်ကလေးကလည်း သူ့ပိုးတွေကို အစွမ်းပြခွင့်ရဖို့ ရီကွက်စ် အခုမှရတော့တယ် ဆိုပြီး ၀မ်းသာသွားတာပေါ့။ ဒီလိုနဲ့ အဲဒီတနေ့လုံး လက်သဲတွေနဲ့ကုတ်ခြစ်ပြီး ကြောင်ကလေးလည်း သီချင်းစပ်ပါလေရော။

သီချင်းကလည်း စပ်ရမယ်ဆိုမှ ခက်လိုက်တာ။ ကြောင်ကလေးက ဘလူးစ်တွေ ကန်းထရီးတွေ ရော့ခ်တွေ ပေါ့ပ်တွေ အမျိုးမျိုးစပ်လိုက် နတ်သမီးလေးကလည်း ဆိုကြည့်လိုက် နောက်ဆုံးတော့ နတ်သမီးလေးတောင် အသံဝင်ချင်သလိုဖြစ်လာသတဲ့။ နောက်ဆုံးတော့ ကြောင်ကလေးလည်း စိတ်ပေါက်ပေါက်နဲ့ အခုလို ရေးလိုက်သတဲ့။

ညောင်ညောင်ညောင်..
အိမ်ကိုလွမ်းတဲ့အကောင်
လွမ်းလွန်လွန်းလို့ငူငူငေါင်ငေါင်
နတ်သုဒ္ဒာတွေလည်းဝေး
အတောင်ပံတွေလည်းကွေး
တော်ရာမှာမနေခဲ့
ပျော်ရာရှာဖွေခဲ့
အခုတော့ ရေလည်ညစ်လို့
မေမေရေ သေမယ်ဖြစ်လို့
ကောင်းကင်ကလှေခါး
ကျလာပါလား
မျှော်လိုက်ရတာ တအား
ဂါးဂါးဂါး…

သူရေးပြီးတဲ့အခါ နတ်သမီးလေးက အင်မတန် ချိုသာတဲ့အသံလေးနဲ့ သီချင်းဆိုပါလေရော။ သီချင်းက သံစဉ်ရော စာသားပါ ဘ၀ဂ်အထိ ပျံလွင့်သွားတယ် ဆိုတာမျိုး ထင်ပါရဲ့ နတ်ပြည်ကို တက်သွားသတဲ့။ သိပ်မကြာပါဘူး လှေခါးကြီး ကျလာပါတယ်။

နတ်သမီးလေးက ၀မ်းသာသွားတယ်။ ကြောင်ကလေးကတော့ မပျော်ပါဘူး။ မင်းကတော့ ပြန်သွားတာဟုတ်ပါပြီ နတ်သမီးရယ်။ ငါကတော့ ဘယ်လိုပြန်ရမလဲ တဲ့။

နတ်သမီးလေးက မျက်စောင်းထိုးတယ်။ ကြောင်ကလေးကလည်း အ လိုက်တာတဲ့။
google earth တွေဘာတွေ သုံးဖူးပုံ မရဘူးတဲ့။ တကယ်တော့ ကြောင်ကလေးကလည်း internet savvy သိပ်မဖြစ်ဘူးလေ။

နတ်သမီးလေးက ကြောင်ကလေးကိုပါ လှေခါးပေါ် ခေါ်သွားတယ် ။ အပေါ်စီးကကြည့်တော့ သူ့အိမ်ကို လှမ်းမြင်ရပြီပေါ့။

ဒီတော့မှ နတ်သမီးက ကြောင်ကလေးအိမ်ကို ရှာပြီး အသေအချာ ပို့ပေးလိုက်တယ်။
ဒါပေမယ့် သူတို့ကသီချင်းတွေ ဘာတွေ အတူစပ် ခင်မင်ပြီးမှ ခွဲရတော့မယ်ဆိုတော့ နည်းနည်း ၀မ်းနည်းသွားကြတာပေါ့။ ကြောင်ကလေးက ငိုတောင်ငိုချင်သတဲ့။ ဒါပေမယ့် နတ်သမီးလေးက ကြောင်ကလေးရဲ့ နားနားကိုကပ်ပြီး တိုးတိုးလေး တစ်ခုပြောလိုက်တော့ ပြုံးသွားသတဲ့။

အဲဒီနေ့ကစပြီး ကြောင်ကလေးက အလုပ်တွေကို အချိန်နဲ့လုပ်တယ်။ မဆိုးတော့ဘူး။
ညတွေဆို ကြောင်မေမေက အိပ်တော့ဆိုရင် စောစောစီးစီး လိမ်လိမ်မာမာ အိပ်တယ်။
ဘာလို့လဲ သိလား။

နတ်သမီးလေးက ပြောလိုက်တယ် ညကျမှ အိပ်မက်ထဲကို လာခဲ့မှာပေါ့ တဲ့။ နတ်သမီးနဲ့ ကြောင်ကလေးက အိပ်မက်ထဲမှာ သူငယ်ချင်းတွေ အမြဲ ဆက်ဖြစ်ကြတာပါ့။

အဲဒီအချိန်ကစပြီး ဒီပုံပြင်ကို ဖတ်ဖူးတဲ့လူတွေဟာ သူတို့သူငယ်ချင်းတွေကို ညအိပ်ခါနီးရင် အိပ်မက်လှလှမက်ပါစေ နတ်သမီးနဲ့တွေ့ပါစေလို့ ဆုတောင်းလေ့ ရှိကြတာပေါ့ကွယ်။။


ပန်ဒိုရာ
ဖေဖော်ဝါရီ ၂၀၀၈





Expand..