ငြိမ်းချမ်းရေးက သင့်ကုပ်ပိုးကို ခွစီးနေ

ငြိမ်းချမ်းရေးက သင့်ကုပ်ပိုးကို ခွစီးနေ

တိုက်ခိုက်လို့ လုယူလို့ အတင်းတောင်းဆိုနေလို့ ရနိုင်ရိုးလား ငြိမ်းချမ်းရေး

မျက်လုံးတစ်လုံးအတွက် မျက်လုံးတစ်လုံး အတွက် နောက်ထပ်မျက်လုံးတစ်လုံး

အဲဒီမျက်လုံးတွေရဲ့ ဝိုင်းဝိုင်းလည်နေတဲ့ သူငယ်အိမ်ထဲက ငြိမ်းချမ်းရေး

အလှမယ်ပြိုင်ပွဲတွေ အထိမ်းအမှတ်နေ့စွဲတွေ

စည်းရုံးဟောပြောပွဲတွေ အရပ်ထဲက လက်ဖက်ရည်ဆိုင်အထိ

စကားထဲမှာ ထည့်ထည့်ပြောရတာ သိပ်လှတာပဲ  ငြိမ်းချမ်းရေး

တစ်ယောက်ယောက်ယူဆောင်လာမှာကို ငုတ်တုတ် စောင့်မျှော်နေသတဲ့ ငြိမ်းချမ်းရေး

ဘာသာရေးအဆုံးအမတွေက ပုံဖော်သွန်းလောင်းပေးလောက်ပါရဲ့ ငြိမ်းချမ်းရေး

ကိုယ့်ပညတ်တစ်ခုတည်းကျန်မှ ငြိမ်းချမ်းရေးဖြစ်ထွန်းမှာမို့ တခြားပညတ်တွေကို

မီးခိုးမည်းတွေကြားမှာ မှိုင်းတိုက်ကြစို့ရဲ့ ဆိုပဲ ငြိမ်းချမ်းရေး

စစ်အကြီးကြီးတစ်ခု လောင်မြိုက်သွားမှသာ စစ်သေးသေးလေးတွေ

အများကြီးကို ငြှိမ်းသတ်နိုင်မတဲ့ ငြိမ်းချမ်းရေး

မမြင်ရတဲ့ ခရီးပန်းတိုင်တစ်ခုလေ - ရောက်ဖို့ထက်

ဦးတည်လျှောက်လှမ်းနေဖို့က ပိုအရေးကြီးတယ်မဟုတ်လား ဆိုတဲ့ ငြိမ်းချမ်းရေး

အမှောင်တွေကွယ်ပျောက်ဖို့ အမှောင်နောက်တစ်ခုနဲ့

ပိတ်ဖုံးချင်နေကြသတဲ့ ငြိမ်းချမ်းရေး

ဘဝကို ငြင်းပယ်ကြ ပျော့ပြောင်းမှုကို ရှောင်ဖယ်ကြ

မာကျောခက်ထန် သန္နိဌာန်ကြီးနဲ့ ငြိမ်းချမ်းရေး

ဟိုဘက်ကသွားမယ် ဒီဘက်ကသွားမယ် မြန်မြန်သွားမယ် နှေးနှေးသွားမယ်

ဆင်ဖမ်းမယ် ကျားဖမ်းမယ် ပြီးတော့မှ မြွေဖမ်းမိ 

ကွိစိကွစ ဝိဝါဒတွေ ညှိနှိုင်းမရတဲ့ ငြိမ်းချမ်းရေး

ငြိမ်းချမ်းရေးဆိုတာ အယူအဆတစ်ရပ်ပေါ့

ငါနဲ့ငါ့သဏ္ဍာန်အကြား ညှိနှိုင်းမှု အောင်မြင်သွားလို့

ကြုံးဝါးကြွေးကြော်နေတဲ့ တစ်ကိုယ်တော် ငြိမ်းချမ်းရေး

လူ့သဘာဝကို မအောင်နိုင်မချင်း စိတ်ကြီးဝင် ခေါင်းမော့နေသေးတဲ့

ဆွတ်ချူရန်ခက်ပါဘိ အိုဘဲ့.. နှင်းဆီခိုင် ငြိမ်းချမ်းရေး

တိတ်ဆိတ်မှုရအောင် အားလုံးရဲ့နားတွေကို

အမြင်ရှင်းမှုရအောင် အားလုံးရဲ့မျက်လုံးတွေကို

ဆူညံသံမထွက်တော့အောင် အားလုံးရဲ့ပါးစပ်တွေကို

ဆာလောင်မှုတွေကင်းအောင် အားလုံးရဲ့ဝမ်းဗိုက်တွေကို

လှုပ်ရှားမှုတွေငြိမ်သက်အောင် အားလုံးရဲ့ခြေလက်တွေကို

အတွေးတွေအေးဆေးသွားအောင် အားလုံးရဲ့ဦးနှောက်တွေကို

ခံစားချက်တွေချုပ်တည်းနိုင်အောင် အားလုံးရဲ့အသည်းနှလုံးတွေကို

ကိုင်း… ကျုပ်တို့ ဘာဆက်လုပ်ကြမှာတုန်း ငြိမ်းချမ်းရေး။

ပန်ဒိုရာ

၃.၉.၂၀၁၃

(၂၀၁၃ စက်တင်ဘာ ၂၁ ငြိမ်းချမ်းရေးကဗျာလှုပ်ရှားမှု အတွက် ပေးပို့ထားသောကဗျာ)

Expand..

Summary..

ငယ်ငယ်တုန်းက အိမ်ကလေးတစ်လုံး

ငယ်ငယ်တုန်းက အိမ်ကလေးတစ်လုံး  

အိမ်ဆိုတာ ကျွန်မရဲ့ ဘဝတလျှောက်မှာ အခါ ၂၀ ကျော်လောက် ပြောင်းပြီး နေထိုင်ခဲ့ရ၊ အခုအထိလည်း ပြောင်းနေရဆဲ အရာတစ်ခုပါ။ အိမ်တစ်လုံး ဝယ်ယူပိုင်ဆိုင်ဖို့ဆိုတာ ကျွန်မတို့အိမ်သားတွေ တချိန်လုံး ကြိုးစားပမ်းစား အားထုတ်ခဲ့ရတဲ့ ကိစ္စတစ်ရပ်ပေါ့။ အိမ်ဆိုတဲ့ အဓိပ္ပာယ်ထဲမှာ မိသားစု အတူတကွ စုစည်းနေနိုင်ခြင်း၊ လုံခြုံမှုရှိခြင်း၊ ပျော်ရွှင်ခြင်း တွေ အသေအချာ ပေါင်းစပ်ပါဝင်နေတယ်။

ကိုယ့်ကိုယ်ကို လူရယ်လို့ စသိလိုက်တဲ့အချိန်မှာ ကျွန်မဟာ နေရောင်ခြည်တွေ ပိုးပိုးပေါက်ပေါက် ဝင်နေတဲ့ နံရံတစ်ခုထဲက အိပ်ခန်းထဲကို ရောက်နေတယ်။ အိပ်ခန်းရဲ့ ပြတင်းပေါက်ကနေ လှမ်းကြည့်လိုက်ရင် ခက်ဖြာညွတ်ကျနေတဲ့ မန်းကျည်းပင်ကိုင်းတွေကို မြင်နေရတယ်။ ကျွန်မရဲ့ လည်မှာ ဆွဲပေးထားတဲ့ ကျောက်နီဆွဲသီးလေးကို အိပ်ခန်းထဲ တိုးဝင်နေတဲ့ နေရောင်အောက်မှာ ထားလိုက်ရင် သက်တံရောင်စုံအရိပ်တွေ တခန်းလုံး တဖျတ်ဖျတ် လက်နေတာကို ကျွန်မက သဘောကျလေ့ရှိတယ်။ အဲဒါဟာ ငယ်ဘဝကို ပြန်တွေးလိုက်ရင် အာရုံထဲဝင်လာတဲ့ ပထမဆုံး အမှတ်တရ ပုံရိပ်ပါ။ 

ကျွန်မ ပထမဆုံး မှတ်မိခဲ့တဲ့ အဲဒီအိမ်ဟာ ဝါးခယ်မ မြို့နယ်ထဲက မောင်းဒီးလို့ ခေါ်တဲ့ ကရင်ရွာလေးတစ်ရွာမှာ ရှိတယ်။ ဖေဖေက ကျောင်းဆရာအဖြစ်နဲ့ အဲဒီရွာမှာ ၃ နှစ်တာဝန်ကျခဲ့တာ ကျွန်မ အသက် ၂ နှစ်ကနေ ၅ နှစ်နီးပါး အရွယ်အထိပဲ။ အိမ်က မဒရပ် အိမ်လို့ ခေါ်ကြတဲ့ ခြေတံရှည် အိမ်အမျိုးအစား။ လူတစ်ရပ်ကျော် ကောင်းကောင်း လွတ်တဲ့ အိမ်အောက်ထပ်မှာ မြေကြီးမာမာရှိတယ်။ လူတွေက အပေါ်မှာပဲ နေတယ်။ အိမ်ဘေးမှာ အိမ်ပေါ်တက်တဲ့ လှေခါးရှည်တစ်ခုရှိတယ်။ အဲဒီတုန်းက အိမ်မှာ မိသားစု လေးယောက်ပဲ ရှိသေးတယ်။ ဖေဖေရယ်၊ မေမေရယ်၊ ကျွန်မထက် တစ်နှစ်ခွဲပဲ ကြီးတဲ့ အစ်ကိုရယ်၊ ကျွန်မရယ်။ ကျွန်မတို့က အဲဒီအိမ်ကို ငှားနေကြတာပါ။ အိမ်ရှေ့ခြမ်းမှာနေတယ်။ အိမ်ရှင် ကရင်မိသားစုက နောက်ဖေးခြမ်းမှာ နေကြတယ်။ 

အိမ်ရှေ့မှာ ချောင်းကလေးရှိတယ်။ ကိုကိုနဲ့ ကျွန်မ ကို ဖေဖေက ချောင်းထဲကို မကြာခဏ ခေါ်သွားပြီး ရေချိုးပေးလေ့ရှိတယ်။  ဖောင်ဖွဲ့ထားတဲ့ ငှက်ပျောတုံးကလေးတွေပေါ်မှာ ကလေးနှစ်ယောက်ကို တင်ပြီး ရေကစားရင်း ပျော်ရွှင်စရာအချိန်တွေ ဖန်တီးပေးခဲ့တယ်။ မေမေကတော့ ရေကြောက်သူ။ ကမ်းနားကနေ စိတ်ပူပြီး လှမ်းအော်နေလေ့ရှိသတဲ့။ နောက်ပိုင်းမှ ဖေဖေက ပြန်ပြောလေ့ရှိတာက “အဲဒီတုန်းက ငါတော်တော်မိုက်မဲတာပဲ။ ကိုယ်တိုင်လည်း ရေကောင်းကောင်း မကူးတတ် မငုပ်တတ်ဘဲနဲ့ တကယ်လို့များ ကလေးတွေ ရေထဲကျသွားရင် အခက်တွေ့ရမှာ” တဲ့။ ပြန်တွေးကြည့်ရင် အသည်းယားစရာ။ မိုးတွင်းကာလတွေမှာတော့ ချောင်းထဲက ရေက တက်လာပြီး အိမ်အောက်မှာ ရေတွေပြည့်နေတတ်တယ်။ ဖေဖေက ကျွန်မတို့ကို သစ်ထွင်းလှေလေးတွေ လုပ်ပေးတယ်။ သားရေကွင်းကလေးတွေ လိမ်ကျစ်ပြီး ပန်ကာမှာ ပတ်ပြီးတော့ အိမ်ပေါ်ကနေ လှေလွှတ်ကြတယ်။ ဖေဖေက ငါးတွေ ပုစွန်တွေ ဖမ်းမိလို ဖမ်းမိငြား မြုံးထောင်တတ်သေးတယ်။ တစ်ခါတော့ မြုံးထဲမှာ ရေမြွေတစ်ကောင် မိနေတာ ကျွန်မ မှတ်မိတယ်။ ရေတွေထဲမှာ မျှော့တွေ ရှိတတ်တာကိုလည်း သတိရမိတယ်။ ကျွန်မက မျှော့တွေ တီကောင်တွေလို ပျော့ပျော့ အကောင်တွေကို သိပ်ကြောက်တတ်တယ်။ 

ရွာကလေးမှာ ကျွန်မတို့ လိုအပ်တဲ့ အသုံးအဆောင်တွေနဲ့ အခြောက်အခြမ်း စားစရာတွေကို အလွယ်တကူ စုံစုံလင်လင် ဝယ်လို့ရနိုင်ဘူး။ အနီးဆုံးမြို့ဖြစ်တဲ့ ဝါးခယ်မမြို့ကို အနည်းဆုံး တစ်လတစ်ခါလောက် စက်လှေစီးသွားပြီး ဈေးဝယ်ရတယ်။ ဆံပင်ညှပ်ရင်လည်း ဝါးခယ်မကိုပဲ သွားညှပ်ရတယ်။ အဲဒီတုန်းက မြို့ကိုတက်တိုင်း ကုန်စုံဆိုင်မှာ ခေါင်းအုံးသကြားလုံး ဝယ်ကျွေးတာကို မှတ်မိနေသေးတယ်။ ခေါင်းအုံးသကြားလုံး ဆိုတာ ခေါင်းအုံးသေးသေးလေးနဲ့ ဆင်တူတဲ့ ပလတ်စတစ်အိပ်ကလေးနဲ့ စွပ်ထားတဲ့ ထိုင်းကလာတဲ့ သကြားလုံးလေးကို ကျွန်မတို့က ခေါ်တာပါ။ နိုင်ငံခြားပစ္စည်း ရှားပါးတဲ့ ငယ်ဘဝက အဲဒီလို ဆန်းဆန်းပြားပြားလို့ ထင်မိတဲ့ စားစရာတွေအားလုံးဟာ အရသာရှိနေတာပဲ။ 

အဲဒီရွာကလေးမှာ မှတ်မိနေတဲ့ နောက်တစ်ခုကတော့ တရွာလုံးမှာ ခရေပင်တွေ ပေါများတာပါပဲ။ တစ်ပင်နဲ့တစ်ပင်မှာ ပွင့်တဲ့ ခရေပွင့်တွေက မတူကြဘူးဆိုတာက ကျွန်မက သတိထားမိခဲ့တယ်။ တချို့က အရောင် ပိုဖြူတယ်။ တချို့က အပွင့်ပိုကြီးတယ်။ မန်ကျည်းပင်တွေလည်း များပါတယ်။ အိမ်ပြတင်းပေါက်က လှမ်းမြင်ရတဲ့ မန်ကျည်းပင်ကြီးအောက်မှာ မန်ကျည်းသီးအနုလေးတွေ ကောက်ရတာကိုလည်း ကျွန်မက ကြိုက်တယ်။ တစ်နေ့တော့ မိုးတွေလေတွေ ကြီးတဲ့ တစ်နေ့မှာ မေမေက ဒေဝေါလာပြီ လို့ ပြောပါတယ်။ ကျွန်မက ပြတင်းပေါက်ကနေ လှမ်းကြည့်တော့ မန်ကျည်းပင်ပေါ်မှာ မိုးခိုနေတဲ့ ကြောင်တစ်ကောင်ကို တွေ့တယ်။ အဲဒီတုန်းက ဒေဝေါဆိုတာ အဲဒီကြောင်ကို ပြောတာလို့ ထင်မိခဲ့ဖူးတယ်။ ဒေဝေါက ကြောင် နဲ့တူတာပဲလို့တောင် တွေးလိုက်သေးတယ်။ 

ကိုကိုက အသက်   ၅ နှစ်ခွဲ အရွယ်မှာ မောင်းဒီးရွာက ကျောင်းမှာ သူငယ်တန်း စတက်ပါတယ်။ မနက်ဆိုရင် ဖေဖေနဲ့ ကိုကိုတို့ ကျောင်းသွားကြတဲ့အခါ ကျွန်မက အိမ်မှာ မေမေနဲ့ ကျန်ခဲ့တယ်။ မေမေက ကျွန်မကို အိမ်မှာ စာသင်ပေးတယ်။ ကျောင်းဆရာအိမ်ဆိုတော့ စာရွက်တွေ ခဲတံတွေက အဆင်သင့်ရှိနေတယ်။ ကျွန်မဟာ ကျောက်သင်ပုန်းကို အဆင့်ကျော်ပြီး စာရွက်ပေါ်မှာ ကကြီး ခခွေး စရေးတတ်ခဲ့တာ။ တစ်နေ့တော့ ဖေဖေ့ ဖောင်တိန်ကို ကျွန်မက ယူရေးရင်း နစ်ကျိုးသွားသတဲ့။ လူကြီးတွေက တွေ့သွားတဲ့အခါ ဖောင်တိန် နစ်ကျိုးနေတာ ဘယ်သူလုပ်တာလဲ လို့ မေးတော့ အိမ်ရှေ့ဝရံတာမှာ တဝီဝီ ပျံဝဲနေတဲ့ ပိတုန်းတွေကို လက်ညိုးထိုးပြပြီး ပိတုန်းထိုးတာ လို့ ကျွန်မက အတင်းငြင်းပါသတဲ့။ တော်တော် ဆင်ခြေများတဲ့ ကလေးလို့ ပြောကြပေမယ့် ကျွန်မကတော့ ဖောင်တိန်ကို တကယ်ပဲ ပိတုန်းထိုးသွားတာ ဖြစ်ကောင်းဖြစ်မှာပေါ့လို့ ထင်ချင်သေးတယ်။  

ကျောင်းတက်ရက်တွေမှာ ညနေ လေးနာရီ ထိုးခါနီးရင် ဖေဖေနဲ့ကိုကို ပြန်လာမှာကို အိမ်အောက်ကို ဆင်းတဲ့ လှေခါးပေါ်မှာ မတ်တတ်ရပ်ရင်း ကျွန်မက မျှော်လေ့ရှိတယ်။ အဲဒီမှာ လှေခါးလက်ရမ်းက ပွတ်လုံးတိုင်လေးတွေကြားမှာ ကျွန်မရဲ့ ဒူးခေါင်းလေးက လျှောဝင်သွားပြီး ပြန်ဆွဲထုတ်မရလို့ ကျွန်မက အော်ငိုလေ့ရှိတယ်။ အဲဒီလှေခါးမှာ ဒူးခေါင်းညပ်တာ အကြိမ်ကြိမ်ပဲလို့ မေမေက ပြန်ပြောပါတယ်။ ပြီးတော့ အိမ်က ကြမ်းပြင်တွေမှာ နည်းနည်း ကျဲနေတဲ့ အပိုင်းတွေ ရှိတယ်။ ကျွန်မက အိမ်ပေါ်ကနေ အဲဒီကြမ်းပေါက်တွေကတဆင့် အောက်ကို ငုံ့ကြည့်လေ့ရှိတယ်။ တစ်နေ့တော့ ကျွန်မရဲ့ ကျောက်နီဆွဲသီးလေးဟာ ကြမ်းပေါက်နဲ့ညပ်ပြီး အောက်ကို ပြုတ်ကျသွားပါလေရော။ ဆွဲကြိုးလေးလည်း ပြတ်သွားတယ်။ အိမ်အောက်က မြေကြီးပေါ်မှာတော့ ကြက်တစ်ကောင်ရှိတယ်။ မေမေက သိသိချင်း အိမ်အောက်ကို ဆင်းသွားတော့ ဆွဲသီးလေးကို မတွေ့တော့ဘူး။ နောက်တော့ အဲဒီနားက ကြက်ပိုင်ရှင်က သူ့ကြက် ကောက်စားသွားတာ ဖြစ်မယ် ဆိုပြီး ကြက်ကိုဖမ်းပြီး သတ်လိုက်တယ်။ ကြက်သေသွားတာတော့ စိတ်မကောင်းစရာပဲ။ ဒါပေမယ့် ကြက်အစာအိမ်ထဲကနေ ဆွဲသီးလေး ပြန်ရခဲ့တယ်။ 

ကရင်လူမျိုး အများစုဖြစ်တဲ့ ရွာသူရွာသားတွေက ကျွန်မတို့မိသားစုကို စောင့်ရှောက်ကြတယ်။ ကျွန်မတို့ မောင်နှမကိုလည်း ချစ်ကြပါတယ်။ ချောင်းထဲက ပုစွန်တုပ်တွေ ရှာတွေ့ရင် မေမေကြိုက်တတ်မှန်းသိလို့ လာပေးကြတယ်။ သူတို့လုပ်တဲ့ ရိုးရာမုန့်တွေလည်း လက်ဆောင် ပေးတတ်ကြတယ်။ ရွာသူရွာသားတွေက နှစ်ခြင်းခရစ်ယာန် ဘာသာဝင်တွေ များပါတယ်။ ခရစ်စမတ်ညတွေမှာ ကျွန်မတို့အိမ်ရှေ့ကို သီချင်း လာဆိုလေ့ရှိကြတယ်။ ကျွန်မတို့ကလည်း သူတို့ရဲ့ ပွဲတော်တွေကို၊ တခါတလေမှာ ဘုရားကျောင်းကို သူတို့နဲ့အတူ လိုက်သွားလေ့ ရှိပါတယ်။ ကရင်စကားလည်း မတောက်တခေါက် သင်ကြတယ်။ အဲဒီရွာကလေးမှာ နေခဲ့တဲ့အချိန်တွေဟာ ပစ္စည်းပစ္စယ ရှားပါးတာကလွဲလို့ ပျော်စရာကောင်းတယ်လို့ ဖေဖေနဲ့မေမေတို့က ပြောပါတယ်။ အားလပ်ချိန်တွေမှာ တခြား ဖျော်ဖြေရေးတွေကလည်း မရှိတော့ ဖေဖေနဲ့ မေမေတို့ဟာ ရေဒီယိုနားထောင်၊ မဂ္ဂဇင်းတွေ ဝတ္ထုတွေဖတ်၊ တခါတလေတော့ စစ်တုရင် (ချက်စ်) ကစားလေ့ရှိတယ်။ ကျွန်မတို့ မောင်နှမတွေ ပထမဆုံး ရင်းနှီးကျွမ်းဝင်ခဲ့တဲ့ ဂိမ်းက ချက်စ်ထိုးတာလို့ ပြောလို့ရမယ်။ 

နောက်တော့ အဲဒီရွာလေးကနေ ပြောင်းခါနီးမှာ မောင်လေးကို မေမေက ကိုယ်ဝန်ရလာခဲ့တယ်။ အဲဒါကိုလည်း ထမင်းစားပြီးခါစမှာ ဘောလုံးကန်လို့ မမျှော်လင့်ပဲ ဆုံးသွားတဲ့ ဖေဖေ့ တပည့် ကရင်လေး ဝင်စားတာလို့ ရွာကလူတချို့က ယုံကြည်နေကြသေးတယ်။ မေမေက မောင်လေး ကိုယ်ဝန်ရခါနီးမှာ အဲဒီကလေးကို အိပ်မက် မက်သတဲ့။ 

အဲဒီရွာကနေ ပြောင်းသွားပြီး နောက်ပိုင်းကာလတွေမှာတော့ မောင်လေး ၄ နှစ်သားလောက် အရွယ်မှာ တစ်ခါပဲ ရွာလေးကို အလည်ခဏ ပြန်ရောက်ခဲ့တယ်။ အလည်သွားတုန်းမှာ ချောင်းကမ်းစပ်မှာ မောင်လေးကို ရေချိုးပေးဖို့ လုပ်နေတုန်း သူက မပြောမဆိုနဲ့ ချောင်းထဲ ခုန်ချလိုက်တယ်။ တိမ်တိမ်လေး ထင်လို့ ဖြစ်မှာပေါ့။ ကျွန်မတို့ တည်းတဲ့အိမ်က ရွာခံကျောင်းဆရာက အတင်းပြေးလာပြီး မောင်လေးကို ရေငုပ်ဆယ်ရတယ်။ အဲဒီနောက် ရွာထဲမှာ လမ်းလျှောက်ကြတဲ့အခါ ဘောလုံးကန်ပြီး ဆုံးသွားတဲ့ ကလေးရဲ့ မိဘတွေအိမ်ကို ခဏ ဝင်လည်ကြသေးတယ်။ ဓာတ်ပုံ အယ်လ်ဘန်ထဲမှာ သူတို့ အမျိုးတွေကို ဘယ်သူက ဘယ်သူလဲဆိုတာ ထောက်ပြခိုင်းတော့ မောင်လေး ထောက်ပြတာတွေက မှန်နေပြန်တယ်။ ဒီတော့ မောင်လေးကို အဲဒီ ကရင်လေး ဝင်စားတာလို့ ပိုထင်ကြပြန်ရော။ 

ငယ်ငယ်တုန်းက အဲဒီရွာမှာ နေခဲ့စဉ် တချို့ အကြောင်းအရာတွေကို ကျွန်မ အမှတ်ရနေတယ် လို့ အခုအချိန်မှာ ပြောတော့ မေမေက မယုံဘူး။ နောက်တစ်ခေါက် သွားလည်တဲ့အချိန်မှာ ကျွန်မက ၈ နှစ်သမီးလောက် ရှိနေပြီမို့လို့ အလည်ခရီးက မြင်ကွင်းကိုပဲ သတိရတာဖြစ်မယ်လို့ ပြောတယ်။ ကျွန်မကတော့ ကျွန်မမျက်စိထဲ မြင်နေတဲ့ ရုပ်ပုံတွေဟာ ၃ နှစ် ၄ နှစ် အရွယ်က ဖမ်းယူထားတဲ့ ပထမဆုံး မှတ်ဥာဏ်တွေလို့ပဲ ထင်နေမိတယ်။ အဲဒီငယ်ဘဝ အကြောင်းတွေကို မိဘတွေက အမြဲ ပြန်ပြောနေကြလို့ မမေ့မလျော့ပဲ သတိရနေတာလည်း ဖြစ်နိုင်ပါတယ်။ 

နှစ်တွေကြာလာတဲ့အခါ ကျွန်မတို့လည်း ရွာတွေ မြို့တွေ အလီလီ ပြောင်းရွှေ့လာခဲ့တယ်။ ရန်ကုန်မြို့တော်ကြီးကိုလည်း ရောက်လာတယ်။ နောက်ဆုံး နိုင်ငံရပ်ခြားအထိ ရောက်တော့လည်း အိမ်တွေ ဆက်လက် ပြောင်းရွှေ့နေထိုင်နေရဆဲပါ။ ခေတ်ကြီးကလည်း ပြောင်းလဲ တိုးတက်လာတာနဲ့ အမျှ ထူးခြားဆန်းပြားတဲ့ အသုံးအဆောင်သစ်တွေ အလွယ်တကူ ရလာတယ်။ လမ်းပမ်းဆက်သွယ်ရေးလည်း ပိုလွယ်လာတယ်။ ငွေကြေးလည်း ပိုပြီး သုံးစွဲနိုင်လာတယ်။ ဒါပေမယ့် ရှားပါးတဲ့ ကာလတစ်ခုမှာလည်း ဘယ်တော့မှ မပြောင်းလဲတဲ့ မိသားစုမေတ္တာတွေနဲ့ ပြည့်စုံလုံလောက်ခဲ့တဲ့ အိမ်ကလေးတစ်လုံးဟာ တကယ်ရှိခဲ့တာပါ။

ပန်ဒိုရာ

၁၆.၅.၂၀၁၃

(Home and Services Journal, Vol.1, No.6, July 27 2013 တွင် ဖော်ပြပါရှိပြီး)

Expand..

Summary..

အိတ်ပွင့်လေသောအခါ

 မရေးဖြစ်တာကြာတဲ့ ဘလော့ဂါဆန်တဲ့ပို့စ်တစ်ခု ရေးလိုက်ပါတယ်။ မတက်ဂ်ဝေ အတွက် :)

၂၀၀၇ ခုနှစ်တုန်းကတော့ အိတ်ထဲမှာ ဘာရှိသလဲ ဆိုတဲ့ tag ပို့စ်တစ်ပုဒ် ရေးဖူးပါတယ်။ စိတ်ဝင်စားရင် ပြန်ဖတ်ကြည့်လို့ရပါတယ်။ ၂၀၀၇ ခုနှစ်က စင်ကာပူမှာ ရုံးတက်ရင်းလွယ်တဲ့ အိတ်ထဲက အရာတွေနဲ့ ၂၀၁၃ ခုနှစ် မြန်မာပြည်မှာ ဟိုနားဒီနားသွားရင်းလွယ်တဲ့ အိတ်ထဲက အရာတွေ ဘာကွာသလဲ ဆိုတာကို ယှဉ်ကြည့်လို့ရမယ်။

ကိုယ့်မှာ အိတ်တွေ များတယ်။ ကြွားတာမဟုတ်ပါဘူး။ မိန်းကလေးတချို့ဟာ ဒီလိုပါပဲ။ အဟောင်းတွေက မပျက်စီးသေးတော့ အသစ်ထပ်ဝယ်တဲ့အခါ တိုးပွားလာတဲ့သဘောလည်း ဖြစ်ပါတယ်။ တချို့အိတ်တွေက သွားရလာရတဲ့ လမ်းနဲ့ သင့်တော်အောင် ပြောင်းကိုင်စရာ လိုတယ်။ တချို့ကတော့ အဝတ်အစားတွေနဲ့ အရောင်အသွေးလိုက်ဖက်အောင် ဝယ်မိတာဖြစ်တယ်။ စင်ကာပူမှာ နေတုန်းကတော့ လျှော့ဈေးနဲ့ရလို့ မရည်ရွယ်ပဲ ဝယ်ဖြစ်တာမျိုးတွေ ရှိခဲ့တယ်။ 

မြန်မာပြည်ကို ပြန်ရောက်တဲ့အခါ လုံခြုံတဲ့ အိတ်တွေကို ဦးစားပေး လွယ်ဖြစ်တယ်။ ပြီးတော့ ကဒ်ပြားတွေထည့်ထားတဲ့ ခေါက်အိတ်(wallet)ကလေး ဆန့်ရုံနဲ့ မလုံလောက်တော့ဘူး။ ပိုက်ဆံတွေအချပ်လိုက် ထူထူဖောင်းဖောင်း သယ်စရာတွေ ရှိလာတဲ့အခါ ကျယ်ကျယ်ဝန်းဝန်းရှိတဲ့ အိတ်တွေကို သုံးဖြစ်တယ်။ အိတ်တစ်လုံးကနေ တစ်လုံး ပြောင်းကိုင်တဲ့အခါ ဟိုဟာမေ့ ဒီဟာမေ့လည်း ဖြစ်တတ်ပါတယ်။

အခုတလောတော့ edc အိတ်လေးကိုပဲ ကိုင်ဖြစ်ပါတယ်။ ပျော့ပြောင်းပြီး ဖွင့်ရပိတ်ရ လွယ်ကူတယ်။ အိတ်ထဲမှာတော့ သူများတကာထက် ထူးထူးထွေထွေ ပါလိမ့်မယ်လို့ မထင်ပါဘူး။

၁။ အနက်ရောင် ပိုက်ဆံအိတ်လေး။ တကယ်တော့ အဲဒီအိတ်က အလှပြင်ပစ္စည်းထည့်တဲ့အိတ်ပါ။ မြန်မာပိုက်ဆံတွေ ဆန့်ရမယ်။ ပါးပြီး ပျော့ပြောင်းရမယ်။ ပေါ့ရမယ်။ သိပ်လည်းမကြီးရဘူး။ အဲဒီလိုစဉ်းစားတော့ အဲဒီအိတ်လေးကိုပဲ သုံးလိုက်တယ်။ အထဲမှာ တစ်ရှူး၊ ပိုက်ဆံအချို့၊ မှတ်ပုံတင်ကဒ် ပါတယ်။ မရှင်းလင်းဖြစ်တဲ့ ဘောက်ချာဟောင်း တချို့လည်းပါတယ်။

၂။ Name card holder သားရေအိတ်ကလေး။ အထဲမှာ နာမည်ရင်းနဲ့ ကဒ်တွေရော၊ ပန်ဒိုရာနာမည်နဲ့ ကဒ်တွေရောပါတယ်။ ကိုယ့်ကိုသူများက ကဒ်ပေးရင်လည်း အဲဒီအိတ်ထဲက အကန့်တစ်ကန့်မှာ ထည့်ထားတယ်။ ပိုက်ဆံအိတ် ပြောင်းတဲ့အခါ အဲဒီ name card အိတ်လေးက မကြာခဏ မေ့ကျန်တတ်တယ်။

၃။ iPhone external ဘက်ထရီ။ မြန်မာပြည်မှာ မီးခဏခဏ ပျက်တယ်ဆိုလို့ စင်ကာပူက မပြန်ခင် ဝယ်လာခဲ့တာပါ။ ခရီးဝေးသွားတော့ အသုံးဝင်တယ်။ ဟိုနားဒီနားသွားရင် သိပ်မလိုပေမယ့် ဆောင်ထားဖြစ်တယ်။

၎။ ဘောလ်ပင်တစ်ချောင်း။ လောလောဆယ် ဒီအိတ်ထဲမှာ ရှိတဲ့ ဘောလ်ပင်ကတော့ မနော်ရဲ့ အော်ဇီလက်ဆောင် ဘောလ်ပင်လေးပါ။ အဘော်ရီဂျင်နယ် ဒီဇိုင်းကို ကြိုက်လို့ ဒါလေးကို သေသေချာချာ သုံးဖြစ်တယ်။ မင်တောင် အတော်လျော့နေပါပြီ။ (မနော်က ဒီတစ်ခါပြန်လာရင် နောက်ထပ် တစ်ချောင်း ထပ်ပေးနေပါဦးမယ်လေ။ :P)

 

၅။ clinique နှုတ်ခမ်းနီနဲ့ မိတ်ကပ်တွဲလျက်။ တစ်ခါတည်းတွဲထားတော့ အဆင်ပြေလို့ပါ။ မှန်လည်းပါတယ်။

 

၆။ မှတ်စုစာအုပ်သေးသေးလေး။ မှတ်စုစာအုပ် ၃ အုပ်လောက်ထားပြီး ဟိုအိတ် ဒီအိတ်တွေထဲ ရောက်နေတယ်။ မှတ်စရာရှိရင် ကြုံသလိုမှတ်တယ်။ ဘယ်ထဲမှာ မှတ်မိမှန်းမသိလို့လည်း ပြန်ရှာရတတ်တယ်။ ဒီအိတ်ထဲမှာတော့ ဒီစာအုပ်လေး ရှိတယ်။

၇။ memory stick ။ အချက်အလက်တွေ လိုအပ်ရင် ကူးဖို့ ပေးဖို့။ မပျောက်အောင် သတိထားရတယ်။

၈။ သောက်ဆေးအချို့။ 

၉။ ဆံပင်စည်းတဲ့ ကွင်းလေးတစ်ခု လိုရမယ်ရ။

၁၀။ စာမူခ ထည့်ထားတဲ့ စာအိတ်တွေ။ စာမူခရလာရင် သတ်သတ်မှတ်မှတ် သိမ်းထားလေ့ ရှိပါတယ်။ အခုတလောတော့ ရလာရင် ပိုက်ဆံအိတ်ထဲက မထုတ်မိပဲ အသုံးစရိတ်ထဲ ထည့်မိသွားလို့။ 

၁၁။  လက်ကိုင်ဖုန်း။ iPhone 3GS အဟောင်းလေးပါ။ (သနားစရာ)

၁၂။ နေကာမျက်မှန်ထည့်ထားတဲ့ အိတ်ပန်းရောင်လေး။ အဲဒီအိတ်ကလည်း အလှပြင်ပစ္စည်း ထည့်တဲ့အိတ်မျိုးပါပဲ။ အဲဒီအထဲကို ကြုံသလို မျက်မှန်ကို ထည့်ထားတာ။ အလှအပအတွက် တပ်လေ့တော့ သိပ်မရှိပါဘူး။ (မျက်မှန်ထက် ပိုလှပတဲ့ မျက်လုံးတွေကို ဖုံးအုပ်ထားလို့ ဘယ်ဖြစ်မလဲနော့ :P) နေပူတဲ့နေ့တွေမှာ လမ်းမကို ကြည့်ရတာ မျက်စိကျိန်းလို့ ဆောင်ထားတာ။ 

၁၃။ ခေါက်ထီးတစ်ချောင်း ပါလေ့ရှိပါတယ်။ နေပူလည်းမခံနိုင်၊ မိုးရွာလည်းမခံနိုင်လို့ပါ။ ဓာတ်ပုံထဲမှာတော့ မပါဘူး။ 

iPad ကို လေးလို့ အမြဲသယ်လေ့မရှိဘူး။ သုံးစရာရှိလို့ သယ်ရင်လည်း အိတ်ထဲမှာ မထည့်ပဲ သပ်သပ် ကိုင်ပါတယ်။ ကွန်ပျူတာ ယူရင်လည်း ကွန်ပျူတာအိတ်နဲ့ သီးသန့် ထည့်ပါတယ်။

စင်ကာပူမှာ အိတ်ထဲမှာပါတဲ့ ပစ္စည်းတွေနဲ့ မြန်မာပြည်က အိတ်ထဲမှာပါတဲ့ အရာတွေ ဘာကွာလဲ။ ယှဉ်ကြည့်နိုင်ပါပြီ။ :)

P.S. ဒါနဲ့ အိတ်ပွင့်လေသောအခါ ဆိုတာက ဆရာအောင်လင်းရဲ့ ရင်ပွင့်လေသောအခါ ဆိုတဲ့ ဝတ္ထုခေါင်းစဉ်ကို သတိရလို့။

Expand..

Summary..

မြန်မာဘလော့ဂ်များ ဘယ်ဆီဘယ်ဝယ်ဘယ်ပုံဘယ်နှယ်

မြန်မာဘလော့ဂ်များ ဘယ်ဆီဘယ်ဝယ်ဘယ်ပုံဘယ်နှယ်

၂၀၀၇ စက်တင်ဘာ ၁ ရက်တွင် ဘလော့ဂ်ဒေးကျင်းပနေသော ဘလော့ဂါများ

အင်တာနက်ကို စတင် သုံးစွဲခဲ့တာ ၂၀၀၁ ခုနှစ် ဂျူလိုင်လမှာ စင်ကာပူကို ရောက်တဲ့အချိန်က စတယ် ဆိုပေမဲ့ လူမှုကွန်ယက်တွေထဲမှာ နာမည်တစ်ခု ဖန်တီးပြီး လှုပ်ရှားသက်ဝင်ခဲ့တာက ၂၀၀၅ ခုနှစ်မှာပါ။ အင်တာနက်ထဲမှာ ကျွန်မအများဆုံး အသုံးပြုဖြစ်တဲ့ စာမျက်နှာတွေကတော့ google.com ရှာဖွေရေးစနစ်ရယ် အစပိုင်းက hotmail နောက် yahoo နဲ့ အခုလက်ရှိတော့ gmail ဆက်သွယ်ရေးစနစ်တွေပါ။ နောက်တော့ blogspot နဲ့ နောက်ဆုံး facebook လူမှုကွန်ယက်တွေကို အချိန်အတော် ခွဲဝေပေးဖြစ်ခဲ့ပါတယ်။

မရေရာတဲ့ နိုင်ငံရေးအခြေအနေတွေကြောင့်ရော၊ ကိုယ်ပိုင်လွတ်လပ်ခွင့် ရှိချင်တာကြောင့်ရော၊ အများနဲ့သက်ဆိုင်နေတဲ့ ကိုယ့်အလုပ်အကိုင်နဲ့ ခပ်ကင်းကင်းဖြစ်အောင်ရော ပန်ဒိုရာ ဆိုတဲ့ အမည်ကို စသုံးချိန်မှာတော့ အလွယ်တကူမှတ်မိနိုင်ပြီး ဘယ်နိုင်ငံက ဘယ်သူဘယ်ဝါလို့ ခွဲခြားမှုမရှိနိုင်တဲ့ nick name တစ်ခုလို့သာ မှတ်ယူခဲ့ပါတယ်။ ကလောင်နာမည်တစ်ခုအနေနဲ့ စာရေးသားမယ်လို့ မရည်ရွယ်ခဲ့ပါ။  ၂၀၀၅ ခုနှစ်လောက်မှာ “မောင်း” လို့လည်း အမည်ရ “မှုန်ရွှေရည်” လို့လည်းခေါ်တဲ့ မြန်မာဝက်ဘ်ဆိုက်တစ်ခုရယ်။ “ပလန်းနက် (Planet) ဖိုရမ်” ရယ်မှာ ပန်ဒိုရာ နာမည်နဲ့ အကောင့်တွေဖွင့်ခဲ့တယ်။

ကျွန်မဟာ တက်ကြွတဲ့ ဖိုရမ်မာတစ်ဦး မဟုတ်ခဲ့ပေမဲ့ ဖိုရမ်တွေမှာ သူများတွေရေးခဲ့တာကိုတော့ စိတ်ဝင်စားမိပါတယ်။ အပြန်အလှန်ပြောစကားတွေကြားမှာ ကိုယ့်နိုင်ငံရဲ့ အခြေအနေတွေ၊ လူမှုဘဝတွေ၊ လူတွေရဲ့ တွေးခေါ်ယူဆပုံတွေကို စူးစမ်းမိပါတယ်။ အဲဒီမှာ ကျွန်မ မမီလိုက်တဲ့ အချိန်က ပုဂံ ဖိုရမ်ဆိုတာ အတော်ကို သက်ဝင်စည်ကားခဲ့တဲ့ နေရာတစ်ခုလို့ ကြားခဲ့ရပါတယ်။ အဲဒီဖိုရမ် ပျက်သွားတဲ့အခါ အတော်များများဟာ ပလန်းနက်ဖိုရမ် ကို ပြောင်းရွှေ့လာခဲ့ကြတယ်။  ပလန်းနက်ထဲမှာတော့ ညီလင်းဆက်၊ မေဓာဝီ၊ ကယ်လ်ဗင်၊ lion slayer၊ နတ်ဆိုး အစရှိတဲ့ ဖိုရမ်မာတွေရဲ့ အရေးအသားတွေကို တွေ့နေရပါတယ်။ အဲဒီတုန်းက ဖိုရမ်တချို့မှာ ဇော်ဂျီဖောင့်ကို တွင်တွင်ကျယ်ကျယ် မသုံးကြသေးဘူး။ ကျွန်မကလည်း မြန်မာစာကို win စနစ်ကနေ ရိုက်တတ်ခဲ့တာမို့ စာရိုက်ရတာတော့ သိပ်အခက်အခဲမရှိခဲ့ပါဘူး။

နောက်တော့ ပလန်းနက်ဖိုရမ်မှာ ဘာသာရေးနဲ့ ပတ်သက်တဲ့ ငြင်းခုန်မှုတွေ ဆူပွက်လာခဲ့ပါတယ်။ အဲဒီအချိန်မှာ တစ်ယောက်ယောက်က hack လိုက်တယ်ထင်ပါတယ်။ ဖိုရမ်ကြီး ဒေါင်းသွားပါတယ်။ ပြန်ပေါ်လာတော့ ပို့စ်တွေအများကြီး ပျောက်ကုန်တယ်။ The day after tomorrow ရုပ်ရှင်ထဲက ရေခဲခေတ်ကို ပြန်ရောက်သွားသလို အားလုံးဟာ ရှင်းလင်းသွားတယ်။ ဒီလိုနဲ့ ဖိုရမ်မာတွေဟာ အားကြိုးမာန်တက် ပြန်ရေးကြပါသေးတယ်။ နောက်တော့ အဲဒီလို အကြိမ်ကြိမ် ဒေါင်းရင်း ပျောက်ရင်းနဲ့ စိတ်ညစ်လာကြတယ်ထင်ပါတယ်။ အခြားဖိုရမ်တွေကို ရွှေ့ပြောင်းကုန်ကြတယ်။

ပဒုမ္မာ၊ နေးတစ်ဗ် စတဲ့ဖိုရမ်တွေ အသီးသီးပေါ်လာပါတယ်။ ရတနာ ဖိုရမ်ကတော့ ပလန်းနက် နဲ့ အချိန်အတူတူလောက်ကတည်းက ပေါ်နေတာလို့ထင်ပါတယ်။  ရတနာဖိုရမ်မှာ လူသိပ်မများတာနဲ့ ကျွန်မက သွားရေးဖြစ်ပါတယ်။ ကိုယ်ရေးထားတဲ့ ကဗျာတွေ၊ အက်ဆေးတွေကို အဲဒီမှာ တင်ပြီး ဝါသနာပါသူတွေနဲ့ ဝေမျှဖတ်ခဲ့တယ်။ ပန်ဒိုရာဆိုတဲ့ နာမည်နဲ့ စာပေလက်ရာတွေ ပြန်ရေးဖြစ်တာ အဲဒီအချိန်က အစောဆုံးလို့ပြောလို့ရမယ်။ အခုတော့ ရတနာဖိုရမ် မရှိတော့ပါဘူး။ အဲဒီက မိတ်ဆွေအတော်များများလည်း အဆက်အသွယ်တွေ ပြတ်သွားကြပါပြီ။  မြန်မာကျူးပစ် ဖိုရမ်ဟာလည်း ထင်ရှားပါတယ်။ အဲဒီမှာ အကောင့်တစ်ခု ဖန်တီးဖြစ်ပေမယ့် ဖတ်ရုံပဲဖတ်ဖြစ်ပါတယ်။ မြန်မာကျူးပစ်ဟာ အခုအထိလည်း ဆက်လက်ရှင်သန်နေတယ်လို့ ထင်ပါတယ်။ အဲဒီက ထုတ်တဲ့ အီးဘွတ်ခ်တွေ အတော်များများရှိပါတယ်။ ဒီကြားထဲမှာ မြန်မာတီးရှော့ပ် ဆိုတဲ့ဖိုရမ်ဟာ နိုင်ငံရေးအကြောင်းအရာတွေ ဆွေးနွေးပြီး အတော် အသက်ဝင်ခဲ့ပါသေးတယ်။ ရည်ရွယ်ချက်တစ်ခုထားပြီး ဆွေးနွေးဖလှယ်ကြတဲ့ ဖိုရမ်တွေလည်း ပေါ်လာပါတယ်။ ဥပမာ ပြောရရင် မြန်မာအန်ဂျီအိုများ ဖိုရမ်ပါ။

စာပေနဲ့ပတ်သက်လို့တော့ အိပ်မက်၊ ချယ်ရီသစ္စာ စတဲ့ ဝက်ဘ်ဆိုက်တွေကို သတိထားခဲ့မိပါတယ်။ အဲဒီဝက်ဘ်ဆိုက်တွေမှာ ဝတ္ထု၊ ကဗျာ၊ အက်ဆေး၊ ဆောင်းပါးတွေ၊ ဘာသာပြန်လက်ရာတွေကို တွေ့ရပါတယ်။ ချယ်ရီသစ္စာက အီးဘွတ်ခ်တွေ ထုတ်ခဲ့ပါတယ်။ စင်ကာပူအခြေပြု သံလွင်အိပ်မက် အင်တာနက်မဂ္ဂဇင်းဟာ ၂၀၀၄ ခုနှစ်ကတည်းက တည်ထောင်ခဲ့တဲ့ မဂ္ဂဇင်းပါ။ မာယာမဂ္ဂဇင်း၊ ကောင်းကင်၊ နေ့သစ်၊ မိုးမခ၊ စတဲ့ ပြည်ပအခြေစိုက် အင်တာနက် ဂျာနယ်၊ မဂ္ဂဇင်းတွေမှာလည်း စာပေလက်ရာတွေ အများအပြားကို တွေ့နိုင်ပါတယ်။ နောက်ပိုင်းတော့ ဖွဲ့တည်ရာ၊ စာပန်းချီ၊ လောကအလှ တို့ကိုလည်း ဖတ်ရှုသူ များလာပါတယ်။ အီးဘွတ်ခ် အနေနဲ့ရော အွန်လိုင်းအနေနဲ့ပါ စာပေမဂ္ဂဇင်းတွေ ပေါ်လာခဲ့ပါတယ်။ ပျောက်သူတွေလည်း ပျောက်သွားကြပါတယ်။ အခုနောက်ပိုင်းတော့ ရွှေဒေါင်းတောင်၊ မျက်ရှု၊ ခရမ်းရိပ်၊ ရသကမ်းခြေ လပွတ္တာအွန်လိုင်းမဂ္ဂဇင်း စတာတွေ ဆက်လက်ထွန်းကားနေတာကို တွေ့နိုင်ပါတယ်။

ဖိုရမ်တွေ၊ ဝက်ဘ်ဆိုက်တွေကို ဖတ်ရှုနေချိန်မှာ ဘလော့ဂ်တွေကို စပြီး သတိထားမိပါတယ်။ မောင်လှ၊ ညီလင်းဆက်၊ မေဓာဝီ၊ နိုင်းနိုင်းစနေ၊ အိမ့်ချမ်းမြေ့၊ စိုးဇေယျထွန်း၊ ဟနစံ အစရှိတဲ့ ဘလော့ဂါတွေဟာ ဘလော့ဂ်ထူထောင်ရာမှာ အတော် စောခဲ့ကြပါတယ် ။ ၂၀၀၆ ခုနှစ်ဝန်းကျင်မှာ ပေါ်လာတဲ့ ဘလော့ဂ်တွေဖြစ်ပါတယ်။ ကျွန်မကတော့ ၂၀၀၆ ဒီဇင်ဘာမှာ ဘလော့ဂ်စပေါ့မှာ pandora-and-pandora.blogspot.com ဆိုပြီး ဘလော့ဂ်တစ်ခု တည်ဆောက်ခဲ့ပါတယ်။ ဒါပေမယ့် ဘာစာမှ မတင်သေးဘဲ တခြားဘလော့ဂ်တွေကို လေ့လာနေခဲ့ပါတယ်။ ဘလော့ဂ်ပို့စ် ပထမဆုံး စတင်တဲ့ နေ့ကတော့ ၂၀၀၇ မတ်လ ၂၇ ရက်နေ့ဖြစ်ပါတယ်။

မြန်မာဘလော့ဂ်တွေ အများဆုံး အသုံးပြုကြတဲ့ ပလက်ဖောင်းတွေကတော့ blogspot  နဲ့ wordpress ပါ။ blogspot က user friendly ပိုဖြစ်တာမို့ အများစုက ဘလော့ဂ်စပေါ့ကို သုံးကြပါတယ်။ ဒါပေမယ့် ၂၀၀၇ ခုနှစ် စက်တင်ဘာ ရွှေဝါရောင်တော်လှန်ရေး အပြီးမှာတော့ ဘလော့ဂ်စပေါ့ကို မြန်မာပြည်က ကြည့်လို့မရအောင် ပိတ်လိုက်တာမို့ wordpress ကိုလည်း တချို့ ပြောင်းကုန်ကြပါတယ်။ တချို့လည်း ဒိုမိန်းနာမည်တွေ .com .net တွေ ဝယ်ကုန်ကြတယ်။ မြန်မာပြည်မှာ နေထိုင်သူတွေကလည်း proxy တွေသုံးကြ၊ ကျော်ကြ၊ ခွကြရပါတယ်။

စက်တင်ဘာ၂၀၀၇ မတိုင်ခင်ပေါ်ခဲ့တဲ့ ဘလော့ဂ်တွေကို ကြည့်ရင် အများစုက နာမည်ရင်းမသုံးစွဲတာကို တွေ့ရပါတယ်။ ဘလော့ဂ်အမျိုးအစားတွေဟာ သတင်း၊ စာပေ၊ နည်းပညာ၊ ဘာသာရေး၊ နိုင်ငံရေး၊ ဓာတ်ပုံ၊ နည်းပညာ၊ အထွေထွေ စသည်ဖြင့် စုံလင်ပါတယ်။ စာပေနဲ့ပတ်သက်ရင် အများစုဟာ ပရော်ဖက်ရှင်နယ်တွေ စာရေးဆရာတွေ မဟုတ်ကြဘဲ အပျော်ထမ်းရေးသူများသာ ဖြစ်ကြပါတယ်။ ချွင်းချက်အနေနဲ့တော့ ပြည်ပကို အကြောင်းအမျိုးမျိုးကြောင့် ရောက်နေတဲ့ (ဥပမာ ဆရာမ ဒေါ်မေငြိမ်းတို့လို) စာရေးဆရာ အချို့သာ ရှိပါတယ်။ အဲဒီအချိန်က လူအများစုဟာ အင်တာနက်သုံးတာ၊ ဘလော့ဂ်တည်ဆောက်တာ၊ နည်းပညာတွေ သုံးစွဲတာတွေကို မကျွမ်းကျင်ကြသူတွေ များတဲ့အတွက် နည်းပညာဝေမျှပေးတဲ့ ဘလော့ဂ်တွေ အများအပြားပေါ်လာပါတယ်။ မောင်လှ၊ ညီလင်းဆက်၊ စေတန်ဂေါ့၊ ရန်အောင် စသူတွေဟာ template တွေ၊ gadget တွေ တပ်ဆင်ပုံအတွက် အားထားရတဲ့ ဘလော့ဂါတွေပါ။

၂၀၀၇ ရွှေဝါရောင်တော်လှန်ရေးဟာ citizen journalist တွေလို့ပဲ ပြောပြော ဘလော့ဂါတွေလို့ပဲပြောပြော ပုံမှန်မီဒီယာလမ်းကြောင်းက မဟုတ်တဲ့ တစ်ဦးချင်းတစ်ယောက်ချင်း သတင်းဝေမျှသူတွေရဲ့ အခန်းကဏ္ဍကို မီးမောင်းထိုးပြခဲ့ပါတယ်။ ………

ပန်ဒိုရာ

၃၁.၈.၂၀၁၃

(နာမည်တွေမပြည့်စုံရင် အချက်တွေမတိကျရင် ကျေးဇူးပြုပြီး ဖြည့်စွက်ပေးပါ။ ဆက်လက်ပြီး ရွှေဝါရောင်တော်လှန်ရေးအပြီး ဘလော့ဂ်များ၊ ပိတ်ဆို့စဉ်ကာလက အခြားပလက်ဖောင်းများ၊ ညီလင်းဆက်ရဲ့ ဘလော့ဂ်ဂါစစ်တမ်း၊ ဘလော့ဂါတို့ရဲ့ လှုပ်ရှားမှုများ၊ ဘလော့ဂ်ဒေး၊ ဘလော့ဂ်ထဲက ဆုပေးပွဲများ၊ ထင်ရှားသူဘလော့ဂါများ၊ ဘလော့ဂ်နဲ့ ဖိုရမ်ဘာကွာသလဲ၊ အင်တာနက်စာပေဆိုတာ ရှိသလား အစရှိတဲ့ အကြောင်းအရာတွေကိုလည်း (ရေးချင်ရင်)ရေးသားသွားမှာမို့ မျှော်.. ဟော် ဟော်.. )

Expand..

Summary..

ဖိလစ်ပိုင်နိုင်ငံမှ ကဗျာဆရာမ စာရေးဆရာမ “ဂျင်းန်ဗီး အယ်လ် အာစန်ဂျို”

ဖိလစ်ပိုင်နိုင်ငံမှ ကဗျာဆရာမ စာရေးဆရာမ “ဂျင်းန်ဗီး အယ်လ် အာစန်ဂျို”

(မှတ်ချက်။ ။ ကြုံတွေ့ခဲ့တဲ့ ကဗျာဆရာတွေနဲ့ တွေ့ဆုံမေးမြန်းမှုနဲ့ သူတို့ရဲ့ လက်ရာအချို့ကို ဆက်လက်တင်ပြသွားပါမယ်။ မကြာခင်ကတော့ အီရတ်က “ဂူလာလာနိုရိ” နဲ့ နယူးဇီလန်က “ဂျက်ဖရီ ပါပရိုရာ ဟိုးလ်မန်း” တို့အကြောင်းကို ရေးသားခဲ့ပါတယ်။ အခုလို မိတ်ဆက်ပေးသွားမယ့် ကဗျာဆရာတွေ အားလုံးဟာ ဆုရသူတွေ၊ အကောင်းဆုံးတွေ၊ နာမည်အကြီးဆုံးတွေ ဟုတ်ချင်မှ ဟုတ်ကြပါမယ်။ ဟုတ်ရင်လည်း ဟုတ်ကြပါမယ်။ သေချာတာကတော့ သူတို့ဟာ သူတို့ရဲ့နိုင်ငံမှာ လက်တလော ကဗျာရေးသားနေဆဲ ယနေ့ခေတ် ကဗျာဆရာများ ဖြစ်ကြပါတယ်။ အခြားနိုင်ငံတွေရဲ့ ယနေ့ခေတ် ကဗျာလောကထဲမှာ သူလိုကိုယ်လို ရေးသားနေသူတို့ရဲ့ ဘဝ၊ ပြောပြချက်တွေနဲ့ လက်ရာတွေကို မိမိဘာသာ တစေ့တစောင်း ကြည့်ချင်လို့ လက်လှမ်းမီသလောက် မေးကြည့်ခြင်းသာ ဖြစ်ပါတယ်။ နောက်အကြောင်းရင်းတစ်ခုကတော့ မူရင်းစာရေးသူတွေနဲ့ ဆက်သွယ်နိုင်တဲ့ အခွင့်အလမ်းရချိန်မှာ တရားဝင်ခွင့်တောင်းပြီး ဘာသာပြန်ခြင်း အလေ့အထကို နှစ်သက်လို့လည်း ဖြစ်ပါတယ်။)


(photo by Ariel Manuel)

ဖိလစ်ပိုင်နိုင်ငံက ကဗျာဆရာမ၊ စာရေးဆရာမ၊ ဘာသာပြန်သူ တစ်ဦးဖြစ်တဲ့ ဂျင်းန်ဗီး အယ်လ် အာစန်ဂျို (Genevieve L. ASENJO)  ဟာ ကျေးလက်ဒေမှာ မွေးဖွားကြီးပြင်းခဲ့ပြီး ကဗျာကို ငယ်စဉ်ကတည်းက ယဉ်ပါးခဲ့ပါတယ်။ သူတို့ဆီက ကျေးလက်လူထုထဲမှာ ကဗျာစပ်ခြင်းနဲ့ ကဗျာရွတ်ခြင်းဆိုတာဟာ ရင်းနှီးကျွမ်းဝင်ပြီးသား အလေ့အထတစ်ခုဖြစ်တယ်လို့ ကျွန်မကို ပြောပြခဲ့ပါတယ်။ ကျေးလက် လူမှုရေး အခမ်းအနားတွေမှာ အမျိုးသား အမျိုးသမီးတွေဟာ လက်တန်း ကဗျာတွေကို အပြိုင်အဆိုင် ရွတ်ဆိုလေ့ရှိကြတဲ့ ဓလေ့ရှိတဲ့အကြောင်း သူက ကျွန်မကို ပြောပြပါတယ်။ ဒီလိုဓလေ့မျိုးဟာ ကျွန်မတို့ မြန်မာနိုင်ငံက ကျေးလက်ဒေသတွေနဲ့ တိုင်းရင်းသားအချို့မှာလည်း ရှိကြတယ်ဆိုတာ မှတ်သားဖူးတာမို့ ဗဟုသုတချင်း ဖလှယ်ဖြစ်ခဲ့ကြပါသေးတယ်။

ဂျင်းန်ရဲ့ စိတ်ဝင်စားဖို့အကောင်းဆုံး အချက်ကတော့ ကဗျာက သူ့ဘဝကို မြှင့်တင်ပေးပြီး အဆင့်အတန်းရှိတဲ့ အလုပ်အကိုင်တစ်ခုကိုပါ ဖန်တီးပေးခဲ့တယ် ဆိုတာပါပဲ။ သူ့ရဲ့ ကဗျာတွေကို တက္ကသိုလ်က နှစ်သက်သဘောကျတဲ့အတွက် သူဟာ တက္ကသိုလ်ဆရာမတစ်ဦး အဖြစ် အလုပ်ရခဲ့ပါတယ်။ သူ့ရဲ့ ကိုယ်ရေးရာဇဝင် အကျဉ်းချုပ်၊ သူ့ကို မေးမြန်းခဲ့တဲ့ အင်တာဗျူးနဲ့ သူ့ရဲ့ ထင်ရှားတဲ့ ကဗျာနှစ်ပုဒ်ကို မိတ်ဆက် တင်ပြလိုက်ပါတယ်။ အင်တာဗျူးကတော့ အိုင်အိုဝါတက္ကသိုလ် International Writing Program(IWP) မှာ ဆုံတွေ့ခဲ့တဲ့အခိုက် ဘော့စဝါနာက အာဖရိကန်ကဗျာဆရာမ တီဂျေဒီးမားနဲ့ ပန်ဒိုရာတို့က မေးမြန်းခဲ့တာဖြစ်ပါတယ်။

ဂျင်းန် ဟာ စာအုပ် ၄ အုပ် ရေးသားထုတ်ဝေခဲ့ပြီး ဖြစ်ပါတယ်။ ၂၀၁၁ ခုနှစ်မှာ ဖိလစ်ပိုင်နိုင်ငံရဲ့ အမျိုးသား စာအုပ်ဆု (National Book Award) ကို ချီးမြှင့်ခံခဲ့ရပါတယ်။ သူ့ရဲ့ ဝတ္ထုတိုတွေနဲ့ ကဗျာတွေဟာ မဂ္ဂဇင်းတွေမှာ၊ စုစည်းမှုတွေမှာ ဖော်ပြခံရပါတယ်။ ဂျင်းန် ဟာ ဖိလစ်ပိုင်ရဲ့ ဘာသာစကားတွေဖြစ်တဲ့ ကီနာရေ-အ၊ ဟီလီဂေနွန်နဲ့ ဖလစ်ပီနို ဘာသာတွေကို ဘာသာပြန်ဆိုပါတယ်။ Balay Sugidanun (Storytelling House) ရဲ့ တည်ထောင်သူဒါရိုက်တာတစ်ဦးလည်း ဖြစ်ပါတယ်။ De La Salle University-Manila ရဲ့ စာပေနဲ့တီထွင်ဖန်တီးစာရေးသားခြင်း ဌာနမှာ လက်ထောက်ပါမောက္ခတစ်ဦးအဖြစ် တာဝန်ထမ်းဆောင်နေပါတယ်။

မေး။    ။ဆရာမက စာရေးဆရာလည်းဖြစ်တယ် တက္ကသိုလ်ဆရာမ တစ်ယောက်လည်း ဖြစ်တယ် ဆိုတော့ ဘယ်အသက်မွေးဝမ်းကျောင်းကို အရင် စလုပ်ဖြစ်တာပါပဲ။ ဘယ်လိုများ လုပ်ခဲ့ပါသလဲ။
ဖြေ။     ။ကျွန်မ တက္ကသိုလ်ဆရာမ ဖြစ်လာရတာက စာရေးဆရာတစ်ယောက်မို့လို့ပါ။ ကျွန်မ ဆက်ပြီး စာရေးဖြစ်ပါတယ်။ ဘာကြောင့်လဲဆိုတော့ တက္ကသိုလ်အတွက်ရော တက္ကသိုလ်ထဲမှာပါ လူထုနဲ့ ဆက်သွယ်မှုတွေ သုတေသနတွေ လုပ်ရလို့ပါ။ အလုပ်ရဖို့၊ အလုပ်သက်တမ်းတိုးဖို့၊ ရာထူးတက်ဖို့နဲ့ အမြဲခန့်ရာထူးကို ရဖို့ စာရေးသားထုတ်ဝေဖို့ လိုပါတယ်။ ဒါကြောင့် တချို့ အခြေအနေတွေက လွဲလို့ ကျွန်မဟာ ကိုယ်လုပ်ချင်တဲ့ အလုပ်ကို လုပ်နေရတယ်လို့ ခံစားရပါတယ်။ ကျောင်းအလုပ်တွေနဲ့ ပင်ပန်းနေတဲ့အခါမှာတော့ စာရေးဖို့ လိုအပ်တဲ့ အာရုံစူးစိုက်မှုအတွက် အချိန်ပေးရတာ အားမွေးရတာ သိပ်ကို ခက်ခဲပါတယ်။

မေး။    ။ဘာကြောင့် ဘယ်သူ့အတွက် ဆရာမ စာရေးပါသလဲ။
ဖြေ။     ။ ကျွန်မ စာတွေကို အတိတ်မှတ်တမ်းနဲ့ အနာဂတ်အမြင်အဖြစ် ရေးပါတယ်။ ဒါကြောင့်မို့ စာရေးခြင်းဆိုတာ ကျွန်မအတွက် အဓိပ္ပာယ်ရှိပြီး ထင်ရှားတဲ့ အတိတ်က ဇာတ်လမ်းတွေကို မှတ်မိခြင်းနဲ့ အဓိပ္ပာယ်ဖော်ခြင်း လုပ်ရပ်တစ်ခုဖြစ်ပါတယ်။ ဥပမာ ငယ်ဘဝ၊ ဒေသရဲ့သမိုင်းတွေ၊ နေရာတွေ လိုမျိုးပေါ့။ ဒီတော့ ဒါတွေဟာ အဆက်မပြတ်ဖြစ်လာပြီး ကျွန်မတို့ဟာ အတွေးတွေ အပြုအမူတွေရဲ့ ပုံစံကို ခြေရာခံနိုင်မယ်။ ခေတ်ပြိုင် စာဖတ်သူတွေကလည်း အဲဒီလို သတိရခြင်းတွေမှာ ပါဝင်လာနိုင်မယ် ဒါမှမဟုတ် တူညီတဲ့ ဘာသာစကားနဲ့ အမှတ်တရတွေကတဆင့် လူ့အဖွဲ့အစည်းတွေဟာ ရှေ့ဆက်လာမယ်လို့ မျှော်လင့်ပါတယ်။  အနာဂတ်အမြင်လို့ ပြောရခြင်းကတော့...................


ဘာသာပြန်ကဗျာ ၂ ပုဒ်အပါအဝင် အပြည့်အစုံကို ရသကမ်းခြေ လပွတ္တာ အွန်လိုင်းမဂ္ဂဇင်းမှာ ဆက်ဖတ်ပါ။


http://www.lptmagazine.net/2013/07/blog-post_28.html

Expand..

Summary..

သူရဲကောင်းအဲလက်စ်

သူရဲကောင်းအဲလက်စ်


ကျား.. ကျားကြီး… အမျိုးသမီးတစ်ယောက်ရဲ့ စူးစူးဝါးဝါး အော်ဟစ်သံကို ကြားလိုက်ရတယ်။ ရွာထဲကို ကျားတစ်ကောင် ဝင်လာလို့တဲ့။  ကလေးငယ်တွေ အာခေါင်ခြစ်ပြီး အော်ငိုကြတယ်။ တချို့လည်း ဘာမှန်းမသိ သူများငိုသံကြားလို့ လိုက်ငိုကြတယ်။ အားလုံး ကစင့်ကလျား ပြေးလွှားကြ။ ကျားဆိုတာ သွား ပါတယ်။ ကျားကိုက်တယ်ဆိုတာ အပေါက်ကလေးနဲ့ မဟုတ်ဘူး။ နာတာရှည်လည်း မဟုတ်ဘူး။ ကျား ဆိုမှတော့ ကူးစက်ရောဂါလည်း မဟုတ်ဘူး။ လူသူအများဟာ အိမ်ကြီးအိမ်ကောင်းတွေပေါ် သစ်ပင်တွေပေါ် တက်မိတက်ရာ တက်ပြေးကြ။

ကျားက တကယ်တော့ အိမ်ကြိုအိမ်ကြားမှာ တစ်လှမ်းချင်း လှမ်းနေတာ။ သူဟာ အားနည်းကျုံလှီနေပုံ ပေါ်တယ်။ သူ့ရဲ့မျက်နှာမှာ မောပန်းမှု၊ ဆာလောင်မှု၊ နာကျင်မှု၊ ဘာကိုမှ မယုံကြည်နိုင်မှု၊ စိတ်ဓာတ်ကျဆင်းမှု၊ မျှော်လင့်ချက်ကင်းမဲ့မှု..။

ကျားရဲ့ရှေ့မှောက်ကို ဗြုန်းဆို အရိပ်တခုကျလာတယ်။ အားအင်ပြည့်ဖြိုး ခွန်အားတိုးကာ ပြတ်သားရဲရင့်တဲ့ အကြည့်တွေနဲ့ ကေ-သ-ရာ-ဇာ ခြင်္သေ့။ တစ်ကောင်တည်း.. ဒါပေမယ့် ခြင်္သေ့။ ခြင်္သေ့စစ်စစ်။ ရေမရောဘူး။ မြက်မစားဘူး။ သက်သတ်လွတ်မစားဘူး။ သူက ကျားကို နှစ်ကိုယ်ကြား ပြောလိုက်တယ်။

မင်းဟာ အန္တရာယ်ကောင်ပဲ။ ရွာထဲမှာ သားရဲတိရစ္ဆာန်တစ်ကောင် ဝင်နေတာ ရွာသူရွာသားတွေအတွက် အန္တရာယ်ရှိတယ်။ မင်းကို သုတ်သင်ပစ်ရမယ်

ဗျာ

ကျားက မျက်လုံးကြီးပြူးသွားတယ်။ မေးချင်နေတယ် - နင်ကရော သားရဲတိရိစ္ဆာန် မဟုတ်လို့လား ခြင်္သေ့ရဲ့။  မေးဖို့အချိန်မရလိုက်တဲ့ တိုက်ပွဲက သိပ်မကြာပါဘူး။ မကြာခင်ပဲ ကျားဟာ မြေပေါ်မှာ ဘုန်းဘုန်းလဲကျပြီး သွေးအိုင်ထဲမှာ မလှုပ်မယှက်။

ခြင်္သေ့က အားလုံးကို သဘောကောင်းတဲ့ အပြုံးနဲ့ ပြုံးပြပြီး အေးအေးဆေးဆေး ရပ်နေတော့ လူတွေက အံ့သြသွားကြတယ်။ မရဲတရဲ အနားကပ်လာတယ်။ ကျေးဇူးတင်လိုက်တာ ခြင်္သေ့ကြီးရယ်..။ လူတွေက ပြောတော့ ခေါင်းလေးညိတ်ပြတယ်။ ရပါတယ်ဗျာ.. ဒါက ကျွန်တော့်အတွက် အသေးအဖွဲပါ။ ခြင်္သေ့ဟာ လူတွေနဲ့ သိပ်ယဉ်ပါးနေပုံရတယ်။

ဟာ… ဒါ.. ဒါ.. အဲလက်စ် မဟုတ်လား

ကလေးတစ်ယောက်က ပြောလိုက်တယ်။ အဲလက်စ် အဲလက်စ်…. မဂဒါစကာ ရုပ်ရှင်ထဲက အဲလက်စ်၊ နယူးယောက်မြို့ စင်ထရယ်ပါ့ခ် ပန်းခြံထဲက တိရိစ္ဆာန်ရုံမှာ လူတွေကို ဖျော်ဖြေမှုပေးတဲ့ အဲလက်စ်။ ဟုတ်တာပေါ့ ဒါ အဲလက်စ် အစစ်ပဲ။

အဲလက်စ်ဆိုတာ နှယ်နှယ်ရရမှ မဟုတ်ပဲ။ ဆယ်လစ်ဘရစ်တီပဲ။ ရုပ်ရှင်မင်းသားပဲ။ အခုတော့ ရွာရဲ့ ဟီးရိုးပဲ။ လူတွေဟာ အဲလက်စ်ကို ပျော်ပျော်ရွှင်ရွှင် လက်ဆွဲနှုတ်ဆက်ကြ။ တွဲပြီး ဓာတ်ပုံရိုက်သူကရိုက်။ မကြာမီ အိုးစည်ဗုံမောင်းတွေနဲ့ ထွက်တဲ့လူက ထွက်လာတယ်။ ရွာသားတွေကို သားရဲတိရစ္ဆာန်ရန်ကနေ ကယ်တင်ပေးတဲ့ ယဉ်ပါးတဲ့ခြင်္သေ့ကို ဂုဏ်ပြုအခမ်းအနားတော့ ကျင်းပမှဖြစ်မယ်။ တစ်ယောက်ယောက်က ဆော်သြလိုက်တယ်။   တစ်ယောက်ယောက်က စပွန်ဆာပေးလိုက်တယ်။ တစ်ယောက်ယောက်က အကောင်အထည် ဖော်လိုက်တယ်။ တစ်ယောက်ယောက်မကတွေက နောက်ကလိုက်ပါလာကြတယ်။ ဒီလိုနဲ့ ပွဲတစ်ခုခု ဖြစ်လာတယ်။

အဲလက်စ်ဟာ လည်ဆံမွှေးတွေကို သံလွင်ဆီလိမ်း သပ်သပ်ရပ်ရပ် ဖြီးသင်ပြီးတော့ ဂုဏ်ပြုခံဖို့ မတ်တတ်လေး ရပ်စောင့်နေပါတယ်။ သူ့ဘေးတဖက်တချက်ကို ညိုဝါရောင်ဝတ်စုံဆင်မြန်းပြီး ဆံပင်တွေဖားလျားချထားတဲ့ မိန်းမပျိုလေးတွေ ရောက်လာတယ်။ ဒါ သူ့ရဲ့အရောင်အသွေး အသွင်သဏ္ဍာန်လို ဆင်ယင်ပြီး သူ့ရဲ့ဂုဏ်ဝါကို ခမ်းနားသထက်ခန်းနားအောင် ဝန်းရံပေးထားမယ့် ရည်ရွယ်ချက်ဖြစ်တယ်။

လက်ဆွဲနှုတ်ဆက်ချင်သူတွေများလွန်းလို့ ခန်းမတစ်ခုလုံးပြည့်လျှံသွားတယ်။ အဲလက်စ်ရဲ့လက်ဖဝါးတွေနဲ့ ထိတို့ခွင့်ရဖို့အရေး အဲလက်စ်နဲ့ တွဲပြီး ဓာတ်ပုံရိုက်ဖို့အရေး တန်းစီစောင့်ဆိုင်းကြရတယ်။ လူတန်းရှည်ကြီးဘေးမှာ အမောပြေ အဆာပြေ ရေသန့်ဗူး ဆေးလိပ်ကွမ်းယာ ရောင်းသူတွေ အလျှိုလျှို ပေါ်ပေါက်လာတယ်။ ဝယ်သူရှိရင် ရောင်းသူရှိ အရောင်းအဝယ်ရှိရာ ဈေးကွက်ရှိ ဆိုသလိုပါပဲ။

ဈေးကွက်ကချဲ့ထွင်လာလိုက်တာ တန်းစီသူတွေက နေရာရောင်းစားလာကြတဲ့ အထိပဲ။ တချို့ကလည်း တစ်မိသားစုလုံး ညအိပ်ညနေ နှစ်ခါ သုံးခါပြန် တန်းစီရင်း ဝင်ငွေရှာကြတယ်။ တချို့ကလည်း အဲလက်စ်ကို ဂုဏ်ပြုတဲ့ပွဲကိုမှ မသွားရင် ခေတ်နောက်ကျမလိုလို ကြော်ငြာတွေဝင်ပြီး ဒီနေရာကို စည်ကားသထက် စည်ကားအောင် လုပ်ကြတယ်။
အားနာတတ်သူ ယဉ်ကျေးတဲ့ ခြင်္သေ့ကလေးအဲလက်စ် ဟာ လူငွေ့တွေကြား ချွေးတွေပျံလာတယ်။ ဆွဲယမ်းနှုတ်ဆက်ရလွန်းလို့ လက်တွေ နာလာတယ်။ ပြုံးဖြဲထားရလို့ ပါးစပ်တွေ ညောင်းလာတယ်။ အဲဒီထက်ဆိုးတာက ဗိုက်ဆာလာတယ်။ ဗိုက်ဆာတာက အရေးမကြီးဘူး။ ဆာဆာနဲ့ တောစိတ်တောင်စိတ်တွေပေါက်ပြီး  လူအုပ်ထဲ ကိုက်ချင်ခဲချင်စိတ် ဝင်လာမှ ဟုတ်ပေ့ဖြစ်မယ်။  အဲလက်စ် စိတ်ညစ်လာတယ်။

လူတွေကြားမှာ ပွဲဆိုတာက စလိုက်ရင် တော်တော်နဲ့ ဘယ်အဆုံးသတ်ပါ့မလဲ။ လှည်းနေလှေအောင်း မြင်းဇောင်းမကျန် လူထုလူတန်းစား အလွှာအသီးသီးက ဒီပွဲကို လာနေကြတယ် ဆိုတာသိတော့ စီးပွားရေး နိုင်ငံရေး အပေးအယူ အရောင်းအဝယ် ညှိနှိုင်းချိတ်ဆက်ချင်သူတွေကလည်း ဒီနေရာကို မျက်စိကျလာတယ်။

ဂွင်သမားတွေ ကျင်လည်ကျက်စားလာတော့ တချို့တွေလည်း ပွဲထဲမှာ ဆိုင်ရာဆိုင်ရာတွေကို လိုက်ရှာပြီး မတော်တဆတွေ့သလိုလိုနဲ့ ဈေးစကားတွေ အပြေးအလွှားပြောကြတယ်။ တချို့လည်း ဒီရည်ရွယ်ချက်နဲ့ပဲ ပွဲကိုလာကြတယ်။ တချို့က အဲလက်စ်ကိုတောင် အလေးမထားတော့ဘူး။ အဲလက်စ်ကို မမြင်ဘဲ အဲလက်စ်ဘေးက ညိုဝါဝတ်စုံနဲ့ မိန်းကလေးတွေကို အဲလက်စ်အမှတ်နဲ့ ဝတ်ကျေတန်းကျေ နှုတ်ဆက်ပြီး ကပျာကယာ ထွက်သွားကြတယ်။

အချိန်တွေ တရွေ့ရွေ့ကြာလာတယ်။ ဂွင်တွေ တဖြည်းဖြည်းများလာတယ်။ အလဲအလှယ် အပေးအယူတွေ ပိုပို အလုပ်ဖြစ်လာတယ်။ အတော်များများဟာ အဲလက်စ်ကို အမှတ်မဲ့ ကျော်ဖြတ်ကုန်ကြတယ်။ အဲလက်စ်ဟာ ဒီပွဲက ငါ့အတွက်မှ ဟုတ်ရဲ့လားလို့ သူ့ရဲ့အရေးပါမှုကို သူ့ဘာသာ သံသယဖြစ်လာတယ်။ မတ်တတ်ရပ်နေရာက နောက်ကို တစ်လှမ်းဆုတ်ကြည့်တယ်။ လူတွေက သူ့ကို ကျော်ဖြတ်သွားကြတယ်။ ပွဲကတော့ ဆက်လက် စည်ကားလျက်။ ခပ်ဝေးဝေး ထောင့်ကလေးကို အသာ သွားနေလိုက်တယ်။ ဘယ်သူမှ သတိမထားမိဘူး။ ပွဲက စည်ကားလျက်ပါပဲ။ ခန်းမရဲ့ အပြင်ဘက်ကို တဖြည်းဖြည်း ဆုတ်ခွာလာခဲ့တယ်။ လူသူဆူပူအသံတွေ ကြိတ်ကြိတ်တိုးနေဆဲ ကျန်ခဲ့တယ်။

ဆုတ်တယ်။ ဆက်ပြီး ဆုတ်ခွာတယ်။ ရွာလယ်ခေါင်ကနေ ရွာဆင်ခြေဖုံးအထိ။ ရွာရဲ့ နယ်နိမိတ်ဆုံး တောစပ်လို့ ထင်ရတဲ့ နေရာအထိ။

ဟူး.. အခုမှပဲ တောကို ရောက်တော့တယ်။ လူတွေနဲ့ ဝေး.. ဝေး.. ဝေးတဲ့နယ်မြေ….ဟိုက်..

အဲလက်စ် အံ့သြစိတ်ပျက်သွားရတယ်။ တောဆိုတာ ရှိမှ မရှိတော့ပဲ။ ရွာက တဖြည်းဖြည်း ချဲ့ထွင်ထားလိုက်တာ နေရာတကာ လူနေအိမ်ခြေတွေနဲ့ချည်းပဲ။ သဘာဝပေါက်ပင်တွေလည်း ခပ်ကျဲကျဲပဲ ရှိတော့တယ်။ ဘယ်နေရာကို ဦးတည်ဦးတည် လူနေရပ်ကွက်တွေပဲ ဖြစ်နေလို့ အဲလက်စ် လည်း စိတ်ပျက်မိတယ်။ ကိုင်း.. သူ ဘယ်လိုဆက်လက်ပြီး ရှင်သန်ရမလဲ။ အဲလက်စ်က လူတွေကြားကို ပြန်မသွားတော့ဘူး။ သူ့ကိုဗဟိုပြုတဲ့ ပွဲတစ်ခုဟာ သူမရှိတောင်မှ ဆက်ဖြစ်နေသေးတဲ့ နေရာကို သူမပြန်ချင်တော့ဘူး။

အဲဒီလိုနဲ့ ရက်မှ လ၊ လမှ နှစ် ကူးသွားတယ် ထင်ပါတယ်။ အချိန်တွေ ဘယ်လောက် ကြာသွားသလဲ မသိတော့ဘူး။ သူတပါးကို သတ်ဖြတ်စားသောက်ခြင်းမပြုဖို့ ငယ်ငယ်ကတည်းက တိရစ္ဆာန်ရုံမှာ လေ့ကျင့်ခံထားရတဲ့ အဲလက်စ်ဟာ တစ်နေ့တစ်နေ့ ပံ့သကူသားကိုသာ  အိမ်ကြိုအိမ်ကြား မီးဖိုချောင်တွေနား ခိုးကြောင်ခိုးဝှက် ရှာဖွှေ စားသောက်ရင်း အသက်ဆက်တယ်ဆိုရုံ ဆက်နေရတယ်။

တနေ့။ ကံဆိုးတဲ့နေ့၊ မိုးမှောင်တဲ့နေ့၊ ရုပ်ရှင်ထဲမှာသာဆိုရင် ရေအိုးတို့ ဖန်ခွက်တို့ ကျကွဲမယ့်နေ့။

မောပန်းမှု၊ ဆာလောင်မှု၊ နာကျင်မှု၊ ဘာကိုမှ မယုံကြည်နိုင်မှု၊ စိတ်ဓာတ်ကျဆင်းမှု၊ မျှော်လင့်ချက်ကင်းမဲ့မှု တွေ ရောပြွန်းနေတဲ့ မျက်နှာနဲ့  အဲလက်စ်ဟာ အိမ်တစ်အိမ်ရဲ့ ရေကပြင်အောက်ကို ချဉ်းကပ်လာတယ်။ အိမ်အောက်မှာ တစ်ခုခုကျလို့ ဆင်းကောက်နေတဲ့ လူတစ်ယောက်နဲ့ မမျှော်လင့်ပဲ ပက်ပင်းတိုးတယ်။

ခြင်္သေ့.. ခြင်္သေ့ကြီး … စူးစူးဝါးဝါး အော်ဟစ်သံကို ကြားလိုက်ရတယ်။ ကလေးငယ်တွေ အာခေါင်ခြစ်ပြီး အော်ငိုကြတယ်။ တချို့လည်း ဘာမှန်းမသိ သူများငိုသံကြားလို့ လိုက်ငိုကြတယ်။ အားလုံး ကစင့်ကလျား ပြေးလွှားကြ။ လူသူအများဟာ အိမ်ကြီးအိမ်ကောင်းတွေပေါ် သစ်ပင်တွေပေါ် တက်မိတက်ရာ တက်ပြေးကြ။

အဲလက်စ်ရဲ့ရှေ့မှောက်ကို ဗြုန်းဆို အရိပ်တခုကျလာတယ်။ အားအင်ပြည့်ဖြိုး ခွန်အားတိုးကာ ပြတ်သားရဲရင့်တဲ့ အကြည့်တွေနဲ့ ကျားသစ်တစ်ကောင်။  သူက အဲလက်စ်ကို နှစ်ကိုယ်ကြား ပြောလိုက်တယ်။

မင်းဟာ အန္တရာယ်ကောင်ပဲ။ ရွာထဲမှာ သားရဲတိရစ္ဆာန်တစ်ကောင် ဝင်နေတာ ရွာသူရွာသားတွေအတွက် အန္တရာယ်ရှိတယ်။ မင်းကို သုတ်သင်ပစ်ရမယ်။

ဗျာ

အဲလက်စ် မျက်လုံးကြီးပြူးသွားတယ်။ မေးချင်နေတယ် - နင်ကရော သားရဲတိရိစ္ဆာန်မဟုတ်လို့လား ကျားသစ်ရဲ့။ မေးဖို့အချိန်မရလိုက်တဲ့ တိုက်ပွဲက သိပ်မကြာပါဘူး။

ပန်ဒိုရာ
၂၃-၂၈.၄.၂ဝ၁၂


(ယုံမလားတော့မသိဘူး။ အဲဒီ ဇာတ်လမ်း အစအဆုံးဟာ ကျွန်မ အိပ်မက်မက်ခဲ့တာပါ။ အဲဒီတုန်းက မမေ့ခင် ချရေးထားတဲ့ ပုံပြင်ခေါ်မလား၊ ဝတ္ထုခေါ်မလား (ဒါမှမဟုတ် စကားပြေကဗျာလို့ပဲခေါ်မလား :)) အဲဒီစာလေးကို ပြန်တွေ့လို့ တင်လိုက်ပါတယ်။)

Expand..

Summary..