အထိအမိမရှိတဲ့နေ့

………………………….xxxxxxxx
………………xxxxxxxxxxxx………………………xxxxxxx
………….xxxxxxxxxxxxxxxxxxx…………….xxxx
……xxxxxxxxxxxxxxxxxxxxxxxxxx…..xxx
>@xxxxxxxxxxxxxxxxxxxxxxxxxxxxx
……xxxxxxxxxxxxxxxxxxxxxxxxxx…..xxx
………….xxxxxxxxxxxxxxxxxxx…………….xxxx
………………xxxxxxxxxxxx………………………xxxxxxx
………………………….xxxxxxxx

အထိအမိမရှိတဲ့နေ့

တောင်လေရေကျမှာ
ပင်လယ်ဝက လှော်ခတ်ပြန်ခဲ့တယ်
ဝမ်းပေါက်ထဲကရေတွေ တယောက်တည်း ခပ်ထုတ်လို့
နက်ပကျွန်းရဲ့ ခက်ရင်းခွအောက်မှာ လုံးလုံးမြုပ်မတတ်
သောင်ကိုဆိုက်တော့ မိုးစုန်းစုန်းချုပ်ပြီ
ပိုက်ဖာတဲ့ ကလေးမတွေ ငါ့လှေလေးထဲ ၀ိုင်းအုံရွေးကောက်ကြ
တကယ်တော့ မိခဲ့တာ ဗလာ တွေချည်း
သောင်ပြင်ပေါ်မှာ သဲတွေလူးနေတဲ့ ခရုတကောင်ကို ကန်ထုတ်လိုက်တယ်
ပင်လယ်ရေ စဉ့်တအိုးနဲ့ ရေဆေး ငန်ပျစ်ပျစ်ဖျော်ပြီး
ရှိရှိသမျှအုန်းပင်တွေမှာ ငါလျှောက်ခြယ်
လွတ်ခဲ့သမျှရေသတ္တ၀ါတွေ အကုန်ကြီးနေတော့တယ်။

ပန်ဒိုရာ


ပြီးခဲ့တဲ့ ရက်တွေက စာရေးရတာ အာရုံမကျလို့ ခြစ်မိတဲ့ စာကြောင်းတချို့ပါ။ အခုလည်း အီးဇင်းတွေအတွက် ဦးစားပေးပြီး အချိန်မီအောင် ရေးနေပါတယ်။ လတ်တလော ဘလော့ဂ်ထဲတော့ အဟောင်းတချို့ဖြစ်ဖြစ် ပုံတချို့ဖြစ်ဖြစ် ဆက်တင်ဖြစ်မယ်။

Expand..

Summary..

ပန်ဒိုရာ လောကအလှ အင်တာဗျူး

လောကအလှ ဆိုတဲ့ အွန်လိုင်း မဂ္ဂဇင်းလေးကို ကြားဖူးကြမှာပါ။ ဟိုမေးဒီမေး မေးလာလို့ ဟိုဖြေဒီဖြေ ဖြေလိုက်ပါတယ်။ :)

မေးခွန်းတွေထဲမှာ ....

• ဘယ်အချိန်ကစလို့ စာတွေရေးခဲ့တာပါလဲ။ 
  

• ဘယ်လို ခံစားရေးပါသလဲ။ 
  

• ရေးတဲ့အခါမှာ စာဖတ်သူကို တစ်ခုခု ပေးလိုက်မယ်လို့ ရည်ရွယ်ရေးတာလား ဘယ်လို မု(ဒ်)မျိုး နဲ့ရေးပါသလဲ။ 
  

• ကဗျာတွေထဲမှာရော ဘယ်လိုကဗျာ အမျိုးအစားတွေ ကြိုက်ပြီး ရေးဖွဲ့ပါသလဲ။ 
  

• ယနေ့ခေတ်လူငယ်တွေကို ဘယ်လိုမြင်မိပါသလဲ။ 
  

... စတာတွေ ပါပါတယ်။ ဘယ်လို ဖြီးလိုက်လဲ အဲ ဖြေလိုက်သလဲ သိချင်ရင်တော့ ဒီမှာ သွားဖတ်ကြပါ။ :)

Expand..

Summary..

ပန်ဒိုရာရဲ့ ဒုတိယအကြိမ် - ၁

ကိုရင်နော် ခင်လေးငယ် တို့က တက်ဂ်လာပါတယ်။ ဒုတိယအကြိမ် ပြန်ဖတ်စေချင်တဲ့ ပို့စ်လေးတွေ ရှိရင် တင်ပေးပါတဲ့။  ကိုယ့်ဘာသာလည်း ဒီဘလော့ဂ်က စာတွေကို လူတွေ ဘယ်လောက် ဖတ်ပြီးပြီလဲဆိုတာ စစ်တမ်းလေး ကောက်ထားပါတယ်။ မဖတ်ရသေးတဲ့လူတွေ များနေရင် ပြန်တင်ချင်တဲ့ တချို့ပို့စ်တွေကို ဒုတိယအကြိမ် တင်သွားရင် ကောင်းမလားလို့ စဉ်းစားနေတုန်းမှာပဲ တက်ဂ်လိုက်တော့ အတော်ဖြစ်သွားပါတယ်။

ပေါ့ပေါ့ပါးပါး ရေးခဲ့တဲ့ ပို့စ်လေးတစ်ခုကို သတိရမိပါတယ်။ ကိုရင်နော်ခင်လေးငယ် အမှတ်တရလည်း ဖြစ်တာပေါ့။ သူတို့ဘလော့ဂ်ကို ပထမဆုံးသွားလည်ခဲ့စဉ်က သူငယ်ချင်းနှစ်ဦး ပေါင်းပြီး လုပ်ထားတဲ့ ဘလော့ဂ်လေးမို့ သဘောကျပြီး ပန်ဒိုရာရေးတဲ့ ဒီပို့စ်လေးကိုလည်း လာဖတ်ပါဦးလို့ ခေါ်ခဲ့သေးတယ်။ ကိုရင်နော်ခင်လေးငယ် တို့လည်း မှတ်မိမယ် ထင်ပါတယ်နော်။

၂၀၀၇ ဂျွန်လက ရေးခဲ့တဲ့ ၀တ္ထုတိုလေးပါ။ အဲဒီအချိန်ပိုင်းတွေက ရယ်စရာမောစရာ ပေါ့ပေါ့ပါးပါးတွေ တော်တော်ရေးဖြစ်တယ်။ ရယ်စရာသန့်သန့်ကို ဖန်တီးဖို့ရာဖြစ်ဖြစ် ခံစားနိုင်ဖို့ဖြစ်ဖြစ် ဆိုတာ လူတွေရဲ့စိတ်ထဲမှာ လောဘ ဒေါသ မောဟတွေ စင်နေတဲ့ အချိန်ပိုင်းလေးဖြစ်မှ ဒါမှမဟုတ် အတော်ပါးလျနေမှ ရနိုင်တယ် လို့ ကြားဖူးပါတယ်။ ကိုယ့်အတွက်တော့ ပေါ့ပေါ့ပါးပါးစာကို ရေးချင်တိုင်း ရေးလို့ အလွယ်တကူ မရပါ။ အခုတော့ အရင်လောက် စိတ်တွေ မကြည်လင်နိုင်တော့တာလည်း ကြာခဲ့ပြီလေ။ ဧပြီ ၁ ရက်နေ့ကတော့ ပျော်ရွှင်စရာ စာတခု ရေးဖြစ်ပါတယ်။ ဖတ်ပြီး ရယ်မောသွားကြတယ်ဆိုရင် ၀မ်းသာပါတယ်။

ပို့စ်အဟောင်းလေးကို ပြန်ခံစားကြည့်ကြပါဦး။ မဖတ်ရသေးရင်တော့ အသစ်ပေါ့နော်။

.......................

ကိုဖိုးရမ် မဘလောက်

ကိုဖိုးရမ်နှင့် မဘလောက်တို့သည် ဗာကျုရယ်ဝါးလ်ဒ် (virtual world) ဟုခေါ်သော အင်တာနက်ကမ္ဘာ လောကသားများ ဖြစ်ကြသည်။

အင်တာနက် လောကသား မှန်လျှင် ဘလော့ဂ်တစ်ခုတော့ ပိုင်ဆိုင်ကြသော ယနေ့ ခေတ်ကြီးတွင် ကိုဖိုးရမ်လည်း ဘလော့ဂ်တစ်ခု တည်ထောင် ထားပါသည်။ သို့သော် သူ့ စိတ်ဝင်စားမှုကတော့ ဖိုရမ် forum များတွင် ရေးသားခြင်းကို ပိုသည်။ အဦးဆုံး မြန်မာဖိုရမ်များထဲမှ ဖြစ်သော ဇလုံဖိုရမ်မှ စ၍ ရတာနာ၊ ပုလင်းနက်၊ မြန်မာကော်ဖီရှော့၊ နှေးထစ်ဖိုရမ်၊ ပဒုံပျော့ ဖိုရမ်၊ မြန်မာဘလော့ဂါဖိုရမ် စသည်တို့သာမက ပရော်ဖက်ရှင်နယ်များ စုဝေးသော မြန်မာအန်ဂျီပျိုများ ဖိုရမ်ပါမကျန် သူ့ခြေရာ အဲ.. သူ့အိုင်ပီအက်ဒရက်စ် တွေချည်း။ အပြော ကလည်း ကောင်း၊ ငြင်းခုံ ဆွေးနွေးရာတွင်လည်း ချက်ကျလက်ကျ အာဘောင်အာရင်း သန်ပေရာ အလွန် လူကြိုက်များ ရေပန်းစားလှလေသည်။

မဘလောက်ကတော့ ဘလော့ဂါလောကတွင် ပိုမို နာမည် ထင်ရှားသည်။ သူမသည် မြန်မာ အင်တာနက် ခေတ်ဦးက ဖိုရမ်များတွင် ၀င်ဖတ်ဝင်ရေး လုပ်ခဲ့သော်လည်း ဘလော့ဂ် blog ဆိုသည်များ ခေတ်စားလာတော့ ဘလော့ဂ်ကိုသာ ပိုစိတ်ဝင်စားကာ ဖိဖိစီးစီး ရေးနေသူ ဖြစ်သည်။ စိတ်ဝင်စားဖွယ် စာ၊ကဗျာ၊ ရုပ်ပုံလှလှ၊ သီချင်းကောင်းကောင်းများ ဝေေ၀ဆာဆာဖြင့် အင်တာနက် ပရိသတ်ကို ဆွဲဆောင်နိုင်သူဖြစ်သည်။ ဘာသာစကား ကျွမ်းကျင်ကာ အရေးအသားကောင်းရုံ သာမက ဘန်နာ လှလှ ဘက်ဂရောင်း ဆန်းဆန်းပြားပြား ကလေးများ ဖြင့် ဘလော့ဂ်ကို သပ်သပ်ရပ်ရပ် အလှဆင်ကာ ပို့စ်များကိုလည်း စနစ်တကျ နေရာချ စီစဉ်တတ်သော မိန်းကလေးဘလော့ဂါ ပီသသူလေး ဖြစ်သည်။

သူတို့နှစ်ယောက် စတွေ့ကြပုံကတော့ ဒီလို။

မဘလောက် က မြန်မာ ဘလော့ဂါ ဖိုရမ်တွင် သူမ၏ဘလော့ဂ် ကို မိတ်ဆက်သည့် ပို့စ်တစ်ခု သွားတင်ထားသည်။ ဒါကိုကိုဖိုးရမ်က တွေ့သွားပြီး ဘာရယ်မဟုတ် လာလည်မိရာမှ မဘလောက် ၏ ပရိသတ် ဖြစ်သွားကာ ဆီပုံးဟုခေါ်သော C Box ထဲတွင် အမှတ်တရ စာတစ်ကြောင်း နှစ်ကြောင်း အမြဲ ရေးသွားလေ့ရှိသည်။ မဘလောက်ကလည်း ကိုဖိုးရမ်၏ ဘလော့ဂ်ကို ပြန်လည်ပတ်သည့် အပြင် ကိုဖိုးရမ်ရေးလေ့ရှိသော ဖိုရမ်များတွင် သူမပါ ရီဂျစ်စတာ လုပ်ပြီး ၀င်ဖတ် ကြည့်ရင်း ကိုဖိုးရမ်၏ ပြောနိုင်ဟောနိုင် ဗဟုသုတ အရည်အချင်းများကို အထင်တကြီး သဘောကျ လာမိသည်။

ဒီလိုနှင့် အချိန်ကြာလာသည်နှင့်အမျှ တစ်ယောက်အကြောင်း တစ်ယောက်သိလာ အပေးအယူမျှလာသည်။ အခေါ်အဝေါ်လေးတွေက အစ “ကိုကိုရမ်” က “လောက်လေး” က ဟုကြင်ကြင်နာနာ ဖြစ်လာကြပြီ။

ဒီတော့လည်း ဒီလောက် လိုက်ဖက်ညီတဲ့ နှစ်ယောက် ဘလော့ဂေ့ဂ်ျ blogage လုပ်ကြပါလား ဟု ပတ်ဝန်းကျင်က တိုက်တွန်း လာကြသည်။ ( မှတ်ချက်။ အဓိပ္ပာယ် အနှစ်သာရ တနည်းအားဖြင့် ဆင်သယောင် ရှိသော်လည်း blockage မဟုတ်ပါ။) ဘလော့ဂေ့ဂ်ျ လုပ်ခြင်း ဆိုသည်မှာကား ဘလော့ဂါနှစ်ဦး ပူးပေါင်း၍ ပရော်ဖက်ရှင်နယ် ဘလော့ဂ် တစ်ခု ထူထောင်ခြင်းဖြစ်သည်။ မြန်မာဘလော့ဂါများကတော့ ဘလော့ဂ်ထောင်ကျခြင်း ဟုလည်း တင်စား ခေါ်ကြလေသည်။

အင်တာနက် လောကကြီး အရည်အသွေး တိုးတက်ရေးအတွက် ဘလော့ဂေ့ဂ်ျ လုပ်ခြင်းကို ပေါ်လစီအရ ကမ္ဘာနှင့်အ၀ှမ်း အလွန်အားပေးလေသည်။ ဘလော့ဂေ့ဂ်ျ လုပ်လိုပါက ဘလော့ဂါနှစ်ဦးသည် အင်တာနက်ဆိုင်ရာ ကုလသမဂ္ဂမှ တရားဝင် ယူအာအယ်လ် နှင့် ၀က်ပေ့ဂ်ျ ခေါ် အင်တာနက် စာမျက်နှာ တစ်ခု လျှောက်ထားရသည်။ သာမန် အပျော်ထမ်း ဘလောက်နေကြသော ဘလော့ဂါများသည် ယခုအခါတွင် အခမဲ့ ရသော အင်တာနက် စာမျက်နှာ များကိုသာ သုံးခွင့်ရလေသည်။ တာဝန်ယူမှုမရှိသည့်အတွက် တရားဝင် ပရော်ဖက်ရှင်နယ် စာမျက်နှာကို အင်တာနက်ဆိုင်ရာ ကုလသမဂ္ဂမှ သုံးခွင့်မပြု။ (ယုံချင်ယုံ မယုံချင်နေ။) ထို့ကြောင့် သူတို့၏ဘ၀မှာ မတည်ငြိမ်။ အာမခံချက်မရှိ ။ တစ်နေ့နေ့ ဆားဗစ်ပရိုဗိုက်တာ က ၀န်ဆောင်မှု ဖြတ်လိုက်လျှင် သွားပြီ။ အဲ.. တစ်ဖက်ကလည်း သူတို့ဘ၀က လွတ်လပ်သည်။ တာဝန်ယူမှု များမှ ကင်းသည်။ ကိုယ့်ဖာသာ ပုံမှန် ပို့စ်တင်ချင်တင် မတင်ချင်နေ။ ပြီးတော့ ကိုယ်ရေးချင်တာ လွတ်လပ်စွာ ရေးလို့ရသည်။

ဘလော့ဂေ့ဂ်ျလုပ်ထားသော ဘလော့ဂ်များကတော့ ဒီလိုမဟုတ်။ ပုံမှန်ဝန်ဆောင်မှု အပါအ၀င် ကြော်ငြာ အကျိုးခံစားခွင့်များပါ ရှိသော တရားဝင် နိုင်ငံတကာ အင်တာနက် အသိအမှတ်ပြု ပရော်ဖက်ရှင်နယ် အင်တာနက် စာမျက်နှာကို ကိုယ်ပိုင် ပိုင်ဆိုင်ခွင့် ရသည်။ အလွန်ဂုဏ်ရှိ ကာ တင့်တယ် တည်ငြိမ်သော ဘ၀ပါပေ။ သို့သော် တစ်လလျှင် ပို့စ်ဘယ်လောက် တင်ရမည်။ အဲဒီအထဲမှာ အင်တာနက် လောကကို အကျိုးပြုရန် နည်းပညာပို့စ်က ဘယ်လောက်၊ ဖျော်ဖြေမှုက ဘယ်လောက် စသည်ဖြင့် သတ်မှတ်ထားသည်များကို လိုက်နာရသည်။ ဘန်နာ ၊ တန်းပလိတ် များကို အချိန် ဘယ်လောက်ကြာလျှင် အပ်ပဒိတ် လုပ်ရန် ဆိုတာမျိုးက ရှိသေးသည်။ ကိုယ်သုံးမည့် အိုင်ပီအက်ဒရက်စ်များကို မှတ်ပုံ တင်ရခြင်း၊ ကိုယ်သုံးမည့် ကွန်ပျုတာနှင့် အီလက်ထရွန်းနစ် ဒီဗိုက်စ်များမှာ ဗိုင်းရပ်စ် ကင်းရှင်းကြောင်း ထောက်ခံစာယူရခြင်း၊ ဒါတွေက လိုသေးသည်။ ဒီလို ကော်မစ်မန့်ဆိုတာများ ကို ဘလော့ဂါ တစ်ဦးချင်း အနေနှင့်ဆိုလျှင် လိုက်နာနိုင်ရန် မလွယ်။ ဒါကြောင့်လည်း အတွေးအခေါ် မျှတကာ တာဝန်ခွဲဝေယူနိုင်ကြရန် အမျိုးသား အမျိုးသမီး ဘလော့ဂါနှစ်ဦးတို့ ပူးပေါင်းစေရခြင်း ဖြစ်သည်။ ဘလော့ဂေ့ဂ်ျ လုပ်ပြီးလျှင်တော့ တသက်လုံး မကွဲမကွာ ချစ်ချစ်ခင်ခင် သစ္စာရှိစွာဖြင့် ဘလော့ဂ်ကလေး ကို တိုးတက် စည်ပင်အောင် မောင်တစ်ကီး မယ်တစ်ကလစ် (မှတ်ချက်၊ 1 key, 1 click ကိုဆိုလိုသည်။) ဆောင်ရွက်ကြရလေသည်။

ဒီအထဲမှာ ဘလော့ဂါရိုက် ဆိုလားဘာလား၊ ဂေးဘလော့ဂါ လက်ဘ်ဘလော့ဂါတို့က ကျားကျားချင်း မမချင်း ဘလော့ဂေ့ဂ်ျ တော့ ဘာဖြစ်လဲ၊ သူတို့ကိုလည်း အသိအမှတ်ပြု အင်တာနက် စာမျက်နှာ ချပေးသင့်သည် ဆိုပြီး တစခန်းထကြသေးသည်။ အဲဒါတွေ အသေးစိတ် ပြောပြရလျှင် ဇာတ်လမ်းကို ရောက်တော့မှာ မဟုတ်။ ဒီတော့ ဇာတ်လမ်းကို ဆက်ပါမည်။

တိုတိုပြောရလျှင် မစွမ်းရင်းကလည်းရှိ ကန်စွန်းခင်းကလည်းငြိ ဆိုတော့ ကိုဖိုးရမ်နှင့် မဘလောက်တို့ ဘလော့ဂေ့ဂ်ျလုပ်ရန် ဆုံးဖြတ်လိုက်ကြသည်။ နာမည်ကြီးကြသူများ ပီပီ ကိုဖိုးရမ်နှင့် မဘလောက်တို့၏ ဘလော့ဂေ့ဂ်ျပွဲကြီးကား ပေါ့ပ်အပ်ပ်ပျံမကျ စည်ကား လှပေသည်။ ဖိုရမ်ရေးဖော်ရေးဖက် ဘလောက်ဖော်ဘလောက်ဖက် အားလုံး အင်တာနက် လုံးကျွတ် တက်ရောက် အားပေးကြသည်။ မြန်မာ ဘလော့ဂါသားများ စုပေါင်း လက်ဆောင်ပေးသော သီရိဘလော့ဂဟာ အမည်ရှိ ဘန်နာကြီးကလည်း လှပ ခန်းနားပေသည်။ ဖိုရမ်ရောင်းရင်းများ အထူးအော်ဒါ မှာပေးထားသော ဘက်ဂရောင်း ပန်းနုရောင် အသစ်စက်စက် ကလေးကလည်း တင့်တယ်ပေစွ။ ၀ိုင်းဝန်း ရေးသားထားသော ဘလော့ဂေ့ဂ်ျ ဆုတောင်းများမှာလည်း များပြားလွန်းသဖြင့် ဆီပုံးခန်းမကျယ်ကြီး ထဲတွင် ပြည့်လျှံသွားသည်။ နေနှင့်လ ရွှေနှင့်မြ ဆိုသလို အတွဲညီသူ ကိုဖိုးရမ်နှင့် မဘလောက်တို့ ပျော်တပြုံးပြုံး ဧည့်ခံရသည်မှာ စာရိုက်ရလွန်းသဖြင့် လက်များပင် ကိုက်ခဲလို့နေသည်။

အဲ.. နှစ်ယောက်ပိုင် ဘလော့ကမ္ဘာလေး တည်ထောင်စတော့ ကြည်နူးမဆုံးနိုင်။ ဘလော့ဂ်ကို စီမံခန့်ခွဲပိုင်ခွင့် admin access က နှစ်ယောက် နာမည် ကိုယ်စီဖြင့် ပုံသေ default လုပ်ထားသည်။ လော့အင် log in ၀င်ပြီး နှစ်ဦးတည်း ရေးသားတိုင်ပင်နိုင်ရန် အများမမြင်နိုင်သော အထူး ဆီပုံးကလေး ကတော့ သူတို့နှစ်ယောက် အတွက် သီးသန့်ကမ္ဘာလေးဖြစ်သည်။ တစ်နေ့တစ်နေ့ ဘာပို့စ်လေးတွေ တင်ကြမလဲ တိုင်ပင်ကြ။ ကိုဖိုးရမ်က ပို့စ်တစ်ခု ရေးပြီးလျှင် ဘာသာဗေဒ ကျွမ်းကျင်သူ မဘလောက်က စာလုံးပေါင်းတွေ စစ်ပေး သီချင်းလေးတွေ အမောပြေ ဖွင့်ပြနှင့် အရာရာသည် လမင်းသာသလို။ ဘလော့တစ်ခုလုံးလည်း စာနု ကဗျာနုလေးများ၊ သီချင်း ဓာတ်ပုံ ကလေးများ၊ နည်းပညာ အသစ်ကလေးများ လွှမ်းခြုံကာ ရောမန္တိက ဖြစ်နေလေသည်။ ကိုကိုရမ် နှင့် လောက်လေး တို့၏ ပျော်ရွှင်ဖွယ်ရာ ဘလော့ဂဟာလေးပေတည်း။

ဤသို့ဖြင့် ငါးလ ခြောက်လ ကြာလာခဲ့ပြီ။ တစ်ခါလာလည်း လော့အင်ဝင်ကာ ငြိမ်ငြိမ်ထိုင်ပြီး တန်းပလိတ်ပြင်ရ တစ်ခါလာလည်း လင့်ခ်တွေ အပ်ပဒိတ်လုပ်ရ ပို့စ်အသစ်ရေးရ ကွန်မန့်တွေကို ပြန်ရေးရ နှင့်ဆိုတော့ ဘလော့ဂ်တာဝန်တွေကို ကိုဖိုးရမ် ငြီးငွေ့စပြုလာသည်။ တနေ့တနေ့ ဘာပို့စ်တင်ရမလဲ ဆိုတာ တွေးရတာကိုက ဦးနှောက် ခမ်းခြောက်စ ပြုလာသည်။ ပြီးတော့ အရင်ကလိုလည်း မဟုတ်။ ကိုယ့်သဘောနှင့်ကိုယ် ပို့စ်တွေ တန်းတင်လို့မရ။ မတင်ခင် မဘလောက်ကို ပြရ၊ စာလုံးပေါင်းစစ်ရ၊ သဘောတူမတူ ညှိရနှိုင်းရ တာတွေကလည်း စိတ်ကျဉ်းကျပ်စရာ ကောင်းလေသည်။

အရေးထဲ ဖိုရမ်ထဲက အပေါင်းအသင်း တွေက

“ကိုဖိုးရမ်ကြီး ဘယ်လိုလဲဗျ။ ဘလော့ဂ်ထောင်ကျသွား ကတည်းက ဖိုရမ်တွေဘက် ခြေဦးတောင် မလှည့်တော့ပါလား။ ဧကန္တ မဘလောက်ကို ကြောက်ရတယ်နဲ့ တူတယ်။ ဟတ် ဟတ် ဟတ်..”

ဟု ဆီပုံးထဲ လာရေးကာတစ်မျိုး ပီအမ်ပို့ကာတစ်ဖုံ ပျက်ရယ်ပြု ခံရတာလည်း အောင့်သက်သက် နိုင်လှသည်။

ဒီတော့ တခါတခါ မယောင်မလည်ဖြင့် ဖိုရမ်တွေ ဘက်ကို ခဏဆိုပြီး လစ်ထွက်သွား တတ်သည်။ မဘလောက်က သြော် သူလည်းပျင်းမှာပေါ့လေ ဟု နားလည်စွာဖြင့် အစပိုင်းက ကြည်ကြည်သာသာ ခွင့်ပြု ခဲ့ပါသည်။ ဒါပေမယ့် တစတစ လေးလံလာသော ဘလော့ထိန်းသိမ်းမှု တာဝန်တွေ ကြားမှာ ကိုဖိုးရမ်က နမော်နမဲ့ အလျင်စလို လုပ်သွားသဖြင့် ပို့စ်အမှားများ အက်ဒစ် ပြန်လုပ်ရတာတို့။ နေရာပြန်ချရတာတို့က များလာတော့ နည်းနည်း ငြိုငြင်ချင်လာသည်။ အရင်ကလို ကိုကိုရမ် ဟုပင် ချိုချိုသာသာ မခေါ်နိုင်။

“တော့ ကဖိုးရမ် ရှင်ဟာလေ.. ပို့စ်တွေကို သေသေချာချာ သတ်ပုံမစစ်ဘူး ။ သြော်.. ဒီမှာလည်း ကြည့်စမ်းပါဦး တန်းပလိတ်မှာ ဖောင့်သွင်းတာ ကျန်ခဲ့ပြန်ပြီ။ ဒီနေရာမှာ မြန်မာစာ မပေါ်ဘူးရှင့်။ ကျွန်မက ဒီလို အသေးစိတ်တွေ ကအစ အကုန် လိုက်စစ် နေရတော့မှာလား..”

ကိုဖိုးရမ်ကလည်း တနေ့တနေ့ လော့ဂ်အင် ၀င်လိုက်တိုင်း မဘလောက်၏ ပူညံပူညံ မက်ဆေ့ခ်ျများကိုသာ တွေ့နေရတော့ စိတ်ပိန်လာသည်။ ဖိုရမ်တွေဘက်ကိုသာ အချိန်ရတိုင်း မျက်စိအေးအောင် သွားနေနေကာ အပေါင်းအသင်းများနှင့် တော်ကီပွားနေတော့သည်။

တစ်နေ့တော့ စောစောစီးစီး ဆီပုံးထဲမှာ မက်ဆေ့ခ်ျ တစ်ခုကို မဘလောက် သွားတွေ့သည်။

“ဦးရမ် …မောနင်း.. မီးက နှေးထစ်ဖိုရမ်မှာ တွေ့ခဲ့တဲ့ မီးမီးလေ။ မီးလည်း အခု ဘလော့ဂ်တစ်ခု လုပ်ထားတယ် သိလား။ ဦးရမ်က သိပ်တော်တာပဲနော်။ ဦးရမ် မီးဆီလာလည်ပြီး မီးကိုသင်ပေးနော်.. နော် ။”

မဘလောက် ယမ်းပုံမီးကျ ဖြစ်ရပြီ။ ဟင်း .. နှစ်ယောက်ပိုင် ဘလော့ဂေ့ဂ်ျ လုပ်ထားတဲ့ ဘလော့ဂ်ကိုများ သိလျက်နှင့် မိန်းကလေး အချင်းချင်းတော့ အကူအညီ မတောင်း။ အခုခေတ် ဘလော့ဂါမ ပေါက်စကလေးတွေများ ကဲကိုကဲသည်။

ခုတလော ကိုဖိုးရမ် ရေးထားသည့် ပို့စ်များကို လိုက်စစ်မိသည်။ အားလားလား..မမျှော်လင့်ပဲ ပို့စ်တစ်ခုအောက်မှာ သွားတွေ့မိသည်။ နည်းတဲ့ကွန်မန့် တွေမဟုတ်။ အပြန်အလှန် ရေးထားငြင်းထား ကြတာ ကွန်မန့်ပေါင်း တစ်ရာကျော်။ သေသေချာချာ ဖတ်ကြည့်လိုက်တော့ ဒင်းတို့က ဖိုရမ်ထဲမှာ အစာမကြေဖြစ်ခဲ့တဲ့ ကိစ္စတွေ ဒီမှာ ဆက်ငြင်းနေကြတာကိုး။ မဘလောက် တစ်ယောက်တည်း ဘလော့ဂ်ကမ္ဘာလေးတုန်းက ဒါမျိုး ဘယ်ရှိခဲ့မှာတုန်း။ အခုတော့ ရှုပ်ရှုပ်ယှက်ယှက် တော်။ ကိုဖိုးရမ် နောက်တစ်မှု တိုးပြန်ပြီ။

မဘလောက်တစ်ယောက် ကိုဖိုးရမ် လော့ဂ်အင်ဝင်လာမည့် အချိန်ကို ကလစ်တခေါက်ခေါက် နှင့် စောင့်နေသည်။ ကြာတော့ စိတ်တိုလာသည်။ ကိုဖိုးရမ် ရှိနိုင်မည့် ဖိုရမ်များကို လိုက်သွားပြီး လော့အင် ၀င်ကာ ပီအမ်တွေ ပို့ပစ်လိုက်သည်။

“ဦးဖိုးရမ်ရှင့်၊ ကိုယ့်ဘလော့ဂ်ကိုလည်း တစ်ချက်လောက်များ ပြန်လှည့်ကြည့်ပါဦး။”

ဟု ခပ်ငေါ့ငေါ့လေး ရေးလိုက်သည်။

ကော်ဖီရှော့မှာ ဆွေးနွေးနေတာ အရှိန်ကောင်းနေတုန်း ပီအမ်တွေက တဒိုင်းဒိုင်း ၀င်လာတော့ ကိုဖိုးရမ် စိတ်တိုသွားသည်။

“ကဲ လစ်လိုက်ဦးမယ်ဗျို့။”

ဒီလိုနှုတ်ဆက်တော့ ဖိုရမ်ရောင်းရင်း များက

“ဟတ် ဟတ် သိပါတယ်ဗျာ။ ပီအမ်စကြာ ရိုက်နေပြီဆိုတာ။ ကိုဖိုးရမ်ကြီး က အရင်ကလို စိတ်သွားတိုင်း ကိုယ်မပါ တော့ဘူးပေါ့”

ဟု လှောင်ကြသည်ကို တဟဲဟဲနှင့် သာ အံကြိတ်ခံလိုက်ရသည်။ တောက်.. လူကြားသူကြား မရှောင် ဖိုရမ်ထဲ အထိများ လိုက်လာရတယ်လို့။ မိန်းမတွေဟာ အလိုက်ကန်းဆိုးကို မသိဘူး။ တွေ့မယ်..။

ဒေါနှင့် မောနှင့် ဘလော့ဂ်ထဲကို လော့အင်ဝင်တော့ ပူညံပူညံ မက်ဆေ့ခ်ျတစ်ခုက စောင့်ကြိုနေသည်။

“တော့ ကဖိုးရမ်.. ရှင့်အရှုပ်ထုပ် တွေ ရှင်လာရှင်းပါဦး။”

“ဘာအရှုပ်ထုပ်လဲကွ။”

“ဒီမှာ ဆီပုံးထဲမှာ ကောင်မလေးတစ်ယောက်။ ပြီးတော့ ဒီပို့စ်အောက်က ကွန်မန့်တွေ။ ကျွန်မရှင့်ကို ပြောတယ်။ ဖိုရမ်ထဲက ကိစ္စတွေ ဘလော့ဂ်ကို သယ်မလာပါနဲ့လို့။ ဟင်.. ဒါတွေ ရှင်ဘယ်လို ရှင်းမှာလဲ။”

“ဟ.. ဖိုရမ်ဆိုတာ တစ်ယောက်နဲ့ တစ်ယောက် ဗဟုသုတဖလှယ်ရာ။ မိတ်ဆွေဖွဲ့ကူညီရာ။ ဆွေးနွေးတယ်ဆိုတာ အရေးကြီးလာတဲ့အခါ ဘလော့ဂ်ထဲပါရင် ပါလာမှာပေါ့။ ငါအရင်ကတည်းက ဖိုရမ်ကို အဓိက ရေးလာခဲ့တာ မင်းမသိဘူးလား။ ဟင်…”

“သြော် အရင်ကကိစ္စ လာမပြောနဲ့လေ။ အခုကိုယ့် ဘလော့ဂ်ရယ်လို့ အတည်တကျ ဖြစ်လာတော့မှ ဒီလို လတ်လျားလတ်လျား လျှောက်သွားနေစရာလား.. တော့ ကဖိုးရမ်ရဲ့..”

“သြော်.. မင်းကရော ဘာထူးလို့လဲ။ တစ်နေ့တစ်နေ့ မိုးလင်းလာရင် မျက်စိနှစ်လုံး ပွင့်မယ်တောင် မကြံသေးဘူး။ ဘလော့ဂ်တကာ ဆီပုံးပေါက်စေ့ လိုက်လည် အရည်မရ အဖတ်မရတွေ လိုက်ရေး။ ငါမသိဘူးများ မှတ်နေသလား။”

“ရှင်.. ဒီလိုမပြောပါနဲ့။ ဒါက လူမှုဝတ္တရားရှင့်။ ရှင်သာ ကိုယ့်တာဝန်မကျေတဲ့သူ။”

တာဝန်..။ ဒါကတော့ ယောင်္ကျားမာနကို ထိပြီ။ လွန်လာပြီ။

“ဟေ့ ငါ့လောက် တစ်လတစ်လ သတ်မှတ်ထားတဲ့ပို့စ်ကို ပြည့်မီ ကျော်လွန် ပြီး တာဝန်ကျေတာ ငါပဲရှိတယ်ကွ.. မင်းလက်ထဲ ငါရေးသမျှ အကုန်အပ်တာပဲ။ မင်းဒီလိုစကား မပြောပါနဲ့။”

“သြော်.. ဘာရေးရေး ရှင်တလွဲတချော်လုပ်ထားတာတွေ ကျွန်မက လိုက်လိုက် ပြင်ပေးနေရတဲ့ အချိန်တွေကိုလည်း ထည့်တွက်ဦးမှပေါ့။”

“ဟေ့ ယောင်္ကျားလေးကွ အဲဒီလောက် အသေးစိတ်တွေ အာရုံစိုက်မနေနိုင်ဘူး။”

“ဒါပေါ့.. ဒါပေါ့.. ရှင့်အာရုံတွေက ဘလော့ဂ်ထဲမှာမှ မရှိပဲ။ ဖိုရမ်ထဲက ဟာတွေ ဆီမှာပဲ ရောက်နေတာကိုး။”

“ဟေ့ ငါ့ကိုပြောရင်ပြော။ ငါ့ အပေါင်းအသင်း တွေကို ဆွဲမထည့်နဲ့ကွ။”

ခက်ကပြီ။ ကွန်ပြူတာအသစ် မောက်စ်ကလေးမှ ဂျီး (ကြေး) မတက်ခင် ဒီဘလော့ဂေ့ဂ်ျတစ်ခု အပျက်အပျက် နဲ့ နှာခေါင်းသွေးထွက် ဆိုသလို ဖြစ်ကြတော့မှာလား။

တိုက်ပွဲက ပြင်းထန်လာသည်။ ကိုယ်ပိုင် ပရိုက်ဗိတ်ဆီပုံးမှာသာမက အပြင်က ဆီပုံးထဲကိုပါ လျှံကျကုန်သည်။ စိတ်ကြီးသူနှစ်ဦးဆိုတော့ ဘလောက်နီးနားချင်းတို့လည်း ၀င်မပြောရဲ။ အသာလေး ဘေးကသာ အရိပ်အခြည် စောင့်ကြည့်နေရသည်။

နောက်ဆုံးတော့ နှစ်ယောက်စလုံး ၀ုန်းဒိုင်းနှင့် လော့အောက်လုပ်ကာ သီရိ ဘလော့ဂဟာလေးထဲက အသီးသီး ထွက်သွားကြတော့သည်။

တစ်ရက်.. နှစ်ရက်.. သုံးရက် တောင် ကြာခဲ့ပြီ။

မဘလောက် တစ်ယောက် လော့အင် မ၀င်သော်လည်း ကိုယ့်ဘလော့ဂ်ကလေးကို ရစ်သီရစ်သီ လာချောင်းဖတ် နေမိသည်။ ပို့စ်အသစ် မရှိသော ဘလော့ဂ်ကလေးကတော့ ခြောက်ကပ်လို့နေသည်။ ကြည့်ရတာ ကိုဖိုးရမ်လည်း ဒီကြားထဲ တစ်ခါမှ လော့အင်မ၀င်ဘူးထင်ပါရဲ့။

ဒီလို စဉ်းစားမိတော့ ကိုဖိုးရမ်နှင့် တွေ့စကာလများကို မြင်ယောင်လာမိသည်။

အို.. တွေ့စ ကာလတွေကများ နည်းပညာအသစ်တစ်ခု ရလာလျှင် သူ့ဘလော့ဂ်မှာတောင် ပို့စ် မတင်ရသေးခင် ကိုဖိုးရမ်တစ်ယောက် လာလာပြောခဲ့ပုံ။ မဘလောက် မလုပ်တတ်လျှင် ၀င်ပြင်ပြင် ပေးလိုက်ရတာက အမော။ မနက်မနက် ဆိုလျှင်လည်း သူများထက်ဦးအောင် ဆီပုံးထဲ လာလာ နှုတ်ဆက်ရတာက တမျိုး။ မဘလောက် ကြိုက်တတ်သည့် ပန်းပွင့်ပုံ ရှုခင်းပုံ လှလှကလေးများ ရလာလျှင် ပိုးကြေးပန်းကြေး လာလာပေးရသည်က တဖုံ။ စောင်းမြောင်းကာ ကဗျာတွေ စပ်ရသည်ကတော့ မရေမတွက်နိုင်။ ဒါတွေကို တစိမ့်စိမ့်တွေးမိတော့ ကွန်ပြူတာ စခရင်ပေါ်မှာ တရေးရေး မြင်ယောင်လာသည်။ အင်း သူ ငါ့အပေါ်မှာ ကောင်းခဲ့တာတွေ အများကြီး ရှိခဲ့ပါတယ်လေ။ ငါကိုယ်တိုင် ကိုက ဘလော့ဂေ့ဂ်ျ လုပ်ပြီး တော်တော်လေးကြာတော့ သူ့ကို အရင်လို ပျော်ရွှင်အောင် ထားဖို့ တာဝန်တွေကြားမှာ မေ့လျော့ နေခဲ့တာပဲ။

ခုချိန်ဆို သူဘယ်ရောက်နေမလဲ။

ကြည့်နေရင်း ရီဖရက်ရှ် တစ်ခါလုပ်လိုက်တော့ မြင်ကွင်းကပြောင်းသွားသည်။ အို.. ရောင်စုံပန်းခင်းကြီးထဲ လိပ်ပြာလေးတွေပျံဝဲ နေကာ ရေတံခွန်ကြီး တသွင်သွင်စီးကျနေပုံနှင့် ဘက်ဂရောင်း အသစ်ဖြစ်နေပါပေါ့လား။

ဒါဆို သူ လော့အင်ဝင်ပြီး အထဲမှာ ပြင်ဆင်နေတာပေါ့။ လိုက်ဝင်ရရင် ကောင်းမလား။ အကောင့်နာမည်နှင့် ပတ်စ၀ပ် ကို ရိုက်ထည့်လိုက်သည်။ လက်ညိုးကလေးက မောက်စ် ပေါ်မှာ တင်ချည် ချချည်။ အဲရိုး ကာဆာ လေးက ကွန်ပြူတာ စခရင်ပေါ်မှာ တုန်ခါလို့ နေသည်။ နောက်ဆုံးတော့ ကလစ်နှိပ်ချလိုက်သည်။

မဘလောက်နာမည် အစိမ်းရောင်လေး လင်းလာသည်။ နှစ်ဦးပိုင် ဆီပုံးလေးထဲမှာ ကိုဖိုးရမ်၏ စာကြောင်းကလေးတစ်ခု မရဲတရဲ ပေါ်လာသည်။

“ဟဲလို”

မဘလောက် ဘာမှ ပြန်မရိုက်ပဲ ကြည့်ရုံသာကြည့်နေမိသည်။ နည်းနည်းကြာတော့ စာတစ်ကြောင်း ပေါ်လာပြန်သည်။

“တန်းပလိတ် အသစ်တစ်ခု လာတပ်နေတာလေ။”

မဘလောက် ထံမှ စကားပြန်မလာ။ ကိုဖိုးရမ် ရေးသော စာလုံးလေးတွေ ထပ်ပေါ်လာပြန်သည်။

“ကိုယ် ပို့စ် အသစ်တွေ ရေးထားတယ်။ သတ်ပုံတွေလည်း အကုန်စစ်ပြီးပြီ။ ဘယ်တော့ တင်လိုက်ရမလဲဟင် လောက်လေး။”

ကိုဖိုးရမ် ရပ်လိုက်ပြီး ဆီပုံးကို အသက်မရှုတမ်း စောင့်ကြည့်နေသည်။ တအောင့်ကြာတော့ မှ စာလုံးလေးတွေ ပေါ်လာသည်။

“အို.. နေပါဦး ကျွန်မ တစ်ခေါက် ထပ်စစ်ပေးဦး မှာပေါ့။”

ယိစ်… ကိုဖိုးရမ်စိတ်ထဲက အားရပါးရ အော်ပစ်လိုက်လေသည်။

ဤသို့ဖြင့် ကိုဖိုးရမ် နှင့် မဘလောက်တို့ ပြန်ပေါင်းထုပ် ကြလေသတည်း။



ပန်ဒိုရာ
၃၊၆၊၂၀၀ရ

Expand..

Summary..

April Fool Day မှာ Conficker Worm အတိုက်အခိုက် မခံရဖို့

ကိုအောင်သာငယ်၊ မိုးမခ နဲ့ တခြား ဘလော့ဂ်တွေ ၀က်ဘ်ဆိုက်တွေ တော်တော်များများမှာ Conficker ဆိုတဲ့ Worm က ကွန်ပြူတာတွေကို တိုက်ခိုက်နိုင်တဲ့အကြောင်း ဖတ်လိုက်ရပါတယ်။

ဒီ worm တိုက်ခိုက်ခံရရင် ကိုယ့်ကွန်ပြူတာကို hacker က ကြိုက်သလို ထိန်းချုပ်တာ ခံရနိုင်သတဲ့။ ဒီပိုးကို ထွင်တဲ့လူတွေကလည်း ကွန်ပြူတာတွေ သန်းနဲ့ချီ အများကြီး လိုက်ထိန်းချုပ်ဖို့ သူတို့မှာ ဘယ်လောက် အချိန်ရှိမှာလဲ။ ကိုယ့်လို ဘာမှ အရေးကြီးတာတွေ မရှိတဲ့ ကွန်ပြူတာလောက်ကို စိတ်ဝင်စားမှာ မဟုတ်ပါဘူး လို့လဲ တွေးမိပါတယ်။ ဘဏ်စာရင်း password ခိုးမယ်ဆိုရင်တောင်မှ ကိုယ့်မဖြစ်ညစ်ကျယ် ပိုက်ဆံလောက်ကိုတော့ မလုပ်လောက်ပါဘူးလေလို့ စဉ်းစားမိပါသေးတယ်။ ဘာပဲဖြစ်ဖြစ် သတိပေးထားကြတာက ကြောက်စရာကြီးပေါ့။

ဟိုးအရင်ကတော့ virus, worm, trojan ဆိုတာတွေကို ကွဲကွဲပြားပြား မသိခဲ့ဘူး။ အခု Conficker ကတော့ worm အမျိုးအစားဆိုတော့ ကပ်ပါးကောင်တွေလိုပဲ ခိုအောင်းနိုင်စွမ်း ရှိပြီး တခုကနေ တခုက ကူးသွားနိုင်တဲ့ ဂုဏ်သတ္တိရှိတယ် လို့ သိလိုက်ပါတယ်။ ကိုယ်ကလည်း ကွန်ပြူတာနဲ့ အင်တာနက်ကို ၂၄ နာရီနီးပါး ချိတ်ဆက်ထားသူဆိုတော့ အဲဒါ ၀င်နေမလားလို့ ပူမိပါတယ်။

ဖြစ်နိုင်ရင် ကွန်ပြူတာကို ဧပြီ ၁ ရက်နေ့ မတိုင်ခင် ပိတ်ပြီး ဧပြီ ၂ ရက်နေ့မှ ပြန်ဖွင့်ပါ လို့ပြောကြတယ်။ အိမ်ပြန်ရောက်ရင် ကွန်ပြူတာနဲ့ လက်နဲ့ မပြတ်နေမှ နေသာထိုင်သာ ရှိသူမို့ ဒုက္ခပါပဲ လို့တွက်မိပါတယ်။ ဒါနဲ့ပဲ ကွန်ပြူတာနဲ့တော့ မဝေးနိုင်ဘူး ပိုးမ၀င်အောင် ဒါမှမဟုတ် ၀င်နေရင်လည်း ဖယ်ရှားနိုင်အောင် အကြံပြုထားကြတဲ့ အတိုင်းလုပ်ဦးမှ ဆိုပြီး ဒီညတော့ ကိုယ့် laptop ထဲမှာ တပ်ထားတဲ့ BitDefender Internet Security ကို full scan လုပ်လိုက်ပါတယ်။ ဒီနေ့မှ ကွန်ပြူတာကလည်း ပိုနှေးနေသလိုပါပဲ။ ည ၁၀ နာရီကျော်လာပါတယ်။ scan run နေတာကလည်း အခုထိ မပြီးနိုင်သေးပါ။ စိတ်ထဲမှာ ကွန်ပြူတာအောက်က run နေတဲ့ ပန်ကာက တ၀ီးဝီးနဲ့ အသံပိုမြည်လာသလိုပဲ။ ပူလည်းပူတယ်။ ဒါနဲ့ပဲ ဖူဂျစ်ဆု လက်ပ်တော့ လေးကို ပြောင်းပြန်လှန် ပြီး ဟိုကြည့် ဒီကြည့် ကြည့်လိုက်ပါတယ်။

အခု မြားပြထားတဲ့ နေရာလေးကို သေသေချာချာ ကြည့်လိုက်တဲ့ အခါကျတော့.. လားလား..။ အဖြူရောင် တွန့်တွန့်သေးသေးလေး တလှုပ်လှုပ်ကို တွေ့လိုက်ရပါတယ်။ ဒါနဲ့ပဲ ဇာဂနာလေးနဲ့ ဖြည်းဖြည်းချင်း ဆွဲနှုတ်လိုက်ပြီးတဲ့အခါ ချက်ချင်းပဲ ကွန်ပြူတာ အရှိန်လည်း ပြန်မြန်လာတယ်။ အေးလည်းအေးသွားပါတယ်။ စိတ်ထဲ သိပ်မရှင်းတာနဲ့ google ကနေ “how to kill conficker worm” လို့ ရိုက်ထည့်ပြီး ရှာကြည့်လိုက်တော့ ကိုယ့်လို ကြုံတွေ့ပြီး ဖြေရှင်းလိုက်ကြတဲ့ အကြောင်း တွေ ဖတ်လိုက်ရပါတယ်။ စိတ်ထဲမှာ matrix ရုပ်ရှင်ကိုတောင် သတိရသွားသေးတယ်။ ကွန်ပြူတာပိုးတွေက တကယ့်ကို physical အကောင် အနေနဲ့ ရောက်လာတာကိုး။ hacker တွေကိုလည်း အံ့သြမိပါတယ်။ အခုတော့ ဧပြီ ၁ ရက်မှာ ကွန်ပြူတာကို စိတ်အေးလက်အေး ဖွင့်နိုင်ပြီပေါ့။ ဒါနဲ့ပဲ ညသန်းခေါင်ကျော်အထိ ဒီစာကို ဆက်ရေးလိုက်ပါတယ်။

Deskstop ဆိုရင်တော့ CPU ပုံး ကိုစစ်ရမယ် ထင်ပါတယ်။ Laptop တွေကတော့ စောစောက ပြထားတဲ့ နေရာကို သေသေချာချာ ကြည့်ပါ။ လှုပ်လှုပ် တွန့်တွန့် အကောင်လေးတွေ တွေ့ရင်တော့ ဇာဂနာနဲ့ ဆွဲနုတ်လိုက်ပါ။ တိုးတက်နေတဲ့ နည်းပညာကြီးကလည်း အံ့သြစရာ ကောင်းလိုက်တာနော်။


ပန်ဒိုရာ

Expand..

Summary..

ပန်ဒိုရာရဲ့ မတ် ၂၇

မတ်လ ၂၇ ရက်ဟာ ဘာနေ့လဲ လို့မေးကြရင်
တခါတလေတော့ ပုဂ္ဂလိကဆန်ဆန် သီးသန့်နေထိုင်ပါရစေ။
လေရူးနဲ့ ရွက်ဝါတွေကြားက ယမ်းငွေ့တွေ သွေးစက်တွေ
သမိုင်းတွေ အမှန်တွေ အမှားတွေ ခဏဘေးဖယ်ထားလိုက်ပါရစေ။
အေးစက်နေတဲ့ လက်နက်တွေ တောင့်တင်းနေတဲ့ တူညီဝတ်စုံတွေ
သံပြိုင်အော်သံတွေ ခြေသံတဖြောင်းဖြောင်းတွေ
အနိုင်တွေ အရှုံးတွေ အငြင်းပွားမှုတွေ မရေရာမှုတွေ
အားလုံးကိုလည်း ခဏ မေ့ထားပါရစေ။
ဒီနေ့ဟာ ပန်ဒိုရာ ဘလော့ဂ်ရေးခဲ့တာ ၂ နှစ်ပြည့်တဲ့နေ့ ဖြစ်တယ်။

ဒီဘလော့ဂ်ကို လာလည်တဲ့ လူတွေ ဘယ် source ကနေ လာဖတ်ကြလဲ လို့ google analytics ကနေ ကြည့်မိပါတယ်။

google analytics ကို ဘလော့ဂ် စရေးရေးချင်းက ထည့်မထားသေးပါဘူး။၂၀၀၇ သြဂုတ် လောက်ကမှ အဲဒါကို တပ်ခဲ့တယ်။ အဲဒီကနေ အခုအချိန်အထိ စုစုပေါင်းကို ကြည့်ရင် ဒီဘလော့ဂ်လင့်ခ်ကို တိုက်ရိုက် လာတာက ၁၅.၀၅ % ရှိတယ် ပြောတယ်။ Referral ကနေ လာတဲ့အထဲမှာ wesheme က ၇.၅၆ % ဆုံဆည်းရာက ၅.၆၈ % နိုင်းနိုင်းစနေဘလော့ဂ်က ၅.၄၈ % ဖြစ်တယ်။ ကျန်တာတွေက တခြား ဘလော့ဂ်နဲ့ တခြား sources တွေကပါ။ ဒါက တစ်နှစ်ကျော် စုစုပေါင်း စာရင်း ကိုပြောတာပါ။

လတ်တလော နောက်ပိုင်း အချိန်တွေမှာတော့ မနိုင်းနိုင်းဆီက တဆင့် လာတာ များပါတယ်။ ဆုံဆည်းရာကတော့ လင့်ခ် မရှိတော့တာကို တွေ့ရတယ်။ ပြီးခဲ့တဲ့ ဖေဖေါ်ဝါရီလ ၂၇ ကနေ မတ်လ ၂၆ အထိဆိုရင် ဘလော့ဂ်ကို တိုက်ရိုက်လာတာ ၁၅.၅၂%၊ နိုင်းနိုင်းစနေက ၁၁.၆၂%၊ နဲ့ ကိုပေါက ၇.၇၆%၊ whesheme က ၆.၆၁% ဖြစ်ပါတယ်။ ကျန်တာတွေကတော့ တခြားဆိုဒ်တွေကပေါ့။

မနိုင်းနိုင်း၊ ကိုပေါ၊ ကိုအန်ဒီမြင့်၊ ဆုံဆည်းရာ အပါအ၀င် တခြားလင့်ခ်ပေးထားတဲ့ လူတွေ၊ လာဖတ်ကြတဲ့လူတွေ၊ ဝေဖန်အကြံပြုသွားသူတွေ အားလုံးကို ကျေးဇူးတင်ပါတယ်။ စာရေးတယ်ဆိုတာ ရေးချင်လို့ ရေးတာက တပိုင်း ဆိုပေမယ့် ဝေမျှဖတ်ရှုခြင်းကလည်း အရေးကြီးနေပါတယ်။ တချို့ရင့်ကျက်မှု အဆင့်တခုကို ရောက်သွားရင်တော့ ဘယ်သူခံစားစား မစားစား ကိုယ့်ဘာသာ ဖန်တီးနေရတာကိုပဲ ပျော်မွေ့နေတယ် လို့ ကြားဖူးပါတယ်။ ကိုယ်တိုင်ကတော့ အဲဒီအဆင့်နဲ့ မနီးစပ်သေးပါဘူး။ လာဖတ်ကြတဲ့ အတွက် ကိုယ်ရေးတာလေးတွေကို ဝေမျှခံစားခွင့်ရလို့ ကျေနပ်ပါတယ်။

ဘာလို့ဒီဘလော့ဂ်ကို လာသလဲ ဆိုတာကိုလည်း စစ်တမ်းလေး ကောက်ခဲ့သေးတယ်။ အများစုက စာဖတ်ချင်လို့ လာတယ် လို့ ဖြေပါတယ်။ အချိန်တွေ ရှားပါးလွန်းတဲ့ အတွက် စာဖတ်ပြီး စာရေးတဲ့ ဘက်ကို ပိုများများသုံးဖြစ်မှာမို့ လာဖတ်သူတွေကို ဧည့်ဝတ်မကျေနိုင်တဲ့အခါ ခွင့်လွှတ်စေလိုပါတယ်။

ဆက်လက်ရှင်သန်နေပါဦးမယ်။
ကျေးဇူးတင်ပါတယ်။

ပန်ဒိုရာ

(မနှစ်က တနှစ်ပြည့် ရေးခဲ့တဲ့ ကဗျာ)

Expand..

Summary..

နေရောင်အောက်မှာ လင်းလက်နေတဲ့ အခွင့်အလမ်းတွေ

ပုံကို ဒီက ရတယ်။

Under the Tuscan Sun ဒီနာမည်ကို စမြင်လိုက်တုန်းကတော့ Nothing is new under the sun. ဆိုတဲ့စကားလေးကို ဗြုန်းဆို သတိရမိခဲ့တယ်။ ခင်မင်ရတဲ့ အစ်မတစ်ယောက်က လွန်ခဲ့တဲ့ ၂ နှစ်လောက်က ဒီကားလေးကောင်းတယ် ကြည့်ပါလားလို့ အခွေလေး ပေးလာလို့ ကြည့်ဖြစ်ခဲ့တဲ့ ရုပ်ရှင်ဇာတ်ကားတခု ဖြစ်ပါတယ်။ ထွက်တာတော့ ကြာလှပြီ ၂၀၀၃ ခုနှစ်ကတည်းကပါ။

ဒီဇာတ်လမ်းက မင်းသမီးဇာတ်ပါ။ အသက်ကြီးတဲ့အထိ မပျက်စီးပဲ လှနေသေးတဲ့ Diane Lane က အဓိက ဇာတ်ဆောင်ပေါ့။ ဇာတ်လမ်းထဲမှာ သူက အသက် ၃၅ နှစ်လောက် ရှိတဲ့ စာရေးဆရာမ Frances အနေနဲ့ သရုပ်ဆောင်ထားတယ်။ အမျိုးသားနဲ့ ကွာရှင်းပြတ်စဲပြီးခါစ စိတ်ဓာတ်တွေ သုညအထိ ကျနေတဲ့ အနေအထားကနေ ဇာတ်လမ်းကို စထားပါတယ်။ သူ့ရဲ့ အချစ်ဆုံး သူငယ်ချင်းဖြစ်တဲ့ Patti (Sandra Oh) က စိတ်ပြေလက်ပျောက် ခရီးထွက်ဖို့ အကြံပေးလာပါတယ်။ တကယ်ကတော့ အဲဒီခရီးဟာ ယောင်္ကျားရှာလေး ဖြစ်တဲ့ Patti နဲ့ သူ့ပါတနာတို့ သွားဖို့ စီစဉ်ထားတဲ့ gay trip ပါ။ နောက်တော့ Patti က ကိုယ်ဝန်ရလာလို့ မသွားဖြစ်တာနဲ့ အစားထိုးသွားဖို့ Frances ကို တိုက်တွန်းလိုက်တာပါ။

ဒီလိုနဲ့ Frances လည်း အီတလီနိုင်ငံက Tuscany ဆိုတဲ့ နေရာကို ခရီးထွက်လာခဲ့ပါတယ်။ ပြီးတော့ သွားရင်းလာရင်း အဲဒီမှာ တွေ့တဲ့ အိမ်တအိမ်ကို သဘောကျလို့ မမျှော်လင့်ပဲ ၀ယ်ဖြစ်သွားပါတယ်။ အဲဒီမှာပဲ သူ့ဘ၀က အသစ် ပြန်စသလို ဖြစ်သွားတော့တယ်။

သူ့အိမ်ကို ပြင်ဆင်မွမ်းမံဖို့ ပိုလန်က ရွှေ့ပြောင်းအလုပ်သမားတွေ အဖွဲ့ကို ငှားရမ်းပါတယ်။ နောက်ပိုင်း အလုပ်လုပ်ကြရင်း အဲဒီအလုပ်သမားတွေနဲ့ ခင်မင်ရင်းနှီးသွားပါတယ်။ သူ့ကို အိမ်ကိစ္စတွေ အကျိုးဆောင် ကူညီပေးတဲ့ အဲဒီအရပ်က အမျိုးသားတယောက်နဲ့လည်း ခင်မင်မှု တည်ဆောက်ခဲ့ပါတယ်။ အဲဒီအမျိုးသားမှာ အိမ်ထောင်နဲ့ မိသားစုရှိတယ်။ Frances ဟာ တယောက်တည်းမို့ တခါတလေလည်း အဲဒီလူကို အားကိုးမိသလို ဖြစ်ခဲ့တယ်။ ချစ်စရာကောင်းတဲ့ Frances ကိုလည်း သနားကြင်နာမိသလို ဖြစ်လာတာကို ကိုယ့်ဘာသာ သတိထားမိတဲ့ အမျိုးသားဟာ ပွင့်ပွင့်လင်းလင်း ပြောပြပြီး ခြေလှမ်းမလွန်ခင် နောက်ဆုတ်လိုက်ပါတယ်။

Frances ဟာ ဒီကြားထဲမှာ နည်းနည်း ဂေါက်သလိုရှိတဲ့ စိတ်ဝင်စားစရာ ရုပ်ရှင်မင်းသမီးဟောင်း အမျိုးသမီးကြီး တယောက်နဲ့လည်း တွေ့ဆုံခင်မင်ခဲ့တယ်။ ဒီလိုနဲ့ပဲ သူစိမ်းတို့ရဲ့အလယ်မှာ ၀န်းကျင်အသစ်ကို လိုက်လျောညီထွေ ဖြစ်အောင် နေထိုင်စူးစမ်းရင်း ပျော်ရွှင်မှုကို ပြန်ရှာခဲ့ပါတယ်။ တနေ့တော့ မြို့ထဲ ထွက်လည်ရင်းနဲ့ ပျော်ရွှင်မှုရဲ့ လမ်းစတခုကို တွေ့ခဲ့တယ်။ အဲဒါကတော့ အမှတ်မထင် တွေ့ခဲ့တဲ့ လူတယောက်ပါ။ တိုတိုပြောရရင်တော့ အဲဒီလူနဲ့ Frances တို့ ဓာတ်တည့်သွားကြတယ်။ ချစ်ကြိုက်သွားကြတယ်ပေါ့။ ဒါပေမယ့်လည်း ပျော်ရွှင်မှုတွေဟာ ကြာရှည်မခံခဲ့ဘူး။

သူငယ်ချင်း Patti က ကိုယ်ဝန်ကြီးနဲ့ ရောက်လာပါတယ်။ သူငယ်ချင်းကို ဂရုစိုက်နေရင်းနဲ့ပဲ ချိန်းထားတာတွေ ပျက်ကွက်ခဲ့တယ်။ နောက်မှ ပြန်တွေ့ဖို့ ကြိုးစားတဲ့အချိန်မှာ ဟိုလူက နောက်တယောက်နဲ့ ငြိသွားခဲ့ပြီ။ သူကလည်း အဆက်အသွယ် မရတဲ့အချိန်မှာ Frances နဲ့ ဇာတ်လမ်း ရှေ့မဆက်ဖြစ်တော့ဘူးလို့ ထင်မိခဲ့တော့ စိတ်မကောင်းပေမယ့်လည်း မတတ်နိုင်တော့ဘူး။ Frances စိတ်ဓာတ်ကျရပြန်ပြီ။ နေရောင်တွေက လင်းမလိုလိုနဲ့ ပြန်မှိန်သွားခဲ့ရပြီ။

ဒီအချိန်မှာပဲ သူနဲ့ခင်မင်တဲ့ အိမ်ပြင်ပေးတဲ့အဖွဲ့က ပိုလန်အလုပ်သမားလေး တယောက်ဟာ ဒေသခံ မိန်းကလေးတစ်ယောက်နဲ့ ချစ်ကြိုက်ပါတယ်။ မိန်းကလေးဘက်က သဘောမတူတော့ ကောင်လေးက Frances ကို အားကိုးတကြီး တိုင်တည်ပါတယ်။ Frances က ကူညီရပ်တည်ပေးလိုက်တော့ စုံတွဲလည်း အဆင်ပြေသွားတယ်။ ဒီလို ကူညီနိုင်လိုက်တော့ Frances လည်း ပီတိဖြစ်နေရတော့တယ်။

အခွင့်အလမ်းတွေက ရပ်မသွားပါဘူး။ ဇာတ်သိမ်းပိုင်းမှာတော့ ဧည့်ခံပွဲမှာ Frances ကို လေးစားတဲ့ စာဖတ်ပရိသတ်ဖြစ်တဲ့ အမျိုးသားတယောက်က မိတ်ဆက်လာတယ်။ Frances ရဲ့ မျက်လုံးတွေလည်း အရောင်တောက်ပလာတယ်။ သူတို့နှစ်ယောက် စကားလက်ဆုံ ကျနေတုန်းမှာပဲ ရုပ်ရှင်က ပြီးသွားပါတယ်။

ဇာတ်လမ်းရဲ့ Theme က ဒီလိုဆိုပါတယ်။ Life offers you a thousand chances ... all you have to do is take one. တဲ့။ ဘ၀က သင့်ကို အခွင့်အလမ်းတထောင် ပေးပါတယ်။ လုပ်ရမှာကတော့ တခုကိုသာ ယူလိုက်ပါလေ.. တဲ့။

ဒီဇတ်လမ်းထဲမှာတော့ Frances ပျောက်ဆုံးခဲ့တာဟာ ပျော်ရွှင်မှုနဲ့ ချစ်ခြင်းမေတ္တာပေါ့။ နောက်တော့ သူလိုချင်တာကို ပြန်ရနိုင်တဲ့ အခွင့်အလမ်းတွေ ပေါ်လာပါတယ်။ ပြောရမယ်ဆိုရင်တော့ မဖြစ်နိုင်ခဲ့တဲ့ အိမ်အကျိုးဆောင်နဲ့ ခင်မင်ခဲ့တာတောင်မှ မယူဖြစ်ခဲ့တဲ့ အခွင့်အလမ်းတခုပါပဲ။ ဇာတ်သိမ်းမှာတော့ အခွင့်အလမ်း နောက်ထပ်တခုကို လှစ်ရုံလေး လှစ်ပြပြီး အဆုံးသတ်ထားတယ်။

ဇာတ်လမ်းထဲမှာ တခြား စိတ်ဝင်စားစရာ ဇာတ်ကွက်လေးတွေ ရှိပါသေးတယ်။ တခုခုကို မမေ့နိုင်မပျောက်နိုင် နေ့စဉ်မှန်မှန် ပန်းစည်းလေး လာချနေတဲ့ အဘိုးကြီးတယောက်ကိုလည်း နှိုင်းယှဉ် တွေးတောစရာ ဖြစ်အောင်ပြထားသေးတယ်။ Frances ၀ယ်လိုက်တဲ့ အိမ်ရဲ့ နာမည်က Bramasole ဆိုတာ နေရောင်ခြည်ကို မျှော်လင့်တမ်းတနေတဲ့ အရာတခု လို့အဓိပ္ပါယ်ရတယ် ဆိုတာကလည်း ဇာတ်လမ်းရဲ့ ဆိုလိုချက်ကို ပံ့ပိုးပေးထားပါတယ်။

ကြိုက်မိတဲ့ စကားပြောလေးတွေ ရှိပါတယ်။ အဲဒီအထဲမှာတော့ Katherine ဆိုတဲ့ အမျိုးသမီးကြီးက Frances ကို ပြောခဲ့တာတချို့လည်း ပါတယ်။

Katherine: Regrets are a waste of time. They're the past crippling you in the present.
နောင်တတွေဟာ အချိန်ကို အလဟသဖြစ်စေတယ်။ ဒါတွေက မင်းရဲ့ ပစ္စုပ္ပန်ကို ချိနဲ့စေတဲ့ အတိတ်တွေပဲ။

Katherine: Never lose your childish innocence. It's the most important thing.
မင်းရဲ့ကလေးဆန်တဲ့ အပြစ်ကင်းစင်မှုကို မပျောက်ပါစေနဲ့။ အဲဒါ အရေးအကြီးဆုံးအရာပဲ။


ဒီနေရာမှာ (ကိုယ်တယောက်တည်းအနေနဲ့) နားလည်မိတာ တခု ရှိပါတယ်။ အခွင့်အရေး (opportunity) နဲ့ အခွင့်အလမ်း (chance) တူမလိုလိုနဲ့ နည်းနည်းကွဲတယ်လို့ ခံစားမိတယ် ။ (သဘောတူချင်မှတူပါ။ ထင်တာပြောတာ။)

အခွင့်အရေး (opportunity) လို့ ပြောလိုက်ရင် အပေါင်းလက္ခဏာ အဓိပ္ပါယ်ပါတယ် လို့ စိတ်ထဲခံစားရတယ် ။ သေချာမှု ပိုတယ်။ ယူသာယူလိုက်ပါ။ ကောင်းကျိုးကို ဆောင်ကြဉ်းလာမယ်လို့ နားလည်မိသလိုပဲ။ ဒါပေမယ့် အခွင့်အလမ်း (chance) ဆိုရင်တော့ ပိုပြီး ဘက်လိုက်မှု ကင်းတယ်လို့ ထင်မိတယ်။ ကောင်းချင်လည်း ကောင်းမယ် ဆိုးချင်လည်း ဆိုးမယ်။ ဒါပေမယ့် ယူလိုက်ရင်တော့ တခုခု ကြိုးစားခွင့်ကို ပေးထားတယ်။ ကိုယ့်ဆုံးဖြတ်ချက်နဲ့ လုပ်ရည်ကိုင်ရည်ကို မူတည်ပြီး ကောင်းကျိုး ဆိုးကျိုးက ဖြစ်လာမယ် လို့ သဘောပေါက်မိတယ်။ အခွင့်အလမ်းဆိုတာ ပိတ်ဆို့ အကျဉ်းကျပြီး အတိတ်က ရုန်းမထွက်နိုင်တဲ့အချိန်မှာ ပေါ်ပေါက်လာတဲ့ လမ်းစ တခုလိုပါပဲ။ အဲဒီလမ်းစကို မြင်လိုက်သလား ဆိုတာရယ် လှမ်းယူလိုက်ပြီး ဘယ်ကိုရောက်သွားမလဲ ဆိုတာရယ် ကတော့ ကိုယ့်ဥာဏ်ပညာ အဆုံးအဖြတ်နဲ့ အားထုတ်မှုမှာပဲ ဆက်မူတည်နေမယ်။

ဒီဇာတ်လမ်းက ပြောထားတယ်။ ဘ၀မှာ အခွင့်အလမ်းဆိုတာ အကြိမ်ထောင်ချီ လာပါတယ်တဲ့။ တစ်ခုသာ ယူလိုက်ဖို့လိုပါတယ် တဲ့။ အခွင့်အလမ်းကို အခွင့်အလမ်းမှန်း သိဖို့တော့ လိုမယ်။ ဘယ်အချိန်မှာ လှမ်းယူပြီး ဘယ်လို ဆက်လုပ်ရမယ် ဆိုတာ သတိမပြတ်ဖို့တော့ လိုပါမယ်။ အတိတ်မှာ နစ်မြုပ်ပြီး စိတ်ဓာတ်ကျဆင်း နေမယ့်အစား ရုန်းထွက်ချင်စိတ်လည်း ရှိရပါမယ်။ ဒီဇာတ်လမ်းက လူတဦးချင်းရဲ့ ပုဂ္ဂလိက ဘ၀ကို ဖော်ကျုးပါတယ်။ လူအများနဲ့ အစုအဖွဲ့နဲ့ ဆိုင်တဲ့ ကိစ္စတွေမှာဆိုရင်ရော ဘယ်လို အဓိပ္ပါယ် သက်ရောက်နိုင်မလဲ။ ဆက်တွေးနေမိတယ်။

ပန်ဒိုရာ

Expand..

Summary..

ကြော်ငြာ

စင်္ကာပူက အင်္ဂလိပ်စာ သင်တန်းတခုပါ။ ပညာရေး လူမှုဝန်ထမ်းကိစ္စများ နဲ့ ပတ်သက်တာတွေဆိုရင် ခင်ရာခင်ကြောင်း အကူအညီတောင်းလာရင် အလကားပဲတင်း ကြော်ငြာပေးနေပါတယ်။ :)

မမြင်ရရင် ဓာတ်ပုံပေါ် ကလစ် နှိပ်ကြည့်ပါ။ ဘေးက ဆိုဒ်ဘားမှာလည်း တင်ထားပါတယ်။ သင်တန်းနဲ့ပတ်သက်တဲ့ မေးခွန်းများ ဒီမှာမေးခြင်း သည်းခံပါ။ ကာယကံရှင်တွေဆီ ဖုန်းဆက်ပြီး မေးမြန်းပါ။

Expand..

Summary..

မိန်းမကြီးလေးယောက်

သောကြာညနေဟာ ပြိုဆင်းလာတဲ့ လူအုပ်ကို ဘူတာရုံလေးကနေ စောင့်နေတယ်။ ရထားပေါ် အလျင်စလို တိုးဝှေ့တက်ကြသူတွေ၊ ဘူတာရုံဝကနေ ဟိုကြည့်ဒီကြည့် လုပ်ကြသူတွေ၊ ဖုန်းခေါ်ကြသူတွေ၊ အက်စ်အမ်အက်စ် ပို့ကြသူတွေ၊ ချိန်းထားတဲ့လူတွေ တွေ့တော့ဝမ်းသာကြသူ၊ မတွေ့တော့ လည်တဆန့်ဆန့်ဖြစ်ကြသူတွေ ကြားမှာ ရထားတွေ တစင်းပြီးတစင်း ၀င်လာတယ်။

ကွန်ပြူတာအိတ်တချို့ စလင်းဘက်ပြောင်ပြောင်လက်လက်တချို့ ထိပ်ဝိုင်းရှုးဖိနပ်အပါးတွေ၊ ရုံးဝတ်စုံကို ဖြေလျော့ထားတဲ့ ဂျင်းပြာပြာတွေ၊ အသားကပ် ခြေသလုံးတ၀က် ဘောင်းဘီတွေ၊ ခါးပတ်ပြားကြီး ပတ်ထားတဲ့ မီနီစကပ်တွေ၊ လူတယောက်ချင်းတွေ၊ နှစ်ယောက်ချင်းတွေ၊ လူအစုလိုက်တွေ ဘူတာရုံထဲမှာ ဟိုနားဒီနား မိုးတိုးမတ်တတ်တွေကြားမှာ သူတို့ ချိန်းထားကြတယ်။

တယောက်က ရောက်နှင့်နေပြီ။ နောက်တယောက်က ဖုန်းဆက်လိုက်တယ်။ ဘယ်နေရာမှာလဲ။ လက်မှတ်ရောင်းကောင်တာရဲ့ ရှေ့တည့်တည့်မှာ ရပ်နေတယ်။ တွေ့ပြီ။ ဟိုနှစ်ယောက်က လမ်းမှာလို့ပြောတယ်။ ဟော.. ရောက်လာကြပြီ။ လူစုံပြီလား။ တယောက် နှစ်ယောက် သုံးယောက် လေးယောက်..။ အိုကေ.. သွားကြစို့။

ဆည်းဆာရီရီအောက်မှာ လူလုပ်ဆိပ်ကမ်းတခုရဲ့ ရှုခင်းအတုကို လူတွေဟာ အာသာပြေ ငေးမောနေကြတယ်။ မီးရောင်တွေလက်နေတဲ့ အဆောက်အဦတွေ ရေယာဉ်တွေ မြစ်ဟိုဘက်ကမ်းက ဆောက်လက်စ ထိုးထိုးထောင်ထောင် အရာတွေက မြို့ပြရဲ့ ညနေကို တန်ဆာဆင်ထားတယ်။

“ဟိုနားက ဆိုင်တန်းတွေမှာ ညနေစာ အရင်စားကြတာပေါ့။” အနီရောင် ဆွယ်တာဝတ်ထားတဲ့ တယောက်က စကားစ လိုက်တယ်။

“ကောင်းတယ်။” ဇာနားတွန့်လေးတွေ တပ်ထားတဲ့ ဘလောက်စ် ပါးပါးပွပွ အဖြူရောင်ကို ၀တ်ထားတဲ့တယောက်က ချက်ချင်း ထောက်ခံလိုက်တယ်။

“ငါကတော့ ဘာဖြစ်ဖြစ် စားတာပဲ။” ချည်ထည်လိုလို အ၀ါနုနု အင်္ကျီကို စကပ်တိုတိုနဲ့ တွဲဝတ်ဆင်ထားတဲ့ တယောက်က ခပ်အေးအေးပြောတယ်။

“အဲဒီဆိုင်တွေမှာ မစားဖူးသေးဘူး။ ဒီဆိုင်တွေရှိတာ ဘာလို့များ မသိခဲ့ပါလိမ့်။” ရင်ဘတ်မှာ ဘာမှန်းမသိတဲ့ အရုပ်တရုပ်ပါတဲ့ အစိမ်းရောင် တီရှပ်ကို ၀တ်ထားတဲ့ တယောက်က ရေရွတ်တယ်။

စားပွဲအားလုံးလိုလို လူတွေပြည့်နေတယ်။ အပြင်ဘက်ကျကျ စားပွဲတစ်လုံးမှာ တချို့ ထသွားတော့ သူတို့ ၀င်ထိုင်လိုက်ကြတယ်။ အနီရယ် အစိမ်းရယ်က စားစရာတွေ သွားမှာတယ်။ အဖြူက အအေးရောင်းတဲ့ ဘက်ကို ထွက်သွားတယ်။ အ၀ါက စားပွဲကနေ ထိုင်စောင့်တယ်။

လေအေးစက် တပ်မထားတဲ့ ၀န်းကျင်ဟာ အညှော်ငွေ့တွေနဲ့ ဗလုံးဗထွေး ဖြစ်နေတယ်။ မြစ်ဘက်က တခါတခါ တိုက်လာတဲ့ လေသာမရှိဘူးဆိုရင် ၀ါးတားတား လေထုဟာ ကြည်လင်စရာ မရှိလှဘူး။ လူတွေက တန်းစီစောင့်ကြတယ်။ ဆိုင်တွေရှေ့က စောင့်နေသူတွေရဲ့ ခြေထောက်တွေအောက်မှာ ရေတွေ စိုစိစိဖြစ်နေတယ်။ ဆယ်မိနစ်ကြာမှ ပြန်လာပါ။ ဆယ့်ငါးမိနစ်မှရမယ်။ တရှဲရှဲ ကြော်လှော်ကြ။ တရှုးရှုး စားသောက်ကြ။ မတ်တပ်ရပ်သူက ရပ်နေ။ နေရာကောင်း ရထားသူတွေက စိမ်ပြေနပြေစားကြ။ စားပွဲမှာ အထုပ်တွေနဲ့ နေရာဦးထားပြီး လက်ကိုင်ဖုန်းတလုံးနဲ့ တယောက်တည်း အလုပ်ရှုပ်သူကရှုပ်နေကြ။ မြို့ပြရဲ့ သောကြာညနေခင်းဟာ အခုထိတော့ ဒရောသောပါး မျောပါနေတုန်းပဲ။

မြစ်ကိုကျောခိုင်းပြီး နောက်မှီလုပ်ထားတဲ့ ခုံတန်းရှည်တွေဟာ စားသောက်ပြီးသူတွေအဖို့ နောက်ထပ်ဆက်ရွှေ့သွားစရာ နေရာပေါ့။ ညဟာ ပီပြင်နေပြီ။ လျှပ်စစ်မီးရောင်စုံတွေက မြစ်ရေပြင်ကို ဟပ်နေတယ်။အနီက ခြေထောက်နှစ်ဘက်ကို ဆန့်တန်းပြီး အညောင်းဖြေတယ်။ အဖြူက အင်္ကျီအဖြူကို မပေကျံအောင် ထိုင်ခုံကို သေသေချာချာကြည့်ပြီးမှ ဖြည်းဖြည်းထိုင်တယ်။ အစိမ်းက နောက်ခိုင်းဖြစ်နေတဲ့ မြစ်ရေပြင်ကို ကိုယ်တစောင်းလိမ်ပြီး လှည့်ကြည့်နေတယ်။ အ၀ါက အဖြူဘေးမှာ ထိုင်ပြီး စကပ်တိုအောက်က ခြေသလုံးတွေကို ကြက်ခြေခတ် ချိတ်ထားလိုက်တယ်။



“ငါတို့ မဆုံဖြစ်တာ ကြာပြီနော်…”

တယောက်က စပြောတော့ ကျန်လူတွေက အသီးသီး ခေါင်းညိတ်လိုက်ကြတယ်။ ဟုတ်တယ်။ မြို့လေးမှာ အတူတူရှိနေကြပေမယ့် သူတို့ အခုလိုမဆုံဖြစ်ခဲ့ကြတာ တနှစ်နီးပါး ရှိနေပြီ။ သူတို့တွေဟာ မွေးရပ်ကို ခွာပြီး ဒီနေရာကို တယောက်ပြီး တယောက် ရောက်လာကြတယ်။ ရောက်စကတော့ မကြာခဏ ဆုံတွေ့ဖြစ်ကြတယ်။ အသစ်တယောက် ထပ်ရောက်လာတိုင်း ၀မ်းသာအားရ ချိန်းကြ ဖုန်းဆက်ကြ လည်ကြပတ်ကြ။ အခုတော့ အနည်ထိုင် အီလေးစပြုလာပြီ။ ကိုယ်ပိုင်ကိစ္စ အသီးသီးတွေနဲ့မို့ နွေးထွေးတဲ့ အချိန်တွေ မဖန်တီးနိုင်ခဲ့တာ အတော့်ကိုကြာနေပြီ။

“ငါ ဒီနေ့ အလုပ်ထွက်စာ တင်လာတယ်” အဖြူက ဆိုင်းမပါ ဗုံမဆင့် ပြောလိုက်တယ်။

“ဘယ်လိုဖြစ်တာတုန်း။ ဒီလိုအချိန်ကြီးမှာ” အစိမ်းက တအံ့တသြ မေးလိုက်တယ်။

“သည်းမခံနိုင်တော့ဘူး။ သူတို့ ဆက်ဆံရေးကို ငါမကြိုက်ဘူး”

အားလုံး ခဏ တိတ်သွားကြတယ်။

“ခက်ပါတယ်။ ဒီမှာလည်း တချို့နေရာတွေမှာက တို့တွေကိုဆို ခွဲခြားနေသလို ရှိတယ်” အ၀ါက ကောက်ချက်ချတယ်။

“ဒီလိုတော့လည်း မဟုတ်ပါဘူး” အနီက ကန့်ကွက်တယ်။ “ကိုယ့်မှာ တကယ်အရည်အချင်းနဲ့ဆိုရင် ဘယ်သူက နှိပ်ကွပ်လို့ရမလဲ”

“လူတိုင်းဟာ နင့်လိုတော့လည်း အရည်အချင်းတွေ ရှိမနေနိုင်ဘူးလေ” ဖြတ်ခနဲ ၀င်ပြောတဲ့ အစိမ်းကို အနီက မျက်စောင်းခဲလိုက်တယ်။ သူတို့တွေက တွေ့လိုက်ရင် အဲဒီလိုပါပဲ။ နည်းနည်းပါးပါး အတိုက်အခံလေးတွေတော့ ရှိစမြဲ။ ဒါပေမယ့်လည်း ခဏပါ။

ဘယ်လိုပဲဖြစ်ဖြစ် ဒီနေရာလေးမှာ အမြဲနေထိုင်ခွင့် ရနေတဲ့ အဖြူအတွက် နောက်ထပ် အလုပ်အခွင့်အရေးတခု ဆိုတာ မရှားကြောင်း။ ကိုယ်ပိုင်စီးပွားရေးတခုပဲ ဖြစ်ဖြစ် တည်ထောင်ရင်တောင် ရနိုင်ကြောင်း အားလုံးက တညီတညွတ်တည်း အားပေးကြတယ်။

ခဏကြာတော့ သူတို့စကားလမ်းကြောင်း ပြောင်းသွားပြန်တယ်။ လာမယ့်နှစ်မှာ ဘာအပြောင်းအလဲတွေ ဖြစ်နိုင်မလဲ ဆိုတာကနေ ဆင်းရဲကျပ်တည်းမှုတွေ အကြောင်းကို ဆက်ကူးသွားတယ်။ အဲဒီကနေ အော်စကာဆုရတဲ့ ကလေကလွင့် သန်းကြွယ်သူဌေး ဆိုတဲ့ ရုပ်ရှင်ကားတစ်ကား အကြောင်း ဆက်ရောက်သွားကြပြန်တယ်။

လေက အေးရုံလေး အေးနေတယ်။ မိုးလည်းမရွာဘူး။ ကောင်းကင်မှာ တိမ်တွေက ဟိုတစ ဒီတစလွင့်နေတယ်။ ကြယ်တချို့ကိုလည်း မြင်နေရတယ်။ ဒီည ရာသီဥတုက သာယာတယ်လို့ ဆိုနိုင်တယ်။ ညက ရင့်ရင့်လာတယ်။ သူတို့ရှေ့မလှမ်းမကမ်းမှာ ထိုင်နေတဲ့ အိန္ဒိယလူမျိုး စုံတွဲတတွဲဟာ တင်းတင်းကျပ်ကျပ် ပွေ့ဖက်လိုက်ကြတယ်။

“နင်အပျိုကြီးပဲ လုပ်တော့မှာလား”

အစိမ်းက အဖြူကို မေးလိုက်တယ်။ အနီက ဘေးကနေ ခွိကနဲ ရယ်တယ်။

“နင့်ကိုတော့ မမေးတော့ပါဘူး” အစိမ်းက အနီဘက်ကို လှည့်ပြောလိုက်တယ်။

အ၀ါကတော့ ခပ်ပြုံးပြုံးနဲ့ ငြိမ်နေတယ်။ ၀င်မပြောဘူး။

“ဒီနှစ်ပိုင်းတွေမှာ မတွေ့ဘူးလား” အစိမ်းက အဖြူကို ထပ်စပ်စုပြန်တယ်။

“ဟင့်အင်း …လေ။ နင်တခါ မိတ်ဆက်ပေးတဲ့ တရုတ်ကလေးတစ်ယောက်က လွဲလို့ပေါ့”

“ငါဘယ်တုန်းက မိတ်ဆက်ပေးလို့လဲ”အစိမ်းက အူကြောင်ကြောင်လုပ်နေတယ်။ သူက ဒီလိုပဲ မေ့တတ်တယ်။

အဖြူက ပြုံးနေပါတယ်။ သူ့ရဲ့ ရွှေရောင်အချိန်တွေကို ပြန်တွေးနေလား မသိပါဘူး။ သူပိုင်ဆိုင်တဲ့ ပျော့စင်းတဲ့ ဆံနွယ်တွေနဲ့ ချိုမြတဲ့ အပြုံးတွေဟာ အတော်ကို လူကြိုက်များခဲ့တာပဲ။ ဒါပေမယ့် လူကြိုက်များခြင်းရယ် ကိုယ်နဲ့ ဓာတုဓာတ်ပြုနိုင်သူကို တွေ့ဆုံခြင်းရယ် ဆိုတာ တိုက်ရိုက်ထပ်တူကျလို့မရတဲ့ ဖြစ်နိုင်ခြေတွေပဲ။

“ငါက တကယ်လို့ တယောက်ယောက်နဲ့ လက်တွဲမယ် ဆိုရင်တောင် လူမျိုးတူ ဘာသာစကားတူချင်းပဲ စဉ်းစားမှာပါ။ နို့မို့ရင် ဘာသာစကား က စည်းခြားနေရင် တယောက်နဲ့တယောက် အပြည့်အ၀ နားလည်ဖို့မလွယ်ဘူးလို့ ငါထင်တယ်”
အဖြူက သူ့အယူအဆကို ပြောပြနေတယ်။

“တော်ပါပြီ။ ဒီအရွယ်ရောက်မှတော့ ငါလည်း တွေ့မယ် မထင်တော့ပါဘူး”
ဒီလိုဆက်ပြောရင်းနဲ့ စကားကို လက်စသတ်တယ်။

“ဟုတ်တယ်။ လက်တွဲဖော် ဆိုတာ တယောက်နဲ့တယောက် နားလည်ဖို့ လိုတယ်”

အနီက ၀င်ပြောတယ်။

“နင်တို့ကျတော့ရော နားလည်မှုတွေကို ဘယ်လိုတည်ဆောက်ခဲ့သလဲ” အနီက အ၀ါဘက်ကို လှည့်မေးတယ်။

“ငါတို့က ဒီလောက် ကြီးကြီးကျယ်ကျယ်တွေ မတွေးမိခဲ့ပါဘူးအေ့။ နင်တို့သိတဲ့အတိုင်း သူကလည်း အေးဆေးပဲလေ” အ၀ါက ပေါ့ပေါ့ပါးပါးပဲ တုန့်ပြန်တယ်။

မေးခွန်းက အစိမ်းဘက်ကို လှည့်လာပြန်တယ်။ သူကဖြေတယ်။ မြန်မာလိုတော့ မဟုတ်ဘူး။

“Well … you know he's a nice guy.”

“ဟုတ်ပါတယ်။ အဲဒီတော့…”

“And …. I'm trying to be a good girl.”

ကျန်တဲ့သုံးယောက်က ၀ါးခနဲ ရယ်လိုက်ကြတယ်။ မြစ်ထဲမှာ စည်းချက်မှန်မှန် တငြိမ့်ငြိမ့် လှုပ်ယိမ်းရင်း ငိုက်မျဉ်းနေတဲ့ လှိုင်းကြပ်ခွပ်လေးတွေတောင် လန့်နိုးသွားပြီး မလိုတမာ ကြည့်လိုက်ကြသလိုပဲ။ အစိမ်းက ပြုံးရုံလေး ပြုံးနေတယ်။ သူက ဆက်မပြောပါဘူး။ ဘာသာလည်း ပြန်မနေဘူး။ ဟုတ်တယ်။ တချို့အရာတွေက တော်တော် ရှင်းပါတယ်။ ဟို သုံးယောက်ကလည်း ထွေထွေထူးထူး ဆက်ပြောမနေပါဘူး။ ဒါဟာ ညနေခင်းရဲ့ အပျင်းပြေ ဟာသတပုဒ်လို့ သဘောထားကြမှာပဲ။

“ရထားတွေ ကားတွေ ရှိသေးရဲ့လားမသိဘူး။ ငါတို့ပြန်မှဖြစ်မယ်။ ဘူတာကို အပြင်ဘက်လမ်းကနေ လမ်းလျှောက်သွားကြမယ်လေ” အနီက စပြီး လှုံ့ဆော်လိုက်ပြန်တယ်။

အပြန်လမ်းမှာ သူတို့ တဖြည်းဖြည်းလျှောက်လာရင်း ကွင်းပြင်တခုကို ဖြတ်လာကြတယ်။ ကွင်းပြင်ဟိုဘက်မှာတော့ မြို့တော်ခန်းမက မီးရောင်တွေဖြာလို့။



ညအေးအေးရဲ့ မြက်ခင်းပြင်ပေါ်မှာ အုပ်စုဖွဲ့ထိုင်နေကြတဲ့ ယောင်္ကျားလေးတချို့ ရှိတယ်။ ခပ်လှမ်းလှမ်းကနေ ဖြတ်လျှောက်သွားတော့ ဂစ်တာသံနဲ့အတူ သီချင်းသံသဲ့သဲ့ ကြားလိုက်ရတယ်။

“ရွှေလည်တိုင်ကိုကွယ် အနမ်းလေး ပေးစဉ်ဝယ်.. ရင်ခုန်စရာ သနပ်ခါးနံ့လေးတွေနဲ့
ရင်ခွင်ကြားမှာ ခေါင်းလေးငုံ့ကာ.. ရှက်ပြုံးလေး ပြုံးနေတဲ့သူရယ်…”

“ဒါ မြန်မာသီချင်းသံပဲ”
“သြော်.. ရွှေတွေကိုး”
“ဒါပေါ့ ပင်နီဆူလာ ပလာဇာနဲ့ နီးတာကိုး ညနေ အလုပ်ဆင်းချိန် ကျောင်းဆင်းချိန် စုချိန်းကြတာ နေမှာပေါ့”
“ဂစ်တာသံ မကြားရတာ ကြာပြီနော်”

သူတို့ မြန်မာလို ပြောတဲ့စကားတွေကိုလည်း ယောင်္ကျားလေးတွေက ကြားသလားမသိပါဘူး။ ခေါင်းတွေ လည်ကြည့်လာကြတာ တွေ့တယ်။

“ငါတို့ဖြတ်လျှောက်သွားလို့ သူတို့သီချင်းသံတောင် ပိုကျယ်လာသလိုပဲ”

အစိမ်းက ခပ်တိုးတိုးပြောတော့ အဖြူက ရယ်လိုက်တယ်။ “နင်ဟာလေ နောက်တီးနောက်တောက် အကျင့်တွေ မဖျောက်သေးဘူး”

“ကျောင်းတုန်းက အဆောင်ရှေ့မှာ ဂစ်တာလာတီးကြရင်း ကောင်လေးတွေ ရန်ဖြစ်ကြတာတောင် သတိရသေးတယ်” အ၀ါက ၀င်ပြောတယ်။

“ဟေ… ဟုတ်လား ဘယ်တုန်းကလဲ” အနီက မေးလိုက်တယ်။

“အဲဒီမှာ တဖွဲ့ပါလာတဲ့ ဂစ်တာကို နောက်တဖွဲ့က ခဏဆိုပြီး ငှားတီးတယ်လေ။ တော်တော်နဲ့ပြန်မပေးပဲ သူတို့ချည်း တီးနေလို့ ဆိုပြီး ရန်ဖြစ်ကြတာ နောက်ဆုံးတော့ ဂစ်တာကို ရိုက်ခွဲရော ဆိုလား” အ၀ါက ရှင်းပြတယ်။

“ဟုတ်လား ငါတောင် မသိလိုက်ဘူး” အစိမ်းက ၀င်ပြောပြန်တယ်။

“နင်ရော သိလား” အဖြူဘက်ကို လှည့်မေးတော့ အဖြူက လက်ခါပြတယ်။

“အဲဒါ ခက်တာပေါ့။ ကျောင်းတလျှောက်လုံး ဒီလောက် တခန်းထဲ နေနေတာ ငါတို့ကမသိဘူး နင်ကသိတယ်ဆိုတော့ ဘယ်တုန်းက ဒီလိုကောင်တွေနဲ့ အဆက်အသွယ် ရှိနေရတာတုန်း။ နင်လူကိုတော့ နင့်အကြောင်းတွေ ပြန်ပြောဦးမှပါပဲ” အစိမ်းက ရယ်သံတ၀က်နဲ့ ဆက်ပြောတယ်။

“နင်တို့နော်။ ငါ့ကို လာမကျပ်နဲ့။ ဘာလို့မသိရမှာလဲ။ ဒါ အဆောင်မှာ အားလုံးသိတဲ့ကိစ္စ”

“မသိဘူး မသိဘူးဟေ့။ ငါတို့က အေးအေးဆေးဆေး စာပဲကျက်နေခဲ့တာ ဒီလိုဟာတွေ စိတ်ဝင်စားခဲ့တာ မဟုတ်ခဲ့ဘူး။”

သူတို့ဟာ ရေးကြီးခွင်ကျယ် လုပ်ပြီး ငြင်းကြတယ်။ အနီ အစိမ်းနဲ့ အဖြူတို့က အ၀ါတယောက်တည်း မခံမရပ်နိုင်ဖြစ်သွားတာကို အရသာခံပြီး အော်ရယ်ကြတယ်။

လမ်းမကို ဖြတ်ကူးပြီးတော့ ခဏရပ်ပြီး အ၀ါက ပလက်ဖောင်းပေါ်မှာ ဟိုရှာဒီရှာ လုပ်တယ်။

“ခရေပန်းတွေ… ခရေပန်းတွေ”

“အေး ဟုတ်ပါရဲ့ ပန်းနံ့တွေရတယ်”

“ငါကတော့ ခရေပန်းဆို မကြိုက်ဘူး။ ငါ့အမေကတော့ သိပ်ကြိုက်တာ”

“ဒီကလူတွေကတော့ ပန်းတွေကို ကြိုက်ပုံမပေါ်ပါဘူးဟယ်”

ဟိုဟိုဒီဒီပြောရင်း ခရေပန်းတချို့ကို ကောက်ကြတယ်။

“ဒါနဲ့ ဘာလို့ အခုလို ချိန်းကြရတာလဲ။ ပျောက်နေကြပြီးမှ ဗြုန်းစားကြီး”

“ဒီလိုလေ ငါဟိုတနေ့က ဆရာတော် xxxx ကို သွားဖူးဖြစ်တယ်။ ပေါင်းသင်းဆက်ဆံရေးတွေကို တန်ဖိုးထားဖို့ လိုတဲ့အကြောင်း ဟောပြတယ်။ ဒါနဲ့ ငါတို့ဟာ အတူရှိနေပါလျက် မတွေ့တာကြာပြီ လို့ သတိရသွားတယ်” အနီက သူ စချိန်းရခြင်း အကြောင်းရင်းကို ပြောပြတယ်။

ဒီလောက်ဆို သူတို့ချင်းက သဘောပေါက်ပြီ။ အားလုံး ခေါင်းတငြိမ့်ငြိမ့် ဖြစ်သွားကြတယ်။ သက်ပြင်းချတဲ့လူက ချတယ်။

သူတို့လမ်းခွဲကြတဲ့ အချိန်မှာ ညတပိုင်းဟာ တိတိရိရိ ပြတ်ကျသွားပေါ့။


---


အဲဒီညမှာ သူတို့ထဲက တယောက်ဟာ တရေးနိုးလာတယ်။ ဗြုန်းခနဲ သတိရသွားပြီး လက်ကိုင်အိတ်ကို ခါချလိုက်တော့ အဖျားလေးတွေ ခြောက်စပြုနေတဲ့ ခရေပန်းလေးတွေ ထွက်ကျလာတယ်။ တစ်ပွင့် နှစ်ပွင့် သုံးပွင့်။ ဒါပဲ။

အိုး.. ဘာလို့သုံးပွင့် ဖြစ်ရတာလဲ။ လေးပွင့်သာဆို ငါတို့လေးယောက်။ သူက ခပ်ကြောင်ကြောင်တွေးတယ်။ ခဏ ငိုင်နေပြီးမှ တယောက်တည်း ထပ်ရေရွတ်တယ်။ အင်း သုံးပွင့်ဆိုတော့လည်း သူတို့သုံးယောက်ပေါ့။ သူက မီးကိုဖွင့်တယ်။ ကွန်ပြူတာကို ဖွင့်တယ်။ စာကြောင်းတချို့ကို ရိုက်လိုက်တယ်။

ညရဲ့လှုပ်ခတ်မှု

မွှေးရနံ့တောင် ကြွေကျသွား

အချိန်ခေါ်သံနောက်မှာ...။

ပန်ဒိုရာ

Expand..

Summary..

ဆက်ဆံရေးတွေ ကျဲနေတယ်

ပထမတော့ အလုပ်များလို့ စာမရေးဖြစ်ပါ။ ကိုယ့်ဗွီအိုင်ပီကို အချိန်ပေးနေတာကလည်း တပိုင်းပေါ့။ နောက်တော့ စာရေးဖို့ စိတ်မပါလက်မပါ ဖြစ်နေလို့ မရေးဖြစ်ပါ။ မရေးဖြစ်တဲ့အပြင် အွန်လိုင်းလည်း သိပ်မ၀င်ဖြစ်ပါ။ သတင်းဝက်ဘ်ဆိုက်တွေ အပြင် ဘလော့ဂ် တချို့ကို ဖတ်ဖြစ်ပေမယ့်လည်း ပျောက်လက်စနဲ့မို့ ခြေရာမထားဖြစ်ပါ။ အမြဲလာရှာကြသူတွေကို အားနာပါတယ်။ ကျေးဇူးလည်း တင်ပါတယ်။

အွန်လိုင်းပေါ်က လူမှုရေးတွေ ကျဆင်းနေပါတယ်။ ခရီးသွားမယ့်လူကို သေသေချာချာ နှုတ်မဆက်ဖြစ်တာတို့ ဘလော့ဂ်မွေးနေ့ လူမွေးနေ့တွေကို လွတ်သွားတာတို့ ကိုယ့်ကိုလာပြောတဲ့လူတွေကို စကားပြန်မပြောဖြစ်တာတို့။ စာရေးဖို့ စိတ်မရတာ အလုပ်ထဲက ဖိစီးမှုတွေကြောင့်လည်း ဖြစ်နိုင်ပါတယ်။ အလုပ်တွေ တဖြုတ်ဖြုတ် ပြုတ်တဲ့သူ ပြုတ်နေတဲ့အချိန်မှာ၊ စီးပွားရေးကျဆင်းလာတဲ့ အလုပ်ခွင်တွေမှာ၊ ဟိုလူဒီလူ အပြစ်တင် အပြစ်ရှာနေကြတဲ့ကြားမှာ အပြိုင်အဆိုင်တွေများတဲ့ ကျွန်းကလေးထဲ ကိုယ့်နေရာလေး မပျောက်အောင် သတိထားနေရတာကိုး။ ဒီကြားထဲမှာ ပို့စ်တချို့မှာ အစာမကြေတဲ့ မှတ်ချက်တချို့ကို တွေ့ရတယ်။ ပြေလည်အောင် ပြန်ဖြေကြားပေးပါမယ်။ အကြည်ဓာတ်ကလေးကတော့ ပျောက်သွားပြန်တယ်။

အပြင်မှာ သူများတွေကို နည်းနည်းပါးပါး ကူညီဖြစ်ပါတယ်။ တွေးစရာတွေ ကူစဉ်းစားပေးတာတို့ သူများအလှူကိစ္စ ဆက်သွယ်ပေးတာတို့ပေါ့။ အကျိုးရှိသွားကြတယ် အဆင်ပြေသွားအောင် နည်းနည်းလောက် လုပ်ပေးနိုင်တယ် ဆိုရင်တော့လည်း ၀မ်းသာပီတိဖြစ်စရာပါ။ နောက်ထပ် အကူအညီတောင်းထားတဲ့ တချို့ လုပ်ပေးစရာ အကြွေးလည်း ကျန်နေသေးတယ်။

သူ.. ကတော့ အားပေးပါတယ်။ ၀ါသနာပါတာကို တဖက်တလမ်းက လုပ်မယ်ဆိုရင်လည်း စူးစူးစိုက်စိုက် လုပ်ဖို့။ တန်ဖိုးရှိတဲ့ အချိန်တွေ ကြားမှာ လုပ်ချင်တာတွေ မပြန့်ကျဲဖို့။ သူကတော့ ကိုယ်တခုခု လုပ်မယ်ဆိုရင် မပြောမဆိုနဲ့ လိုက်လိုက်ပံ့ပိုးပါတယ်။ တချို့စာတွေ ကိုယ့်ဘာသာ လေ့လာမလို လုပ်တုန်းက သက်ဆိုင်တဲ့ စာအုပ်တွေ ၀ယ်ပေး။ ကျောင်းဆက်တက်မလို စဉ်းစားတော့ ကျောင်းတွေ လိုက်ရှာပေး။ ပုံတွေဆွဲမလို လုပ်တုန်းက ဆေးတွေ ခဲတံတွေ ပုံဆွဲစက္ကူတွေ ၀ယ်ပေး (အခုထိ မဖောက်ဖြစ်သေး)။ အခုလည်း မြန်မာပြည်မှာ အသစ်ထွက်တဲ့ ကဗျာစာအုပ်တချို့ ပေးလာပြန်ပါတယ်။

ဒါနဲ့ စကားမစပ် တနင်္လာ-သောကြာ အချိန်ဇယားလေး ပြောပြချင်ပါတယ်။ မနက်ဆိုရင် ၆ ခွဲ အိပ်ရာထ။ ရေမိုးချိုးပြီး ရုံးကိုပြေး။ ညနေ ၆ နာရီ ရုံးဆင်းပြီးရင် အိမ်ပြန်ရောက်ချိန်ဟာ ၇ နာရီခွဲလောက် အစောဆုံးပါပဲ။ ညစာချက် ညစာစား ရေချိုး တခြားဗာဟီရကိစ္စတွေနဲ့ ၉ နာရီလောက်မှ စပြီး အချိန်ရပါတယ်။ ည ၁၂ နာရီ အိပ်မယ် ဆိုရင် ၃ နာရီလောက် အချိန်ရတယ် ဆိုပါတော့။ အဲဒီကြားမှာ ဖုန်းပြောစရာတွေ ရှိမယ်။ အွန်လိုင်းဝင်ရင်လည်း သတင်းတို့ တခြားနေ့စဉ် ဖတ်စရာတွေ ရှိမယ်။ တွေးစရာတွေ တွေ့ရင်တော့ ဆက်တွေးမိနေသေးတယ်။ တခါတလေကျတော့လည်း ကိုယ်စကားပြောချင်သူတွေနဲ့ ဆွေးနွေးစရာ ရှိရင် ဖြစ်ဖြစ်၊ relax အနေနဲ့ ဘာရယ်မဟုတ် ဟိုဟိုဒီဒီ ဖြစ်ဖြစ် ခဏတဖြုတ် chat ချင်သေးတယ်။ ရုံးကအလုပ်တွေ အိမ်ပါလာတဲ့ ရက်မျိုးဆိုရင်တော့ အချိန်က ရှားပါးလှတယ်။ အလုပ်နဲ့ပတ်သက်တဲ့ မဖတ်ဖြစ်သေးတဲ့ လေ့လာစရာ စာတွေကလည်း စားပွဲပေါ်မှာ ကျောက်ချနေတယ်။ တီဗွီ ကြည့်တဲ့ အချိန်ကတော့ သိသိသာသာနည်းသွားတယ်။

ဒါပါပဲ။ ညည်းညူတယ်လို့ သဘောမထားပါနဲ့။ ဟိုရောက်ဒီရောက် ရေးရင်း ပြန်ပြီး အင်ထရို ၀င်တဲ့စာ ဆိုပါတော့။

ပန်ဒိုရာ

(ဒီညတော့ အစောကြီး အိပ်သွားပြီးမှ ၁နာရီလောက်မှာ တရေးနိုးပြီး ထရေးပါတယ်။)

Expand..

Summary..

ဝိုင်မြစ်ချိုထဲမှာ မျှောလိုက်တယ် ဂျွန် -၂

ဝိုင်မြစ်ချိုထဲမှာ မျှောလိုက်တယ် ဂျွန် -၂

ဆောင်းလေပြင်းတွေ မတိတ်သေးဘူးလား ဂျွန်
သစ်ရွက်တွေ စင်သွားတဲ့ အရိုးပြိုင်းပြိုင်းပင်တွေ တစ္ဆေခြောက်လို့
ရယ်မောဖို့စောင့်ရတာ မျက်လုံးတွေညောင်းလို့
ပါးစပ်တွေဟောင်းလောင်းနဲ့ နားတွေပြားကပ်လို့
ရှုံးပြီး ရှင်ကျန်သူတွေကို ကူတိုက်ဖို့
ပိတ်မိနေတဲ့ ရဲဘော်တွေကို တူးထုတ်ဖို့
စစ်သတင်းတွေ တကျီကျီ လွှင့်ထုတ်နေတဲ့ ရေဒီယိုတွေကို ထားခဲ့ဖို့
ငါတို့စစ်မြေပြင်ကို ပြန်သွားကြမယ်ကွယ်…
ဟောဟိုမှာ အဆောက်အဦအပျက်တွေကြား
အရွေ့တွေတိုင်းမှာ အကွေ့တွေတိုင်းမှာ အတွေ့တွေတိုင်းမှာ
အချိန်မရွေး ခြုံခိုတိုက်ခိုက်မှုတွေ ရှိနိုင်တယ်
အရပ်သားတွေက ပစ်မှတ်ထဲ ၀င်ဝင်လာတယ်
မိန်းမတွေ ကလေးတွေ ဘေးကိုဖယ်ကြပါကွဲ့
အချိန်သိပ်မကြာတော့ပါဘူး ဂျွန်
နောက်တစ်နှစ်မှာ တပ်တွေ ရုပ်သိမ်းပြီးရင်
နောင် ဆယ်နှစ် အနှစ် နှစ်ဆယ် ကြာရင်
ငါတို့နာမည်တွေ ရုပ်တုတွေ ရေးထိုးထားကြမယ် (ထင်တယ်…)
ငါတို့ဟာ ကယ်တင်သူတွေ လွတ်လပ်ရေးကို ခေါ်လာသူတွေ (ထင်တယ်..)
ငါတို့ဟာ ဦးဆွေးဆံမြည့် ထမ်းရွက်သူတွေ (ထင်တယ်.. ငါထင်တယ်)
စစ်မြေပြင်ကိုပဲ ပြန်သွားကြပါစို့ ဂျွန်ရယ်
နေရောင်ကျဲကျဲထဲ တံလျှပ်တွေက တလက်လက်နဲ့
ဖုန်မှုန့်တွေ ဗလုံးဗထွေးနဲ့
ကန္တာရက ဖြားယောင်းတယ်
မသေချာဘူး ဘာမှ မမြင်ရဘူး
နေ့ဘက်မှာ လင်းလွန်းလို့မမြင်ရဘူး
ညရောက်တော့ မှောင်လွန်းလို့မမြင်ရဘူး
မှန်တဲ့ဘက်ဆိုတာ အသက်နဲ့ရင်းပြီး လိုက်ဖို့လိုတယ်
မှားတဲ့ဘက်မှာလည်း အသက်နဲ့ရင်းပြီး လိုက်ဖို့လိုတာပဲ
သူတို့လက်တွေနဲ့ ညွှန်.. လို့
သူတို့ပါးစပ်တွေနဲ့ ပြော… လို့
ငါတို့ခေါင်းကိုတော့ တည့်တည့်ချိန်ထားလေတယ်
ငါတို့ရင်ဘတ်တွေနဲ့ တွန်းတွန်းပြီး ရှေ့တက်ကြမယ်
ဂျွန်ရေ…
သတင်းတွေကလည်း မထူးသေးပါလားကွယ်
ငါတို့ဒဏ်ရာတွေကိုပဲ အရည်ဖျော်လို့
သစ်သီးဆန်ဆန်ဝိုင်ကလေးကိုဖောက်ပြီး
ကန္တာရထဲသွန်းချလိုက်ကြမယ်
ပြီးရင်အားလုံးကို မေ့လိုက်ကြမယ်
အလိုရှိတဲ့အချိန်မှာ စတင်ပြီး
အလိုရှိတဲ့အချိန်မှာ မရပ်စဲနိုင်ခဲ့တာ စစ်ပွဲတွေပဲ.. တဲ့
တင့်ကားတွေ သေနတ်တွေ အမြောက်တွေ
ပေါက်ကွဲသံတွေ ငိုယိုသံတွေ အသေခံဗုံးတွေ
ဖျက်ဆီးခံလိုက်ရတဲ့ သောက်ရေတိုင်ကီတွေ
ပဲ့ရွဲ့သွားတဲ့သစ်သီးတွေ ပုတ်ချခံလိုက်ရတဲ့ အစားအသောက်တွေ
ကလေးငယ်တွေရဲ့ စူးစူးဝါးဝါးအကြည့်တွေ
သွေးစက်တွေကြားကိုပဲ ပြန်သွားလိုက်ကြပါစို့ ဂျွန်ရယ်..။



ပန်ဒိုရာ



(၀ိုင်မြစ်ချိုထဲမှာ မျှောလိုက်တယ် ဂျွန် - ၁ သို့)

Expand..

Summary..